Nehemii 9 - LAWA A BOO SONBORE

Zaman lɛ na ka a sii baraan nɛ

¹ A din mui lɛ a lɛawaa fuəwensiibaa ǹ wɔ pinaa, Izirayeli minin lɛn nə́ gɛ̀ koa ǹ mɔnaan wɔ, ǹ gɔ̀nɔn yii n tii lɛa, ǹ nə́ n sɔkɔn lɛ-sɔɔ taman yii.

² Min mɛnɛn nə goã Izirayeli tɔrɔn lɛa, bɛn nə́ n na ǹ nə́ n bɔ tiin lɛn ganaa, ǹ nə́ giã bii-a ǹ nə́ ǹ sii baraan pɛ, ka ǹ digolon dɔn sãn nɛ.

³ Ǹ bɛ́ golee-n lon ǹ bǎã nɛ, ǹ Lawa, Dɛnaa Lawa a dí-pɛn sɛ́wɔ kɛ na á n pɛ á belebɔ, á dɔ biikoo sɔɔ. Ǹ nə́ ǹ sii baraan dɔn pɛ, ǹ nə́ ǹ Lawa, Dɛnaa Lawa guguru kɔ, bɛ dɔ́ belebɔ á dɔ biikoo sɔɔ.

⁴ Zozoe ne, Banii ni, Kadimiyeli ni, Sebania nɛ, Bunii ni, Serebia nɛ, Banii laanka Kenaani ni, bɛn nə́ dii *Levii tɔrɔn banbaran kɛ la, ǹ nə́ n lɛ dɛ gole ǹ Lawa, Dɛnaa Lawa lɛ ganaa.

⁵ Bɛ kio, Levii tɔrɔn kɛn, Zozoe ne, Kadimiyeli ni, Banii ni, Hasabunia nɛ, Serebia nɛ, Hodiya nɛ, Sebania nɛ, ka Petayaa nɛ, bɛn nə́ pɛ: «Ka yoo lon, ka barka da kaa Lawa, Dɛnaa Lawa lɛ nɛ yǎa duduu!» Zaman lɛ tɔn pɛ: N tɔ guguru kɛ die a n saa lon, tɔ mɛn bɛ́ màn tumaa mìi la, a miã ná a banban.

⁶ N din lɛ n Dɛnaa Lawa lɛa, n dinsɔɔ̃ goon toto! N din nə́ ń lon zɛnaa, lon gɔ́ɔ̃ nɛ, lon gɔ̀nɔn ganaa ǹ mànan tumaa nɛ, tán laanka a lalan mànan nɛ, yìsi mu laanka a gɔ́ɔ̃gɔ́ɔ̃ ǹ mànan nɛ. N din nə nyin koe ǹ tumaa la, lon màn pàãdɛnan kɛn man kiɛ tán n giulun.

⁷ N din Dɛnaa Lawa goon lɛ nə́ ń Abramu yii gɔgɔɔ̃, ń bɔ ń bɔ Uuru kiwi, Kaldee minin gána nɛ, ń Abrahamubaa wɔ a ganaa.

⁸ Ń bɔlɔgoondɛnaabaa ǹ foo yɛ a nɛ n wɔ paǹ li, ń tɔ́n lɛ kɔ kɔn la wɔ nɛ. Gána ke Kaanaan minin wɔ lɛa, Ɛti minin wɔ lɛa, Amɔɔrɔ tɔrɔn wɔ lɛa, Perɛzi minin wɔ lɛa, Zebuzu laanka Girgazi tɔrɔn wɔ lɛa, ń mà n tá re bɛ koe, a laanka a tɔrɔn la. Ń nə́ n boon lɛn lɛ pã, a giala n tá pepere.

⁹ Ń wɔ digolon nɔmaa yɛ Ezipti gána nɛ, ń nə́ ǹ lɛ-dɛ ma Sawɛɛ tà lɛ-a.

¹⁰ Ń sii nyaa ǹ sii dadaran da Eziptin kii mìi ni a di-nyanlin tumaa laanka a gána a zaman tumaa nɛ, a giala ń goã doɛ̃ mà ǹ nə́ fuu nyaa wɔ digolon lɛn manɛ, ń tɔ́n nə n din tɔ bɔ ǹ sii zɛnaa, ka yii bɛ́ tɔn a ganaa lɔn pelo.

