Nya ǹ dín 4 - LAWA A BOO SONBORE

Maǹ kiri kuri Piɛrɛ laanka ZAÃ la

¹ Piɛrɛ laanka ZAÃ bɛ́ bɛa boo lɛ diɛ zaman lɛ nɛ, wúlu-bɔlen goledɛnan nɛ, ka Lawa a kion-lɛduə̃lin goledɛnaa nɛ, ka *Sadusɛɛ̃n nə́ daa ǹ li.

² Ǹ foo yoo parsiini, mà wàa na á baa Piɛrɛ laanka ZAÃ tá zaman lɛ darɛɛ, ǹ nə́ pii mà Yezu yii kaa á n bɔ geren bii, ka n pɛ mà geren yii á kiɛ.

³ Wasa bɛ́ á mɛ á nya, ǹ nə́ Piɛrɛ laanka ZAÃ kũ ǹ nə́ ǹ kaa kòso-n yǎa lɛ̀ waa.

⁴ Sɛnɛ, minin mɛnɛn nə n too kɔ boo laakalaa lɛ li, bɛn gigiã golee Lawa li. Lawa a zaman lɛ tumaa woo dɔ min duu sooro (5 000) kɛ miã.

⁵ A lɛawaa kəni, goledɛnan nɛ, ka min golen ne, ka landa sii-daraalin mɛnɛn bɛ́ Zeruzalɛmu, bɛn nə́ n lɛ sɔkɔn.

⁶ Bɛa lɛsɔkɔn wolen lɛn man ke: Wúlu-bɔlen kiã Anɛ nɛ, Kayifu ni, ZAÃ nɛ, Alɛksandrə ne, ka wúlu-bɔlen goledɛnan kion minin tumaa nɛ.

⁷ Ǹ nə́ minin dia ǹ nə́ woo Piɛrɛ laanka ZAÃ waa kòso-n, ǹ nə́ daa ǹ nɛ ǹ yɔrɔ-a. Ǹ nə́ nɔ̀n da ǹ la mà ǹ ganaa: «Ka ǹ ká giĩ kɛ lɛ kaka kɔ ka pàã mɛn nɛ? Ka n ka zɛnaa ka die tɔ nɛ?»

⁸ Lawa a Yiri Fu pàã kɔ Piɛrɛ la, yǎa a pɛ ǹ nɛ: – Kasɛn Zuifun nyɛɛnaandɛnan laanka ǹ min golen lɛn!

⁹ Táa wɔsɛn nə́ bǐɛ̃ mɛn zɛnaa bɔlɔka kɛ nɛ, ka ǹ nɔ̀n diɛ wɔ la pelo ka bɛ nɛ mà wɔ n wɔ́ saa lɔn giĩ kɛ a busu nya.

¹⁰ Ka dinin tumaa laanka Izirayeli gána minin tumaa dɔ̃ kəni, mà Nazarɛtin Yezu tɔ kɛ pàã nɛ, giĩ kɛ á golee ne ka yɔrɔ-a min kaka lɛa. Yezu *Krita mɛn bɛ́ ka dinin nə́ dere gɔn-a, Lawa na á yii kaa á bɔ geren bii, bɛ lɛ barka nɛ.

¹¹ A nə n pii Yezu lɛ wɔ gɔn la kɛnɛn: «Kion-dɔlen nə n piã ka kɔlɔ mɛn nɛ, a din na á wusoo á kɛ-gùrù dɔ ǹ kɔlɔ baa»; ka dinin man bɛa kion-dɔlen kɛn lɛn lɛa, Yezu n kɔlɔ lɛ lɛa.

¹² Kirisibaa ba yii bǎã kɔn nɛ wa yǎa Yezu din ni. A giala, kanaa gɔ́ɔ̃ nɛ, bɛ̀ á n bɔ a din tɔ nɛ, Lawa tɔ kɔsɔ kɔ minbuiinin la, màn mɛn bɛ́ boe la a wɔ kirisibaa wa.

¹³ Zuifun sii yɔrɔ-bɔlen lɛn bɛ́ ǹ nə́ Piɛrɛ laanka ZAÃ a foo doa kɛ yɛ, ǹ yiri gisĩ a nɛ, mà ǹ ba màn kɔ́n lɛa wa, mà ǹ daraa gole dɔ din wɔ wa, bɛ kaãbaa da ǹ-a parsiini. Maǹ nə́ goã ǹ doɛ̃ Yezu a koa-kun wolen lɛa.

