Nehemii 13 - LAWA A BOO SONBORE

Izirayeli a toɛ̃ a bɔ tɔrɔ kɔsɔn ganaa

¹ Bɛa biikoo lɛ li, ǹ nə́ Muizu a sɛ́wɔ kɛ pɛ zaman lɛ yii ni, ǹ nə́ tɔ́n yɛ kiɛ̃ nɛ a nɛ, mà Amɔn tɔrɔ laanka Moabu tɔrɔ ba re n doe kun ka Lawa a zaman kɛ-n ka duduu wa.

² A giala, Amɔn tɔrɔn lɛn laanka Moabu tɔrɔn lɛn nə goã ǹ nə́ daa n da Izirayeli minin lɛn lɛ, ka màn-bii laanka mu-n wa. Ka bɛ dɔ nɛ, Moabu gána goã á Balaamu lɛ pii á da Izirayeli minin lɛn ganaa, á lɛn baraa bíi ǹ li. Sɛnɛ, wɔa Lawa bɛa lɛn baraa kɛ lɛ bɔyaa, á baa sii bǐɛ̃ lɛa.

³ Izirayeli minin lɛn bɛ́ ǹ nə́ bɛa dí-pɛ boo kɛ lɛ ma, min woo min, ǹ dɛnaa n tɔrɔ kɔsɔ min lɛa, ǹ nə́ bɛa dɛnaa na ǹ nə́ bɔ Izirayeli ganaa.

⁴ Lɛlɛ, Lawa a kion a kionən kɛn sii na á goã Lawa a wúlu-bɔle Eliasibu gɔn. Eliasibu lɛ na á goã Tobiya ǹ dɔɔ̃n tã bonbon lɛa.

⁵ Á goã á kion gɔ́ɔ̃ goon yɔrɔ bɔ Tobiya wɔ lɛa. Bɛa kion gɔ́ɔ̃ kɛ lɛ, man nə́ goã mànan kɛn kiɛ a-n lɛlɛ: Lawa gɔ ǹ mànan nɛ, da yon gìĩ kɔɔ̃n nɛ, Lawa a dí nya ǹ mànan nɛ, *belee a fùbaa ǹ wɔ nɛ, duvɛ̃ dii wɔ laanka nyɔɔ wɔ nɛ, màn mɛn doamaa bɛ́ nɛ a n bɔ *Levii tɔrɔn wɔ lɛa, ka loe-lɔlin laanka kiɛnlɛ-lɛduə̃lin ni, bɛ nɛ, ka ǹ bɛ́ màn mɛn boe ǹ nə́ koe Lawa a wúlu-bɔlen la.

⁶ Bɛa biikoo kɛ lɛ tumaa gɔ́ɔ̃ nɛ, ma goã ma tan Zeruzalɛmu kiwi wa, a giala *Baabilonii gána a kii Artagizɛrɛsɛɛsi a kiibaa lɛ̀ pɔsɔɔwenpaabaa ǹ wɔ, má goã má wusoo má daa kii lɛ li. Sɛnɛ a bɛ́ á belebɔ boɛɛnɛ, má n din nyankɔ kii lɛ la bɔrɔ,

⁷ má n bɔyaa kəni má daa Zeruzalɛmu. Tobiya taman yii, Eliasibu goã á sii baraa mɛn zɛnaa, má daa má bɔ bɛ siére-a. A giala, Eliasibu lɛ na á goã á kion gɔ́ɔ̃ goon yɔrɔ bɔ Tobiya wɔ lɛa Lawa a kion lɛa bǎã nɛ.

⁸ Bɛa sii lɛ ma foo yoo taãn-taãnɛ. Mànan mɛnɛn tumaa bɛ́ Tobiya wɔn lɛa kion lɛ nɛ, má tɔ́n bɛn goa má ǹ zuzũ kanaa.

⁹ Bɛ kio, má pɛ máa ǹ *gɔ̀ bɔ kion gɔ́ɔ̃n lɛn ganaa. Má tɔ́n daa ka Lawa a kion mànan kɛn nɛ kion gɔ́ɔ̃ lɛ nɛ, ka Lawa gɔ ǹ mànan kɛn laanka da yon gìĩ kɔɔ̃n kɛ nɛ.

¹⁰ Ǹ ná a boo dɔ da ma nɛ, mà ǹ Levii tɔrɔn màn gii kɔ wa, mà Levii tɔrɔn laanka loe-lɔlin mɛnɛn nə goã dí lɛ nyɛɛ, mà bɛn nə́ baa si, ǹ didie woo a wuru-n.