¹¹ Ń yìsi mu yu kɔn ǹ nyɛɛnɛ, ǹ nə́ tɔ wɔ tán gere la, ǹ nə́ kiɛ̃ yìsi mu lɛ bii. Min mɛnɛn nə goã ǹ kio lui, ń bɛn gisĩ mu giala-n, ka kɔlɔ a dɔ mu gole li bɛ́ lɔn.

¹² Ń goã ǹ nyɛɛnaan boe ka tɛmaa bara goon ne penleen ne, ń goã ǹ nyɛɛnaan boe ka tɛ bara goon ne tèlò-n, ǹ doamaa bɛ́ nɛ ǹ kɔ zii mɛn lɛ, á n bɛ fúli ǹ ni.

¹³ Ń gisĩ Sinayii kele kɛ la, ń nə́ n toa lon ń boo da ǹ nɛ. Ń sii yɔrɔ bɔ ǹ boo peperen kɔ ǹ la, ka dí-pɛn boo taãnan nɛ, ka landa boon laanka gɔn waa ǹ boo sonboren ne.

¹⁴ Ń toa ǹ nə́ n *susu ǹ pii sonbore kɛ dɔ̃. Gɔn waa ǹ boon ne, landa boon ne, ka dí-pɛn nɛ, ń bɛn kɔ n dí-nyali Muizu la á ǹ kɔ ǹ la.

¹⁵ Bòo bɛ́ ǹ ganaa, ń màn-bii bɔ lon ń kɔ ǹ la, mu boro bɛ́ ǹ ganaa, ń mu bɔ para nɛ ń kɔ ǹ la. N goã ń nə́ n liɛ mà nsɛ tá gána mɛn lɛ koe ǹ la, ń pɛ ǹ nɛ, mà ǹ bɛ si ǹ baa ǹ wɔ lɛa.

¹⁶ Sɛnɛ wɔ digolon lɛn nə́ n dinin gole kɔ, ǹ nə́ n too laa, ǹ nə n too kɔ ǹ gɔn waa ǹ boon lɛn ganaa wa.

¹⁷ Ǹ nə́ n piã ǹ nə n too kɔ wa, n goã ń kaãbaa ǹ sii mɛnɛn zɛnaa ǹ nɛ, ǹ nə n yiri kɔ ka bɛn nɛ wa, ǹ nə́ n too laa. Ǹ gòãn dii lɛ gɔ́ɔ̃ nɛ, á wɔ ǹ mìi ni, mà ǹsɛn manə n lɛ goɛ ǹ wo bɛ̀rɛbaa ǹ bǎã lɛ-n doo. Sɛnɛ n nə ǹ toa walan wa, a giala n nə Lawa lɛa, Lawa mɛn nə́ ke minin sii baraan toɛ ǹ nɛ, bǐɛ̃ zɛnɛɛ, min makara doɛ̃, a foo ná a ba yui fufuu wa, a bǐɛ̃baa á gole taãn-taãnɛ.

¹⁸ Ǹ nə́ goã ǹ nə́ sana yo ǹ nə́ diin nɛ nyín zɛnaa nɛ, ǹ nə́ pɛ: «Wɔa lawa lɛ á ke, kɛ lɛ, á wɔ waa Ezipti gána nɛ á soo wɔ nɛ.» Ǹ nə́ sã dadaran wɔ.

¹⁹ Sɛnɛ, n makara gole lɛ taman yii, n nə ǹ toa walan don lɛ-n wa. Penleen ne, tɛmaa bara lɛ goã n niɛ̃ n boe ǹ ganaa wa, á goã ǹ nyɛɛnaan boe zii lɛ la. Tèlò-n tɛ bara lɛ dɔ goã n niɛ n boe ǹ ganaa wa, ǹ doamaa bɛ́ nɛ ǹ kɔ zii mɛn lɛ, á goã bɛ fúli ǹ ni.

²⁰ Ń nə́ n yiri sonbore kɛ kɔ ǹ la, màn mɛn bɛ́ toɛ ǹ sii bɔkɔnlɛ doɛ̃. N nə ǹ nu ka *maanə n wa, ń mu kɔ ǹ la ǹ mu boro a lɛa.

