Nehemii 10 - LAWA A BOO SONBORE

Zaman lɛ n koe dí-pɛ lɛ

¹ Bɛ lɛ n ke wɔ́ lɛ kɔ kɔn la bɛbiɛ wɔ, wɔ́ kiɛ̃ sɛ́wɔ nɛ, wɔa nyɛɛnaandɛnan nə́ n gɔn bǎã da a nɛ, ka wɔa *Levii tɔrɔn laanka wɔa Lawa a wúlu-bɔlen ne.

² Min mɛnɛn nə n gɔn bǎã da sɛ́wɔ lɛ nɛ, bɛn tɔn nə́ ke: Hakalia a nɛgiĩ Nehemii, ke pàãdɛnaa lɛa, Sedekiasi,

³ Seraza, Azaria, Zeremii,

⁴ Pasiwuru, Amariya, Malkiza,

⁵ Hatusi, Sebania, Maluku,

⁶ Harimu, Meremɔti, Obadia,

⁷ Daniyeli, Ginetɔn, Baruku,

⁸ Mesulaamu, Abiya, Miyamɛn

⁹ Maazia, Bilgayii, Semayeza, Lawa a wúlu-bɔlen man ka ǹsɛn nɛ.

¹⁰ Levii tɔrɔn dɔn: Azaria a nɛgiĩ Zozoe, Henadaadi a tanlɛ min Binuyii, Kadimiyeli,

¹¹ bɛn dɔɔ̃nɔn kɛn: Sebania, Hodiza, Kelitaa, Pelaza, Hanan,

¹² Misee, Rewɔbu, Hakabia,

¹³ Zakuru, Serebia, Sebania,

¹⁴ Hodiya, Banii, ka Beninu ni.

¹⁵ Zaman lɛ a nyɛɛnaandɛnan dɔn: Parɔɔsi, Paati-Moabu, Elamu, Zatu, Banii,

¹⁶ Bunii, Azigaadi, Bebayii,

¹⁷ Adoniya, Bigwayii, Adɛn,

¹⁸ Atɛɛrɛ, Hizikiya, Azuuru,

¹⁹ Hodiya, Hasumu, Besayii,

²⁰ Harifu, Anaatɔti, Nebayii,

²¹ Magpiasi, Mesulaamu, Heziiri,

²² Mesezabɛli, Saadɔki, Yadoa,

²³ Pelatia, Hanan, Anania,

²⁴ Hoseya, Hanania, Hasubu,

²⁵ Ha-Loyɛsi, Pileya, Sobɛki,

²⁶ Rewumu, Hasaabnaa, Maaseya,

²⁷ Ayia, Hanan, Anan,

²⁸ Maluku, Harimu, ka Baanaa nɛ.

²⁹ Zaman gialakun lɛ nɛ, Lawa a wúlu-bɔlen ne, Levii tɔrɔn nɛ, kiɛnlɛ-lɛduə̃lin ni, loe-lɔlin ni, Lawa a kion dí-nyalin ni, ka min mɛnɛn tumaa nə n na ǹ nə́ n bɔ gána lɛ a tɔrɔ kɔsɔn kɛn ganaa, ǹ nə́ kɔ Lawa a dí-pɛ lɛ lɛ, bɛn lɔn nɛ, ǹ nɛgiĩn ni, ǹ nɛlɔn nɛ, ka min mɛnɛn tumaa bɛ́ boe la ǹ tá sii a woo ǹ bǎã doɛ̃,

³⁰ ǹ nə́ ǹ wɔ kaa kun ka ǹ dɔɔ̃nɔn kɛn nɛ, min yii guguru-an lɛa ǹ tumaa bii. Ǹ nə́ n lɛ kɔ ka liɛ-n kun ni. Lawa a dí-nyali Muizu dí-pɛn mɛnɛn kɔ ǹ la, mà ǹsɛn tá re tɔ we a kɔnpɛ ka bɛn nɛ. Mà ǹsɛn Dɛnaa Lawa a gɔn waa ǹ boon kɛn tumaa, a sii yɔrɔ bɔ ǹ boon kɛn laanka a landa boon kɛn nɛ, mà ǹsɛn tá re bɛn tamaɛ ǹ nə ǹ siin zɛnaa.

³¹ Bɛ lɛ tɔ ganaa, wɔ ba re wɔa nɛlɔn koe gána lɛ a minin la wa, wɔ ba re ǹ nɛlɔn goɛ wɔ ǹ kɔ wɔa nɛgiĩn la wa.

³² *Susu ǹ pii pinaa, bɛ̀ gána lɛ a minin nə́ daa pii mànan sã, ta a din nə wàa mɛn màn lɛa, wɔ ba re màn kɔn pii ǹ lon bɛa susu ǹ pii kɛ lɛ li wa. Zɔ́nɔn dɔn li, wɔ ba re màn kɔn pii ǹ lon wa. Ka bɛ dɔ nɛ, lɛ̀ sɔbaa woo lɛ̀ sɔbaa, wɔ á re susui koe wɔa wurun la, wɔ minin giɔ̀mɔ tumaa toa ǹ nɛ.

