Minin nimi 35 - LAWA A BOO SONBORE

Kiwin mɛnɛn nə dɔ Levii tɔrɔn ganaa

¹ Dɛnaa Lawa boo da ka Muizu ni, Moabu gána a nyankɔrɔ lɛ kɛ nɛ, kunu Zurdɛ̃ tà li, Zerikoo kiwi yɔrɔ-a, á pɛ:

² A pɛ Izirayeli minin lɛn nɛ, mà bǎã mɛn bɛ́ re doe ǹ ganaa ǹ wɔ gii lɛa, mà ǹ die ǹ kiwin kɔnɔn bɔ bɛ nɛ ǹ nə ǹ kɔ *Levii tɔrɔn kɛn la, ǹ giã ǹ nɛ. Ǹ die ǹ bǎã dɔ kɔ ǹ la bɛa kiwin kɛn lɛn lɛkoro-a, kiwin lɛn nə goã bii.

³ Bɛa kiwin kɛn lɛn tá re Levii tɔrɔn lɛn giã ǹ bǎãn biɛ, kiwin lɛn lɛkoro lɛ-a bǎãn kɛn nə goã ǹ tɔɔn laanka ǹ gɔn mànan wɔ lɛa, ka ǹ tɔɔ màn tumaa nɛ.

⁴ Ka bɛ́ re bǎãn mɛnɛn koe Levii tɔrɔn lɛn la kiwin lɛn lɛkoro-a, bɛn gogoonmaa doamaa nɛ a saa tán kiwi lɛ a kungɔn li, a n lɛ bɔ li ka a kio ne, a wo dɔ mɛtərə biɛsooro kungɔn lɛ paǹ yii ganaa.

⁵ Kiwi lɛ a kanaa wɔlɔ-a, ka mɛtərə duu goon zɔɔ̃ lɛ̀giala gɔn la, ka mɛtərə duu goon zɔɔ̃ gusin a lɛ̀gɔn la, ka mɛtərə duu goon zɔɔ̃ lɛ̀nyɛɛn gɔn la, ka mɛtərə duu goon zɔɔ̃ gɔsɛ a lɛ̀gɔn la, kiwi lɛ goã bii, bɛn lɛn man die ǹ bǎãn biɛ kiwi Lɛkoro-a.

⁶ Ka die ka mìi duru ǹ kiwi sɔrɔ kɛ kɔ Levii tɔrɔn lɛn la, bɛa kiwin mɛnɛn lɛn nə́ ke, bɛ̀ min nə́ gɛ̀ dɛ, ǹ dɛnaa ná a bie á zɛnaa woon wa, á n boe la a baa si a wo n duru ǹ ni. Ka die ka kiwi pusiwenpaa kɔsɔ dɔ kɔ ǹ la.

⁷ Ka bɛ́ re kiwin mɛnɛn koe Levii tɔrɔn lɛn la, ǹ tumaa a kaa kun nə goɛ̃ kiwi pusiwenkiwisi, ǹ gogoonmaa laanka a lɛkoro lɛ-a bǎãn nɛ.

⁸ Bɛa kiwin kɛn lɛn ka tá re ǹ pɔrɛɛ Izirayeli minin bǎãn nɛ, bɛ̀ ǹ mɛnɛn kiwin tá mɔnaa nɛ, ka die ka bɛn wɔ baa didi, bɛ̀ ǹ mɛnɛn kiwin ba tɛ wa, ka baran bɛn wɔ baa didi wa. Bǎã mɛn dɔ tɔrɔ lɛ a gogoonmaa ganaa, didie n die a kiwin lɛn koe Levii tɔrɔn lɛn la, a zɛnɛ bɛ lɛ.

