Nahumu 1 - LAWA A BOO SONBORE

¹ Boo mɛn nə n da Ninivu wɔ paǹ li, Elkɔɔsi min Nahumu a sii-yɛn manɛ.

Dɛnaa Lawa a foo yoo ka a sonborebaa

² Lawa a sii á kaka. Min mɛnɛn bɛ́ n piɛ̃ nɛ, Dɛnaa Lawa n dɔlɔ boe bɛn ganaa, a foo-yoo á baraa. Dɛnaa Lawa na a gɛ̀ dòo boe a zɔ́ɔn ganaa, a foo-yoo á kiɛ̃ wa.

³ Dɛnaa Lawa foo a yui fufuu wa. Sɛnɛ a zɛ̀rɛdɛnaa bíi zɛ̀rɛbaãdɛnaa wa. A pàã golebaa miã banban. Piɛ̃ laanka kurunkurun na a kiɛ̃ ǹ zii lɛa. A gòã giulun gusuũ n ka labaran nɛ.

⁴ A n boo diɛ yìsi mu gole ne, a piɛ̃ ka daɛ̃. A n tàn mu piɛ̃, a bɔ ǹ nɛ. Basan a buu bǎã nyantoto ke ka Karmɛli kele kɛ nɛ, bɛn tumaa n damɛ ǹ taã ka bon, Liban a da buũ kɛ tumaa n bɛbɛnɛ.

⁵ Kelen man bìn diɛ a nyɛɛnɛ tentenen man yoe. A daa biikoo li, tán nə bìn diɛ ka kanaa laanka a minbuiin tumaa nɛ.

⁶ A foo-yoo gɔ́ɔ̃ nɛ, die n boe la a gole a yɔrɔ-a? Die yii n boe la a goã koo a foo-yoo baraa kɛ gɔ́ɔ̃ nɛ? A foo-yoo n ka tɛ bɛ́ lɔn, wɔlɔ tumaa kuĩ, haalɛ gɛ̀fu din nə yɔyɔrɛ a nyɛɛnɛ.

⁷ Dɛnaa Lawa á siĩni. A n mìi duru ǹ bǎã lɛa koe pinaa. Min mɛnɛn bɛ́ n dinin koe la, a n giɛ bɛn walan.

⁸ Sɛnɛ a n die Ninivu yui lenlen ka mu gole ne. A na a zɔ́ɔn papaɛ̃, a nə́ ǹ kiɛ wɔlɔ tì biribiri li.

Lawa a zɔ́ɔn dɔlɔ

⁹ Ka n wàa sii we kɔn Dɛnaa Lawa ganaa? Á re kaa zɔ́ɔn papaɛ̃ a ǹ bɔ bii-a, ǹ gɔn ba re doe kaa gunyin paa doo wa.

¹⁰ Maǹ ka nyan da mɛn nə́ ke, we-n kɔn nɛ, ǹsɛn yɔ-mili baraan kɛn lɛn. Maǹ die kui lenlen ka buu gere bɛ́ lɔn.

Ninivu kiwi wɔ paǹ li

¹¹ Nsɛ Ninivu, giĩ goon soo n ne a n sii wɔ kɔn yɔrɔ boe Dɛnaa Lawa ganaa.

Zudaa minin wɔ paǹ li

¹² Dɛnaa Lawa n kɛ pii: «Ta kaa zɔ́ɔn lɛn nə́ mɔnaa lɔn, ta ǹ nə́ kaka kɔ lɔn, ǹ tá re papaɛ̃, ǹ nya lenlen. Ma ka puusə kɔ. Sɛnɛ, ma a re bɛ miã zɛnɛɛ doo wa.

¹³ Sisia kəni, ma ka si kaa zɔ́ɔn la, ma fɔlɔ biɛn kɛn na ma ǹ bɔ ka-a.»

Ninivun kii wɔ paǹ li

¹⁴ Dɛnaa Lawa n kɛ pii n wɔ paǹ li: «N ba re nɛnyaanan yii doo n tɔ nə n tɔ kɔ ǹ ganaa wa. N dìn kɛn gɔn lɛa hinlaa fɔlɔ lɛa, ma á re ǹ tumaa ziziɛ̃ ǹ kion. Ma nə n yala yɔrɔ boe a giala, n ba màn kɔn lɛa ma yii li wa.»