Nya ǹ dín 9 - LAWA A BOO SONBORE

Lawa a Sooli bɔ ǹ gɔn

¹ Bɛa biikoo kɛ lɛ din tumaa li, Sooli sɛ na á goã taasiɛ goon we: A fuu nyaa Dɛnaa a kialandɛnan lɛn manɛ, a ǹ dɛ ǹ gã. Á woo wúlu-bɔlen kiã li,

² mà bɛ sɛ́wɔn kɔ asɛ la. Sɛ́wɔn mɛnɛn bɛ́ zii koe asɛ la, asɛ wɔ Damaasi kiwi a Zuifun lɛsɔkɔn kionən ne, màn mɛn bɛ́ toɛ, bɛ̀ asɛ woo minin yaa, giĩn ni ka lɔn nɛ, ǹ nə́ koe kɛa zii kɛ lɛ, asɛ nə ǹ kũ a ǹ yii, a da ǹ nɛ Zeruzalɛmu.

³ Sooli bɛ́ zii la woe, á diri Damaasi la. Bǎã goon ne gɔrɔ, wɔlɔ fúlu bɔ lon á daa kaa la, Sooli bɔ á n tɔ tán.

⁴ Á boo-diɛ lɛ ma pii ni: «Sooli, wàa na á baa n tá fuu nyɛɛ masɛ nɛ.»

⁵ Sooli tɔ́n nɔ̀n da: «Dɛnaa, die n ka nsɛ nɛ?» Boo-diɛ lɛn lɛ pɛ nɛ: «Yezu n ka masɛ nɛ, n bɛ́ fuu nyɛɛ Yezu mɛn nɛ ke lɛn.

⁶ Sɛnɛ, yoo, n wɔ kiwi, n doamaa bɛ́ nɛ n sii mɛn zɛnaa, ǹ tá re bɛ pii n ni walan.»

⁷ Minin mɛnɛn nə goã zii tɔ lɛ we kun ka Sooli ni, bɛn nə́ golee, ǹ boo kɔ́n bɔ ǹ lɛ-n ǹ nə́ da wa. Ǹ dɔn too boo lɛ ma, sɛnɛ, ǹ min kɔ́n yɛ ka n yii-n wa.

⁸ Sooli yoo á n bɔ tán, a laan a yii nànan nə́ goã kanaa, ǹ goã màn kɔ́n yii wa. Ǹ miãn lɛn nə́ kũ a gɔn-a ǹ nə́ wɔ nɛ Damaasi kiwi.

⁹ Á goã walan lɛawaa sɔɔ bɛ̀ a yii ná a wɔlɔ yii wa, a ná a màn bii wa, a mu mii wa.

¹⁰ Giĩ goon dɔ na á goã Damaasi kiwi lɛ nɛ, Yezu a kialandɛnaa nɛ, a tɔ n Ananiasi. Dɛnaa na á sii nyaa bɛa giĩ lɛ nɛ, á bíi ka a tɔ nɛ: «Ananiasi.» Á Dɛnaa lɛ si: «Ma á ke.»

¹¹ Dɛnaa tɔ́n pɛ nɛ: «Soo, zii mɛn bɛ́ ǹ nə́ bíi Zii Pepere, wo bɛ la, n wɔ Zudaasi a kion, n nɔ̀n da ka Tarsin giĩ kɛ nɛ ǹ nə́ bíi Sooli. Bɛa giĩ lɛ tá a gialaa Lawa nyankoe.

¹² Lawa giĩ goon nyaa nɛ, a tɔ n Ananiasi, bɛ n we kion, die n gɔn diɛ la, màn mɛn bɛ́ toɛ, a yii wusoo a wɔlɔ yɛ.»

¹³ Ananiasi pɛ: «Dɛnaa, masɛ min gigiã lɛ ma boo diɛ giĩ kɛ lɛ wɔ gɔn la, ka a bɛ́ á sii baraan mɛnɛn zɛnaa Dɛnaa din a minin kɛn manɛ Zeruzalɛmu.

¹⁴ Kànaa dɔ-n, pàã tumaa tá a lon, wúlu-bɔlen goledɛnan bɛ́ ǹ nə́ ǹ mɛn kɔ la, minin mɛnɛn bɛ́ koe Dɛnaa din lɛ, a bɛn kũ.»

¹⁵ Sɛnɛ, Dɛnaa pɛ nɛ: «Woo, a giala giĩ kɛ lɛ, min ni, ma din bɔ, màn mɛn bɛ́ toɛ, a masɛ tɔ kɛ laakalaa tɔrɔ kɔsɔn manɛ, ka kiin ni, ka Izirayeli minin ni.

¹⁶ A bɛ́ re fuu mɛn yii masɛ tɔ kɛ a lɛa, masɛ dinmaa á re bɛn nyɛɛ nɛ.»