Gɛ̀-dɛlen duru ǹ kiwin

⁹ Dɛnaa Lawa boo da Muizu ni á pɛ:

¹⁰ mà a boo da ka Izirayeli minin lɛn nɛ, a pɛ ǹ nɛ: «Bɛ̀ ka Zurdɛ̃ tà lɛ kuru ka wɔ Kanaan gána nɛ,

¹¹ ka die ka kiwin kɔnɔn bɔ ka ǹ koa mìi duru ǹ bǎãn lɛa. Bɛ̀ min mɛn nə́ gɛ̀ dɛ, ǹ dɛnaa ná a bie á zɛnaa woo-n wa, ǹ dɛnaa die a wo n duru walan.

¹² Bɛa kiwin kɛn lɛn man die goɛ̃ ka gɔn, mìi duru ǹ kiwin lɛa gɛ̀ dòo-bɔle nyɛɛnɛ, màn mɛn bɛ́ toɛ gɛ̀-dɛle lɛ baran gã, bɛ̀ zaman lɛ ná a tɔn kiri wɔ a ganaa wa.

¹³ Mìi duru ǹ kiwin lɛn man die goɛ̃ kiwi sɔrɔ,

¹⁴ sɔɔ ń Zurdɛ̃ tà kio, sɔɔ dɔ ń Kanaan gána nɛ.

¹⁵ Bɛa kiwi sɔrɔ kɛ lɛ n die mìi duru ǹ bǎã biɛ Izirayeli minin lɛn gɔn, ka gùli laanka min mɛn dɔ á ke tii biɛ ǹ li. Bɛ̀ min woo min gɛ̀ dɛ, ǹ dɛnaa ná a bie á zɛnaa woon wa, á boe la a wo n duru bɛa kiwin kɛn lɛn goon ne.

¹⁶ Sɛnɛ, bɛ̀ min nə́ ǹ miã dɛ ka fɔlɔ màn nɛ yǎa a gã, bɛa dɛnaa n gɛ̀ woon dɛli lɛa, ǹ doamaa nɛ ǹ na a dɔ dɛ.

¹⁷ «Bɛ̀ min nə́ n miã dɛ ka kɔlɔ nɛ yǎa a na a gɛ̀ giala baa, gɛ̀ woon dɛli n ka bɛa dɛnaa nɛ, ǹ doamaa nɛ ǹ nà a dɔ dɛ a gã.

¹⁸ Bɛ̀ min nə́ n miã dɛ ka gɛ̀ dɛ ǹ màn nɛ gɔn lɛa yǎa a gã, gɛ̀ woon dɛli n ka bɛa dɛnaa nɛ, ǹ doamaa nɛ ǹ nà a dɔ dɛ a gã.

¹⁹ Gɛ̀-wɔle lɛ a gɛ̀-dòo bɔ bɛ́ doe min mɛn ganaa, bɛ doamaa nɛ a gɛ̀-dɛli lɛ dɛ a gã: bɛ̀ gɛ̀ dòo-bɔle lɛ kaa lɛ lɔn gɔrɔ, a dɛ.

²⁰ Bɛ̀ min nə́ ǹ miã nyanaa ka zɔ́ɔbaa nɛ, hinlaa bɛ̀ á màn zũ ǹ miã nɛ ka gɔ́ɔ̃ tìbaa nɛ yǎa bɛa miã lɛ gã,

²¹ hinlaa bɛ̀ á n gɔn munu á dɛ nɛ ka baraabaa nɛ yǎa a gã, gɛ̀ woon dɛli n ka ǹ dɛnaa nɛ. Ǹ doamaa nɛ ǹ na a dɔ dɛ a gã. Gɛ̀-wɔle lɛ a gɛ̀ dòo bɔ bɛ́ doe min mɛn ganaa, bɛ̀ bɛ́ kaa lɛ lɔn gɔrɔ, a dɛ a gã.

²² «Sɛnɛ, a tá boe la a n zɛnaa, min nə n miã nyanaa, bɛa miã lɛ gã, a da yǎa ǹ dɛnaa ná a bɛa taasiɛ wɔ wa, a ná a zɛnaa ka zɔ́ɔbaa-n wa, hinlaa min tá boe la a màn zũ a wo n miã kũ, baraa zɛnaa ná a bie ǹ dɛnaa yiri-n wa.

