Nya ǹ dín 10 - LAWA A BOO SONBORE

Kɔrnɛyi yii n lon a dia dí-a wole yii

¹ Giĩ goon na á goã Sezaaree kiwi a tɔ n Kɔrnɛyi. A na á goã goledɛnaa lɛa sɔraasin kuru kɔ́n nɛ ǹ nə́ bíi "Italiin wɔ".

² Á goã Lawa a sii kuĩ ka a foo ne, a laanka a kion minin tumaa goã woe Lawa guguru koe lɛsɔkɔn bǎã nɛ. A din goã Zuifu lɛa wa, sɛnɛ, á goã bǐɛ̃ gigiã zɛnɛɛ Zuifun doobaan manɛ, á goã Lawa nyankoe dɔn biikoo tumaa li.

³ Ǹ kɔ́n pinaa, wasa lɛ kanaa n nɛ, biikoo a sɔɔbaa ǹ wɔ kɛ miã li, a yii màn yɛ buə̃buə̃ ne, lon a dia dí-a wole goon wɔ a kion, á lɛ dia la: «Kɔrnɛyi.»

⁴ Kɔrnɛyi nə́ n yiin doa la ka gongon. Nyɛ́ɛ bɛ́ a ganaa, a ná a lɛ si: «Wàa mɛn nɛ, Dɛnaa?» Lon a dia dí-a wole lɛ pɛ: «Lawa nə́ n yiri kɔ n nyankɔ lɛ li, ka n bǐɛ̃n kɛn nɛ n nə́ ǹ zɛnaa doobaan manɛ.

⁵ Sisia kəni, minin dia Zoopee kiwi, giĩ kɔ́n tá walan a tɔ n Simɔn, ǹ nə́ bíi Piɛrɛ, minin dia ǹ wo lɛ dia bɛ la.

⁶ Bɛa Simɔn kɛ lɛ n tii lɛa ki dí-nyali goon a piɛ, a dɔ tɔ n Simɔn. A kion nə mu lɛ-a.»

⁷ Lon a dia dí-a wole mɛn goã boo diɛ nɛ, bɛ bɛ́ á papaã lɔn gɔrɔ, Kɔrnɛyi lɛ dia a kion minin min paa la, ka sɔraasi nyɛ́ɛbaa Lawa yii-n wole goon ne, min mɛn bɛ́ a dinmaa a dí yɔrɔ-bɔle lɛa haalɛ bibi.

⁸ Á sii lɛ din tumaa yɔrɔn pɛ ǹ nɛ, á ǹ dia Zoopee kiwi.

Piɛrɛ yii a màn yɛ

⁹ Bɛa sii lɛ a lɛawaa, Kɔrnɛyi a dia dí-a wolen lɛn bɛ́ zii tɔ we, ǹ nə́ diri kiwi la. Piɛrɛ na á goã kala-n, a n Lawa nyankoe. Penleen tiɛɛ̃n kɛ miã nɛ.

¹⁰ Bòo Piɛrɛ kũ, màn bii sii goã a ganaa. Ǹ bɛ́ màn-bii zɛnɛɛ die koe la, sii kɔ́n nə́ daa kirəə Piɛrɛ la ka yii-tii bɛ́ lɔn.

¹¹ Á goã giɛ lon lɛ ganaa buĩ ni. Màn kɔ́n nə́ bɔ lon, ka mɔnaa gole bɛ́ lɔn, kuĩ ni a gùrù sii tumaa ganaa, á n die gisĩ.

¹² Tɔɔ màn gòã siidɛnan nɛ, a giɛraa tán wolen ne ka a nyàa kadɛnan nɛ, bɛn man nə́ goã a nɛ.

¹³ Lɛn goon bɔ, á pɛ Piɛrɛ nɛ: «Haya Piɛrɛ! Màn lɛ kɔ́n dɛ n sɔ̃.»

¹⁴ Piɛrɛ ná a lɛ si: «Dɛnaa, haayii. A giala, masɛ a yiikoonaabaa din tumaa nɛ, ma tɔn soɛ̃ màn kɔ́n wɔ ma lɛ-n wa.»

¹⁵ Sɛnɛ, lɛn goon wusoo á boo da-n doo: «Lawa bɛ́ pii mà màn mɛn tá siĩni, n baran pɛ mà soɛ̃ màn nɛ ka bɛ-n wa.»

¹⁶ Bɛa sii lɛ na á n zɛnaa yǎa gunyin sɔɔ. Bɛ kio gɔrɔ, mɔnaa lɛ laanka a gɔ́ɔ̃gɔ́ɔ̃ ǹ mànan nə́ woo lon.

Piɛrɛ n woe tɔrɔ kɔsɔn kion

¹⁷ Piɛrɛ yii bɛ́ á sii mɛn yɛ, a na á goã giɛ bɛ giala li. Sonbore, a din biikoo lɛ dɔ li gɔrɔ, Kɔrnɛyi a dia dí-a wolen lɛn nə́ nɔ̀n da Simɔn a kion li, yǎa ǹ da dɔ kiɛnlɛ-a.