³³ Wɔ́ baa pàã lɛa wɔ ganaa, wáa didie die a wɔrɔgiala garamu sii bɔ lɛ̀ tunaa nɛ, wɔa Lawa a kion lɛ a dí wɔ lɛa,

³⁴ buuru ke ǹ ná a pàla boe Lawa yɔrɔ-a, bɛ wɔ lɛa, *wúlu màn ke ǹ nə́ Lawa goe ne baraabaraa, bɛ wɔ lɛa, wúlu màn ke ǹ nə́ tiɛ̃ baraabaraa, bɛ wɔ lɛa, susu ǹ pii wɔ lɛa, mui dii zɔ́nɔn wɔ lɛa, zɔ́n kɔsɔn wɔ lɛa, ǹ mànan mɛnɛn kɔ Lawa la bɛn wɔ lɛa, Izirayeli a sii baraan sawaa ǹ wúlu mànan wɔ lɛa, wɔa Lawa a kion lɛ a dí tumaa wɔ lɛa.

³⁵ Màn mɛn bɛ́ kiɛ̃ nɛ landa sɛ́wɔ kɛ nɛ, a kɔnpɛ ka bɛ nɛ, biikoon man nə́ n koa. Lɛ̀ tunaa nɛ bɛa biikoon lɛn li, gɔn doamaa nɛ a da wɔa Lawa a kion, wɔa sumun lɛ yii li, Lawa gɔ ǹ màn lɛa, màn mɛn bɛ́ toɛ ǹ tɛ koa nɛ wɔa Lawa, Dɛnaa Lawa a *wúlu bɔ ǹ bǎã kɛ la. Lawa a wúlu-bɔlen ne, Levii tɔrɔn nɛ ka zaman lɛ nɛ, wɔ́ n pã bɛa wúlu màn tã ǹ gɔn kɛ lɛ a sii ganaa.

³⁶ Wɔ́ lɛ kɔ, wáa lɛ̀ tunaa nɛ, wáa wɔ á re die ka wɔa tán màn lɛ bibinaa laanka da din tumaa a lɛ da ǹ nɛ nɛ, Dɛnaa Lawa a kion.

³⁷ Lawa a wúlu-bɔlen mɛnɛn bɛ́ dí nyɛɛ wɔa Lawa a kion kɛ nɛ, wɔ́ lɛ kɔ wáa wɔ á die woe ka wɔa nɛgiĩ bibinaan laanka wɔa tɔɔn nɛ bibinaan nɛ bɛn li, wɔa Lawa a kion kɛ nɛ, ka a bɛ́ kiɛ̃-n dí-pɛn sɛ́wɔ kɛ-n lɔn. Wɔa tɔɔ dadaran nɛ bibinaan laanka wɔa tɔɔ bisinin wɔn nɛ.

³⁸ Wɔ́ lɛ kɔ, wáa wɔ á die woe Lawa a wúlu-bɔlen kɛn li, wɔa Lawa a kion lɛ a kionən ne ka wɔa buuru wùsu-yia sonbore ne. Wɔ bɛ́ da tɔrɔ tumaa a nɛ mɛn boe, wɔ́ lɛ kɔ wáa wɔ́ á die woe ka bɛ dɔ a sonbore ne, wɔ bɛ́ duvɛ̃ dii laanka nyɔɔ mɛn boe ka bɛn dɔn sonbore ne. Wɔ́ lɛ dɔ kɔ, wáa wɔ á die wɔa tán màn a fùbaa ǹ wɔ koe Levii tɔrɔn kɛn la. Wɔ bɛ́ dí nyɛɛ kiwi dadaran mɛnɛn tumaa nɛ, Levii tɔrɔn lɛn dinin doamaanɛ, ǹ da màn a fùbaa ǹ wɔ lɛ si walan.

³⁹ Bɛ̀ Levii tɔrɔn lɛn tá màn a fùbaa ǹ wɔ lɛ sii, Lawa a wúlu-bɔle ke Aarɔn tɔrɔ lɛa, bɛ á die goɛ̃ kunun ǹ ni. Levii tɔrɔn lɛn tá re màn a fùbaa ǹ wɔ lɛ a fù baa ǹ wɔ boe wɔa Lawa a kion kɛ wɔ lɛa, ǹ wo ne màn tamaa ǹ kion kɛ gɔ́ɔ̃ nɛ.

⁴⁰ A giala, Izirayeli minin lɛn laanka Levii tɔrɔn lɛn bɛ́ mànan mɛnɛn boe, *belee kɛ nɛ, duvɛ̃ dii kɛ laanka nyɔɔ kɛ nɛ, maǹ woe ǹ ne bɛa kion gɔ́ɔ̃n kɛn lɛn nɛ. Lawa a kion a mànan lɛn maǹ walan lɛ nɛ. Lawa a wúlu-bɔlen mɛnɛn bɛ́ dí lɛ la, bɛn man giɛ̃ walan lɛ nɛ, ka kiɛnlɛ-lɛduə̃lin kɛn laanka loe-lɔlin kɛn nɛ. Ka bɛa yɔrɔ lɛ nɛ, wɔ ba re n là boe wɔa Lawa a kion lɛ ganaa wa.