²³ Min dɔ á boe la a kɔlɔ bɔ a da ǹ miã la a gã, a yii ná a ǹ miã lɛ yɛ wa, ǹ miã lɛ ná a bie a zɔ́ɔ lɛa wa, a ná a bie giɛ li dɔn a baraa zɛnaa-n wa.

²⁴ Zaman lɛ n die bɛ miã sii lɛ yɔrɔ boe gɛ̀-dɛle lɛ laanka gɛ̀ dòo-bɔle lɛ biin ni, a kɔnpɛ ka a yɔrɔ bɔ ǹ gɔnɔn kɛn nɛ.

²⁵ Zaman lɛ die a gɛ̀-dɛle lɛ si gɛ̀ dòo-bɔle lɛ la ǹ da. Gɛ̀-dɛli lɛ goã á woo n mìi duru duru ǹ kiwi mɛn nɛ, zaman lɛ die ǹ kũ ǹ wo-n walan doo. A die a goã walan yǎa Lawa a wúlu-bɔlen kiã kɛ giɛ̃, ǹ nyɔɔ sonbore lɔ ǹ mɛn lɛ-a, ǹ nə́ koa.

²⁶ Sɛnɛ, gɛ̀-dɛle lɛ wo n duru duru ǹ kiwi mɛn nɛ, bɛ̀ á bɛ da a kio,

²⁷ yǎa gɛ̀ dòo-bɔle lɛ yɛ bǎã kɔsɔ nɛ, bɛ ná a bie ka duru ǹ kiwi kɛ-n wa, bɛ̀ gɛ̀ dòo-bɔle lɛ dɛ, gɛ̀ lɛ a dɔlɔ ba kuĩ a mìi-n wa.

²⁸ Sonbore, gɛ̀-dɛle lɛ doamaa nɛ a giã mìi duru ǹ kiwi lɛ nɛ, yǎa Lawa a wúlu-bɔlen kiã lɛ giɛ̃. Bɛa gɛ̀ kio, á boe la a wusoo a da a giã ǹ bǎã nɛ.

²⁹ «Bɛ n die goɛ̃ sii zɛnaa ǹ gɔn lɛa Izirayeli minin mìi ni biikoo yii li, ta maǹ bǎã woo bǎã nɛ.

³⁰ Gɛ̀-dɛ sii tumaa gɔ́ɔ̃ nɛ, gɛ̀-dɛle lɛ ba n dii, bɛ̀ siére didi ná a boo da wa. Ka a boe la ka gɛ̀ dɔlɔ bɔ min ganaa, siére goon dinsɔɔ̃ a da ǹ boo taman yii wa.

³¹ Bɛ̀ gɛ-dɛli mɛn doamaa-n ka gɛ̀ nɛ, ka baran toa ka paa si, ka a yii toa koo wa. Ka dɛ a gã.

³² Bɛ̀ gɛ̀-dɛle mɛn dɔ́ baa si á woo n duru duru ǹ kiwi, ka baran toa ka lɛ kɔ ka paa si bɛ dɔ la, a n bɔyaa a da a giã ǹ bǎã nɛ, Lawa a wúlu-bɔlen kiã kɛ ná a tɔn gã wa.

³³ Ka bɛ́ re goɛ̃ gána mɛn lɛ nɛ, ka doamaa bie ka bɛ gɔgɔrɛ kɔ wa. Sonbore, gɛ̀-dɛ n sii lɛa, sii mɛn nə́ ke gána gɔgɔrɛ koe. Bɛ̀ ǹ nə́ mà kaa gána lɛ nɛ, màn kɔn ba boe la a bɛ tuturu wa, yǎa mà-kaali lɛ mà.

³⁴ Gána mɛn lɛ bɛ́ ka n die giɛ̃ a nɛ, masɛ dinmaa dɔ́ n die goɛ̃ ka bii a nɛ, ka die ka yiri bɔ kəni, ka baran bɛ gɔgɔrɛ kɔ wa. Masɛ din nə Dɛnaa Lawa lɛa, má ń Izirayeli minin lɛn bii.»