Minin nimi 8 - LAWA A BOO SONBORE

Bolon koa ǹ bǎã

¹ Dɛnaa Lawa boo da Muizu ni, á pɛ:

² «Boo da Aarɔn nɛ, n pɛ nɛ: bɛ̀ n tá bolonən lɛn lɛ siɛ̃, bolon sɔbaa lɛ doamaa nɛ, ǹ wɔlɔ fúlu bɔ bolon koa ǹ bǎã lɛ yɔrɔ-a.»

³ Aarɔn dɔ́ zɛnaa miɛ̃. Á bolonən lɛn lɛ sã, ǹ nə́ wɔlɔ fúlu kiɛ bolon koa ǹ bǎã lɛ yɔrɔ-a, ka Dɛnaa Lawa goã á pɛ Muizu-n lɔn.

⁴ Ǹ goã ǹ nə́ bolon koa ǹ bǎã lɛ zɛnaa lɔn, bɛ á ke: maǹ nə́ sana dɛ ǹ nə́ zɛnaa nɛ. A saa a giala ganaa, a wo a da buũn nyaǹan kɛn yaa, maǹ nə́ sana dɛ, ǹ nə́ zɛnaa nɛ. Maǹ nə́ bɛa bolon koa ǹ bǎã lɛ zɛnaa ka Dɛnaa Lawa goã á ná a yɔrɔ nyaa Muizu-n lɔn.

Levii tɔrɔn man Lawa wɔn lɛa

⁵ Dɛnaa Lawa boo da Muizu ni, á pɛ:

⁶ «*Levii tɔrɔn kɛn bɔ Izirayeli minin bii, n *gɔ̀ bɔ ǹ ganaa.

⁷ N die n gɔ̀ lɛ bɔ ǹ ganaa ka yɔrɔ kɛ nɛ: n die n gɔ̀ bɔmaa ǹ mu kɛ pɛsɛ̃ ǹ ganaa, ǹ die ǹ nə n gɔ̀nɔn ka tumaa kɔɔ̃, ǹ nə ǹ mɔnaan pii. Bɛ kio, ǹ tá re *yoreen koe.

⁸ Ǹ die ǹ dii gɔ̀lɔ̀ ten goon bɔ, ka Lawa gɔ ǹ *wùsu sonbore ne, yia-n ka nyɔɔ nɛ. Bɛ kio, Muizu, n die n dii gɔ̀lɔ̀ ten kɔsɔ bɔ, sii baraa sawaa ǹ *wúlu màn lɛa.

⁹ N die n Levii tɔrɔn kɛn wɔlɔ kunu kɔ kɔn yɛ ka Lawa nɛ ǹ kion kɛ yɔrɔ-a, n Izirayeli zaman lɛ tumaa sɔkɔn.

¹⁰ N die n Levii tɔrɔn lɛn wɔlɔ kunu kɔ Dɛnaa Lawa yɔrɔ-a, Izirayeli minin lɛn die ǹ nə ǹ gɔn da ǹ la.

¹¹ Bɛ kio, Aarɔn die a Levii tɔrɔn lɛn kɔ Lawa la ǹ sii zɛnaa Dɛnaa Lawa yɔrɔ-a, Izirayeli minin lɛn wɔ lɛa. Levii tɔrɔn lɛn wɔ n die goɛ̃ ka Dɛnaa Lawa a dí nya nɛ.

¹² Levii tɔrɔn lɛn die, ǹ nə n gɔn da dii gɔ̀lɔ̀n lɛn mìi ni. Muizu die a dii gɔ̀lɔ̀ lɛ goon baa sii baraa sawaa ǹ wúlu màn lɛa, a kɔsɔ kɛ tã Lawa wɔ lɛa, Levii tɔrɔn sii baraa sawaa ǹ wɔ lɛa.

¹³ A die a Levii tɔrɔn lɛn kaa bii-a, Aarɔn laanka a nɛgiĩn yɔrɔ-a, a ǹ kɔ Lawa la ǹ sii zɛnaa.

¹⁴ Izirayeli minin lɛn bii, a die a Levii tɔrɔn lɛn bɔ, a ǹ kaa ǹ gɔrɔn. Maǹ die goɛ̃ masɛ din wɔn lɛa.

¹⁵ Bɛ kio, Levii tɔrɔn lɛn die ǹ kɔn yɛ ka Lawa nɛ ǹ kion kɛ a dí nya. Muizu die a gɔ̀ bɔ ǹ ganaa kəni, a ǹ kɔ Lawa la ǹ sii zɛnaa.