²¹ Lɛ̀ pusi gɔ́ɔ̃ nɛ, ń ga ǹ walan don, màn kɔn nyaabaa ǹ ganaa wa, ǹ dɔnkɛn nə kun baa wa, ǹ gòãn dɔn nə yuyu wa.

²² Ń gánan laanka tɔrɔn wɔ ǹ gɔn, ń bɛn bǎãn nana kɔn ǹ biin ni. Ɛsibɔn gána ke, kii Sihɔn a gána lɛa, ǹ nə́ bɛ si ǹ nə́ baa ǹ wɔ lɛa, ka Basan gána kɛ nɛ, Ɔgu a gána lɛa.

²³ Ń nə́ ǹ nɛnyaanan mɔnaa ka lon a leeren bɛ́ lɔn. N goã ń pɛ ǹ digolon manɛ, mà ǹ wo gána mɛn lɛ si, ǹ baa ǹ wɔ lɛa, ń wɔ ǹ nɛ walan.

²⁴ Ǹ nɛnyaanan lɛn nə́ wɔ gána lɛ nɛ, ǹ nə́ si ǹ baa ǹ wɔ lɛa. Kaanaa minin kɛn, gána lɛ a minin lɛa, ń bɛn puusə kɔ ǹ nyɛɛnɛ, ń nə́ ǹ wɔ ǹ gɔn, kɔnlɛ ka ǹ kiin ni, ka tɔrɔn mɛnɛn bɛ́ gána lɛ nɛ, màn mɛn bɛ́ toɛ, bɛ̀ sii mɛn dɔ nɛnyaanan lɛn yii li, ǹ bɛ zɛnaa ǹ nɛ.

²⁵ Ǹ nə́ kiwi dadara kungɔndɛnan kũ ǹ nə́ ǹ si, ka tán bǎã sonbore ne. Ǹ nə́ kionən si ǹ nə́ ǹ baa ǹ wɔ lɛa. Bɛa kionən lɛn man piɛ̃ nɛ ka gɔn màn tɔrɔ tumaa nɛ, ǹ nə́ tù foɛ̃n si tán ǹ nə́ ǹ baa ǹ wɔ lɛa, ka *rezɛ̃ dan nɛ, ka *olivie dan nɛ, ka da nɛ-kɔle gigiã nɛ. Ǹ nə́ màn bii, ǹ nə́ kã, ǹ nə́ kasã, ǹ nə́ goã kanaa a nɔnɔ̀ɔbaa lɛ li, n bǐɛ̃ gole lɛ barka nɛ.

²⁶ Sɛnɛ, ǹ nə́ n kurəə ǹ nə́ n gòãn dii n ganaa, ǹ nə́ n dí-pɛ lɛ da ǹ gɔn dɔ̀ɔ̃ nɛ. N boo gii-dalin mɛnɛn dɔn nə goã miɛ ǹ ganaa mà ǹ wusoo ǹ da n ganaa, ǹ nə́ bɛn dɛ, ǹ nə́ sã dadaran wɔ.

²⁷ Ń tɔ́n nə ǹ wɔ ǹ zɔ́ɔn gɔn, bɛn nə́ bɔ ǹ yii ni. Ǹ nɔmaa biikoo li, ǹ nə́ goã n lɛ dii n ganaa, ń goã n toɛ lon ǹ lɛ miɛ. N makara-doɛ̃ gole lɛ gɔ́ɔ̃ nɛ, ń nyɛɛnaan-bɔlen kɔ ǹ la, bɛn nə́ ǹ si ǹ zɔ́ɔn lɛn la ǹ nə́ ǹ kaa.

²⁸ Sɛnɛ piɛ̃ bɛ́ á kaa ǹ ganaa ǹ mɛn waáraa, ǹ ná a giala kɔ doo, ǹ nə́ sii baraa zɛnɛɛ n yɔrɔ-a. Ń tɔ́n nə ǹ toa ǹ zɔ́ɔn lɛn gɔn, bɛn nə́ goã boe ǹ yii ni. Ǹ nə́ wusoo ǹ nə́ goã n lɛ dii n ganaa, ń goã n toɛ lon ǹ lɛ miɛ, n makara-doɛ̃ gole lɛ gɔ́ɔ̃ nɛ, ń goã ǹ sii ǹ kiɛ gunyin gigiã.

