Nya ǹ dín 2 - LAWA A BOO SONBORE

Lawa a Yiri Fu a daa boo

¹ Zɔ́n mɛn bɛ́ n zɛnɛɛ kiɛ̃mala ǹ wɔ kɛ a kiɛ̃ lɛawaa posooro pinaa, a tɔ n *Pantikɔti, bɛ dɔ. Kialandɛnan lɛn tumaa lɛ na á goã soe-n kɔn kun.

² Bǎã goon ne, màn wuu bɔ lon ka piɛ̃ gole wuu bɛ́ boe lɔn. Ǹ lɛ bɛ́ soe-n kɔn kion mɛn nɛ lɛn, bɛ́ pã ka màn wuu lɛ nɛ.

³ Ǹ yii mànan kɔnɔn yɛ ka tɛ lɛwɔnɔn bɛ́ lɔn. Bɛa tɛ lɛwɔnɔn lɛn nə́ n gigii kɔn, ǹ nə́ mɛ kialandɛnan lɛn gogoonmaa mìi la.

⁴ Lawa a Yiri Fu daa ǹ tumaa kũ, yǎa ǹ mɛ la ǹ nə́ bɔlɔ kɔsɔn pii, a n kɔnpii ka Yiri Fu lɛ din a boo wɔ ǹ lɛ-n nɛ.

⁵ Á daa yaa, Zeruzalɛmu kiwi lɛ nɛ, Zuifu nyɛ́ɛbaa Lawa yii-n wolen tan, ǹ nə́ bɔ kanaa a gánan tumaa nɛ ǹ nə́ daa.

⁶ Bɛa màn wuu kɛ lɛ bɛ́ á bɔ, zaman lɛ nə́ n lɛ sɔkɔn. Á yiri lɔlɔkɔn da ǹ ganaa parsiini, a giala, didie na á goã ǹ lɛ miɛ boo diɛ ka a din a yɛ ǹ bɔlɔ nɛ.

⁷ Á kaãbaa gole da ǹ ganaa, ǹ nə́ goã pii kɔn nɛ: «Minin kɛn lɛn boo diɛ, ǹ tumaa bie Galilee gána minin lɛa wa ya?

⁸ A n siɛ lɔn wɔsɛn gogoonmaa tá ǹ lɛ miɛ boo diɛ ka wɔ bɔlɔ nɛ?

⁹ Wɔsɛn mɛnɛn bɛ́ boe Parti gána nɛ, ka Mɛdi laanka Elamu gána nɛ, ka Mezopotamii gána nɛ, Zudee gána-n ka Kapadɔɔsi gána nɛ, Pɔn gána-n ka Azii wɔ nɛ,

¹⁰ Frizii ni ka Panfilii gána nɛ, Ezipti ni ka Liibii a Sirɛni gána nɛ, Rɔmu minin ni

¹¹ ka Krɛti laanka Larabu gána minin ni. Wɔsɛn tumaa, a Zuifu taãnan nɛ, ka tɔrɔ kɔsɔn mɛnɛn nə wɔ Zuifubaa nɛ. Á ke, wɔsɛn tumaa dɔ nə ǹ lɛ miɛ, ǹ nə́ Lawa a dí dadaran kɛn boo diɛ ka wɔsɛn gogoonmaa a bɔlɔ nɛ.»

¹² Ǹ tumaa nə́ n kaãbaa parsiini, ǹ goã doɛ̃ ǹ bɛ́ re màn mɛn taasɛ sii kɛ wɔ gɔn la wa. Maǹ nə́ goã pii kɔn nɛ: «Kɛ n wàa sii lɛa ke kəni?»

¹³ Sɛnɛ min tɛnɛn man nə́ goã yaa we kialandɛnan lɛn-a, bɛ̀ ǹ nə́ pii: «Duvɛ̃ nə ǹ yii ganaa.»

Piɛrɛ Lawa a boo mɛn pɛ zaman nɛ

¹⁴ Piɛrɛ tɔ́n yoo, kun ka dia dí-a wole fulugoon gialakun kɛ nɛ, á n lɛ bũ á pɛ zaman lɛ nɛ: – Zudee gána minin lɛn, ka minin mɛnɛn tumaa bɛ́ giã-n Zeruzalɛmu kiwi, ka n too kɔ masɛ lon ka dɔ̃.

¹⁵ Ka bɛ́ màn mɛn taasɛ, bɛ bie wa. Minin kɛn lɛn nə duvɛ̃ mi wa. Táa wɔ n baayɛlɛ a wasa kaa biikoo dinsɔɔ̃ gɔ́ɔ̃ nɛ.

¹⁶ Sɛnɛ, ka yii bɛ́ sii mɛn-a ke, Lawa a boo gii-dali Zowɛli boo mɛn pɛ lɛlɛ, bɛ lɛ pã ǹ sii ni.

