Nehemii 12 - LAWA A BOO SONBORE

Lawa a wúlu-bɔlen laanka Levii tɔrɔn tɔn

¹ Lawa a wúlu-bɔlen laanka *Levii tɔrɔn mɛnɛn nə da kun ka Salatieli a nɛgiĩ Zorobabeli laanka Zozoe ne, bɛn tɔn nə́ ke: Seraya nɛ, Yirmeya nɛ, Ezira nɛ,

² Amariya nɛ, Maluku ni, Hatusi ni,

³ Sekania nɛ, Rewumu ni, Meremɔti ni,

⁴ Idoo ne, Ginetoyii ni, Abiya nɛ,

⁵ Miyamɛn nɛ, Maadia nɛ, Bilgaa nɛ,

⁶ Semayia nɛ, ka Yogaribu ni, Yedaya nɛ,

⁷ Salu ni, Amɔki ni, Hilkiya nɛ, ka Yedaya nɛ. Zozoe a biikoo li, bɛn lɛn man nə́ goã Lawa a wúlu-bɔlen nyɛɛnaandɛnan lɛa, ǹ dɔɔ̃nɔn dɔn nyɛɛnaandɛnan lɛa.

⁸ Levii tɔrɔn bii: Zozoe ne, Binuyii ni, Kadimiyeli ni, Serebia nɛ, Yewudaa nɛ, Matania nɛ, ǹsɛn laanka ǹ dɔɔ̃nɔn man nə́ goã Lawa guguru kɔ ǹ loe nyɛɛnaan boe.

⁹ Ǹ dɔɔ̃nɔn kɛn, Bakbukia laanka Unii ni, bɛn man nə́ goã golee ǹ yɔrɔ-a ǹ tá ǹ dí lɛ piɛ̃.

Zozoe tɔrɔn

¹⁰ Zozoe na á Zozakimu yɛ, Zozakimu na á Eliasibu yɛ, Eliasibu dɔ na á Zozadaa yɛ.

¹¹ Zozadaa na á Zonaatan yɛ, Zonaatan na á Yaduwa yɛ.

¹² Zozakimu bɛ́ wúlu-bɔlen kiã lɛa biikoo mɛn li, Lawa a wúlu-bɔlen kɛn man nə́ goã Lawa a wúlu-bɔlen tanlɛn mìilandɛnan lɛa: Meraya na á goã Seraya a tanlɛ mìilandɛnaa lɛa, Hanania na á goã Zeremii a tanlɛ wɔ lɛa,

¹³ Mesulaamu na á goã Ezira a tanlɛ wɔ lɛa, Zoanan na á goã Amariya a tanlɛ wɔ lɛa,

¹⁴ Zonaatan na á goã Meliku a tanlɛ wɔ lɛa, Zozɛfu na á goã Sebania a tanlɛ wɔ lɛa,

¹⁵ Adnaa na á goã Harimu a tanlɛ wɔ lɛa, Helkayii na á goã Merayɔti a tanlɛ wɔ lɛa,

¹⁶ Zakarii na á goã Idoo a tanlɛ wɔ lɛa, Mesulaamu na á goã Ginetɔn a tanlɛ wɔ lɛa,

¹⁷ Zikiri na á goã Abiya a tanlɛ wɔ lɛa, min kɛ na á goã Miniamɛn a tanlɛ wɔ lɛa, Piltayii na á goã Moadia a tanlɛ wɔ lɛa,

¹⁸ Samuwa na á goã Bilgaa a tanlɛ wɔ lɛa, Zonaatan na á goã Semayia a tanlɛ wɔ lɛa,

¹⁹ Matenayii na á goã Zozaribu a tanlɛ wɔ lɛa, Uuzi na á goã Zedaya a tanlɛ wɔ lɛa,

²⁰ Kalayii na á goã Salayii a tanlɛ wɔ lɛa, Ebɛɛrɛ na á goã Amɔki a tanlɛ wɔ lɛa,

²¹ Hasabia na á goã Hilkiya tanlɛ wɔ lɛa, Netaneyeli na á goã Yedayaa a tanlɛ wɔ lɛa.

²² Eliasibu ni, Zozadaa nɛ, Zoanan nɛ, ka Yaduwa nɛ, bɛn bɛ́ Lawa a wúlu-bɔlen lɛa biikoo mɛn li, Levii tɔrɔn mɛnɛn nə goã kɛdɛnan lɛa, ǹ nə́ bɛn tɔn kiɛ̃ sɛ́wɔn nɛ. Maǹ nə́ Lawa a wúlu-bɔlen dɔn wɔ baa miɛ̃ yǎa á daa dɔ Pɛrsi gána a kii Dariusu a kiibaa biikoo ganaa.

²³ Ǹ bɛ́ lɛlɛ boon kiɛ̃ sɛ́wɔ mɛn nɛ, ǹ nə́ Levii tɔrɔn lɛn kɛdɛnan tɔn kiɛ̃ walan, yǎa á daa dɔ Eliasibu a nɛ Zoanan a biikoo ganaa.

