Minin nimi 7 - LAWA A BOO SONBORE

Mànan mɛnɛn nə n kɔ Lawa a kion lɛ wɔn lɛa

¹ Muizu bɛ́ á Lawa a kion lɛ doa á nya ǹ mɛn pinaa, á nyɔɔ sonbore lɔ a ganaa, á baa Lawa wɔ lɛa, kɔnlɛ ka a gɔ́ɔ̃ mànan tumaa nɛ. Á nyɔɔ sonbore kaa *wúlu bɔ ǹ bǎã kɛ dɔ ganaa, á baa Lawa wɔ lɛa, kɔnlɛ ka a màn bisinin tumaa nɛ.

² Bɛ kio, min mɛnɛn bɛ́ Izirayeli minin lɛn nyɛɛnaandɛnan lɛa, ǹ didie dɔ ná a tɔrɔ minin goledɛnaa lɛa, bɛn nə́ daa ka ǹ Lawa gɔ ǹ mànan nɛ. Tɔrɔn lɛn goledɛnan mɛnɛn nə goã minin nimii lɛ mìi la, ǹ dinin lɛn manɛ.

³ Ǹ nə́ daa ka ǹ Lawa gɔ ǹ mànan lɛn nɛ Dɛnaa Lawa yɔrɔ-a: wotoro sɔrɔ, màn nə́ pɛnɛɛ nɛ ǹ ganaa, ka dii fulupaa nɛ. Wotoro lɛ a gogoonmaa n nyɛɛnaandɛnaa min paa a Lawa gɔ ǹ màn lɛa, dii lɛ a gogoonmaa n nyɛɛnaandɛnaa goon wɔ lɛa. Ǹ nə́ woo ǹ ne kion lɛ yɔrɔ-a.

⁴ Dɛnaa Lawa boo da Muizu ni á pɛ:

⁵ «Mànan lɛn si n bɔ ǹ gɔn. Kɔn yɛ ka Lawa nɛ ǹ kion kɛ a dí tá re n nyɛɛ ka bɛa mànan lɛn nɛ. N die n nə ǹ kɔ *Levii tɔrɔn kɛn la, a kɔnpɛ ka didie a dí ni.»

⁶ Muizu tɔ́n wotoron lɛn laanka diin lɛn si á ǹ kɔ Levii tɔrɔn lɛn la.

⁷ Á wotoro màn paa laanka dii màn sii kɔ Gɛrsɔn tɔrɔn la á kɔnpɛ ka ǹ dí ni.

⁸ Wotoro sii gialakun ke, ka dii kiwisi kɛ nɛ, á bɛn kɔ Lawa wúlu-bɔle Aarɔn a nɛgiĩ, Itamaara la, bɛ nə́ ǹ kɔ Merarii tɔrɔn la, á kɔnpɛ ka ǹ dí ni.

⁹ Muizu màn kɔn kɔ Keyati tɔrɔn lɛn sɛn la wa, a giala, ǹsɛn dí na á goã ka màn sonboren kɛn gũ ni, ǹ kɔrɔn.

¹⁰ Ǹ bɛ́ ǹ nə́ nyɔɔ sonbore lɔ wúlu bɔ ǹ bǎã kɛ ganaa ǹ mɛn pinaa, nyɛɛnaandɛnan lɛn nə́ daa ka Lawa gɔ ǹ mànan nɛ, wúlu bɔ ǹ bǎã lɛ a kɔ Lawa la ǹ wɔ lɛa. Nyɛɛnaandɛnan lɛn man nə́ daa ka ǹ Lawa gɔ ǹ mànan lɛn nɛ, wúlu bɔ ǹ bǎã lɛ yɔrɔ-a.

¹¹ Dɛnaa Lawa tɔ́n pɛ Muizu ni: Nyɛɛnaandɛnan lɛn nə da ka ǹ Lawa gɔ ǹ mànan lɛn nɛ, pinin goon, min goon, wúlu bɔ ǹ bǎã lɛ a kɔ Lawa la ǹ wɔ lɛa.