¹¹ Má sii yɔrɔ-bɔlen lɛn zɛ̀rɛ baa, má pɛ máa wàa na á baa ǹ nə́ Lawa a kion lɛ toa walan? Bɛ kio, má Levii tɔrɔn lɛn laanka loe-lɔlin lɛn bii má wusoo má ǹ kaa ǹ dí la.

¹² Zudaa minin tumaa tɔ́n daa ka belee a fùbaa ǹ wɔ nɛ, ka duvɛ̃ dii wɔ nɛ, ka nyɔɔ wɔ nɛ, ń giɛ ǹ tá ǹ kiɛ màn koa ǹ bǎãn nɛ.

¹³ Má pɛ máa ǹ bɛa màn koa ǹ bǎãn lɛn gama walan sii wɔ minin kɛn gɔn: Lawa a wúlu-bɔle Selemia nɛ, landa sii-daraali Sadɔki ni, ka Pedayia kɛ nɛ Levii tɔrɔn goon lɛa. Zakuru a nɛgiĩ Hanan ke Matania a nɔ̀ɔn lɛa, máa bɛ goã ǹ genli dɔmalɛ wole lɛa. A giala, man nə́ goã bɔlɔgoondɛnan lɛa. A na á goã ǹ dinin lɛn dí lɛa, ǹ màn gii ǹ dɔɔ̃nɔn manɛ.

¹⁴ Bɛ lɛ taman yii, n yiri koa ka ma nɛ, maa Lawa: ma sii sonboren mɛnɛn zɛnaa n kion kɛ wɔ paǹ li, a gama walan wɔ paǹ li, n yiri baran bɔ ka bɛn nɛ wa.

¹⁵ Bɛa biikoo kɛ lɛ li, ma yii minin yɛ Zudaa gána nɛ, rezɛ̃ mu boe *susu ǹ pii pinaa, gialakunun nə́ die ka belee gɔn sara yiin ni, ǹ nə́ ǹ kiɛ dundunun la, ka duvɛ̃ nɛ, ka rezɛ̃ nɛ, ka gɔ́rɔ nɛ, ka guĩ tɔrɔ tumaa nɛ, ń giɛ ǹ tá die ǹ ne Zeruzalɛmu susu ǹ pii pinaa. Ǹ goã ǹ pii mànan lɛn siɛ̃ ǹ mɛn pinaa, má goã má ǹ zɛ̀rɛ baa.

¹⁶ Tiiri kiwi minin mɛnɛn nə goã giã-n Zeruzalɛmu, bɛn nə́ goã die ka zɔ̀ nɛ, ka pii màn tɔrɔ tumaa nɛ. Maǹ nə́ goã ǹ siɛ̃ Zudaa tɔrɔn la, ǹ nə́ ǹ siɛ̃ Zeruzalɛmu kiwi gɔ́ɔ̃ nɛ, susu ǹ pii pinaa.

¹⁷ Má tɔ́n Zudaa gána a min yii guguru-an zɛ̀rɛ baa má pɛ ǹ nɛ: «Wàa dí baraa n ke ka á nyɛɛ, ka n susu ǹ pii lɛ ziziɛ̃?

¹⁸ Tá a ka digolon lɛn dɔn man nə́ goã ǹ nə́ zɛnaa kɛnɛn, wɔa Lawa lɛ tɔ́n koe kɛ tumaa dia wɔ laanka kiwi kɛ la. Sɛnɛ, kasɛn, bɛ̀ ka tá susu ǹ pii lɛ ziziɛ̃, ka n Lawa a foo-yoo lɛn baraa koe Izirayeli wɔ paǹ li.»

¹⁹ A kũ bɛ lɛ ganaa, má pɛ máa bɛ̀ wɔlɔ á die tii, máa ǹ Zeruzalɛmu a kiɛnlɛn lɛn tã, bɛ̀ susu ǹ pii baa n giala koe. Má pɛ ǹ nɛ dɔn, máa bɛ̀ susu ǹ pii bie a nya wa, ǹ baran ǹ bũ wa. Má maa dí-nyalin lɛn kɔnɔn doa kiɛnlɛn lɛn lɛ-a, màn mɛn bɛ́ toɛ, guĩ kɔn baran toa a wɔ kiwi lɛ nɛ, susu ǹ pii pinaa wa.

²⁰ Pii-kɔlin ni, ka pii màn tɔrɔ tumaa a sãlin ni, ǹ nə́ gunyin goon hinlaa gunyin paa yɛ lɛ̀ wɛɛ kanaa Zeruzalɛmu kiwi kio.