²⁴ A kɔnpɛ ka Lawa a min Davida a da ǹ boon ne, Levii tɔrɔn nyɛɛnaandɛnan kɛn, Hakabia nɛ, Serebia nɛ, Kadimiyeli a nɛgiĩ Zozoe ne, bɛn nə́ goã giɛ̃ kɔn yɔrɔ-a Levii tɔrɔ gialakunun kɛn nyɛɛnɛ, bɛ̀ ǹ loe lɔ ǹ dia kɔn la, Lawa tɔ bɔ laanka a guguru kɔ ǹ wɔ lɛa.

²⁵ Matania nɛ, Bakbukia nɛ, Odavia nɛ, Mesulaamu ni, Talmɔn nɛ, ka Akubu ni, bɛn man nə́ goã kiɛnlɛ-lɛduə̃lin lɛa. Ǹ bɛ́ gɔn mànan tamaɛ bǎãn mɛnɛn nɛ, Lawa guguru kɔ ǹ kion kɛ a kiɛnlɛn genli, maǹ nə́ goã bɛn lɛduĩ.

²⁶ Zozoe a nɛgiĩ Zozakimu ke, Zozadaaki a nɔ̀ɔn lɛa, bɛa biikoo ne, bɛa minin kɛn lɛn nə́ goã dí nyɛɛ. Ǹ nə́ goã dí nyɛɛ pàãdɛnaa Nehemii dɔ a biikoo li, ka Lawa a wúlu-bɔle Ɛsidrasi, landa sii-daraali kɛ dɔ wɔ nɛ.

Kungɔn lɛ a kɔ Lawa la

²⁷ Zeruzalɛmu a kungɔn lɛ a kɔ Lawa la sii taman yii, ǹ nə́ woo ga Levii tɔrɔn li, ǹ giã ǹ bǎãn tumaa nɛ, ǹ nə́ daa ǹ nɛ Zeruzalɛmu màn mɛn bɛ́ toɛ, ǹ nə n nyɛnyɛɛ ǹ kungɔn lɛ kɔ Lawa la, ǹ Lawa guguru kɔ ǹ loen lɔ, ǹ gɔn pere dɛ ǹ mànan kaa li, ka tùtun laanka kɔnkoɛɛ̃nɛn nɛ.

²⁸ LOE-lɔlin nə́ kɔn paã ǹ nə́ bɔ Zeruzalɛmu lɛkoro lɛ-a bǎãn tumaa nɛ, Netofaa minin kiwin ni,

²⁹ Bɛti-Gilgaali ni, Gebaa don ne, ka Azimawɛti don ne. A giala loe-lɔlin lɛn man nə́ goã ǹ nə́ kiwi bisinin koa ǹ dinin wɔ lɛa, Zeruzalɛmu lɛkoro lɛ-a bǎãn nɛ.

³⁰ Lawa a wúlu-bɔlen laanka Levii tɔrɔn nə́ *gɔ̀ bɔ ǹ dinin ganaa, ǹ nə́ gɔ̀ bɔ zaman lɛ ganaa, ka kiɛnlɛn laanka kungɔn lɛ nɛ.

³¹ Bɛ kio, má pɛ máa Zudaa gána a nyɛɛnaandɛnan nə dii kungɔn lɛ la, má loe-lɔli kuru dadara paa koa. Kuru lɛ goon nə́ tɔ wɔ kungɔn lɛ la, á woo yisi kaa ǹ bǎã a kiɛnlɛ kɛ ganaa, gusin li.

³² LOE-lɔlin lɛn kio wɔlɔ-a, Hosaya laanka Zudaa gána a nyɛɛnaandɛnan nə́ goã tɔ we.

³³ Azaria dɔ́ goã tɔ lɛ we, ka Ezira nɛ, Mesulaamu ni,

³⁴ Yewudaa nɛ, Bɛnzamɛn nɛ, Semayia laanka Irmeya nɛ.

³⁵ Ka bɛ dɔ nɛ, Lawa a wúlu-bɔlen nə́ goã tɔ lɛ we, ka bɛnɛn nə́ ǹ gɔn. Zonaatan a nɛgiĩ Zekaria ke Semaaya tɔrɔ lɛa, Matania tɔrɔ lɛa, Mikaya tɔrɔ lɛa, Zakuru laanka Azaafu tɔrɔ lɛa,

³⁶ bɛ laanka ǹ dɔɔ̃nɔn nɛ, Semayia nɛ, Azareli ni, Milatayii ni, Gilayii ni, Mayii ni, Netaneyeli ni, Yewudaa nɛ, ka Hananii ni, ǹ dɔn nə́ goã tɔ lɛ we. Davida lɛ, Lawa a min lɛa, bɛa da loe li ǹ mànan man nə́ goã ǹ gɔn. Landa sii-daraali Ɛsidrasi na á goã ǹ nyɛɛnɛ.

³⁷ Ǹ bɛ́ ǹ nə́ dɔ Mu pìã a kiɛnlɛ kɛ li, dii ǹ bǎã mɛn bɛ́ woe "Davida a kiwi" kɛ ganaa, ǹ nə́ dii bɛ la ǹ yɔrɔ-a ka kungɔn lɛ a dii ǹ bǎã kɛ nɛ, Davida a kion kɛ lalan, ǹ nə́ woo yǎa Mu kiɛnlɛ kɛ li, lɛ̀giala gɔn la.

