Filemɔn 1 - LAWA A BOO SONBORE

¹ Masɛ Pooli mɛn bɛ́ kòso-n Yezu *Krita a Boo Tii Kɔɔ̃n kɛ a pɛ a lɛa, ma laanka ma dɔɔ̃n-giĩ Timote n sɛ́wɔ kɛ diɛ n la, nsɛ Filemɔn mɛn bɛ́ wɔa giaára lɛa, n nə́ wɔ miã dí-nyali lɛa Lawa nɛ.

² Wɔ á fòo diɛ n nɛ. Lawa a sɔmɔ minin mɛnɛn tumaa bɛ́ n lɛ soekɔn n kion, wɔ á fòo diɛ bɛn tumaa nɛ, ka wɔ dɔɔ̃n lɔ Apiya nɛ, ka wɔ dɔɔ̃n-giĩ Arsipu mɛn dɔ bɛ́ wɔ miã dí-nyali lɛa, zia biɛ kun wɔ nɛ Lawa a lɛa.

³ Wɔa Díi Lawa laanka wɔa Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.

Filemɔn a kɔn-narɛɛ ka a goleemali

^4-5 Filemɔn, n foo bɛ́ doa-n Dɛnaa Yezu ganaa lɔn, n bɛ́ kɔn-narɛɛ mɛn dɔ nyɛɛ Lawa a minin tumaa nɛ, má bɛn boo ma, bɛ lɛ nɛ, ma á barka diɛ maa Lawa nɛ. Biikoo woo biikoo, bɛ̀ ma á Lawa nyankoe, ma na a nyankoe n lɛa.

⁶ Man Lawa nyankoe, golee Lawa li mɛn bɛ́ n laanka Lawa-nyankɔlen tumaa lon, bɛ pàã yɛ n foo ne, màn mɛn bɛ́ toɛ, wɔ bɛ́ boe la wɔ bǐɛ̃ mɛn tumaa zɛnaa, wɔ Krita tɔ bɔ nɛ, n bɛ dɔ̃ n zɛnaa.

⁷ Ma dɔɔ̃n-giĩ Filemɔn, n dɔɔ̃nɔn narɛɛ lɛ foo kɔɔ̃nbaa gole laanka foo tãbaa sonbore kɔ ma la. Bɛa kɔn-narɛɛ lɛ na á dɔɔ̃nɔn lɛn tumaa foo kɔɔ̃n kɔ.

Pooli Filemɔn nyankɔ Onezimu a lɛa lɔn

⁸ Wɔa dɔɔ̃nbaa lɛ taman yii Krita a lɛa, n doamaa bɛ́ nɛ n dí mɛn nya, ma á boe la ma bɛ pɛ n nɛ, ma laa n ganaa dɔn dinin.

⁹ Sɛnɛ, ma a re zɛnɛɛ miɛ̃ wa, màn mɛn bɛ́ soɛ, man die n nyankoe ka sii goon ne, wɔ bii gɔ́ɔ̃ ǹ kɔn-narɛɛ kɛ a lɛa. Masɛ Pooli nə n nyankoe, masɛ mɛn bɛ́ giĩ gole lɛa, ka bɛ dɔ nɛ, man kòso-n sisia Yezu Krita a lɛa,

¹⁰ ma nə n nyankoe Onezimu wɔ gɔn la. Onezimu mɛn bɛ́, ma bɛ́ kòso-n kànaa, má Lawa a boo pɛ nɛ, á si á golee Lawa li, á n ka maa nɛ bɛ́ lɔn sisia.

¹¹ Onezimu lɛ kaa, a laanɛ lɛlɛ a là goã n ganaa wa, sisia masɛ máa a là tá wɔ ganaa, wɔ dinin min paa, nsɛ laanka masɛ nɛ.

¹² Man wusii diɛ n la. Onezimu kooro bie ma á diɛ n la wa, sɛnɛ, Onezimu mɛn bɛ́ goon kanna ka ma din gɔ̀nɔn siĩ paǹ kɔ́n nɛ.

