Minin nimi 32 - LAWA A BOO SONBORE

Tɔrɔ sɔɔ n giɛ̃ Zurdɛ̃ tà a lɛ̀ giala gɔn la

¹ Urubɛn tɔrɔn laanka Gaadi tɔrɔn tɔɔn man nə́ goã mɔnaa-n taãn-taãnɛ. Ǹ nə́ tɔ́n yɛ, mà Yazɛɛrɛ bǎã laanka Galaati gána tá tɔɔn sii.

² Bɛ lɛ n ke, ǹ nə́ woo Muizu laanka Lawa a wúlu-bɔle Eleyazaara li, ka zaman lɛ a nyɛɛnaandɛnan nɛ, ǹ nə́ pɛ ǹ nɛ:

³ «Atarɔti kiwi ni, Dibɔn kiwi ni, Yazɛɛrɛ kiwi ni, Nimura kiwi ni, Ɛsibɔn kiwi ni, Eleyale kiwi ni, Sebamu kiwi ni, Neboo kiwi ni, ka Bewɔn kiwi ni,

⁴ bɛa bǎãn kɛn lɛn Izirayeli minin nə́ boo ǹ la ǹ nə́ ǹ si ka Dɛnaa Lawa a dɔmalɛ nɛ, ǹ tá tɔɔn sii. Á ke, tɔɔn man wɔsɛn lon.»

⁵ Ǹ nə́ wusoo doo ǹ nə́ pɛ Muizu ni: «Bɛ̀ n tá bǐɛ̃ koe wɔsɛn ganaa, bɛa gána kɛ lɛ wɔsɛn wɔ baa, n baran wo ka wɔsɛn nɛ Zurdɛ̃ tà kio wa.»

⁶ Sɛnɛ Muizu pɛ Gaadi tɔrɔn lɛn laanka Urubɛn tɔrɔn lɛn manɛ: – Ka dɔɔ̃nɔn kɛn man die woe zia la, kasɛn nə n zɔ̃ ka giã kànaa koɛ?

⁷ Dɛnaa Lawa bɛ́ gána mɛn koe Izirayeli minin lɛn la, wàa na á baa ka tá Izirayeli minin lɛn gù dii ka bɛa woo ne?

⁸ Ka digolon dɔn man nə́ goã ǹ nə́ bɛa sã kɛ lɛ tɔrɔ wɔ, bɛ̀ masɛ bɛ́ má n toa Kadɛsi-Barneya má ǹ dia máa ǹ wo ga Kanaan gána lɛ ganaa.

⁹ Maǹ nə́ goã ǹ nə́ woo yǎa Ɛsikɔli a nyankɔrɔ lɛ kɛ nɛ, ǹ nə́ ga gána lɛ ganaa. Ǹ bɛ́ ǹ nə́ n bɔyaa biikoo mɛn li, Dɛnaa Lawa bɛ́ mà asɛ á gána mɛn lɛ koe ǹ la, ǹ nə́ Izirayeli minin gialakunun gù dɛ ka bɛa gána lɛ a woo ne.

¹⁰ Dɛnaa Lawa foo goã á yoo bɛa pinaa kɛ lɛ-n taãn-taãnɛ, á tɔ́n nə n liɛ kɛnɛn:

¹¹ «Min mɛnɛn nə soo Ezipti gána lɛ nɛ, ǹ lɛ̀ ń lɛ̀ fuə, ka lɛ̀ fuə ka kio ne, bɛn kɔn yii ba re gána kɛ yii wa, masɛ nə n lɛ kɔ ka ǹ mɛn lɛ nɛ, máa ma á koe Abrahamu la, ka Izaaki laanka Zakɔba nɛ. A giala, ǹ kɔ ma lɛ ka ǹ yɔrɔ-n wa.

¹² Zefunee a nɛgiĩ Kalɛbu ke Kenii tɔrɔ lɛa, bɛ laanka Nunu a nɛgiĩ Zozoe dinsɔɔ̃ n die we gána lɛ nɛ, a giala ǹ nə́ kɔ masɛ lɛ ka ǹ yɔrɔ nɛ.»

¹³ Muizu mà bɛ lɛ n ke, Dɛnaa Lawa foo yoo Izirayeli minin lɛn li á ǹ kaa birin bɔ ganaa lɛ̀ pusi, diə gole gɔ́ɔ̃ nɛ, yǎa bɛa biikoo lɛ a minin tumaa gã ǹ nə́ nya. Sii mɛn bɛ́ a ba Dɛnaa Lawa foo sii wa, bɛa biikoo lɛ a minin man nə́ bɛ zɛnaa.

