Minin nimi 5 - LAWA A BOO SONBORE

Maǹ gɔ̀dɛnan bo

¹ Dɛnaa Lawa boo da Muizu ni á pɛ:

² «A pɛ Izirayeli minin lɛn manɛ, ǹ gɔ̀nɔn ki busu babaraadɛnaa din tumaa kaa para-a ǹ bɔ giã ǹ bǎã lɛ nɛ, ka min mɛn tumaa bɛ́ kii mu a da a din li ǹ busu ná a ganaa, hinlaa min mɛn tumaa bɛ́ gere *gɔ̀ da a ganaa.

³ Giĩ ba la wa, lɔ ba la wa, ka ǹ kaa para-a, kaa giã ǹ bǎã lɛ kio, màn mɛn bɛ́ toɛ, masɛ bɛ́ giã-n Izirayeli minin mɛnɛn lɛn bii, ǹ baran bɛn giã ǹ bǎã lɛ gɔgɔrɛ kɔ wa.»

⁴ Izirayeli minin lɛn nə́ tɔ́n zɛnaa miɛ̃. Ǹ nə́ bɛa dɛnan lɛn kaa para-a, ǹ nə́ ǹ bɔ giã ǹ bǎã lɛ nɛ. Maǹ nə́ zɛnaa ka Dɛnaa Lawa goã á pɛ Muizu-n lɔn.

Sii la min la a yɔrɔ bɔ

⁵ Dɛnaa Lawa boo da Muizu ni, á pɛ:

⁶ «A pɛ Izirayeli minin lɛn nɛ, bɛ̀ giĩ hinlaa lɔ bɔlɔgoonbaãdɛnaabaa ǹ sii zɛnaa Dɛnaa Lawa nɛ, á wɔ ǹ miã kɔsɔ lon, ǹ dɛnaa zɛ̀rɛ nɛ.

⁷ A sii baraa mɛn lɛ zɛnaa, a doamaa nɛ a na ka bɛ nɛ. Màn mɛn bɛ́ a zɛ̀rɛ lɛ mìi lɛa, a wɔ min mɛn lɛ lon, a doamaa nɛ, a bɛ tumaa saraa la, a màn lɛ a giɔ̀mɔ a talakɔn sooro goon da la.

⁸ A sii la min mɛn lɛ la, bɛ̀ a yii á koo wa, ka bɛ dɔ nɛ, bɛ̀ ǹ dɛnaa dɔɔ̃n taãn banban, màn lɛ ń boe la a n saraa bɛ la wa, màn lɛ doamaa nɛ a n kɔ Lawa la, Lawa a wúlu-bɔle wɔ lɛa. Zɛ̀rɛdɛnaa lɛ doamaa nɛ a sère gɔ̀lɔ̀ dɔ bɔ sii baraa sawaa ǹ *wúlu màn lɛa, màn mɛn bɛ́ toɛ, Lawa a wúlu-bɔle sii baraa sawaa ǹ wúlu bɔ ǹ sii zɛnaa a lɛa.

⁹ Izirayeli minin lɛn bɛ́ mànan mɛnɛn tumaa boe kiɛ ǹ gɔrɔn, Lawa gɔ ǹ wɔ lɛa, ǹ nə́ woe ǹ ne Lawa a wúlu-bɔle li, bɛn tumaa n Lawa a wúlu-bɔle lɛ wɔ lɛa.

¹⁰ Bɛ̀ ǹ nə́ mànan mɛnɛn bɔ ǹ nə́ ǹ kaa ǹ gɔrɔn, bɛn man doe Lawa a wúlu-bɔle lɛ-a, ka màn mɛn bɛ́ ǹ nə́ kɔ la.»

Landa mɛn bɛ́ zuũ-bɔ wɔ paǹ li

¹¹ Dɛnaa Lawa wusoo á boo da Muizu ni, á pɛ:

¹² – Boo da Izirayeli minin lɛn nɛ, n pɛ ǹ nɛ: bɛ̀ min mɛn a lɔ giã doɛ̃ wa, á n baa bɔlɔgoonbaãdɛnaa lɛa ǹ dɛnaa nɛ,

¹³ bɛ̀ min kɔsɔ tá kun ka lɔ lɛ nɛ, giĩ lɛ yii n tì a gɔ́ɔ̃ nɛ, bɛ̀ lɔ lɛ nə́ n din gɔgɔrɛ kɔ ka durii ni, bɛ̀ siére kɔn banban bɛ ń yui a gialaa doɛ̃ wa, bɛ̀ ǹ kũ sii lɛ a zɛnaa ǹ bǎã-n wa,

¹⁴ bɛ̀ zuũ-bɔ wɔ giĩ lɛ yiri ni, yǎa a zɛ̀rɛ koa a lɔ lɛ ganaa, a da yǎa lɔ lɛ dɔ nə́ n din gɔgɔrɛ kɔ sonbore, hinlaa bɛ̀ zuũ-bɔ wɔ giĩ lɛ yiri ni, yǎa a zɛ̀rɛ koa lɔ lɛ-a, sɛnɛ lɔ lɛ ná a n din gɔgɔrɛ kɔ wa,

¹⁵ bɛa giĩ lɛ wo ka a lɔ lɛ nɛ Lawa a wúlu-bɔle li, ka lɔ lɛ a Lawa gɔ ǹ màn nɛ, *ɔrzi wùsu nɔnɔɔ kilo sɔɔ. A baran nyɔɔ kaa li wa, a baran da yon gìĩ kɔɔ̃n da la wa, a giala zu-bɔ ǹ màn nɛ, yiri gisĩ sii ni ǹ màn nɛ, a n yiri gisĩ ka sii baraa nɛ.