²⁹ Ń goã miɛ ǹ ganaa mà ǹ wusoo ǹ nə n dí-pɛ lɛ wɔ ǹ gɔn lɛ, sɛnɛ ǹsɛn nə́ ń dinin gole kɔ, ǹ nə n too kɔ n gɔn waa ǹ boon lɛn ganaa wa. N sii yɔrɔ bɔ ǹ boon mɛnɛn bɛ́, bɛ̀ min mɛn nə́ ǹ si, ǹ nə́ toɛ ǹ dɛnaa n liɛ, ǹ nə́ n piã ka bɛn nɛ. Ǹ nə́ n kɔkɔrɔ suĩ, ǹ nə́ n too laa, ǹ nə n too kɔ wa.

³⁰ Ń nə́ ǹ sii si n ganaa lɛ̀ damata gɔ́ɔ̃ nɛ, ń nə́ n din yiri kɛ kɔ n boo gii-dalin la, bɛn nə́ goã miɛ ǹ ganaa. Sɛnɛ ǹ dɔ̃ mà boo-n wa. Ń tɔ́n nə ǹ wɔ gána kɔsɔn minin gɔn.

³¹ N makara gole lɛ gɔ́ɔ̃ nɛ, n nə n gɔn bɔ ǹ ganaa, ǹ nə́ bɔ̀n baa wa, n nə ǹ toa walan wa, a giala n nə Lawa lɛa, bǐɛ̃ zɛnɛɛ, min makara doɛ̃.

³² Sisia kəni, wɔa Lawa gole, pàã tá n lon, n tá nyɛ́ɛ diɛ, nsɛ mɛn bɛ́ n lɛ kɔ kɔn la lɛpiɛ̃, ń bǐɛ̃ zɛnɛɛ, a kũ Asiirii gána a kiin biikoo ganaa a da pelo yaa, nɔmaa mɛn tumaa wɔ yɛ, kɔnlɛ ka wɔa kiin ni, wɔa nyɛɛnaandɛnan nɛ, wɔa Lawa a wúlu-bɔlen ne, wɔa Lawa a boo gii-dalin ni, wɔ digolon ne, ka zaman lɛ tumaa nɛ, n baran ga bɛ ganaa sii kiɛɛrɛ lɛa wa.

³³ Sii mɛn tumaa wɔ yɛ, bɛ wɔ paǹ li, ń peperebaa ǹ sii zɛnaa, a giala, ń nə́ n din nyaa bɔlɔgoondɛnaa lɛa, sɛnɛ, wɔsɛn man wɔ́ baraabaa ǹ sii zɛnaa.

³⁴ Wɔa kiin ni, wɔa kii kiodɛnan nɛ, wɔa Lawa a wúlu-bɔlen ne, ka wɔ digolon ne, ǹ kɔ n dí-pɛ lɛ wa. N goã n gɔn wɛɛ ǹ nɛ ka boon mɛnɛn nɛ, ǹ goã n yiri koɛ bɛn li wa. N goã miɛ ǹ ganaa ka boon mɛnɛn nɛ, ǹ goã yiri boe bɛn dɔn li wa.

³⁵ N goã bǐɛ̃ didi mɛn zɛnɛɛ ǹ nɛ, ǹ bɛ́ bɛ bii ǹ mɛn waáraa ǹ gána nɛ, gána gole mɛn lɛ bɛ́ ń goã ń kɔ ǹ la màn nə́ bǐɛ̃ koe a nɛ, ǹ dí nya n nɛ wa, ǹ nə n bɔ ǹ dí baraan nya wɔlɔ li wa.

³⁶ Pelo wɔ́ á ke bɛ̀rɛn lɛa! N gána mɛn kɔ wɔ digolon la, màn mɛn bɛ́ toɛ ǹ na a da nɛn laanka a gɔn mànan bii, wɔ́ á ke bɛ̀rɛn lɛa bɛ nɛ.

³⁷ N wɔ kaa kiin mɛnɛn pàã giulun, wɔa siin baraan taman yii, bɛn wɔ n ka gána lɛ a màn damata kɛ nɛ. Maǹ giɛ̃ wɔ dinin laanka wɔa tɔɔn mìi la, ǹ dinin foo yii li. Wɔ n foo ziziɛ̃ gole gɔ́ɔ̃ nɛ.