¹⁷ Ananiasi tɔ́n woo, á wɔ kion lɛ nɛ, á n gɔn da Sooli la, á pɛ nɛ: «Ma dɔɔ̃n Sooli, Dɛnaa na á masɛ dia, Yezu mɛn bɛ́ á n din nyaa n nɛ zii la, bɛ lɛ na á masɛ dia màn mɛn bɛ́ toɛ, ma Lawa nyankɔ nɛ, n yiin nə wusoo ǹ wɔlɔ yɛ, Yiri Fu dɔ gisĩ n la.»

¹⁸ Màn fɔ́rɔ tɔrɔn kɔnɔn nə́ bɔ Sooli yiin ni bɛa bǎã lɛ-n gɔrɔ, ǹ nə́ mɛnaa, a yiin nə́ wɔlɔ yɛ. Á yoo, ǹ nə́ *batɛmu da a ganaa.

¹⁹ A bɛ́ á màn bii á nya, a gù wen nə́ wusoo ǹ nə́ doa. Bɛ kio, Sooli lɛawaan kɔnɔn zɛnaa kun ka Damaasi kiwi a kialandɛnan nɛ.

Sooli Lawa a boo mɛn pɛ Damaasi kiwi

²⁰ A ná a giala kɔ gɔrɔ á woe lɛsɔkɔn kionən ne, á pii mà Yezu n Lawa a Nɛgiĩ lɛa.

²¹ Min mɛnɛn tumaa goã a lɛ miɛ bɛa boo kɛ lɛ diɛ, bɛn nə́ goã n kaãbiɛ, bɛ̀ ǹ nə́ pii: «A din kɛ lɛ bie á goã, a n golee Yezu tɔ li wolen kɛn lɛn nɔmiɛ parsiini Zeruzalɛmu kiwi wa? Táa a na á daa kànaa a din mìi goon kɛ lɛ ganaa, a bɛa golee Lawa li wolen kɛn lɛn kũ, a biɛn kaa ǹ-a, a wo ǹ kɔ wúlu-bɔlen goledɛnan la.»

²² Sɛnɛ, Sooli na á goã boo diɛ ka pàã nɛ, mà Yezu lɛ n Minin Nyin-sili lɛa Lawa dia, á bɛa boo lɛ da, yǎa Zuifun mɛnɛn bɛ́ ǹ nə́ goã Damaasi kiwi, á bɛn lɛ tã ǹ yii ná a ba boo-a wa.

²³ Lɛawaan kɔnɔn bɛ́ ǹ nə́ kiɛ̃, Zuifun lɛn nə́ da kɔn nɛ, mà maǹ die Sooli dii a gã.

²⁴ Bɛ lɛ nɛ, ǹ nə́ goã kiwi lɛ a kiɛnlɛn lɛduĩ tèlò-n ka penleen ne, màn mɛn bɛ́ toɛ, ǹ dɔ a ganaa ǹ dɛ a gã. Sɛnɛ, Sooli bɔ ǹ sii lɛ siére-a.

²⁵ Tèlò goon ne kialandɛnan nə́ Sooli da dɔ́ɔ nɛ, ǹ nə́ gisĩ ka kiwi lɛ a kungɔn nɛ.

Sooli a tá Zeruzalɛmu

²⁶ Sooli bɛ́ á dɔ Zeruzalɛmu, á ga li mà a wɔ kun ka kialandɛnan nɛ. Sɛnɛ, ǹ tumaa na á goã n nyanɛɛ nɛ, a giala, ǹ goã golee li mà á kialandɛnaa baa sonbore wa.

²⁷ Barnabaasi tɔ́n kũ á da kun ka a din ni, á woo ne dia dí-a wolen lɛn li. Sooli bɛ́ zii tɔ we, Dɛnaa bɛ́ á n din nyaa nɛ, á boo da-n lɔn, Sooli bɛ́ á dɔ Damaasi kiwi doo, a Yezu tɔ kɛ laakalaa ka foo-tãbaa-n lɔn, Barnabaasi bɛ yɔrɔ pɛ dia dí-a wolen lɛn manɛ.

²⁸ A kũ bɛ ganaa, ǹ nə́ lɛ kɔ Sooli ganaa. Zeruzalɛmu kiwi lɛ nɛ, á goã Yezu boo diɛ ka foo-tãbaa nɛ, mà a din nə Dɛnaa lɛ lɛa.

²⁹ Zuifun mɛnɛn nə goã Grɛki bɔlɔ pii, liere wɔ Sooli laanka bɛn bii ni. Sɛnɛ, maǹ nə́ goã giɛ li mà ǹ dɛ a gã.