¹⁸ Ǹ nə́ daa ǹ nə́ nɔ̀n da ka lɛn gole ne, màn mɛn bɛ́ toɛ, ǹ dɔ̃ taãn-taãnɛ bɛ̀ Simɔn Piɛrɛ lɛ n tii lɛa kion kɛ lɛ-n sonbore.

¹⁹ Bɛa biikoo kɛ lɛ li, Piɛrɛ yii sii mɛn yɛ, a taasiɛ tumaa na á goã doa-n bɛ ganaa. Sɛnɛ, Yiri Fu pɛ nɛ: «Á ke, min sɔɔ á giɛ n li.

²⁰ Gisĩ fufuu, n zii saa kunun ǹ ni, haalɛ nyɛ́ɛ boɛɛn baran n kũ wa. A giala, masɛ din nə ǹ diɛ n li.»

²¹ Piɛrɛ gisĩ á woo min sɔɔ lɛ li, á pɛ ǹ nɛ: «Ma á ke, ka bɛ́ giɛ min mɛn li, ma din ni. Ka a daa mìi n ka wàa nɛ?»

²² Minin lɛn ná a lɛ si: «Wɔsɛn lɛn man wɔ́ daa Kɔrnɛyi a dí ganaa, Kɔrnɛyi mɛn bɛ́ sɔraasin goledɛnaa lɛa, a n pepere, a n Lawa guguru koe kun ka Zuifun ni, a tɔ sonbore dɔ n boe ne ǹ tumaa bii. Lawa a lon a dia dí-a wole goon na á nyaa Kɔrnɛyi ni, mà a doamaa nɛ a lɛ dia Piɛrɛ la a kion, siin mɛnɛn nə n zɛnaa, á die n too koe bɛn li Piɛrɛ lɛ lon.»

²³ Piɛrɛ bɛ́ á bɛ ma, á minin lɛn kũ á wɔ ǹ nɛ kion, ǹ nə́ ǹ tiibaa kũ sɔnbɔraanɛ. A din a lɛawaa gɔrɔ, a laanka Zoopee kiwi a dɔɔ̃n Lawa-nyankɔlen kɔnɔn nə́ woo kun ka tiin lɛn nɛ.

²⁴ A lɛawaa paabaa ǹ wɔ pinaa Piɛrɛn nə́ dɔ Sezaaree kiwi. Kɔrnɛyi nə́ n dɔɔ̃nɔn laanka a giaára sonboren bíi, ǹ tá n yii diɛ.

²⁵ Piɛrɛ bɛ́ á dɔ ǹ mɛn waáraa, Kɔrnɛyi daa n da lɛ, á kaa tán a giulun, a ná a guguru kɔ.

²⁶ Piɛrɛ pɛ nɛ: «Yoo lon.» Yǎa á kũ á da lon. Á pɛ nɛ: «Sabara baa. Masɛ dɔ n minbuiin nɛ kooro lɛa.»

²⁷ Piɛrɛ sùn baa kun ka Kɔrnɛyi ni, á wɔ sumu-n, á woo zaman gigiã yaa.

²⁸ Piɛrɛ pɛ: «Táa ka tá doɛ̃ mà Zuifu nə n mɔrɔ tɔrɔ kɔsɔ ganaa, hinlaa mà a wɔ a kion dinin, mà a doamaa bie wa. Sɛnɛ, masɛ mɛn nə́ ke, Lawa nyaa masɛ nɛ sisia, mà min kɔ́n doamaa bie a n bíi soɛ̃ min wa.

²⁹ Bɛ lɛ a lɛa nɛ, a kɔnpɛ ka n nɔ̀n-diɛ nɛ, masɛ daa ka li bɛ̀ piã ǹ sii kɔ́n ná a ba masɛ gɔ̀nɔn-a wa. Sisia, man giɛ li ka masɛ a lɛ diamala ǹ mìi pɛ ma nɛ.»

³⁰ Kɔrnɛyi ná a lɛ si: – A lɛawaa sɔɔ n ke, kɛa biikoo kɛ lɛ nɛ, wasa lɛ kanaa a biikoo sɔɔ waáraa, man má goã Lawa nyankoe maa kion. Bǎã goon ne, min goon nə́ n din nyaa ma nɛ, ka mɔnaa tɛ-pɛle sonboren ná a ganaa,

³¹ Á pɛ ma-n kɛnɛn: «Nsɛ Kɔrnɛyi, Lawa nə́ n nyankɔ lɛ yɛ ka n bǐɛ̃ zɛnaan kɛn nɛ doobaan manɛ.

³² Min dia Zoopee kiwi, Simɔn mɛn bɛ́ ǹ nə́ bíi Piɛrɛ, a wo lɛ dia bɛ la a da kànaa. Simɔn Piɛrɛ lɛ n tii lɛa ki dí-nyali Simɔn a piɛ, Simɔn mɛn a kion bɛ́ mu lɛ-a.»

