Minin nimi 24 - LAWA A BOO SONBORE

¹ Balaamu yɛ, mà á goã kɔɔ̃n Dɛnaa Lawa ganaa, a barka da Izirayeli minin lɛn ganaa. Bɛ lɛ nɛ, a lɛ kɔ a wo ga sii-nyaan li wa, ka á bɛ́ á goã á woo ga li lɛlɛ lɔn, a gunyin paa. Sɛnɛ, a na á n yɔrɔ bɔyaa gɔrɔ, á dia diə gole kɛ la.

² A bɛ́ á n yii saa á ga, á Izirayeli minin lɛn yɛ, giã nɛ tanlɛ yii li, ǹ giã ǹ bǎã nɛ. Dɛnaa Lawa yiri daa gisĩ la,

³ á tɔ́n bɔ boon kɛn nɛ kɛnɛn á ǹ pɛ: Masɛ, Bewɔɔrɔ a nɛgiĩ Balaamu n boo diɛ. Min mɛn yii bɛ́ sii yii, bɛ n boo diɛ.

⁴ Min mɛn too bɛ́ Lawa a boo miɛ, á n Pàãyiidɛnaa a sii-nyaa yii, á niɛ̃ kiɛ tán a lɛ la, a yii n niɛ̃, bɛ n boo diɛ.

⁵ Ee Zakɔba tɔrɔn lɛn, asɛ-n kaa mɔnaa zìãn kɛn tá siĩni! Izirayeli minin lɛn, kaa giã ǹ bǎãn kɛn tá siĩni!

⁶ Ǹ nə́ n da wɔlɔ la, ka tà mu bɛ́ lɔn. Maǹ ka dù gɔrɔ bɛ́ lɔn tà lɛ-a, ka aloɛsi da bɛ́ lɔn, Dɛnaa Lawa nə́ ǹ zumu. Maǹ ka *sɛdrə da bɛ́ lɔn mu lɛ-a.

⁷ Maǹ ka mu mɛn nə́ ke toɛ̃ dɛn nɛ, bɛ̀ á baa si a kaa da wurun ganaa sɔnbɔraa nɛ. Izirayeli minin lɛn kii á die boe Agaagi la. Ǹ gána á die pàã yii.

⁸ Lawa na á ǹ waa á soo ǹ ne Ezipti gána nɛ. Á pàã kɔ ǹ la, ka don a zũ bɛ́ lɔn. Tɔrɔn mɛnɛn bɛ́ ǹ ziadɛnan lɛa, maǹ bɛn lɔloɛ ǹ lɛ-a, Maǹ nə ǹ wen yɔyɔrɛ, ǹ kiɛ dɔdɔrɔ ǹ ganaa.

⁹ Maǹ nə n kumii, ǹ nə́ wɛɛ tán ka don siĩ bɛ́ lɔn, ká yàra bɛ́ lɔn. Die n boe la a ǹ da yoo ganaa ka pàã nɛ? Bɛ̀ min mɛn nə́ lɛn bǐɛ̃ bíi ǹ li, lɛn bǐɛ̃ nə n bíi bɛa dɛnaa li. Bɛ̀ min mɛn nə́ lɛn baraa bíi ǹ li, lɛn baraa nə n bíi bɛa dɛnaa li.

¹⁰ Balaaki foo yoo Balaamu li. Á n gɔnɔn pɛsɛ̃, á pɛ Balaamu lɛ nɛ: «Man má n bíi máa n da lɛn baraa bíi maa zɔ́ɔn li, sɛnɛ n gunyin sɔɔbaa ǹ wɔ n ke, barka diɛ ǹ ganaa woone.

¹¹ A bɛ́ miɛ̃, n ta n gána nɛ! Ma goã má pɛ n nɛ, má maa á die gugurubaa koe n la taãn-taãnɛ, sɛnɛ á ke Dɛnaa Lawa nə n kurəə bɛa yɛ ganaa.»

Balaamu a boo gɔn nyɔmiɛ̃

¹² Balaamu tɔ́n na a lɛ si: «N goã ń minin mɛnