Minin nimi 29 - LAWA A BOO SONBORE

Bɛnɛn pɛ ǹ zɔ́n a wúlu màn

¹ «Lɛ̀ a mui sɔbaabaa ǹ wɔ a giala kɔ pinaa, ka n sɔkɔn ka Dɛnaa Lawa guguru kɔ. Ka baran n gɔn da dí kaka ganaa bɛa pinaa kɛ lɛ-n wa. Bɛnɛn pɛ ǹ zɔ́n nɛ.

² Ka die ka dii gɔ̀lɔ̀ goon baa wúlu màntiɛ̃ gìĩ kɔɔ̃n lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ, ka ǹ kɔ Dɛnaa Lawa la. Ka baran toa wɔ̀lɔ̀ goã ǹ kɔn ganaa wa.

³ *Wùsu sonbore mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ka bɛ da kun ka tɔɔ lɛ gogoonmaa nɛ. Dii gɔ̀lɔ̀ kɛ wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ goã kilo sɔrɔ,

⁴ sère nɛ sɔbaa lɛ a gogoonmaa wɔ goã kilo sɔɔ.

⁵ Ka bɛ dɔ nɛ, ka butumu goon bɔ sii baraa sawaa ǹ *wúlu màn lɛa, ka sii baraa sawaa ǹ sii zɛnaa ka ganaa nɛ.

⁶ Bɛa wúlu mànan kɛn lɛn tumaa n die kiɛ baraabaraa a wúlu màn tiɛ̃ kɛ li, ka mui dii a wúlu màn tiɛ̃ kɛ nɛ, kɔnlɛ ka Lawa gɔ ǹ wùsu kɛ laanka Lawa gɔ ǹ duvɛ̃ kɛ nɛ, bɛ̀ ka goã bɛ̀ ka ti ǹ ganaa. Bɛn man wúlu màn-bii tiɛ̃ lɛa, ǹ gìĩ ń kɔɔ̃n Dɛnaa Lawa ganaa.

Sii baraa toa ǹ lɛawaa a wúlu màn

⁷ «Lɛ̀ a mui sɔbaabaa ǹ wɔ kɛ a lɛawaa fùbaa ǹ wɔ pinaa, ka die ka n sɔkɔn ka Dɛnaa Lawa guguru kɔ, ka n lɛ sɔɔ, ka n ka a ǹ gɔn diɛ dí kaka kɔn ganaa wa.

⁸ Ka die ka dii gɔ̀lɔ̀ goon baa wúlu màn tiɛ̃ gìĩ kɔɔ̃n lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ, ka ǹ kɔ Dɛnaa Lawa la. Ka baran toa wɔ̀lɔ̀ goã ǹ kɔn ganaa wa.

⁹ Wùsu sonbore mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ka bɛ da kun ka tɔɔ lɛ gogoonmaa nɛ. Ka dii gɔ̀lɔ̀ kɛ wɔ n goɛ̃ wùsu sonbore kilo manangɔrɔ, sère gɔ̀lɔ̀ kɛ wɔ goã kilo sɔrɔ,

¹⁰ sère nɛ sɔbaa lɛ a gogoonmaa wɔ goã kilo sɔɔ.

¹¹ Ka bɛ dɔ nɛ, ka butumu goon baa sii baraa sawaa ǹ wúlu màn lɛa, ka da sii baraa toa ǹ lɛawaa gole kɛa sii baraa sawaa ǹ wúlu màn lɛ la, ka baraabaraa a wúlu màn tiɛ̃ kɛ laanka a Lawa gɔ ǹ wùsu kɛ nɛ, ka Lawa gɔ ǹ duvɛ̃ kɛ nɛ bɛ̀ ka ti ǹ ganaa.

Giã siã giulun zɔ́n a wúlu màn

¹² «Lɛ̀ a mui sɔbaabaa ǹ wɔ lɛ a lɛawaa fulusoorobaa ǹ wɔ pinaa, ka n sɔkɔn ka masɛ Dɛnaa Lawa guguru kɔ. Ka baran n gɔn da dí kaka kɔn ganaa wa. Ka zɔ́n zɛnaa lɛawaa sɔbaa, ka masɛ Dɛnaa Lawa guguru kɔ nɛ.

¹³ A lɛawaa bibinaa li, ka dii gɔ̀lɔ̀ fulusɔɔ baa wúlu màn tiɛ̃ gìĩ kɔɔ̃n lɛa, ka sère gɔ̀lɔ̀ paa laanka lɛ̀ goon sère nɛ fulusii ni, ka ǹ kɔ masɛ Dɛnaa Lawa la. Ka baran toa wɔ̀lɔ̀ goã ǹ kɔn ganaa wa.