^12-83 Ǹ koa kɔn la lɔn ǹ nə́ daa, bɛ á ke: Lɛawaa bibinaa pinaa: Aminaadaabu a nɛgiĩ Naasɔn ke Zudaa tɔrɔ lɛa, bɛ nɛ. Lɛawaa paabaa ǹ wɔ: Suwaara a nɛgiĩ Netaneyeli ke Isakaara tɔrɔ lɛa, bɛ nɛ. Lɛawaa sɔɔbaa ǹ wɔ: Elɔn a nɛgiĩ Eliabu ke Zabulɔn tɔrɔ lɛa, bɛ nɛ. Lɛawaa siibaa ǹ wɔ: Sedewuru a nɛgiĩ Elisuuru ke Urubɛn tɔrɔ lɛa, bɛ nɛ. Lɛawaa soorobaa ǹ wɔ: Surisadayii a nɛgiĩ Selumiyeli ke Simiɔn tɔrɔ lɛa, bɛ nɛ. Lɛawaa sɔrɔbaa ǹ wɔ: Dewɛli a nɛgiĩ Eliasaafu ke Gaadi tɔrɔ lɛa, bɛ nɛ. Lɛawaa sɔbaabaa ǹ wɔ: Amiwudu a nɛgiĩ Elisamaa ke Efrayimu tɔrɔ lɛa, bɛ nɛ. Lɛawaa kiwisibaa ǹ wɔ: Pedaasuuru a nɛgiĩ Gamuliyeli ke Manaasee tɔrɔ lɛa, bɛ nɛ. Lɛawaa manangɔrɔbaa ǹ wɔ: Gidonii a nɛgiĩ Abidan ke Bɛnzamɛn tɔrɔ lɛa, bɛ nɛ. Lɛawaa fùbaa ǹ wɔ: Amisadayi a nɛgiĩ Ayiezɛɛrɛ ke Dan tɔrɔ lɛa, bɛ nɛ. Lɛawaa fulugoonbaa ǹ wɔ: Okran a nɛgiĩ Pagiyeli ke Asɛɛrɛ tɔrɔ lɛa, bɛ nɛ. Lɛawaa fulupaabaa ǹ wɔ: Enan a nɛgiĩ Ayira ke, Nɛfutalii tɔrɔ lɛa, bɛ nɛ. Ǹ gogoonmaa na á daa ka Lawa gɔ ǹ mànan kɛn nɛ: Wɔrɔ tasa goon, a gugurubaa n kilo goon ka garamu biɛsɔɔ, wɔrɔ kaaran goon, a gugurubaa n Lawa a kion kɛa màn zɔɔ̃ ǹ màn a garamu biɛsɔbaa (700). Wùsu yia ka nyɔɔ-n na á goã bɛa màn paa lɛ piɛ̃ Lawa gɔ ǹ wɔ lɛa. Sana kaaran goon, a gugurubaa n garamu paabiɛ, a piɛ̃maa-n ka da yon gìĩ kɔɔ̃n nɛ. Dii gɔ̀lɔ̀ goon, sère gɔ̀lɔ̀ goon, lɛ̀ goon sère nɛ goon, *wúlu màn tiɛ̃ lɛa, butumu goon, sii baraa sawaa ǹ wúlu màn lɛa. Dii màn paa, sère gɔ̀lɔ̀ sooro, butumu sooro ka lɛ̀ goon sère nɛ sooro ne, barka da ǹ wúlu mànan lɛa.

⁸⁴ Izirayeli minin nyɛɛnaandɛnan lɛn nə da ka Lawa gɔ ǹ mànan mɛnɛn nɛ, wúlu bɔ ǹ bǎã lɛ a kɔ Lawa la lɛ li, bɛn kaa kun nə́ ke: wɔrɔ tasa fulupaa, wɔrɔ kaaran fulupaa, sana kaaran fulupaa.

⁸⁵ Wɔrɔ tasa lɛ gogoonmaa a gugurubaa na á goã kilo goon ka garamu biɛsɔɔ (300), kaaran lɛ dɔ a gogoonmaa na á goã garamu biɛsɔbaa. Bɛa mànan kɛn lɛn tumaa a gugurubaa a kaa kun nə Lawa a kion a màn zɔɔ̃ ǹ màn kɛ a kilo fuəwensii.

⁸⁶ Sana kaaran lɛ gogoonmaa a gugurubaa n garamu paabiɛ. A fulupaa lɛ tumaa a gugurubaa a kaa kun nə Lawa a kion kɛa màn zɔɔ̃ ǹ màn a kilo goon ka garamu biɛ paa (200). Ǹ tumaa na á goã piɛ̃ nɛ ka da yon gìĩ kɔɔ̃n kɛ nɛ, ǹ tá tiɛ̃.

⁸⁷ Tɔɔn mɛnɛn bɛ́ wúlu màn tiɛ̃ wɔ lɛa, bɛn kaa kun nə dii gɔ̀lɔ̀ fulupaa, sère gɔ̀lɔ̀ fulupaa, lɛ̀ goon sère ten fulupaa, ka tán-kɔsiɛ mànan kɛn nɛ, ǹ nə́ tii ǹ ganaa Lawa gɔ ǹ wɔn lɛa. Butumu fulupaa dɔ na á goã sii baraa sawaa ǹ wúlu màn wɔ lɛa.

⁸⁸ Tɔɔn mɛnɛn bɛ́ barka da ǹ wúlu mànan wɔ lɛa, bɛn tumaa a kaa kun na á goã dii fuəwensii, sère gɔ̀lɔ̀ pɔsɔrɔ, butumu pɔsɔrɔ, ka lɛ̀ goon sère nɛ pɔsɔrɔ nɛ. Ǹ Lawa gɔ ka mànan mɛnɛn nɛ, wúlu bɔ ǹ bǎã lɛ a kɔ Lawa la wɔ lɛa, wúlu bɔ ǹ bǎã lɛ a nyɔɔ sonbore lɔma-a kio, ǹ dinin lɛn man ka kɛn nɛ.

⁸⁹ Bɛ̀ Muizu tá we kɔn yɛ ka Lawa nɛ ǹ kion kɛ nɛ, boo diɛ ka Lawa nɛ, á goã Dɛnaa Lawa lɛ miɛ boo diɛ nɛ. Boo-diɛ lɛn lɛ na á goã boe goo lɛpii kɛ lalan, lon màn yiikoonaan nyín màn paa kɛ bii n ni. Goo lɛpii lɛ na á goã *lɛ kɔ kɔn la ǹ goo lɛ la. Lawa na á goã nɛn bɛ̀ a boo da ka Muizu-n miɛ̃.