Nahumu 3 - LAWA A BOO SONBORE

Ninivu pã ka geren ne

¹ Koe n ke, Ninivu ganaa, kiwi mɛn bɛ́ mà n baa sii a nɛ. A piɛ̃maa nɛ ka soɛ nɛ, wurumubaa nɛ, ka mɛnaa kɔn la nɛ a ná a nyɛɛ wa.

² Á ke, kiwi lɛ gɔ́ɔ̃ nɛ, sɔsɔrɔ wuu n boe! Wotoron gòã wuu n boe! Sùin man paparɛ! Zia wotoron wuu n boe paparɛ!

³ Sùi dabaa-a wolen manə n daɛ kɔn la! Gɔya san man tɛ pii lon! Sɛmiɛ̃n man tɛ boe! Gere la yii ni! Geren man diɛ-n kɔn la! Lɛ ba ǹ la wa! Maǹ nə́ n gòã niɛ̃ gere ganaa bǎã yii ni!

Dɔlɔ n die n boe Ninivu ganaa

⁴ Ninivu sii baraa zɛnaa á la yii ni. A siĩnbaa taman yii, a n ka kɔrɔbaali bɛ́ lɔn, minin yiri sii. A n ka dagòãdɛnaa bɛ́ lɔn, minin yiri sii. Bɛ lɛ taman yii, tɔrɔ gigiã ná a bɛ̀rɛ baa.

⁵ Dɛnaa Lawa Pàãyiidɛnaa na á kɛ pɛ: Á ke, ma lɛ nə n li. Ma á re n mɔnaa lusi ma kɔ ǹ yɔrɔ lɛ, ma n tontoro nyaa tɔrɔ kɔsɔn manɛ. Gána kɔsɔn kɛn tá re n sìi yii.

⁶ Man die yisi kiɛ n la, n bɛbɛnɛ, má n nyaa sii a kɔnboe lɛa.

⁷ Màn mɛn bɛ́ toɛ, bɛ̀ min mɛn nə́ n yɛ a baa si, a nə́ n lɛ dii: «Ninivu ziziɛ̃! Die n die makara boe a ganaa?» Die n die yii a gu wɔ la?

Didie n ka a biikoo ne

⁸ Ninivu, ń ta soɛ Tebɛɛsi kiwi kɛ nɛ? Ke Niili tà gòã la, mu ná a lɛnpɛnɛ. Niili ná a kirisibiɛ ka kungɔn bɛ́ lɔn.

⁹ A foo n doa nɛ Etiopii laanka Ezipti ganaa, ǹ pàã gole ke, a na a ba nyɛɛ wa. Puutu minin laanka Libii minin maǹ nə́ goã a koa kun wolen lɛa.

¹⁰ Sɛnɛ a dɔ a biikoo bɛ́ á dɔ, ǹ ná a minin goa, ǹ nə́ woo ǹ ne bɛ̀rɛbaa ǹ bǎã nɛ. Ǹ ná a nɛnyaanan yɔyɔrɛ ziin bɔ kɔn-a ǹ bǎã tumaa nɛ, ǹ nə́ n pã gána lɛ a nyɛɛnaandɛnan ganaa, ǹ nə́ fɔlɔbiɛn kaa ǹ min dadaran ganaa.

¹¹ Á dɔ n dɔ ganaa kanna Ninivu, fuu á re liɛ n yii ni. Bɛ̀ á dɔ n dɔ ganaa, n tá re giɛ duru ǹ bǎã li, n zɔ́ɔn nyɛɛnɛ.

Ninivu n die mɛnɛɛ

¹² N kungɔnɔn lɛn man ka gɔ́rɔ da bɛ́ lɔn gɔ̀rɔ mərə n la. Bɛ ǹ nə́ zuzuu lɔn gɔrɔ, min mɛn bɛ li mà a bii, a n miɛ̃ bɛ lɛ-n.

¹³ N sɔraasin lɛn man ka lɔn bɛ lɔn, pàã ba ǹ lon wa. N gána lɛ a kiɛnlɛn buĩ maa nɛ n zɔ́ɔn nyɛɛnɛ. Tɛ nə n goo-nɛ daanan lɛn tumaa kũ.

¹⁴ Ninivu minin lɛn, zɔ́ɔn tá re die ka lɛnpɛnɛ. Ka mu si ka koa ka li. Ka màn da kaa kungɔnɔn pàã li. Ka gì mà, ka kaa kungɔnɔn tɔrɔ.

¹⁵ Tɛ n die ka kuĩ ka gã walan hinlaa zia n die ka nyin boe. Kaa zɔ́ɔn man die ka soɛ̃ ka bisin bɛ́ màn soɛ̃ lɔn. Ninivu minin, ka bulubɔ, ka bulubɔ ka bisin bɛ́ lɔn.

Ninivu a zaman kuturu papaã

¹⁶ N pii-kɔlen nə́ mɔnaa ǹ nə́ la lon a leeren manɛ. Sɛnɛ maǹ ka bisin bɛ́ lɔn, basaã koe bɛ̀ ǹ wusoo ǹ woo.

¹⁷ N bǎã-lɛduəlin kɛn man mɔnaa nɛ ka kondoonən bɛ́ lɔn. N dí-nyalin nyɛɛnaandɛnan kɛn man mɔnaa nɛ ka bisin kuru bɛ́ lɔn, kiɛ da la, nyan biikoo li. Bɛ̀ wasa bɔ lɔn gɔrɔ, maǹ yui min ná a ba ǹ woo ǹ bǎã doɛ̃ wa.

Basaã gole n ke, yɔrɔ bɔ ǹ gɔn ná a ba la wa

¹⁸ Asiiriin kii, n gánadɛnan lɛn nə nyuù wɔ tɛmɔɔ. N min kakan lɛn sɛ̀mɔɔdɛnan lɛa, bɛn kɔn ba bìn diɛ doo wa. N zaman lɛ sasawa a woo paǹ yii li, kelen mii ni, min kɔn banban a die ǹ soekɔn wa.

¹⁹ Bɔ̀n gole ke á n yɛ, yɔrɔ bɔ ǹ gɔn ba la wa. N busulɛn kɛn ba nyɛɛ duduu wa. Bɛ̀ min nə́ə n sii kɛ ma, n dɛnaa nə n gɔn dii n koe kɛ ganaa, a giala, dan goã n baraabaa lɛ la wa. Bɛ n die lɛa kəni, n baraabaa lɛ ná a dɔ a ganaa wa?