³³ A din bǎã-n gɔrɔ má minin dia giɛ n li. N dɔ́ minbaa zɛnaa, ń lɛ kɔ ń daa wɔsɛn li. Sisia, wɔsɛn tumaa bɛ́ n yɔrɔ-a, Dɛnaa màn mɛn kɔ n la mà n pɛ, wɔsɛn man die n too koe bɛ li.

Piɛrɛ a Yezu boo diɛ bibinaa tɔrɔ kɔsɔn manɛ

³⁴ Piɛrɛ tɔ́n nə́ n lɛ bũ á pɛ: «Má dɔ̃ sonbore, máa Lawa a bɔkɔnlɛ we wa.

³⁵ Gána din tumaa dɔ nɛ, min woo min, a n nyɛ́ɛ biɛ Lawa yii ni, a n sonborebaa zii tɔ we, Lawa n lɛ koe bɛa dɛnaa ganaa.

³⁶ Lawa boo mɛn dia Izirayeli minin la, ǹ tá bɛa Boo Tii Kɔɔ̃n kɛ doɛ̃. Lawa na á bǐɛ̃ wɔ a din laanka minbuiinin bii ni, ka Yezu barka nɛ, Yezu mɛn bɛ́ minbuiin tumaa a Dɛnaa lɛa.

³⁷ Ka á doɛ̃, mà sii lɛ na á n giala kɔ Galilee gána nɛ, bɛ kio Zudee gána tumaa nɛ, ZAÃ a boo laakalaa laanka a *batɛmu da minin ganaa kio.

³⁸ Ka á doɛ̃, mà Yezu mɛn bɛ́ boe Nazarɛti, mà Lawa na á bɔ, á Yiri Fu kɔ la parsiini, ka pàã dɔ nɛ. Á woo bǎã tumaa nɛ, á bǐɛ̃ zɛnaa. *Sɛtaan goã min mɛnɛn tumaa nɔmiɛ, á bɛn yii kaka kɔ, a giala, Lawa na á goã kun ni.

³⁹ A sii mɛn din tumaa zɛnaa Zudee gána nɛ ka Zeruzalɛmu kiwi ni, wɔsɛn man bɛa siéren lɛa. Asɛ Yezu mɛn bɛ́ ǹ nə́ dere gɔn-a, ǹ nə́ dɛ á gã,

⁴⁰ Lawa na á ná asɛ lɛ yii kaa á bɔ geren bii, a gɛ̀ lɛawaa sɔɔbaa ǹ wɔ pinaa. Lawa toa á n din nyaa taãn-taãn yoo a bɔ geren bii wole lɛ lɛa.

⁴¹ A bie á n din nyaa zaman tumaa-n wa, Lawa bɛ́ á siéren mɛnɛn bɔ haalɛ lɛlɛ á ǹ koa, a na á n din nyaa bɛn lɛn manɛ. Bɛa siéren lɛn man ka wɔsɛn dia dí-a wolen kɛn nɛ, wɔsɛn mɛnɛn bɛ́ wɔ́ màn bii kun ni, a yii kaa a bɔ geren li lɛ kio.

⁴² Á pɛ wɔsɛn man dɔn, mà wɔsɛn nə kɛ laakalaa zaman nɛ, mà Lawa lɛ na á ná a din lɛ bɔ yiikoonaan laanka geren kiri-kuruli lɛa.

⁴³ Lawa a boo gii-dalin lɛn tumaa na á goã boo kɛ pii a din lɛ wɔ gɔn la, mà min woo min golee li, mà Lawa n die bɛa dɛnaa a sii baraan toɛ nɛ ka a din lɛ tɔ pàã nɛ.»

Yiri Fu a gisĩ tɔrɔ kɔsɔn la boo

⁴⁴ Piɛrɛ bɛ́ bɛa siin kɛn lɛn yɔrɔ pii, min mɛnɛn tumaa bɛ́ n too koe Lawa a boo lɛ li, Yiri Fu gisĩ bɛn la.

⁴⁵ Zuifu Lawa-nyankɔlen mɛnɛn nə́ Piɛrɛ da zii, ǹ nə́ bɔ Zoopee kiwi, á kaãbaa da bɛn ganaa parsiini, a giala, Lawa Yiri Fu dia á gisĩ tɔrɔ kɔsɔn dɔn la sisia.

⁴⁶ Sonbore, maǹ nə́ goã bɛa minin kɛn lɛn lɛ miɛ boo diɛ ka bɔlɔ kɔsɔn nɛ, ǹ nə́ Lawa a golebaa boo diɛ nɛ. Piɛrɛ wusoo á n lɛ bũ á pɛ:

⁴⁷ «Die n boe la a wɔsɛn kurəə, mà wɔ baran batɛmu da minin kɛn ganaa wa, Lawa a Yiri Fu gisĩ minin mɛnɛn la ka wɔsɛn bɛ́ lɔn?»

⁴⁸ Piɛrɛ zii kɔ, mà ǹ batɛmu da ǹ ganaa ka Yezu *Krita tɔ nɛ. Bɛ kio ǹ nə́ Piɛrɛ nyankɔ, mà a giã kun ka ǹsɛn nɛ lɛawaa paa.