Ozee 13 - LAWA A BOO SONBORE

Efrayimu a gɛ̀

¹ Efrayimu bɛ́ á goã boo diɛ, nyɛ́ɛ na á goã min tumaa ganaa, a giala nyɛɛnaandɛnaa gole ne Izirayeli gána nɛ. Á zɛ̀rɛ da a din-a a *Baali guguru kɔ a lɛa, bɛ lɛ nɛ á gã.

² Kanna kəni, maǹ woe nyɛɛnɛ ka ǹ sii baraa zɛnaa nɛ. Ǹ nə́ ǹ wɔrɔ yo ǹ nə́ màn nyínin zɛnaa nɛ, manə ǹ dinin foo sii dì zɛnɛɛ, ǹ tumaa n gɔn dí-nyalin màn zɛnaan lɛa. Maǹ pii ǹ wɔ paǹ li: Wɔ doamaa nɛ wɔ wúlu mànan kɔ ǹ la! Minin man dii nɛn nyínin guguru koe!

³ Bɛ lɛ nɛ, minin kɛn tá re papaɛ̃ ka baayɛlɛ labara bɛ́ lɔn, ka pele bɛ́ kiɛ lɔn, ka wii duwəə ǹ bǎã a kaã bɛ́ woe piɛ̃ li lɔn, ka tɛmaa bɛ soe sìã-n lɔn.

⁴ A kũ n soo Eziptin ganaa, Izirayeli man Dɛnaa Lawa, n Lawa lɛa, n ba Lawa kɔsɔ doɛ̃ masɛ kio wa. N kirisibaali kɔsɔ banban bɛ̀ á n bɔ masɛ nɛ.

⁵ Man má n dɔ̃ diə ne, lɛ̀ gere gána nɛ.

⁶ N dɔ buu sɔ̃ ǹ bǎã-n lɔn gɔrɔ, n bòo nya. N bɛ́ n kã, n nə́ n din gole kɔ. Bɛ lɛ nɛ n yiri bɔ ka ma nɛ.

⁷ Bɛ lɛ nɛ ma á re n biɛ ka yàra bɛ́ lɔn ka tumaa ganaa, ka goe bɛ́ lɔn durii ni zii giala-a.

⁸ Ma á re ka kuĩ ka gòon màn babaraa nɛn dan bɛ́ lɔn ǹ ná a nɛ si la, ma á re ka tìãbii toɛ̃ kɔn. Man die ka soɛ̃ ka yàra nɛn dan bɛ́ lɔn, don mànan tá re ka geren wɔ̃woɛ̃ kɔn.

⁹ Izirayeli, n wɔ ziziɛ̃, ma dinsɔɔ̃ n boe la ma da n gú ganaa.

¹⁰ N kii lɛa maa kəni? Asɛ mɛn doamaa nɛ a n kirisibaa n kiwin ni? N bɔ sii-n wolen lɛn man maa? N pɛ ǹ mɛnɛn lɛn manɛ, mà ǹ kii kɔ nsɛ la ka nyɛɛnaandɛnan nɛ.

¹¹ Má kii kɔ n la ma foo n yoo ne n li, má wusoo má si ka foo busii ni.

¹² Yiri a boe ka Efrayimu a sii baraan lɛn nɛ wa, maǹ koa nɛ bǎã biɛ̃n nɛ.

¹³ A là paparɛ n die, ka lɔ a nɛ yɛ a biikoo wɔ á ke lɔn. Sɛnɛ nɛnyaan too kaka nɛ, a yɛ biikoo li, a nə n piɛ̃ mà a soe a n bɔ ǹ dan gɔ́ɔ̃-n wa.

¹⁴ Masɛ Dɛnaa Lawa, ma doamaa nɛ, ma bɛa minin kɛn waa ma ǹ bɔ geren piɛ, ma á re ǹ kirisibiɛ gɛ̀ ganaa. Gɛ̀, n pàã lɛ a ma-a? Geren piɛ, n gɛ̀ dɛ ǹ pàã lɛ a ma-a? Man die n yii tiɛ̃, ma a re makara doɛ̃ doo wa.

¹⁵ Ta Efrayimu tɔ bɔ ǹ dɔɔ̃nɔn bii, lɛ̀giala piɛ̃ á re die, Dɛnaa Lawa a piɛ̃ lɛa, boe diə gole ne. Mu yala á re piɛ̃, mu á re damɛ. Ǹ tá re kaa naforon goɛ, ka gɔn màn giɔ̀mɔ kakan kɛn, ǹ wo ka bɛn nɛ.