¹⁴ Bɛ̀ ǹ nə́ ga giĩ kɛ-a golee ne ǹ li, a n kaka, boo ba ǹ lɛ-n ǹ tá ǹ lɛ sii-n wa.

¹⁵ Ǹ nə́ tɔ́n pɛ mà ǹ nə ǹ kũ ǹ soo ǹ ne, ǹ nə ǹ bɔ kiri wɔ ǹ bǎã lɛ nɛ. Bɛ kio, ǹ dinin nə́ tɔ́n nɔ̀n da kɔn la:

¹⁶ «Wɔ ǹ die wàa zɛnɛɛ minin kɛn manɛ? Sonbore, a n foaãnɛ Zeruzalɛmu min tumaa yɔrɔ-a, mà man nə́ kaãbaa ǹ sii gole zɛnaa, wɔsɛn nə́ wɔ ba boe la wɔ màn mɛn liere kɔ wa.

¹⁷ Sɛnɛ, màn mɛn bɛ́ toɛ, boo kɛ baran n daa wɔlɔ la a wo nyɛɛn zaman bii wa, wɔsɛn man die ǹ kurii ǹ baran Yezu kɛ boo da min kɔ́n nɛ doo wa.»

¹⁸ Ǹ nə́ minin dia, mà ǹ wusoo ǹ da Piɛrɛ laanka ZAÃ lɛ nɛ ǹsɛn yɔrɔ-a. Ǹ nə́ pɛ ǹ nə́ laa ǹ ganaa taãn-taãnɛ: «Ka baran Yezu tɔ laakalaa min ni doo wa, ka baran min dɔ daraa-a wa.»

¹⁹ Sɛnɛ, Piɛrɛ laanka ZAÃ nə́ ǹ lɛ si: «Ka dinin nə ga sii màn paa kɛ bii, ǹ mɛn a zɛnaa n pepere Lawa yɔrɔ-a: Wɔsɛn nə ka bɔlɔ si, hinlaa wɔ Lawa bɔlɔ si? Ka dinin nə màn pɛ.»

²⁰ Piɛrɛ laanka ZAÃ pɛ: «Sonbore, wɔsɛn yii bɛ́ á màn mɛn yɛ, wɔsɛn too nə ǹ mɛn ma, wɔsɛn ba boe la wɔ n lɛ tã bɛ-a wa.»

²¹ Ǹ nə́ wusoo doo ǹ nə́ n gòon pepere ǹ yii li, ǹ nə́ ǹ kaa. Ǹ dɔlɔ da ǹ mìi ni ǹ gòã kɔ́n yɛ wa. Ǹ nə́ nyɛ́ɛ baa zaman lɛ nɛ, a giala min tumaa na á goã Lawa tɔ boe sii kɛ a zɛnaa taman yii.

²² Sonbore, giĩ kɛ lɛ kaãbaa ǹ sii nə́ n zɛnaa nɛ, a busu nya ke lɛn, á la lɛ̀ pusi ni.

Lawa a zaman nə pàã nyankoe Lawa lon

²³ Ǹ bɛ́ ǹ nə́ n gɔn bɔ Piɛrɛ laanka ZAÃ ganaa, ǹ nə́ woo ǹ miãn li, wúlu-bɔlen goledɛnan laanka min golen lɛn nə màn mɛn pɛ ǹ nɛ, ǹ ná a yii tumaa laakalaa ǹ nɛ.

²⁴ Ǹ miãn lɛn nə́ n too kɔ ǹ lon, bɛ kio, ǹ tumaa nə́ n lɛ kaa kun, ǹ nə́ Lawa nyankɔ: – Mìinaa, n din nə́ n lon zɛnaa, ka tán nɛ, ka yìsi mu laanka a gɔ́ɔ̃gɔ́ɔ̃ ǹ màn tumaa nɛ.

²⁵ N din ni ń boon kɛn da ka n Yiri Fu barka nɛ, n din a dí-nyali Davida wɔsɛn digolo kɛ lɛ-n, á pɛ: «Wàa na á baa tɔrɔn tá n gɔ́ɔ̃ tii kɛnɛn? Wàa na á baa zaman tá sii kooron taasɛ, mà maǹ nə ǹ zɛnɛɛ?