¹⁷ A màn mɛn pɛ, bɛ n ka kɛ nɛ Lawa pɛ: «Biikoo a nya waáraa ma á re ma yiri kɛ koe min tumaa la. Kaa nɛgiĩn laanka kaa nɛlɔn tá re maa boo gii diɛ. Ma á re boo diɛ kaa min golen manɛ ka narɛɛn nɛ, ma á re boo diɛ kaa nɛ tenən manɛ ka sii-yɛn nɛ.

¹⁸ Bɛa biikoo lɛ li, haalɛ bɛ̀rɛgiĩn laanka bɛ̀rɛ ɔn nɛ, ma á re ma yiri koe bɛn dɔn la, ǹ tá re maa boo gii-dalin biɛ.

¹⁹ Ma á re kaãbaa ǹ siin zɛnɛɛ lon, ma á re ǹ zɛnɛɛ tán. Minin tá re mà yii, ka tɛ nɛ, ka tɛmaa bara nɛ.

²⁰ Dɛnaa Lawa a lɛawaa lɛ laan bɛ̀ a n doe, bɛa lɛawaa gole kɛ lɛ, a sii ń nyɛ́ɛ diɛ, wasa á re n bɔyɛɛ a tii ka wɔlɔ tì bɛ́ lɔn, mui á re n bɔyɛɛ a taã ka mà bɛ́ lɔn.

²¹ Sɛnɛ, min woo min bɛ́ re Dɛnaa Lawa tɔ bíi, bɛa dɛnaa á re kirisibiɛ.»

²² Piɛrɛ pɛ ǹ nɛ doo: – Izirayeli minin lɛn, masɛ bɛ́ re màn mɛn pii ka nɛ ka n too kɔ bɛ ganaa. Nazarɛtin Yezu lɛ, Lawa na á dia ka bii a din a dí a lɛa. Lawa na á bɛ nyaa ka nɛ, ká dɔ̃ kaãbaa ǹ sii laanka sii-nyaa ǹ sii dadara tɔrɔ tumaa li, Lawa din mànan mɛnɛn zɛnaa a gɔn. Ka dinin tumaa bɛ dɔ̃,

²³ sɛnɛ, ká n tã, ká toa Lawa doɛ̃ baãnaan nə́ dere gɔn ganaa ǹ nə́ dɛ. Sɛnɛ, Lawa din na á saa lɛlɛ á bɛ yɔrɔ bɔ á koa.

²⁴ Lawa gɔsɛ gɛ̀ gɔn á si, á wusoo á yiikoonaabaa kɔ la. A giala, pàã goã gɛ̀ lon a Yezu lɛ kurəə wusoo a da yiikoonaabaa ganaa wa.

²⁵ Sonbore, kii Davida goã á pɛ a wɔ gɔn la: «Ma yii na á goã Dɛnaa ganaa biikoo tumaa li ma yɔrɔ-a. A na á goã ma para li, màn mɛn bɛ́ toɛ, màn kɔ́n baran ma yiri lɔlɔkɔn wa.

²⁶ Bɛ lɛ-n ma foo á kɔɔ̃nɛ, ma á nyɛnyɛɛ ǹ loe loe. Ta man giɛ̃, ma foo n doa nɛ n din Lawa ganaa,

²⁷ máa n ba re ma toɛ geren li wa, ma bɛ́ n din a dí-nyali bɔlɔgoondɛnaa lɛa, n ba re toɛ ma gere bɔɔ̃ wa.

²⁸ Ma nə́ n yiikoonaabaa ǹ zii nyaa ma nɛ. N din a tá kun ma-n tá re ma foo kɔɔ̃n koe taãn-taãnɛ.»

²⁹ Piɛrɛ pɛ: – Ma dɔɔ̃nɔn lɛn, ka toa ma pɛ ka nɛ wɔsɛn digolo Davida wɔ gɔn la, á gã, ǹ ná a gere bĩ, a yala tá tɔn na a tan wɔsɛn bii ka pelo yii ni.

³⁰ Sɛnɛ, Davida na á goã Lawa a boo gii-dali lɛa, á dɔ̃ mà Lawa nə́ n liɛ asɛ nɛ ka sonbore tumaa nɛ, mà á re a tɔrɔ min boe a nɛnyaanan bii, a koa a kii dankan la.

³¹ Lawa bɛ́ re sii mɛn zɛnɛɛ, Davida na á saa lɛlɛ á bɛ yɛ. Á yɛ mà Lawa á re Minin Nyin-sili yii kiɛ. A na á bɛ lɛ boo da mà «Lawa ba re toɛ geren li wa, a re toɛ a gere bɔɔ̃ wa.»

