Misee 4 - LAWA A BOO SONBORE

Là nyantoro boo Zeruzalɛmu wɔ paǹ li

¹ Lɛawaan kɔnɔn tá re doe, Dɛnaa Lawa a kion lɛ bɛ́ kele mɛn la, bɛ á die goɛ̃ ǹ miã kelen mìi la, lon tentenen tumaa mìi la, tɔrɔn tá re yiɛ girigiri bɛ̀ ǹ wo la.

² Gána gigiã á die zii siɛ, bɛ̀ ǹ nə́ pii kɔn nɛ: Ka daa wɔ n tá wɔ dii Dɛnaa Lawa a kele la, wɔ wo Zakɔba a Lawa kɛa kion. A din tá re a zii lɛ a tɔ wɔ ǹ gɔn nyɛɛ wɔ nɛ, bɛ̀ a din wɔ da zii mɛn la, wɔ á re koe bɛ lɛ. A giala, dí-pɛn boon lɛn man boe *Siɔn, Dɛnaa Lawa a boo lɛ n boe Zeruzalɛmu.

³ A din nə die sabara-dali biɛ tɔrɔ gigiã bii, pàã bɛ́ gánan mɛnɛn lon, ǹ wɔlɔ dɔ din nə sɔsɔɔ, a din nə die bɛn wɛɛ kɔn. Ǹ ziabaa ǹ gɔya san kɛn, ǹ tá re bɛn biɛ kána nànan lɛa. Ǹ sɛmiɛ̃n kɛn, ǹ tá re bɛn biɛ sɛǹ gɔyan lɛa. Gánan ba re gɔya san goɛ kɔn li doo wa, min ba re n darɛɛ ziabaa ganaa doo wa.

⁴ Didie á re giɛ̃ tán a din a *rezɛ̃ da laanka a din a gɔ́rɔ da giulun. Min kɔn ba re nyɛ́ɛ diɛ ǹ ganaa wa. A giala, Dɛnaa Lawa Pàãyiidɛnaa din lɛ na á pɛ.

⁵ Tɔrɔn kɛn tumaa gogoonmaa n koe ǹ dìn lɛ. Sɛnɛ, wɔsɛn man koe wɔa Lawa, Dɛnaa Lawa lɛ yǎa duduu.

Lawa a zaman a sɔkɔn

⁶ Dɛnaa Lawa a da ǹ boo á ke: «Bɛa pinaa kɛ lɛ nɛ, wɔ̀lɔ̀ goã ǹ mɛnɛn lɛn ganaa ka sère busulən bɛ́ lɔn, ma á re bɛn soekɔn. Ǹ goã ǹ nə́ ǹ mɛnɛn loo, ǹ nə́ woo ǹ ne, ma fuu nyaa ǹ mɛnɛn lɛn manɛ, ma á re wusii ma ǹ si.

⁷ Wɔ̀lɔ̀ goã ǹ mɛnɛn lɛn ganaa, ma á re bɛn toɛ maa zaman lɛ tɔrɔ lɛa. Ǹ nə ǹ mɛnɛn lɛn loo, ǹ nə́ woo ǹ ne sɔsɔɔ, ma á re ǹ soekɔn, ma ǹ baa gána pàãdɛnaa lɛa. Dɛnaa Lawa din tá re goɛ̃ ǹ kii lɛa, Siɔn kele kɛ la, a kũ bɛa pinaa lɛ ganaa, yǎa duduu.

⁸ Nsɛ Siɔn kele lɛ, maa zaman kɛa daa ǹ bǎã, Zeruzalɛmu kiwi a lɛduə̃ ǹ bǎã, n lɛlɛ a pàã lɛ á re wusii a dɔ n-a, kiibaa lɛ á re wusii a da Zeruzalɛmu kiwi.»

Si nɔmaa la

⁹ Zeruzalɛmu, là-paparɛɛ bɛ́ á dɔ n-a, wàa na á baa n tá n lɛ dii kanna, ka lɔ nɔnɔ-a n nɔ̀ɔrɔ koe? N kii lɛ na a banban doo wa? N doroli lɛ na á gã?

¹⁰ Zeruzalɛmu minin, ka n mɔmɔɔsɛ là-paparɛɛ gɔn ka n lɛ dɛdɛ, ka lɔ nɔnaa n nɔɔrɔ koe. A giala, kanna, ka n die soe ka kiwi lɛ toa, ka á re giɛ̃ don miɛ̃, yǎa ka woe doe *Baabilonii. Sɛnɛ, ka á re kirisibiɛ walan, Dɛnaa Lawa á re ka sii kaa zɔ́ɔn lɛn la.

¹¹ Sɛnɛ sisia, gána gigiã nə́ n lɛ sɔkɔn, ǹ tá ka gialaa. Maǹ pii: «Ka daa wɔ Zeruzalɛmu zaãbaa, bɛ̀ wɔ yii nàn diɛ̃ bɔ a kɛbɔlɔ la.»

¹² Sɛnɛ, ǹ ba Dɛnaa Lawa a taasiɛ doɛ̃ wa. A bɛ́ li a sii mɛn zɛnaa, ǹ yiri a doe bɛ gɔ́ɔ̃-n wa: a na á gánan lɛn sɔkɔn, ka ǹ bɛ́ *belee soekɔn lɔn a duwəə ǹ bǎã nɛ.

¹³ Zeruzalɛmu minin lɛn, ka yoo kəni, ka kaa belee duwəə, ma din tá re a duwəə ǹ pàã koe ka la. Dii mɛn bɛ́ a bɛnɛn nə́ fɔlɔ lɛa, a gòon tɔnɔn nə́ zan lɛa, ma á re ka biɛ bɛa dii lɛ miã lɛa, ka á re boe la ka tɔrɔ gigiã yɔyɔrɛ ka gòãn giulun. Ǹ gɔn mànan kɛn, ka bɛn kɔ Dɛnaa Lawa la, ǹ pàãmabaa ǹ mànan kɛn, ka bɛn kɔ kanaa tumaa a dɛnaa la.

¹⁴ Zeruzalɛmu a minin lɛn, ka n gɔ̀nɔn tɔtoɛ̃ ka gɛ̀ na á gã ka la. Zɔ́ɔn nə́ ke ǹ nə́ daa n doa wɔ nyɛɛnɛ. Ǹ nə́ ke Izirayeli a sii-yɔrɔ bɔle lɛ duwii a para giala-a ka bàlà nɛ.