¹³ Yezu a boo kɔɔ̃n kɛ lɛ a pɛ a lɛa nɛ, ma tá kòso-n, á kɔɔ̃n ma ganaa, ma Onezimu lɛ toa ma li kànaa, a n dɔ ma lɛ, n dòo.

¹⁴ Sɛnɛ, ma a giɛ li ma sii kɔ́n zɛnaa a wɔ gɔn la, bɛ̀ n nə́ n lɛ kɔ wa. Maa taasiɛ n ka kɛ nɛ, bɛa bǐɛ̃ kɛ lɛ, man giɛ li n zɛnaa ma nɛ, a baran pàã sii baa wa, sɛnɛ, a bɔ n din foo ganaa.

¹⁵ N ba taasɛ, mà Lawa din na á toa Onezimu nə́ n na á n bɔ n ganaa, biikoo boɛɛn gɔ́ɔ̃ nɛ, màn mɛn bɛ́ toɛ, ka wusoo ka kaa kun yǎa duduu wa?

¹⁶ A bie re goɛ̃ bɛ̀rɛ kooro lɛa doo wa, sɛnɛ, á re goɛ̃ màn mɛn lɛa sisia n gɔn, bɛ la bɛ̀rɛ-n pasapasa, n dɔɔ̃n nɛ, ka n kɔn narɛ. A n bɛa dɔɔ̃n kɛ lɛ lɛa masɛ gɔn taãn-taãnɛ. Ma á doɛ̃ máa a n die goɛ̃ bɛ lɛ lɛa n dɔ gɔn, n wɔ din tá re liɛ masɛ wɔ nɛ, a giala n tá re kuĩ minbuiin nɛ lɛa, n tá re kuĩ Lawa-nyankɔle dɔ lɛa.

¹⁷ Filemɔn, bɛ̀ n tá giɛ ma ganaa sonbore, n miã dí-nyali lɛa Yezu Krita nɛ, Onezimu lɛ kũ ka n pɛ mà masɛ Pooli ni.

¹⁸ Bɛ̀ á daa yaa Onezimu lɛ sã á wɔ n lon, hinlaa ta n giɔ̀mɔ kɔ́n na a ganaa, bɛa giɔ̀mɔ lɛ toa masɛ bɔlɔ-a.

¹⁹ Masɛ dinmaa Pooli n bǎã kɛ kiɛ̃, ka ma din gɔn nɛ, ma á nyɛɛ n nɛ, máa ma á re sarɛɛ. Mìi ba la, masɛ nyaa n nɛ, mà maa giɔ̀mɔ tá n ganaa wa, a giala bɛa giɔ̀mɔ lɛ, n dinmaa nɛ.

²⁰ Ma dɔɔ̃n-giĩ Filemɔn, sonbore, ma nə n nyankoe, n Dɛnaa Yezu lɛ taman yii, bǐɛ̃ kɛ zɛnaa ma nɛ. Ma foo kɔɔ̃n kɔ Yezu Krita a lɛa.

²¹ Ma bɛ́ sɛ́wɔ kɛ kiɛ̃, ma á waa-n la taãn-taãnɛ, máa ma bɛ́ n nyankoe ka sii mɛn nɛ, máa n tá re bɛ zɛnɛɛ ma nɛ. Ma á doɛ̃ dinin máa n tá re zɛnɛɛ, a kiɛ̃ maa taasiɛ la.

²² Ma nə n nyankoe dɔn gɔrɔ, n kion yɔrɔ bɔ n koa ma nɛ, a giala ma á taasɛ, máa Lawa á re kaa nyankɔ lɛ sii, a toa ǹ ma bɔ kòso-n, ǹ ma da, màn mɛn bɛ́ toɛ, ma da ka li.

Pooli a fòo giala-nyɔmiɛn

²³ Epafrasi mɛn dɔ bɛ́ kòso-n, kun ma-n kànaa Yezu Krita a lɛa, a dɔ á fòo diɛ ka nɛ.

²⁴ Ma miã dí nya kun wolen dɔn tá fòo diɛ n nɛ: Marki ni, Aristarki ni, Demaasi ni, ka Luku ni.

²⁵ Dɛnaa Yezu Krita din a bǐɛ̃ die a goã kun ka nɛ.