³⁸ LOE-lɔli kuru lɛ a paabaa ǹ wɔ ke, bɛ́ tɔ wɔ á woo gɔsɛ li. Ma dinmaa goã a kio kungɔn lɛ la, ka zaman lɛ a talɛɛ nɛ. Wɔ́ bɔ zɔ́ɔn sanabolo kɛ lalan, wɔ́ woo yǎa kungɔn lɛ a pəməbaa ǹ bǎã kɛ nɛ.

³⁹ Bɛ kio, wɔ́ bɔ Efrayimu kiɛnlɛ kɛ lalan, ka kiɛnlɛ zizi kɛ nɛ, zɔ̀nɔn kiɛnlɛ kɛ nɛ, Hananeyeli a sanabolo kɛ nɛ, Meya a sanabolo kɛ nɛ, wɔ́ woo yǎa sèren kiɛnlɛ kɛ li. Wɔ́ tɔ́n golee wɔlɔ lɛduə̃ ǹ kiɛnlɛ kɛ lɛ-a.

⁴⁰ LOE-lɔli kuru paa lɛ golee Lawa a kion. Ma dinmaa dɔ laanka nyɛɛnaandɛnan lɛn talɛɛ mɛn goã kun, wɔ dɔn nə́ golee.

⁴¹ Lawa a wúlu-bɔlen dɔn nə́ goã bɛnɛn nə́ ǹ gɔn: Eliakimu ni, Maaseya nɛ, Miniamɛn nɛ, Mikaya nɛ, Elioyenayii ni, Zekaria nɛ, Hanania nɛ, bɛnɛn nə́ ǹ gɔn.

⁴² Maaseya dɔ goã a tan, Semayia nɛ, Eleyazaara nɛ, Uuzi ni, Zoanan nɛ, Malikiya nɛ, Elamu ni, ka Ezɛɛrɛ nɛ. LOE-lɔlin lɛn nə́ kũ loe la, Yiziraya nə́ ǹ nyɛɛnaan boe.

⁴³ Bɛa pinaa kɛ lɛ nɛ, minin nə́ wúlu didi bɔ, ǹ nə́ goã foo kɔɔ̃nbaa gɔ́ɔ̃ nɛ, a giala Lawa na á foo kɔɔ̃nbaa gole kɔ ǹ la. Lɔn laanka nɛnyaanan dɔn nə́ goã n nyɛnyɛɛ, minin nə́ n toa sɔsɔɔ ǹ nə́ Zeruzalɛmu a foo kɔɔ̃nbaa lɛ a boo ma.

⁴⁴ Bɛa pinaa kɛ lɛ nɛ, mànan kaa ǹ kionən kɛn, ǹ nə́ mànan boe kiɛ ǹ nɛ, màn lɛ bibinaan nɛ, ka gɔn màn a fùbaa ǹ wɔ nɛ, ǹ nə́ giĩn kaa bɛn gama walan ganaa. Dí-pɛ bɛ́ mà ǹ mànan mɛnɛn bɔ, Lawa a wúlu-bɔlen laanka Levii tɔrɔn wɔ gii lɛa, man nə́ giĩn lɛn koa, màn mɛn bɛ́ toɛ bɛa mànan kɛn lɛn boe kiwi dadaran lɛkoro lɛ-a donən ne, ǹ nə ǹ si ǹ nə ǹ kaa mànan kaa ǹ kionən lɛn nɛ. Sonbore, Lawa a wúlu-bɔlen lɛn laanka Levii tɔrɔn lɛn dí kaa Zudaa minin lɛn foo la.

⁴⁵ Maǹ nə́ goã dí nyɛɛ ǹ Lawa nɛ, ǹ nə́ gɔ̀ bɔ ǹ dí dɔ nyɛɛ, bɛ̀ ǹ tá koe Davida laanka a nɛgiĩ Salomɔn a da ǹ boo kɛ lɛ, kun ka loe-lɔlin kɛn laanka kiɛnlɛ-lɛduə̃lin kɛn nɛ.

⁴⁶ Sonbore ne, lɛlɛ, Davida laanka Azaafu a biikoo li, loe-lɔlin nyɛɛnaandɛnan nə́ goã ǹ tan, guguru kɔ ǹ loen laanka barka da ǹ loen loe Lawa nɛ.

⁴⁷ Zorobabeli laanka Nehemii a biikoo li, màn mɛn bɛ́ doe loe-lɔlin lɛn laanka kiɛnlɛ-lɛduə̃lin lɛn ganaa ǹ wɔ gii lɛa, Izirayeli tumaa goã bɛ koe baraabaraa. Maǹ nə́ goã Levii tɔrɔn dɔn wɔ boe bɛ̀ ǹ kaa a gɔrɔn. Levii tɔrɔn dɔn man nə́ goã Aarɔn tɔrɔn wɔ boe, bɛ̀ ǹ kaa a gɔrɔn.