Minin nimi 34 - LAWA A BOO SONBORE

Kanaan gána gèlè

¹ Dɛnaa Lawa boo da Muizu ni á pɛ

² mà a boo da Izirayeli minin lɛn nɛ, a pɛ ǹ nɛ: «Bɛ̀ ka wɔ Kanaan gána lɛ nɛ, bǎã lɛ a kɛ n die kaawɔ biɛ, a n lɛ doa ka gèlèn kɛn nɛ:

³ gusin a lɛ̀gɔn la, kaa bǎã gèlè n die n doɛ ka Sini diə gole laanka Edɔmu gána nɛ. Lɛ̀giala gɔn la, kaa gèlè lɛ n die siɛ tán Yìsi mu kɔsɛ kɔsɛ kɛa lɛ doa ǹ bǎã nɛ gusin a lɛ̀gɔn la,

⁴ a kiɛ̃ a n pusu a bɔ tonən kele kɛa gusin a lɛ̀gɔn la, a kiɛ̃ a bɔ Sini, a wo bɔ Kadɛsi-Barneya a gusin a lɛ̀gɔn la, a wusoo a wo Hasara-Adaara li, a kiɛ̃ a bɔ Asimɔn.

⁵ Gèlè lɛ n die n toɛ Asimɔn, a n pusu a wo Ezipti a lɛ̀giala gɔn la tà kɛ ganaa, a kiɛ̃ a n doa yìsi mu ganaa.

⁶ Lɛ̀ nyɛɛngɔn la, yìsi mu kɛ n die n biɛ ka gèlè lɛa.

⁷ Gɔsɛ a lɛ̀gɔn la, ka die ka kaa gèlè lɛ bɔ tán yìsi mu kɛ laanka Hɔrɔ kele kɛ biin ni.

⁸ Ka die ka n toa ka gèlè lɛ nɛ Hɔrɔ kele lɛ li, ka bɔ ka wo ne yǎa Lebo-Amaati. Gèlè lɛ die a n lɛ doa Sedaa ganaa,

⁹ Bɛ kio, a wusoo a n yɔrɔ dia Zifrɔn li, a kiɛ̃ a wo n lɛ doa Hasaara-Eyinan ganaa. Ka gèlè n die goɛ̃ miɛ̃ gɔsɛ a lɛ̀gɔn la.

¹⁰ Lɛ̀giala gɔn la, ka n toa Hasaara Eyinan, ka gèlè lɛ bɔ ka wo ne Sefan li.

¹¹ Gèlè lɛ die a n toa Sefan a wo Ribla li Ayini a lɛ̀giala gɔn la, bɛ kio, a wo n lɔ tentenen kɛn ganaa Kinerɛti yìsi mu a lɛ̀giala gɔn la.

¹² Gèlè lɛ die a da yǎa Zurdɛ̃ tà li, a kiɛ̃ a wo n lɛ doa yìsi mu kɔsɛ kɔsɛ kɛ ganaa. Kaa gána lɛ n die goɛ̃ miɛ̃, ka a gèlèn ne.»

¹³ Muizu wusoo á boo da Izirayeli minin lɛn nɛ, á pɛ: «Gána lɛ din nə ke, kɛ lɛ ka n die n piɛ̃ a ganaa ka didie wɔ gii kɔ la. Dɛnaa Lawa na á pɛ mà asɛ n die bɛa gána lɛ koe tɔrɔ manangɔrɔ ka talɛɛ kɛ la.

¹⁴ A giala, Urubɛn tɔrɔn kion minin ni, Gaadi tɔrɔn kion minin ni, ka Manaasee tɔrɔn talɛɛ nɛ, bɛn nə́ saa lɛlɛ ǹ nə́ ǹ bǎã yɛ.

¹⁵ Bɛa tɔrɔ paa ka talɛɛ kɛ lɛ ná a bǎã yɛ Zurdɛ̃ tà kio, Zerikoo kiwi yɔrɔ-a, dia-n woe lɛ̀giala li.»

Min mɛnɛn bɛ́ bǎã lɛ a gii mìi la

¹⁶ Dɛnaa Lawa boo da Muizu ni, á pɛ:

¹⁷ «Giĩn mɛnɛn bɛ́ re gána lɛ gii ǹ ni, bɛn tɔn nə́ ke: Lawa a wúlu-bɔle Eleyazaara nɛ, ka Nunu a nɛgiĩ Zozoe ne.

¹⁸ Ka die ka nyɛɛnaandɛnaa goon bɔ tɔrɔ lɛ gogoonmaa bii, ka a gòɛ̃ wɔ gána lɛ a gii ni.

¹⁹ Bɛa minin lɛn tɔn nə́ ke: Zudaa tɔrɔn bii: Zefunee a nɛgiĩ Kalɛbu ni.

²⁰ Simiɔn tɔrɔn bii: Amiwudu a nɛgiĩ Semuweli ni.

²¹ Bɛnzamɛn tɔrɔn bii: Kislɔn a nɛgiĩ Elidaadi ni.

²² Dan tɔrɔn bii: Zɔgli a nɛgiĩ Bukii ni.

²³ Zozɛfu a nɛgiĩ Manaasee tɔrɔn bii: Efodi a nɛgiĩ Aniyeli ni.

²⁴ Zozɛfu a nɛgiĩ Efrayimu tɔrɔn bii: Siftan a nɛgiĩ Kemuyeli ni.

²⁵ Zabulɔn tɔrɔn bii: Parnaaki a nɛgiĩ Elisafan nɛ.

²⁶ Isakaara tɔrɔn bii: Azan a nɛgiĩ Paltiyeli ni.

²⁷ Asɛɛrɛ tɔrɔn bii: Selomi a nɛgiĩ Ayiwudu ni.

²⁸ Nɛfutalii tɔrɔn bii: Amiwudu a nɛgiĩ Pedayele ne.»

²⁹ Dɛnaa Lawa min mɛnɛn bɔ mà ǹ Kanaan gána lɛ gii Izirayeli tɔrɔn lɛn bii, ǹ dinin man ka kɛn nɛ.