²¹ Má n gɔn waa ǹ nɛ, má pɛ ǹ nɛ, máa wàa na á baa ǹ tá lɛ̀ wɛɛ tán kungɔn lɛ kio? Máa bɛ̀ ǹ nə́ wusoo ǹ nə́ ti kɛ ganaa, ma nə ǹ kuĩ! A saa bɛa biikoo kɛ lɛ ganaa, ǹ da susu ǹ pii pinaa doo wa.

²² Bɛ kio, má pɛ Levii tɔrɔn manɛ, máa ǹ gɔ̀ bɔ ǹ dinin-a ǹ da kiɛnlɛn lɛn lɛduə̃, màn mɛn bɛ́ toɛ ǹ susu ǹ pii lɛ tamaa. Bɛ lɛ dɔ taman yii, maa Lawa, n yiri kɔ ma nɛ, makara bɔ ma ganaa a kɔnpɛ ka n bǐɛ̃ gole kɛ nɛ!

²³ A din biikoo lɛ dɔ gɔ́ɔ̃ nɛ, má Zuifun yɛ ǹ nə́ lɔn goa, bɛa lɔn lɛn nə́ Asidɔdi minin lɛa, Amɔn tɔrɔn laanka Moabu tɔrɔn lɛa.

²⁴ Ǹ nɛgiĩn talɛɛ na á goã Asidɔdi bɔlɔ pii, hinlaa tɔrɔ kɔsɔn bɔlɔ pii. Sɛnɛ, ǹ goã boe la ǹ tá Zuifu bɔlɔ pii wa.

²⁵ Má ǹ zɛ̀rɛ baa, má n lɛ baraa da ǹ kio. Ma gɔn mɛ min didi ganaa ǹ bii, má ǹ mìi ka wɔwoɛ̃. Bɛ kio, má ǹ kaa liɛ ganaa ka Lawa tɔ nɛ, máa ǹ baran toa ǹ nə ǹ nɛlɔn kɔ bɛa minin kɛn lɛn nɛgiĩn la wa, ǹ baran ǹ dɔn nɛlɔn goa ǹ nɛgiĩn laanka ǹ dinin wɔn lɛa wa.

²⁶ Má pɛ ǹ nɛ kɛnɛn: «Táa bɛ lɛ na á toa Izirayeli a kii Salomɔn sii baraa zɛnaa. Gána damata kɛn kiin bii, kii yɛ ka a bɛ́ lɔn wa. Á goã kɔɔ̃n Lawa ganaa. Lawa na á goã á koa kii lɛa, Izirayeli kuturu mìi la. A laanka bɛ yii ni, a din kɛ lɛ nɛ, tɔrɔ kɔsɔ lɔn nə́ nyanaa ǹ nə́ da sii baraa nɛ.

²⁷ Ka dɔn wɔ paǹ li, min doamaa bie a ma, mà ka tá bɛa sã ǹ sii gole kɛ miã zɛnɛɛ, ka n wɔa Lawa bɔlɔ tii, ka n tɔrɔ kɔsɔn lɔn goɛ wa.»

²⁸ Zozadaa tɔrɔ goon ne, wúlu-bɔlen kiã Eliasibu a nɔ̀ɔn lɛa, bɛ na á goã Horɔn min Sanbalaa kɛ daãgiĩ lɛa. Má loo má bɔ ma li ka sɔsɔɔ.

²⁹ «Maa Lawa, n yiri da bɛa minin kɛn lɛn li, a giala, ǹ nə́ n wúlu bɔ ǹ dí lɛ gɔgɔrɛ kɔ, ka lɛ kɔ kɔn la kɛ nɛ, n wɔ ka wúlu-bɔlen laanka Levii tɔrɔn nɛ.»

³⁰ Má gɔ̀ bɔ zaman lɛ ganaa, má ǹ na má ǹ bɔ tiin tumaa ganaa. Má wusoo má Lawa a wúlu-bɔlen dí laanka Levii tɔrɔn dí da a giala la, didie ná a dí ni.

³¹ Ǹ bɛ́ gɔn mɛn boe Lawa gɔ ǹ wɔ lɛa, má wusoo má bɛa bɔ da a giala la, á kɔnpɛ ka a bɔ biikoon ne, kɔnlɛ ka màn lɛ bibinaan kɛn nɛ. «Maa Lawa, n yiri koa ma nɛ, bǐɛ̃ kɛ taman yii, má zɛnaa.»