Biblia Todo Logo
Bìoball air-loidhne

- Sanasan -

Ozee 12 - LAWA A BOO SONBORE


Efrayimu a soɛn

1 Efrayimu ma lɛnpɛnɛ ka soɛ nɛ, Izirayeli a zaman ma lɛnpɛnɛ ka siɛ̃ nɛ. Sɛnɛ Zudaa a tɔn tɔ we kun ka Lawa nɛ, á pepere min sonboren bii.

2 Efrayimu nə n din toe ka piɛ̃ nɛ, a n baa sii lɛ̀giala piɛ̃ kɛ kio a wasa mɛ nɛ, a n màn diɛ a soɛ bɔ li, ka a kakaarɛbaa nɛ. Á lɛ kɔ kɔn la wɔ ka Asiirii ni, a n nyɔɔ koe Ezipti la.


Zakɔba, digolo mɛn goã minin siɛ̃

3 Dɛnaa Lawa n kiri we ka Zudaa minin ni, á re yui Zakɔba a zaman gialaa, ǹ giã ǹ gɔǹ baraa lɛ taman yii. Ǹ sii baraa mɛn lɛ zɛnaa á re bɛ lɛ a dɔlɔ diɛ a mìi ni.

4 Á n toa ǹ dan gɔ́ɔ̃ nɛ á ǹ dɔɔ̃n lɛ a bǎã si. A bɛ́ á gole kɔ, á yɔ bɔ kɔn Lawa nɛ.

5 Á yɔ bɔ kɔn ka lon a dia dí-a wole goon ne á gɔ̀lɔ̀baa yɛ. Á wuu pɛ, á gòã-kũ wɔ. Á tɔn nə n da Lawa lɛ Betɛli, Lawa tɔn boo da ka wɔ nɛ.

6 «Dɛnaa Lawa, Dɛnaa Lawa Pàãyiidɛnaa,» a tɔ n Dɛnaa Lawa.

7 Nsɛ, n tá re wusii n da n Lawa li, toa makara doɛ̃ laanka peperebaa goã n li, n foo doa n Lawa ganaa biikoo tumaa li.

8 Ka Kanaan a pii-kɔlen bɛ́ lɔn, n màn zɔɔ̃ ǹ kilo lɛ a piɛ̃-n ma, mɛnaa n miã la n kɔɔ̃nɛ n ganaa.

9 Efrayimu pɛ: Sonbore, má pàãma baa. Má gɔn màn gigiã yɛ. Ma dí mɛn tumaa nya, sii baraa zɛnaa ǹ paǹ kɔn yɛ ma-a wa.

10 Sɛnɛ, masɛ nə n Dɛnaa Lawa lɛa, a kũ Ezipti gána ganaa. Man die toɛ n wusoo doo n giã mɔnaa kionən ne, ká maa da ka lɛ pinaa kɛ bɛ́ lɔn.

11 Má boo da maa boo gii-dalin manɛ, má sii-yɛn mɔnaa, maa boo gii-dalin barka nɛ má boo da ka nɛ ka giməə ne.

12 Bɛ̀ Galaati minin nə́ sii bɔbɔnɛɛ zɛnalin baa, maǹ màn kooron lɛa ma gɔn. Maǹ tɔn wúlun boboe Gilgaali ka dii gɔ̀lɔ̀n nɛ. Ǹ wúlu bɔ ǹ bǎãn kɛn tá re n biɛ ka kɔlɔn bɛ́ lɔn kantian bii ni wuru-n.

13 Zakɔba baa si á woo Aaramu gána nɛ. Izirayeli nə n din kɔ bɛ̀rɛbaa la, lɔ a lɛa. Lɔ a lɛa, á tɔɔn-lɛduə̃li baa.

14 Lawa a boo gii-daali goon barka nɛ, Dɛnaa Lawa Izirayeli bɔ Ezipti gána nɛ á soo ne. Lawa a boo gii-dali goon barka nɛ, a ná a lɛduə̃.

15 Efrayimu foo-ziziɛ̃ gole da Lawa ganaa. A mà mɛn yii kaa Dɛnaa Lawa n die bɛ diɛ a din la. A gasɛ mɛn yii wɔ, á re bɛ sarɛɛ la.

San Catholic Edition Bible © Bible Society of Burkina Faso, 2013.

Bible Society of Burkina Faso
Lean sinn:



Sanasan