¹⁴ Á ke, ka dɔn man ka yoo tán ka digolon lɛn bǎã nɛ, sii baraa-zɛnaali tɔrɔn lɛa, ka n màn diɛ Dɛnaa Lawa a foo-yoo li, Izirayeli minin wɔ paǹ li.

¹⁵ Sonbore, bɛ̀ ka kanaa ka n bɔ Dɛnaa Lawa kio, a n die wusii a toa Izirayeli minin nə belebɔ diə gole lɛ nɛ. Bɛa yɔrɔ lɛ la, ka n die zaman kɛ lɛ tumaa bɔ̀n biɛ.

¹⁶ Bɛa minin lɛn nə́ wusoo ǹ nə́ n zɔ̃ ǹ nə́ dɔ Muizu li, ǹ nə́ pɛ nɛ: «Wɔsɛn man die zìã doe kànaa wɔa tɔɔn wɔn lɛa, wɔ kiwin dɔ a nɛ wɔa kion minin wɔn lɛa.

¹⁷ Bɛ kio, wɔ tá re n nanaɛ wɔ wɔa ziabaa ǹ mànan goa, wɔ kiɛ̃ wɔ mɛ̀ Izirayeli min gialakun lɛ nyɛɛnɛ, yǎa wɔ woe doe ǹ ne ǹ bǎã nɛ. Bɛa biikoo li, wɔa kion minin tá re goɛ̃ kiwi kungɔndɛnan kɛn nɛ, ǹ nə́ tamaa nɛ gána lɛa minin ganaa.

¹⁸ Wɔ ba n bɔyɛɛ wɔ da piɛ wa, yǎa Izirayeli min gogoonmaa na a bǎã yii.

¹⁹ Sɛnɛ, bǎã ba re doe wɔ ganaa ǹ li, Zurdɛ̃ tà kio lɛ-n wa, a giala wɔsɛn bǎã tá paǹ kɛ ganaa, Zurdɛ̃ tà a lɛ̀ giala gɔn la.»

²⁰ Bɛ kio, Muizu pɛ ǹ nɛ: «Bɛ̀ ka bɛ zɛnaa, bɛ̀ ka ziabaa ǹ mànan goa Dɛnaa Lawa yɔrɔ-a ka woo zia la,

²¹ bɛ̀ kaa sɔraasin tumaa Zurdɛ̃ tà lɛ kuru Dɛnaa Lawa yɔrɔ-a, yǎa Dɛnaa Lawa na a zɔ́ɔn tumaa loo a ǹ bɔ a nyɛɛnɛ,

²² bɛ̀ ka n bɔyaa wa, ka gole miɛ̃ yǎa Dɛnaa Lawa gána lɛ da a pàã giulun, zɛ̀rɛ ba re ka kuĩ Dɛnaa Lawa laanka Izirayeli minin wɔ paǹ li wa. Bǎã kɛ lɛ tán, a n die goɛ̃ kaa wɔ lɛa Dɛnaa Lawa yɔrɔ-a.

²³ Sɛnɛ, bɛ̀ ka zɛnaa miɛ̃ wa, ka n sii liɛ Dɛnaa Lawa la. Ka dɔ̃ sɛn, mà kaa sii baraa lɛ tá ka kio.

²⁴ Ka kiwin dɔ ka ǹ kɔ ka kion minin la, ka zìã dɔ kaa tɔɔn wɔn lɛa. Sɛnɛ, lɛ-kɔ ǹ boo mɛn nə soo ka lɛ-n, ka bɛ lɛ pã.»

²⁵ Gaadi tɔrɔn lɛn laanka Urubɛn tɔrɔn lɛn nə́ tɔ́n pɛ Muizu ni: «N boo mɛn pɛ wɔ nɛ, wɔ á re a sii zɛnɛɛ.

²⁶ Wɔa lɔn nɛ, wɔa nɛnyaanan nɛ, wɔa tɔɔn nɛ, ka wɔa dí nya ǹ tɔɔn nɛ, wɔ n die bɛn toɛ kànaa, Galaati kiwin ni.

²⁷ Bɛ kio kəni, ziabaa ǹ mànan bɛ́ wɔ mɛnɛn tumaa ganaa wo ziabaa taman yii, wɔ á re kiɛ̃ Dɛnaa Lawa yɔrɔ-a wɔ wo zia lɛ la, ka wɔa dɛnaagiĩ pɛ lɔn.»