³² Bɛa Yezu kɛ lɛ, Lawa ná a yii kaa á bɔ geren bii, wɔsɛn tumaa n bɛa siéren lɛa.

³³ Lawa saa á da gugurubaa ǹ bǎã nɛ a din gusin. A Díi nə n lɛ kɔ la ka Yiri Fu mɛn nɛ, á bɛ kɔ la á dia wɔ la. Ka yii bɛ́ sii mɛn tumaa ganaa, ka nə ǹ mɛn tumaa dɔ miɛ, a din Yiri Fu lɛ a dí ni.

³⁴ Davida dinmaa bie á dii lon wa, sɛnɛ, a na á pɛ: «Maa Dɛnaa Lawa pɛ maa Dɛnaa nɛ: Giã ma gusin,

³⁵ yǎa ma gɔ̀lɔ̀baa lɛ piɛ̃ koe n la, n zɔ́ɔn nə die kiɛ tán n gòãn giulun.»

³⁶ Izirayeli minin tumaa doamaa nɛ ǹ dɔ̃ taãn-taãnɛ mà ǹ Yezu mɛn dere gɔn-a ke lɛn, mà Lawa na á bɛ lɛ baa minbuiin tumaa a Dɛnaa laanka a Nyin-sili lɛa.

Minin golee Lawa li giala kɔ

³⁷ Ǹ bɛ́ ǹ nə́ bɛa boon kɛn ma, á ǹ foo kũ parsiini, ǹ nə́ nɔ̀n da Piɛrɛ laanka dia dí-a wole gialakunun lɛn la: «Dɔɔ̃nɔn lɛn, wɔsɛn man die wàa zɛnɛɛ kəni?»

³⁸ Piɛrɛ nə́ ǹ lɛ si: «Ka wusoo kaa sii baraan kio. Kaa didie lɛ kɔ, wɔsɛn nə batɛmu kɛ da ka ganaa ka Yezu *Krita tɔ nɛ, màn mɛn bɛ́ toɛ, Lawa kaa sii baraan toa ka nɛ. Bɛa biikoo li, Lawa á die a Yiri Fu gisĩ ka la.

³⁹ A giala, Lawa din bɛ́ á n lɛ kɔ ka màn mɛn nɛ, bɛ ǹ ka dinin wɔ lɛa ka kaa nɛnyaanan nɛ, ka minin mɛnɛn tumaa wɔlɔ bɛ́ tɔn sɔsɔɔ, Lawa n die ǹ bíi.»

⁴⁰ Piɛrɛ boo gigiã kɔsɔn da á Lawa a boo nyaa nɛ, á minin lɛn dɔn nyankɔ, á pɛ ǹ nɛ: «Ka baa si, ka n bɔ busii kɛ li die mɛnɛɛ min kɔkɔrɔn kɛn la.»

⁴¹ Min gigiã golee a boo li, ǹ nə́ batɛmu da ǹ ganaa. Bɛa pinaa kɛ lɛ nɛ, minbuiin duu sɔɔ (3 000) kɛ miã yɛ, ǹ nə́ kaa kun Lawa a zaman lɛ nɛ.

Lawa a zaman bibinaa

⁴² Bɛa minin kɛn lɛn man nə́ goã woe dia dí-a wolen minin daraa ǹ bǎã-n kun, ǹ nə́ goã dɔɔ̃nbaa ǹ kɔn-narɛɛ we, ǹ nə́ goã màn bii ǹ nə́ Lawa nyankoe kun.

⁴³ Dia dí-a wolen lɛn man nə́ goã kaãbaa ǹ sii dadara gigiã zɛnɛɛ. Nyɛ́ɛ min tumaa kũ.

⁴⁴ Min mɛnɛn tumaa golee Lawa li, bɛn man nə́ goã kun, maǹ nə́ goã ǹ màn tumaa kiɛ kun.

⁴⁵ Maǹ nə́ goã ǹ wurun siɛ̃ ka ǹ gɔn mànan nɛ, ǹ ná a giɔ̀mɔ gii kɔn, a n kɔnpii ka didie laadoo ne.

⁴⁶ Ǹ goã nyaabiɛ Lawa a kion wa. Maǹ nə́ goã n lɛ kiɛ kun bɛ̀ ǹ wo baraabaraa. Maǹ nə́ goã màn bii kɔn a piɛn nɛ kun, ka nyɛnyɛɛ nɛ ka foo sonbore ne.

⁴⁷ Maǹ nə́ goã Lawa tɔ boe, min tumaa dɔ goã boo sonbore diɛ ǹ wɔ gɔn la. Lawa bɛ́ min mɛnɛn kirisibiɛ, a na á goã bɛn kiɛ a din a zaman lɛ li baraabaraa.