Nahumu 2 - LAWA A BOO SONBORE

Zudaa minin wɔ paǹ li

¹ Á ke, ma yii n dia dí-a wole ganaa, kele mìi-n die: A n die ka boo tii kɔɔ̃n nɛ, là nyantoro boo ne. Ka kaa zɔ́nɔn zɛnaa, Zudaa minin lɛn. Ka lɛ kɔ Dɛnaa Lawa la ka mànan mɛnɛn nɛ, ka bɛn zɛnaa. Min baraa kɛ a re doe kaa gána-n doo wa, a pàã mɛnaa.

Ninivu kiwi a paǹ li

² Á ke, sɔraasin nə́ ke die n gialaa Ninivu: N kungɔnɔn lɛduə̃, n doa n ziin gialaa n yɔrɔ bɔ ziabaa taman yii, n pàã tumaa sɔkɔn.

³ Ǹ nə́ Izirayeli ziziɛ̃ lenlen, ǹ nə́ ǹ *rezɛ̃ dan tumaa ziziɛ̃. Sɛnɛ, Dɛnaa Lawa n die Zakɔba tɔ siɛ lon. Hiĩ, a n die tɔ golebaa koe Izirayeli la.

Ninivu a mɛnaa

⁴ Zɔ́ɔ sɔraasin lɛn maǹ ka goóro tãtãn nɛ, mɔnaa tãtãn nɛ ǹ ganaa, n yɔrɔ boe woe zia la. Ǹ ziabaa ǹ wotoron kɛn man telee-n kɔn li, tɛ pii ka tɛ buə̃ bɛ́ lɔn. Sɛmiɛ̃n nə́ bìn diɛ giala kɔ.

⁵ Ziabaa ǹ wotoron lɛn nə́ yiɛ zii dadaran gialaa, ǹ nə́ n mìi fɔ̃ bǎã dadaran ganaa. Maǹ tɛ pii, ǹ yii n fuu ka la a tɛ-pɛ bɛ́ lɔn.

⁶ Ǹ kii lɛ dia a sɔraasin nyɛɛnaandɛnan la, maǹ die bɛ̀ ǹ tá tatalɛɛ. Maǹ baa si woe ziabaa ǹ kungɔnɔn li. Ǹ nə́ màn da kiɛnlɛn lɛn pàã li.

⁷ Bǎã goon ne, kiɛnlɛn mɛnɛn bɛ́ dia-n tàn la, ǹ nə́ bɛn yiyiɛ, ǹ nə́ kii a kii kion kɛ kũ.

⁸ Sàabaa ba la wa, ǹ nə́ Ninivu gɔn bɔ a giala lɛ, ǹ nə́ woo ne bɛ̀rɛbaa ǹ bǎã nɛ. Lɔn mɛnɛn bɛ́ dínyɛɛ nɛ, bɛn man gini, ǹ nə́ n tìãbii dii foo-ziziɛ̃ taman yii.

⁹ Ninivu n ka mu doo á ke lɔn, a n mu boe. Maǹ baa sii: «Ka gole ka gole!» Sɛnɛ, min mɛnɛn bɛ́ baa sii, n kɔn ba n bɔyɛɛ wa.

¹⁰ Ka sana kokoo, ka wɔrɔ kokoo! Ninivu a paãmabaa a nyɛɛ wa. A gɔn màn giɔ̀mɔ kakaan nə la yii ni.

¹¹ Ǹ ná a tumaa koã, ǹ nə́ yu, ǹ nə́ yɔyɔrɛ. Minin foo ziziɛ̃, ǹ gòãn nə́ gã, ǹ gɔ̀nɔn nə bìn diɛ, ǹ yɔrɔ ziziɛ̃.

Ninivu n ka yàra mɛn nə́ ke ǹ nə́ dɛ

¹² Lɛlɛ, Ninivu na á goã ka yàran bǎã bɛ́ lɔn. A na á goã yàra sa laanka yàra dan a woo ǹ bǎã lɛa, Maǹ nə ǹ nɛn toe ǹ nə́ ǹ tamɛɛ a nɛ, ǹ ba nyɛ́ɛ biɛ màn kɔn nɛ wa.

¹³ Yàra n don siĩ dii a tɔtoɛ̃, yàra dan laanka a nɛn wɔ lɛa. A bɛ́ don siĩn mɛnɛn dii, bɛn ná a yala pã.

¹⁴ Á ke, Pàãyiidɛnaa Lawa n kɛ pii: «Nsɛ Ninivu, man die yui n gialaa. Man die tɛ diɛ n ziabaa ǹ wotoron ganaa, ǹ kukũ lenlen. N nɛ tenən kɛn ka yàra nɛn manɛ, Zia á re ǹ bii. N mɛnaa ma la siin kɛn ma á re bɛn sàabiɛ tán la, n dia dí-a wolen kɛn kɔn lɛ á re boe doo wa.»