¹⁴ Wùsu mɛn bɛ́ á n yia ka nyɔɔ nɛ, Lawa gɔ ǹ wɔ lɛa, ka bɛ da kun ka tɔɔ lɛ gogoonmaa nɛ. Dii gɔ̀lɔ̀ fulusɔɔ lɛ a gogoonmaa wɔ n goɛ̃ wùsu sonbore kilo manangɔrɔ, sère gɔ̀lɔ̀ paa kɛa gogoonmaa wɔ goã kilo sɔrɔ,

¹⁵ sère nɛ fulusii kɛ a gogoonmaa wɔ goã kilo sɔɔ.

¹⁶ Ka bɛ dɔ nɛ, ka butumu goon baa sii baraa sawaa ǹ wúlu màn lɛa, ka da baraabaraa a wúlu màn tiɛ̃ kɛ la, ka Lawa gɔ ǹ wùsu kɛ laanka Lawa gɔ ǹ duvɛ̃ kɛ nɛ bɛ̀ ka ǹ ti a ganaa.

^17-34 A kũ a lɛawaa paabaa ǹ wɔ ganaa a wo dɔ a sɔbaabaa ǹ wɔ ganaa, ka die ka wúlu bɔ ka tɔɔn nɛ, wɔ̀lɔ̀ ná a ba ǹ ganaa wa. Ka bɛ́ goɛ̃ bɛ̀ ka wúlu mànan mɛnɛn dɔn ti ǹ ganaa, ka bɛn kaa kunun ǹ ni. Ka bɛ́ re wúlu boe ka tɔɔn mɛnɛn lɛn nɛ, bɛn man ke: Lɛawaa paabaa ǹ wɔ pinaa: dii gɔ̀lɔ̀ fulupaa, sère gɔ̀lɔ̀ paa, lɛ̀ goon sère nɛ fulusii, ka butumu goon ne. Lɛawaa sɔɔbaa ǹ wɔ: dii gɔ̀lɔ̀ fulugoon, sère gɔ̀lɔ̀ paa, lɛ̀ goon sère nɛ fulusii, ka butumu goon ne. Lɛawaa siibaa ǹ wɔ: dii gɔ̀lɔ̀ fù, sère gɔ̀lɔ̀ paa, lɛ̀ goon sère nɛ fulusii, ka butumu goon ne. Lɛawaa soorobaa ǹ wɔ pinaa: dii gɔ̀lɔ̀ manangɔrɔ, sère gɔ̀lɔ̀ paa, lɛ̀ goon sère nɛ fulusii, ka butumu goon ne. Lɛawaa sɔrɔbaa ǹ wɔ: dii gɔ̀lɔ̀ kiwisi, sère gɔ̀lɔ̀ paa, lɛ̀ goon sère nɛ fulusii ka butumu goon ne. Lɛawaa sɔbaabaa ǹ wɔ: dii gɔ̀lɔ̀ sɔbaa, sère gɔ̀lɔ̀ paa, lɛ̀ goon sɛ̀re nɛ fulusii, ka butumu goon ne.

³⁵ «Zɔ́n lɛ a lɛawaa kiwisibaa ǹ wɔ pinaa nə n biɛ a nya lɛa, ka baran n gɔn da dí kaka kɔn ganaa wa.

³⁶ Ka die ka dii gɔ̀lɔ̀ goon baa wúlu màn tiɛ̃ gìĩ kɔɔ̃n lɛa, ka sère gɔ̀lɔ̀ goon laanka lɛ̀ goon sère nɛ sɔbaa nɛ, wɔ̀lɔ̀ ná a ba ǹ ganaa wa.

³⁷ Ka bɛ́ nɛn bɛ̀ ka Lawa gɔ ǹ wùsu sonbore laanka Lawa gɔ ǹ duvɛ̃ mɛn ti wúlu bɔ ǹ tɔɔ ganaa, ka die ka bɛn ti tɔɔ lɛ a gogoonmaa ganaa.

³⁸ Ka bɛ dɔ nɛ, ka butumu goon baa sii baraa sawaa ǹ wúlu màn lɛa, ka da baraabaraa a wúlu màn tiɛ̃ kɛ la, ka Lawa gɔ ǹ wùsu kɛ laanka Lawa gɔ ǹ duvɛ̃ kɛ nɛ, bɛ̀ ka ǹ ti ǹ ganaa.

³⁹ Ka die ka bɛa mànan kɛn lɛn kɔ Dɛnaa Lawa la, kaa lɛawaa dadaran pinaa, ka ǹ kaa kaa lɛ kɔ ǹ wúlu mànan kɛn la, ka ka bɛ́ wúlu mànan mɛnɛn boe ka dinin li, wúlu màn tiɛ̃n nɛ, Lawa gɔ ǹ wùsu ni, Lawa gɔ ǹ duvɛ̃ nɛ, ka barka da ǹ wúlu mànan nɛ.»