²⁶ Kanaa a kiin nə́ n zɔ̃ ǹ nə́ dɔ kɔn li, nyɛɛnaandɛnan nə́ kaa kun, màn mɛn bɛ́ toɛ, ǹ nə n baa goon ǹ nə n gòãn doa Dɛnaa Lawa ganaa ka a Minin Nyin-sili kɛ nɛ.»

²⁷ Sonbore, maǹ nə́ n lɛ kaa kun taãn-taãnɛ, Zeruzalɛmu kiwi kɛ lɛ nɛ, kii Erɔdi laanka kii gole Pɔnsi Pilati ni, kun ka tɔrɔ kɔsɔn laanka Izirayeli minin ni, ǹ nə́ n gòãn doa Yezu-a, Lawa din a dí-nyali sonbore ke, á bɔ a dí a lɛa.

²⁸ Lawa din saa lɛlɛ, á siin mɛnɛn taasɛ, á ǹ yɔrɔ bɔ á ǹ koa, minin lɛn man nə́ bɛn lɛ pã ǹ siin dininsɔɔ̃nɔn zɛnaa.

²⁹ Dɛnaa Lawa, n din ga minin kɛn sisia a taasiɛ baraan kɛn ganaa. N dɔ wɔsɛn lɛ, wɔsɛn mɛnɛn bɛ́ n din a dí-nyalin lɛa, wɔsɛn nə n din a boo kɛ pɛ ka foo-doa gole ne.

³⁰ N din dí nya, màn mɛn bɛ́ toɛ busulən nə kaka kɔ, kaãbaa ǹ sii dadara kɔsɔn nə n zɛnaa ka n din a dí-nyali Yezu kɛ tɔ barka nɛ, bɛ mɛn bɛ́ n din wɔ lɛa.

³¹ Ǹ bɛ́ ǹ nə́ Lawa nyankɔ ǹ nə́ nya, ǹ lɛ bɛ́ soe-n kɔn bǎã mɛn nɛ, bɛa bǎã lɛ bìn da, Lawa a Yiri Fu gisĩ ǹ tumaa la. Ǹ nə́ Lawa a boo da ka foo-doa nɛ.

Lawa a zaman bɛ́ á goã a gɔn màn gii lɔn

³² Minbuiin gigiã mɛn din tumaa golee Lawa li, bɛn gɔ́ɔ̃n laanka ǹ taasiɛn man nə́ goã goon, ǹ kɔ́n dɔ goã giɛ a din gɔn màn kɔn-a a din wɔ lɛa wa, sɛnɛ, ǹ tumaa na á goã ǹ gɔn màn yii kiɛ kun.

³³ Dia dí-a wolen lɛn man nə́ goã siéren biɛ ka ǹ da ǹ boon ne, ka kaãbaa ǹ siin ni, ǹ nə́ nyɛɛ mà Yezu n Dɛnaa lɛ lɛa, a yii kaa á n bɔ geren bii. Lawa a bǐɛ̃baa gole kɛ na á goã barka we ǹ tumaa nɛ.

³⁴ Min din goã ǹ bii a laadoo màn nə́ nyaabiɛ a ganaa wa. Sonbore, minin mɛnɛn bɛ́ wurun nə́ goã ǹ lon ka kionən ne, bɛn nə́ goã ǹ sisiɛ̃, ǹ nə́ die ǹ giɔ̀mɔn nɛ,

³⁵ ǹ nə́ ǹ koe dia dí-a wolen lɛn la. Ǹ nə́ goã gii, didie ná a wɔ gii yii á kɔnpii ka a laadoo ne.

³⁶ Bɛ lɛ nɛ, giĩ goon dɔ́ zɛnaa miɛ̃. Bɛa giĩ lɛ tɔ na á goã Zozɛfu, Siipri gána min ni, Levii tɔrɔ lɛa, dia dí-a wolen man nə́ goã bíi Barnabaasi, bɛ giala, mà "Minin foo-taãli".

³⁷ Wuru goon na á goã a lon. Á bɛa wuru lɛ sã, a ná a giɔ̀mɔ saa á daa kɔ dia dí-a wolen lɛn la.