³⁰ Ǹ dɔɔ̃n Lawa-nyankɔlen bɛ́ ǹ nə́ bɛ ma, ǹ nə́ kũ ǹ nə́ woo ne Sezaaree kiwi, ǹ nə́ tɔ́n nə n toa walan, ǹ nə́ dia Tarsi kiwi.

³¹ Bɛa biikoo kɛ li, Lawa a sɔmɔ minin mɛnɛn bɛ́ bǎã tumaa nɛ, Zudee gána nɛ, Galilee gána nɛ ka Samarii gána nɛ, bɛn nə́ goã yii-nyɛɛ la. Ǹ nə́ goã kɔn foo taɛ̃, ǹ nə́ n doe kɔn lɛ, ǹ nə́ goã tɔ we ka nyɛ́ɛbaa Dɛnaa yii-n ni. Lawa a Yiri Fu barka nɛ, màn na á goã miɛ ǹ li á woe nyɛɛnɛ.

Piɛrɛ n Enee a busu nyɛɛ

³² Piɛrɛ mɛn bɛ́ á goã n bibiĩ á boe Lawa a sɔmɔ minin li bǎã tumaa nɛ, ǹ kɔ́n pinaa bɛ́ daa dɔ Liidaa kiwi.

³³ Á din bǎã-n gɔrɔ, giĩ goon yaa kiwi lɛ nɛ, a tɔ n Enee. A n naa-n katara la, a lɛ̀ kiwisi n ke, a n bɔlɔkabaa nɛ.

³⁴ Piɛrɛ pɛ nɛ: «Enee ganaa, Yezu *Krita nə n busu nyɛɛ. N din yoo n nə n katara saa.» A din bǎã-n gɔrɔ, giĩ lɛ yoo á golee.

³⁵ Ǹ bɛ́ ǹ nə́ bɛ yɛ, Liidaa kiwi minin ni, ka Saarɔn bǎã tumaa kɛ a min gigiã golee Dɛnaa li.

Tabita yii kaa boo

³⁶ Lɔ goon na á goã Zoopee kiwi, a na á goã Lawa-nyankɔle lɛa, a tɔ n Tabita, ka Grɛki bɔlɔ nɛ mà Dɔrkaasi, bɛ giala mà "Wore". Á goã zɛnaa ǹ sii sonboren zɛnɛɛ parsiini, á goã doobaan dɔn goe ka màn nɛ.

³⁷ Sɛnɛ, bɛa biikoo kɛ lɛ nɛ, lɔ lɛ busu kɔ yǎa á gã. Ǹ bɛ́ ǹ ná a gere zoo ǹ nə́ nya, ǹ nə́ woo naa tán sanabolo kion.

³⁸ Liidaa kiwi wɔlɔ bɛ́ a ba sɔsɔɔ Zoopee kiwi ganaa wa, Lawa-nyankɔlen lɛn bɛ́ ǹ nə́ ma mà Piɛrɛ tá Liidaa, ǹ nə́ min paa dia mà ǹ wo pɛ Piɛrɛ nɛ mà ǹsɛn man a nyankoe mà a da sisia.

³⁹ Piɛrɛ bɛ́ á bɛ ma lɔn gɔrɔ, á yoo á woo kun ka min paa lɛ nɛ. A bɛ́ á dɔ Zoopee kiwi, ǹ nə́ woo ne sanabolo kion kɛ nɛ. Lɔ giɔɔrɔ lɛ tumaa na á goã golee ne a yɔrɔ-a wuu pii, bɛ̀ ǹ nə́ dɔnkɛ bɔnboɛɛnɛn laanka a dadaran nyɛɛ nɛ, Dɔrkaasi goã mànan mɛnɛn zɛnɛɛ bɛ̀ a yii bɛ́ tɔn koo.

⁴⁰ Piɛrɛ pɛ mà min tumaa soo. A din nə́ mɛ a musin la, á Lawa nyankɔ. Bɛ kio á n yɔrɔ dia gere lɛ la, á pɛ: «Tabita, yoo lon.» Lɔ lɛ nə́ n yii bũ, á bɛ́ á Piɛrɛ yɛ lɔn gɔrɔ, á yoo á giã a giala la.

⁴¹ Piɛrɛ kũ a gɔn ganaa, á n dɔ lɛ á yoo lon. Á tɔ́n lɔ giɔɔrɔn lɛn bíi, ka Lawa-nyankɔle gialakunun kɛn nɛ, á Tabita lɛ nyaa ǹ nɛ a yii n koo.

⁴² Zoopee kiwi din tumaa bɛa boo kɛ lɛ ma, min gigiã golee Dɛnaa li.

⁴³ Piɛrɛ giã Zoopee á belebɔ boɛɛn nɛ. A na á goã ki dí-nyali goon a kion, a tɔ n Simɔn.