Nehemii 6 - LAWA A BOO SONBORE

Kungɔn lɛ a dí gɔn nyɔmiɛ̃

¹ Sanbalaa laanka Tobiya nɛ, ka Larabu gána min Gesɛmu kɛ nɛ, ka wɔa zɔ́ɔ gialakunun kɛn nɛ, bɛn bɛ́ miɛ ǹ mɛn waáraa, mà má wusoo má kungɔn lɛ dɔ, fɔfoɛ̃ bǎã ná a ba a-a doo wa, bɛa biikoo lɛ li, bɛ̀ ma tɔn kiɛnlɛ-a ǹ goon kɛn wɔ bɔrɔ wa.

² Sanbalaa lɛ laanka Gesɛmu lɛ tɔ́n min dia die pii ma nɛ mà ma daa wɔ kɔn yɛ Kefirimu kiwi, Onoo a nyankɔrɔ lɛ kɛ nɛ. A na á goã ǹ gɔ́ɔ̃ nɛ, mà ǹ basaã kɔ ma nɛ.

³ Má dia dí-a wolen dia woe pii ǹ ni kɛnɛn: «Ma bɛ́ dí mɛn nyɛɛ, dí lɛ pàã á gole, ma a boe la ma da walan doɛ̃ wa. Bɛ̀ má dí kɛ toa walan, ma daa ǹ li, dí lɛ n die golee.»

⁴ Ǹ ná a din a dia dí-a wole goon lɛ dia ma li gunyin sii, ma dɔ nə́ ǹ lɛ si a din yɔrɔ goon lɛ la.

⁵ A gunyin soorobaa ǹ wɔ, Sanbalaa ná a dí-nyali dia ma li, a din boo goon lɛ ganaa, ka sɛ́wɔ nɛ a gɔn, sɛ́wɔ lɛ lɛ ń koo.

⁶ A na á goã kiɛ̃-n sɛ́wɔ lɛ nɛ: «Tɔrɔn bii, wɔ tá miɛ minin lɛ-n, Gasimu dɔ́ pɛ, mà n din laanka Zuifun lɛn nɛ, ka gɔ́ɔ̃ na a ganaa ka n gòãn dii, bɛ lɛ nɛ n tá wusii kungɔn lɛ doe. Ǹ tá pii mà n din nə die ǹ kii biɛ.

⁷ Ń Lawa a boo gii-dalin dinin koa mà ǹ pɛ Zeruzalɛmu, n wɔ paǹ li, mà kii tá Zudaa. A re beleboe wa, Pɛrsin kii á re bɛa boon kɛn lɛn miɛ. Daa kəni, wɔ kaa tán wɔ da.»

⁸ Má tɔ́n min dia woe kɛ pii ni: «N bɛ́ boo mɛn diɛ ke, màn din ba li wa, n din a soɛ dɔ kɔn lɛ nɛ.»

⁹ Bɛa minin kɛn lɛn tumaa na á goã giɛ li maǹ ǹ nyɛ́ɛ da wɔ ganaa. Maǹ nə́ goã taasɛ mà wɔ tá re n gɔn boe dí lɛ-a, a ná a die n nyɛɛ doo duduu wa. «Sɛnɛ Lawa, pàã kɔ ma la sisia.»

¹⁰ Delazaa a nɛgiĩ Semayia ke Meyetabeli a nɔ̀ɔn lɛa, má tɔ́n woo bɛ li, a giala a na a goã á soo ǹ kiɛnlɛ yɛ wa. Á tɔ́n pɛ: «Wɔ n ta Lawa a kion kɛ gɔ́ɔ̃-n kun, wɔ a kiɛnlɛn tã, a giala ǹ tá re die mà maǹ ma dii. Tèlò ne, ǹ tá re die ma dii.»

¹¹ Má tɔ́n na a lɛ si: «Ma din giĩ kɛ miã yoo ma baa si? Masɛ kɛ miã mɛn nə boe la a wɔ Lawa a kion, a la? Ma a we a-n wa.»

¹² Sonbore, má dɔ̃ máa Lawa bie á kɛ dia wa. Sɛnɛ, Sanbalaa laanka Tobiya nɛ, bɛn maǹ ná a lɛ pii ǹ nə́ dia die ǹ boo gii diɛ ma nɛ.

¹³ Ǹ bɛ́ ǹ ná a lɛ pii miɛ̃, ǹ yiri na á goã a ganaa, mà nyɛ́ɛ á re ma kuĩ, ma kɔ a boo lɛ lɛ, ma sii baraa zɛnaa, ǹ tɔn ma tɔ ziziɛ̃ bɛ kio, ǹ sìi da ma ganaa.

¹⁴ Ee maa Lawa, n die n nə n yiri da Tobiya laanka Sanbalaa li, ka ǹ nya ǹ dín kɛn dɔn nɛ. N die n nə n yiri da Lawa a boo gii-dali Noadia kɛ li, ka Lawa a boo gii-dali gialakunun kɛn dɔn nɛ, ǹ nə́ goã giɛ li mà ǹ nyɛ́ɛ da ma ganaa.

¹⁵ Kungɔn lɛ a doe na á nya lɛawaa posoorowenpaa gɔ́ɔ̃ nɛ, *Eluulu mui a lɛawaa fuəwensoorobaa ǹ wɔ pinaa.

¹⁶ Wɔa zɔ́ɔn tumaa bɛ́ ǹ ná a boo ma, tɔrɔn mɛnɛn tumaa goã wɔ lɛnpɛnɛ, nyɛ́ɛ nə́ ǹ kũ. Ǹ dinin yii li, ǹ lɛ na á kuməə duduu. Ǹ nə́ dɔ̃ mà dí lɛ na á goã á n nya á kɔnpɛ ka wɔa Lawa foo sii ni.

¹⁷ Bɛa biikoo lɛ dɔ nɛ, Zudaa gána a min yii guguru-an nə́ goã sɛ́wɔ didiɛ Tobiya la, bɛ̀ Tobiya dɔ wɔn nə́ woe ǹ dɔn li.

¹⁸ A giala min gigiã goã Zudaa gána lɛ nɛ, lɛ-kɔ nə́ n doa kɔn ka Tobiya lɛ nɛ. Bɛ mìi n ke, Tobiya lɛ na á goã Araa a nɛgiĩ Sekania daãgiĩ lɛa, ka bɛ dɔ nɛ, a nɛgiĩ Zoanan goã á Berekia a nɛgiĩ Mesulaamu a nɛlɔ saa.

¹⁹ Ǹ nə́ goã Tobiya lɛ tɔ bǐɛ̃ pii ma yii-n dinin, bɛ̀ ǹ maa boon gũ ǹ wo ǹ pɛ nɛ. Tobiya dɔ na á goã sɛ́wɔn diɛ ma la, ń giɛ nyɛ́ɛ tá ma kuĩ.