Minin nimi 25 - LAWA A BOO SONBORE

Izirayeli minin dì wúlu bɔ

¹ Izirayeli minin lɛn nə́ giã Sitimu. Ǹ ná a giala kɔ walan ǹ nə́ narɛbaa zɛnɛɛ kun ka Moabu gána lɔn nɛ.

² Bɛa lɔn lɛn man nə́ goã lɛ diɛ Izirayeli zaman lɛ la, ǹ dì wúlu bɔn ganaa. Zaman lɛ dɔ na á goã woe màn bii, bɛ̀ ǹ nə ǹ dìn lɛn guguru kɔ.

³ Izirayeli minin lɛn nə́ n mìi paraa Pewɔɔrɔ minin dì *Baali kɛa sii ni, Dɛnaa Lawa foo tɔ́n yoo ǹ li taãn-taãnɛ.

⁴ Bɛ kio, Dɛnaa Lawa pɛ Muizu-n kɛnɛn: «Zaman lɛ a nyɛɛnaandɛnan tumaa kũ, n nə ǹ bɔlɔ yu lon masɛ yɔrɔ-a wasa nɛ, màn mɛn bɛ́ toɛ maa foo yoo gole kɛ nə n bɔ ka wɔlɔ li.»

⁵ Muizu tɔ́n pɛ Izirayeli minin lɛn sii yɔrɔ bɔlen manɛ: «Ka gogoonmaa a minin bii, min mɛnɛn nə n mìi paraa Pewɔɔrɔ minin dì Baali kɛ a sii ni, ǹ didie na a wɔn dɛ.»

⁶ Bɛa biikoo kɛ lɛ nɛ, bɛ̀ Izirayeli minin lɛn goon nə́ ke á daa n dɔ ǹ dɔɔ̃nɔn lɛn bii, Madiã gána lɔ goon nə́ kun ni. A Muizu laanka Izirayeli zaman lɛ tumaa toa wuu pii kɔn yɛ ka Lawa nɛ ǹ kion kɛa kiɛnlɛ-a, ǹ yii bɛa min paa lɛ yɛ.

⁷ Ǹ bɛ́ ǹ nə́ ǹ yɛ miɛ̃, Lawa a wúlu-bɔle Pinasi ke, Eleyazaara a nɛ lɛa, Aarɔn a nɔ̀ɔn lɛa, bɛ́ yoo á n bɔ tán zaman lɛ bii, á n daa sɛmiɛ̃ la.

⁸ Izirayeli min lɛ wɔ mɔnaa zìã mɛn nɛ ka lɔ lɛ nɛ, Pinasi wɔ a kio walan, á sɛmiɛ̃ dere ǹ dinin paanan nɔ̀ nɛ, ǹ nə́ gã. Bɛa bǎã-n gɔrɔ, koe mɛn goã Izirayeli minin lɛn gialaa, bɛ nə́ n bɔ ǹ mìi ni.

⁹ Koe lɛ bɔ min mɛnɛn ganaa ǹ nə́ gã, maǹ min duu fuəwensii (24 000).

¹⁰ Dɛnaa Lawa boo da Muizu ni, á pɛ:

¹¹ «Lawa a wúlu-bɔle Pinasi ke, Eleyazaara a nɛ lɛa, Aarɔn a nɔ̀ɔn lɛa, bɛ na á ma foo da waa ganaa Izirayeli minin lɛn li. A giala, maa sii kaka kɔ a gɔn Izirayeli minin lɛn bii, ka n pɛ mà masɛ din ni. Bɛ lɛ n ke, a laanɛ masɛ tá n liɛ ǹ Lawa goon toto lɛa, ma ǹ bɔ̀n baa lenlen wa.

¹² Bɛ lɛ tɔ ganaa, a pɛ Pinasi lɛ nɛ, mà masɛ Lawa n lɛ kɔ kɔn la we ne, lɛ kɔ kɔn la mɛn bɛ́ re là nyantoro koe.

¹³ Bɛa lɛ kɔ kɔn la kɛ lɛ n die goɛ̃ a din wɔ lɛa, ka a tɔrɔn nɛ. A din lɛ kɔ kɔn la kɛ lɛ n die toɛ, wúlu bɔ ǹ dí goã ǹ wɔ lɛa miɛ̃ duduu. A giala, á nyaa mà a Lawa lɛ sii á kaka a gɔn, ka bɛ dɔ nɛ, á Izirayeli minin lɛn sii baraa sawaa ǹ sii zɛnaa.»

¹⁴ Ǹ Izirayeli min mɛn lɛ dɛ, kɛ lɛ ǹ nə́ dɛ kun ka Madiã gána lɔ lɛ nɛ, a tɔ n Zimirii. Saluu a nɛ nɛ, a n Simiɔn tɔrɔn nyɛɛnaandɛnaa goon lɛa.

¹⁵ Madiã lɔ lɛ sɛ tɔ n Kozbii, ǹ di tɔ n Suuru. Suuru lɛ na á goã Madiã gána a tɔrɔ kɔn a tanlɛ gigiã nyɛɛnaandɛnaa lɛa.

¹⁶ Bɛ kio, Dɛnaa Lawa boo da Muizu ni, á pɛ:

¹⁷ «Ka n yii dɔraa Madiã gána minin lɛn li, ka ǹ dɛ lenlen.

¹⁸ A giala, Madiã minin lɛn man nə́ yiri baraa bɔ, ka n yii dɔraa ǹ dɔn li. Maǹ nə́ yiri baraa bɔ ka li, ǹ nə́ ka mìi dɔ ka li Pewɔɔrɔ a sii kɛ gɔ́ɔ̃ nɛ, ka ǹ dɔɔ̃nlɔ Kozbii wɔ kɛ nɛ, Kozbii mɛn lɛ á ke Madiã gána a nyɛɛnaandɛnaa a nɛlɔ lɛa, ǹ nə́ dɛ koe lɛ a pinaa, Pewɔɔrɔ a sii kɛ taman yii.»

Izirayeli minin lɛn nimi a paabaa ǹ wɔ

¹⁹ Koe lɛ a woo kio.