²⁸ Muizu tɔ́n dí pɛ Lawa a wúlu-bɔle Eleyazaara nɛ, ka Nunu a nɛgiĩ Zozoe laanka Izirayeli tɔrɔn lɛn kɛdɛnan nɛ. Bɛa dí lɛ yɔrɔ na á goã dia-n Gaadi tɔrɔn kɛn laanka Urubɛn tɔrɔn kɛn la.

²⁹ Muizu lɛ na á pɛ ǹ nɛ: «Bɛ̀ Gaadi tɔrɔn lɛn laanka Urubɛn tɔrɔn lɛn nə́ ǹ ziabaa ǹ mànan goa ǹ nə́ Zurdɛ̃ tà kɛ kuru kun ka nɛ, ǹ nə́ woo zia baa Dɛnaa Lawa yɔrɔ-a, ǹ nə́ n dɔ ka lɛ ǹ nə́ gána lɛ da ka pàã giulun, ka die ka Galaati gána kɛ kɔ ǹ la ǹ bǎã lɛa.

³⁰ Sɛnɛ, bɛ̀ Gaadi tɔrɔn lɛn laanka Urubɛn tɔrɔn lɛn nə bɛ zɛnaa wa, bǎã doamaa nɛ a dɔ ǹ ganaa ka dinin kɛn lɛn li Kanaan gána lɛ nɛ.»

³¹ Gaadi tɔrɔn lɛn laanka Urubɛn tɔrɔn lɛn nə́ wusoo ǹ nə́ pɛ doo: «Dɛnaa Lawa boo mɛn pɛ wɔsɛn nɛ, wɔ tá re bɛ zɛnɛɛ.

³² Wɔ n die wɔ ziabaa ǹ mànan goɛ wɔ wo kaa Kanaan gána lɛ nɛ Dɛnaa Lawa yɔrɔ-a, màn mɛn bɛ́ toɛ wɔ wɔa bǎã gii yɛ Zurdɛ̃ tà lɛ a para kɛ nɛ.»

³³ Muizu Amɔɔrɔ tɔrɔn kii Sihɔn a gána laanka Basan kiwi a kii Ɔgu a gána kɔ Gaadi tɔrɔn lɛn laanka Urubɛn tɔrɔn la, ka Zozɛfu a nɛgiĩ Manaasee tɔrɔn kɛn talɛɛ nɛ. A na á bɛa gánan lɛn kɔ ǹ la kɔnlɛ ka ǹ lɛkoro lɛ-a bǎãn nɛ.

³⁴ Gaadi tɔrɔn lɛn nə́ wusoo ǹ nə́ Dibɔn kiwi dɔ, Atarɔti kiwi ni, Aroɛɛrɛ kiwi ni,

³⁵ Atrɔti-Sofan kiwi ni, Yazɛɛrɛ kiwi ni, Zogbaa kiwi ni,

³⁶ Bɛti-Nimura kiwi ni, ka Bɛti-Haran kiwi ni. Ǹ nə́ bɛa kiwi kungɔndɛnan lɛn dɔ, ka sèren kaa ǹ bǎãn dɔn nɛ.

³⁷ Urubɛn tɔrɔn nə́ wusoo ǹ nə́ Ɛsibɔn kiwi dɔ, Eleyale kiwi ni, Kiriyatayimu kiwi ni,

³⁸ Neboo kiwi ni, Baali-Mehɔn kiwi ni, ka Sibma kiwi ni. Ǹ wusoo ǹ nə́ kiwin mɛnɛn lɛn dɔ, ǹ nə́ tɔ dii wɔ ǹ tɛnɛn ganaa.

³⁹ Manaasee a nɛgiĩ Makiiri tɔrɔn man nə́ woo Galaati gána nɛ, ǹ nə́ gána lɛ si ka pàã nɛ ǹ nə́ baa ǹ wɔ lɛa, Amɔɔrɔ tɔrɔn mɛnɛn nə goã giã nɛ a nɛ, ǹ nə́ bɛn loo.

⁴⁰ Muizu tɔ́n Galaati gána lɛ kɔ Manaasee a nɛgiĩ Makiiri la, á giã a nɛ.

⁴¹ Yayiiri ke Manaasee a nɛgiĩ kɔsɔ lɛa, bɛ tɔrɔn nə́ woo Amɔɔrɔ tɔrɔn kiwin si ka pàã nɛ ǹ nə́ ǹ baa ǹ wɔn lɛa. Ǹ nə́ bɛa kiwin lɛn bíi "Yayiiri a kiwin".

⁴² Nobaa dɔ́ woo Kenati kiwi si á baa a wɔ lɛa, kɔnlɛ ka a lɛkoro lɛ-a bǎãn nɛ. Á n din tɔ taãn kɔ kiwi lɛ-a, mà Nobaa.