¹⁶ A giala, Levii tɔrɔn lɛn man nə́ n kɔ masɛ la, maǹ nə́ n kɔ masɛ la a tɔ-a, Izirayeli minin lɛn bii. Masɛ n má ǹ kũ má ǹ baa maa wɔn lɛa, gɔn bibinaa nɛn tumaa bǎã nɛ, Izirayeli minin lɛn nɛgiĩ, bibinaan tumaa.

¹⁷ A giala, gɔn bibinaa nɛ mɛn tumaa bɛ́ nɛginin lɛa Izirayeli minin lɛn bii, masɛ din wɔ n ka bɛ nɛ, ka tɔɔ nɛ bibinaa tumaa nɛ. Ma gɔn binaa nɛn tumaa dɛ Ezipti gána nɛ ǹ mɛn pinaa, bɛa pinaa lɛ nɛ, má ǹ baa ma din wɔn lɛa.

¹⁸ Sɛnɛ, masɛ n má Levii tɔrɔn lɛn baa maa wɔn lɛa, Izirayeli minin nɛ bibinaan tumaa bǎã nɛ.

¹⁹ Masɛ n má Levii tɔrɔn kɔ Aarɔn laanka a nɛgiĩn la, Izirayeli minin lɛn bii, màn mɛn bɛ́ toɛ ǹ dí nya Izirayeli minin lɛn lɛa, kɔn yɛ ka Lawa nɛ ǹ kion kɛ nɛ, ǹ sii baraa sawaa ǹ sii dɔ zɛnaa ǹ ganaa. Bɛa yɔrɔ lɛ la, bɛ̀ Izirayeli minin kɛn nə́ n mɔrɔ bǎã sonbore kɛ ganaa, koe sii ba re ǹ yii wa.»

²⁰ Dɛnaa Lawa goã á boo mɛn yii da Muizu ni Levii tɔrɔn lɛn wɔ paǹ li, Muizu lɛ nɛ, Aarɔn nɛ, ka Izirayeli zaman lɛ nɛ, bɛn nə́ bɛa boo lɛ tumaa a sii zɛnaa Levii tɔrɔn lɛn manɛ. Izirayeli minin lɛn man nə́ zɛnaa ǹ nɛ miɛ̃.

²¹ Levii tɔrɔn lɛn nə́ gɔ̀ bɔ ǹ dinin ganaa, ǹ nə́ ǹ mɔnaan pii. Bɛ kio, Aarɔn nə́ ǹ kɔ Lawa la ǹ sii zɛnaa, Dɛnaa Lawa yɔrɔ-a, á gɔ̀ bɔmaa ǹ landa sii kɛ zɛnaa ǹ ganaa, á ǹ yoreen kɔ.

²² Bɛ kio, Levii tɔrɔn lɛn nə́ daa, ǹ dí nya kɔn yɛ ka Lawa nɛ ǹ kion kɛ nɛ, Aarɔn laanka a nɛgiĩn yɔrɔ-a. Maǹ nə́ sii lɛ zɛnaa Levii tɔrɔn manɛ, ka Dɛnaa Lawa goã á pɛ Muizu-n lɔn ǹ wɔ gɔn la.

Levii tɔrɔn dí

²³ Dɛnaa Lawa boo da Muizu ni, á pɛ:

²⁴ «Sii mɛn bɛ́ a tan Levii tɔrɔn lɛn wɔ paǹ li, bɛ á ke: A kũ lɛ̀ fuəwensooro ganaa, ka kio ne, bɛ̀ Levii tɔrɔ mɛn tumaa lɛ̀ dɔ miɛ̃, ǹ dɛnaa doamaa nɛ a dí saa, a kɔn yɛ ka Lawa nɛ ǹ kion kɛa dí nya.

²⁵ Bɛ̀ ǹ dɛnaa dɔ lɛ̀ posooro, a n sii bɔ a bɔ dí lɛ nɛ, a baran dí lɛ nya doo wa.

²⁶ Sɛnɛ, ǹ dɔɔ̃n Levii tɔrɔn mɛnɛn bɛ́ tɔn dí lɛ la, á boe la a n dɔ bɛn lɛ kɔn yɛ ka Lawa nɛ ǹ kion lɛ nɛ, ń giɛ, mànan mɛnɛn bɛ́ bɛn gama walan gɔ́ɔ̃ nɛ, a dɔ ga bɛn walan. A baran dí nyan doo wa. Levii tɔrɔn dí wɔ paǹ li, Muizu die a sii lɛ zɛnaa miɛ̃.»