¹⁶ Lawa a wúlu-bɔle lɛ die a lɔ lɛ wɔlɔ kunu kɔ, a da bii-a Dɛnaa Lawa yɔrɔ-a.

¹⁷ A die a mu sonbore kaa tii donkolon ne, a kion sonbore kɛa tán tii bɔ a kaa mu lɛ li.

¹⁸ A die a da ka lɔ lɛ nɛ Dɛnaa Lawa yɔrɔ-a, a pii bɔ a mìi lɛ, a yiri gisĩ sii ni ǹ màn kɛ da a gɔn, zu-bɔ ǹ Lawa gɔ ǹ màn ke. Bɛa biikoo lɛ gɔ́ɔ̃ nɛ, mu kɔɔsɛ ke die ka koe ne, bɛ die a goã Lawa a wúlu-bɔle lɛ dinmaa gɔn.

¹⁹ Lawa a wúlu-bɔle lɛ die a lɔ lɛ da liɛ ganaa, a pɛ nɛ: «Bɛ̀ giĩ kɔsɔ giã kunun ni duduu wa, bɛ̀ n giã ǹ gɔn nə talaa wa, bɛ̀ n nə n zuũ sã, n nə n din gɔgɔrɛ kɔ wa, mu kɔɔsɛ ke die ka koe ne, n die n kanbaa bɛ ganaa.

²⁰ Sɛnɛ, a n toa n zuũ lɛ li, bɛ̀ n giã doɛ̃ wa, bɛ̀ n nə́ n din gɔgɔrɛ kɔ, bɛ̀ giĩ kɔsɔ giã kunun n ni, bɛ ná a bie n zuũ kɛ-n wa,

²¹ Lawa a wúlu-bɔle lɛ die a lɔ lɛ da lɛn baraa bii ganaa a pɛ nɛ: Dɛnaa Lawa die a n kurəə nɛ yɛ ganaa, a n nɔ̀ da yii ganaa. Bɛ̀ n tɔrɔ minin tá lɛn baraa bii kɔn li, ǹ nə́ n liɛ, ǹ die ǹ pɛ: Lawa die a n baa ka min kɛ a lɔ kɛ bɛ́ lɔn.

²² Mu kɔɔsɛ ke die ka koe ne, bɛ á die we n gɔ́ɔ̃ nɛ, a n nɔ̀ yii, a n kurəə nɛ yɛ ganaa.» Lɔ lɛ die a pɛ: «A n miɛ̃, a n miɛ̃.»

²³ Lawa a wúlu-bɔle lɛ die a bɛa lɛn baraa bii ǹ boon kɛn lɛn kiɛ̃ sɛ́wɔ nɛ, a pii ka mu kɔɔsɛ lɛ nɛ.

²⁴ Bɛ kio, mu kɔɔsɛ lɛ die ka koe ne, a lɔ lɛ da a mii ganaa. Bɛa mu kɛ lɛ die ka koe ne, á die we a gɔ́ɔ̃ nɛ, a kɔɔsɛ kɔ.

²⁵ Lawa a wúlu-bɔle lɛ die a zu-bɔ ǹ Lawa gɔn màn lɛ si a bɔ lɔ lɛ gɔn, a na a kɔ Lawa la ǹ sii zɛnaa Lawa yɔrɔ-a, a wo ne *wúlu bɔ ǹ bǎã nɛ.

²⁶ Wúlu-bɔle lɛ die a gɔn yii goon bɔ Lawa gɔ ǹ wùsu nɔnɔɔ lɛ nɛ, yiri gisĩ sii ni ǹ sii lɛa, a tã wúlu bɔ ǹ bǎã lɛ lalan. Bɛ kio, a lɔ lɛ da mu lɛ a mii ganaa.

²⁷ A die a da mu lɛ a mii ganaa, sii kɛ n die n zɛnɛɛ: bɛ̀ lɔ lɛ nə́ n din gɔgɔrɛ kɔ, á n baa bɔlɔgoonbaãdɛnaa lɛa ǹ zuũ ni, mu mɛn lɛ á ke die ka koe ne, bɛ á die we a gɔ́ɔ̃ nɛ a kɔɔsɛ kɔ. A nɔ̀ tá re yii, a ná a ba nɛ yii wa. Lɔ lɛ a tɔrɔ minin tá re lɛn baraa bii kɔn li ǹ nə n liɛ ǹ pɛ: «Lawa die a n baa ka min kɛ a lɔ kɛ bɛ́ lɔn.»

²⁸ Sɛnɛ, bɛ̀ lɔ lɛ nə n din gɔgɔrɛ kɔ wa, á n *yoreene, sii na á n bɔ lɛ, á boe la a nɛ yɛ.

²⁹ Bɛ̀ lɔ lɛ giã doɛ̃ wa, bɛ̀ a tá kun ka giĩ kɔsɔ nɛ, n din gɔgɔrɛ koe,

³⁰ hinlaa bɛ̀ zuũ-bɔ wɔ giĩ yiri ni, á n zuũ boe a lɔ la, landa mɛn bɛ́ a tan bɛa zuũ-bɔ lɛ wɔ paǹ li, bɛ n ka kɛ nɛ: giĩ lɛ lɔ lɛ da bii-a Dɛnaa Lawa yɔrɔ-a, Lawa a wúlu-bɔle bɛa landa sii kɛ lɛ tumaa zɛnaa nɛ.

³¹ Giĩ lɛ sii ba re goɛ̃ sã kɔn nɛ wa. Sɛnɛ, lɔ lɛ sɛ á die n toɛ̃ ka a sã nɛ.