Ozee 10 - LAWA A BOO SONBORE

Izirayeli gána a gɔn nyɔmiɛ̃

¹ Izirayeli minin lɛn man nə́ goã ka *rezɛ̃ da bɛ́ lɔn, á n gùrùn nyɔmaa, á goã nɛ gigiã koe. A bɛ́ á goã nɛ gigiã koe lɔn, ǹ dɔn man nə́ goã wúlu bɔ ǹ bǎã gigiã doe miɛ̃. Ǹ gána goã siĩn lɔn, ǹ dɔn man nə́ goã ǹ tíĩn nyaǹ koe miɛ̃.

² Sonbore a boe minin kɛn gɔ́ɔ̃-n wa. Sisia kəni, a dɔlɔ á re n boe ǹ ganaa. Dɛnaa Lawa dinmaa n die ǹ wúlu bɔ ǹ bǎãn kɛn wurii. A din nə die ǹ tíĩn kɛn yuyui.

³ Sisia kəni, ǹ na a gialaa pii mà ǹsɛn bɛ́ ǹ nyɛ́ɛ baa Dɛnaa Lawa yii-n wa, mà bɛ lɛ na á toa kii ba ǹsɛn lon wa. Sɛnɛ, ta kii dɔ din ni ǹsɛn lon pelo, mà a n boe la a wàa mɛn bǐɛ̃ kɔ ǹsɛn man doo?

⁴ Boo n woe ǹ la. Maǹ lɛ kɔn we kɔn la, maǹ liɛ we soɛ la. Ǹsɛn gɔn, pepere-pɛ na á buu sèwòdɛnaa baa, ka nyankɔrɔ bɛ́ lɔn kantian bii ni wuru-n.

⁵ Nyɛ́ɛ n Samarii minin kɛn ganaa ka ǹ diin nɛ nyín kɛa sii ni, Bɛti-Avɛn kiwi. Zaman lɛ n wuu pii dì lɛ taman yii. Min mɛnɛn bɛ́ n dinin biɛ a wúlu-bɔlen lɛa, bɛ́n man bìn diɛ a nyɛɛnɛ. A giala a siĩnbaa lɛ woo sɔsɔɔ ǹ ganaa.

⁶ Diin nɛ nyín lɛ dɔ, ǹ tá re woe a dɔ nɛ Asiirii bǐɛ̃baa ǹ màn lɛa ǹ kɔ kii gole kɛ la. Á re sìi biɛ Efrayimu ganaa, sìi á re Izirayeli kuĩ a doroo ǹ boon kɛn lɛa.

⁷ Samarii wɔ nya kɔnlɛ ka ǹ kii ni a n die goɛ̃ ka gɔn mìi bɛ́ lɔn mu tii n woe ni.

⁸ Ǹ wúlu bɔ ǹ bǎãn kɛn Avɛn bɛ́n tá re ziziɛ̃, Izirayeli sii baraa zɛnaa bǎã mɛn lɛ nɛ. Buu laanka nyan tá re boe ǹ wúlu bɔ ǹ bǎãn nɛ. Ǹ tá re pii bɛa biikoo li kəni: «Kelen lɛn, ka n kɔ wɔ lɛ! Tentenen lɛn ka bɔ ka mɛ wɔ la!»

Izirayeli màn mɛn da, á re bɛ kuri

⁹ A saa Gibeya a lɛawaan kɛn ganaa, ń sii baraa zɛnaa Izirayeli, n nə n giã ǹ gɔn bɔyaa wa. Zia ke á yoo gɛ̀-dɛlen wɔ lɛa, bɛ lɛn die n yiɛ Gibeya.

¹⁰ Man die dɔlɔ boe n ganaa ma foo yii li. Tɔrɔ kɔsɔn tá re n soekɔn ǹ da ka gialaa, a giala n tɔ nə n sii baraa màn paa kɛ lɛ lɛ da wa.

¹¹ Efrayimu na á goã dii luu lɛa daraa na a gɔ̀nɔn bɔ, tɔ *belee nàn la n kɔɔ̃nɛ a ganaa, ma bɛ́ má daa kiɛ̃ a yɔrɔ-a, má a wìi a siĩnbaa kɛ yɛ, má kána da a ganaa. Man die zǔu diɛ Efrayimu ganaa Zudaa n buu kɔsɛ, Zakɔba sɛ n tii kɔlɔ nyuə ǹ fɔlɔ baɛ̃.

¹² Bɛ̀ n tá min pepere lɛa, n tá re bǐɛ̃ yii a dòo lɛa. Ka sɔ́ dɛ, a giala kaa bɔyaa a yɔrɔ dia Dɛnaa Lawa la biikoo dɔ, bɛa re peperebaa kiɛ ka la ka la bɛ́ lɔn.

¹³ Sɛnɛ, ka n ka baraabaa kɔsɔ, kaa kaa-piɛ na á goã ka mɛnaa kɔn la nɛ. Ń soɛ da nɛ bii. Man nə́ n foo doa n pàã ganaa n zia nɛn mɔnaabaa a lɛa.

¹⁴ Bɛ lɛ nɛ, bɔlɔ lɔlɔkɔn gole á re yui n zaman lɛ bii, ǹ tá re kaa duru ǹ bǎã kakan kɛn tumaa ziziɛ̃ ka Bɛti-Arbeli á ke Salaman ziziɛ̃ zia pinaa lɔn, bɛ̀ ǹ bɛ́ ǹ nə́ náa yɔyɔrɛ kɔnlɛ ka a nɛnyaanan nɛ.

¹⁵ Kaa baraabaa a la yii-n lɛ na á toa Betɛli kɛ zɛnaa ka nɛ. Ǹ tá re kaa kii lɛ nyin boe lɛ̀ tiə ne.