Misee 1 - LAWA A BOO SONBORE

¹ Dɛnaa Lawa a boo n ka kɛ nɛ, á pɛ Moresɛtin Misee ne. Zudaa tɔrɔn kiin kɛn, Zoatamu ni, Ahaazi ni ka Ezekiasi ni, bɛn gogoonmaa a wasa nɛ, Misee sii-nyaa yɛ Samarii laanka Zeruzalɛmu wɔ paǹ li.

Lawa dɔlɔ mɛn boo da a zaman wɔ paǹ li

² Haya, tɔrɔn tumaa, ka n too kɔ! Tán laanka màn mɛn tumaa bɛ́ la, ka n too kɔ doɛ̃! A giala, Dɛnaa Lawa n die yui ka gialaa. Dɛnaa din nə die n toɛ a kion sonbore kɛ nɛ, a yoo ka gialaa.

³ Haya, Dɛnaa Lawa á ke soe a giã ǹ bǎã nɛ! Á ke die gisĩ, a n tɔ we kele sɔsɔrɔn la, die gisĩ tán.

⁴ Kelen kɛn man die wurii a gòãn giulun, nyankɔrɔ basan kɛn man die yaliɛ, ka zoo gón bɛ́ tɛ li lɔn, ka mu bɛ́, ǹ nə́ kaa kele baã zuməə ǹ bǎã-n lɔn.

⁵ Zakɔba tɔrɔn kɛn bɔlɔ-tii taman yii ni, kɛ tumaa á die n zɛnɛɛ. Izirayeli minin lɛn sii baraa a lɛa nɛ, kɛ tumaa á die n zɛnɛɛ. Izirayeli gána a bɔlɔ-tii kɛ na á bɔ die li? Samarii kiwi kɛ lɛ sii ni. Zudaa gána a dì wúlu bɔ kɛ na á bɔ die li? Zeruzalɛmu kiwi kɛ lɛ sii ni.

⁶ Dɛnaa Lawa mà Samarii kiwi kɛ á die don biɛ. A kɛbɔlɔ á die *rezɛ̃ da zumu ǹ wuru biɛ. Ma á die a dɔǹ kɔlɔn lɛn birikəĩ, ma ǹ kaa nyankɔrɔ basa kɛ nɛ. Ma á die wurii yǎa a gòã daa ǹ bǎã kɛ nɛ.

⁷ A màn nyínin kɛn lɛn tumaa á die pɔpɔsɛ. A kɔrɔbaa ǹ mànan lɛn tumaa á die n tiɛ̃. Ma á die a dìn kɛn tumaa yɔyɔrɛ. A giala, kɔrɔbaa ǹ mànan manɛ, ǹ tá re wusii, ǹ kɔrɔbaa ǹ dí nya.

Bɔ̀n mɛn bɛ́ re Zeruzalɛmu yii

⁸ Bɛ lɛ n ke, masɛ Misee á die wuu pii, man din dɛdɛ. Man die n sɔlɛɛ, ma tɔ wɔ ka ma gòã kooro ne, ka yii koe-yele n ma nɛ. Man die n lɛ dii ka toloka bɛ́ lɔn, man die lɛ biɛ, ka bɛnda bɛ́ lɔn.

⁹ A giala, sii mɛn bɛ́ die Samarii ganaa, a lɛ goa ǹ gɔn banban. Á ke á dɔ Zudaa gána dɔ din ganaa, á woo yǎa ma tɔrɔn kɛn kiɛnlɛ-a, yǎa Zeruzalɛmu kiwi.

¹⁰ Ka nyan toa Gaati minin nə kɛ ma wa, ka nyan kɛ din a wuu pɛ wa. Bɛti-Lefra minin lɛn, ka n birikəə̃ tán tii li, ka koe na á ka yɛ.

¹¹ Safiiri minin, ka wo ka ka tontoro ne, ka kaa sìi ni. Saanan minin dinin ba re soe doo wa. Bɛti-Esɛli minin dɔn bɛ́ ke wuu kɛ pii, n duduwii, kaa duru ǹ bǎã ba walan doo wa.

¹² Marɔti minin man nə́ goã n yii diɛ a susuu lɛ la, sɛnɛ, á kɔsɛ ǹ ganaa. Á ke, bɔ̀n na á bɔ lon Dɛnaa Lawa li, á daa Zeruzalɛmu *kiwi a kiɛnlɛ-a.

¹³ Lakiisi minin lɛn, ka sùin kaa wotoron ganaa. A giala, *Siɔn kiwi minin lɛn man nə́ ǹ saa ka dinin li, ǹ nə́ tɔ́n sii baraa zɛnaa. Bɛ̀ ń yaa Izirayeli minin lɛn nə́ n piã, ka dinin sii ni.

¹⁴ Bɛ lɛ nɛ, yǎa ka n lɛ boe Moresɛti-Gaati ganaa. Akziibu kiwi a kionən kɛn, Izirayeli kiin kɛn bebele ǹ wɔn manɛ.

¹⁵ Maresaa minin lɛn, man die min kɔsɔn diɛ ǹ da zia baa ka ganaa. Izirayeli minin bɛ́ n dinin koɛ ǹ kiin mɛnɛn taman yii, bɛn lɛn tá re baa sii, ǹ wo n duru Adulaamu kele kɛa yala-n.

¹⁶ Zeruzalɛmu minin lɛn, ka n mìi kɔɔ̃. Ka zèwon bɛ́ lɔn, ka nyan ka toa ka mìi-n wa, kaa là-paparɛɛ taman yii, kaa nɛnyaanan kɛn lɛn lɛa, ka tá ǹ narɛ. A giala, maǹ die ǹ goɛ, ǹ wo ǹ ne bɛ̀rɛbaa ǹ bǎã nɛ, ǹ wɔlɔ lui ka ganaa.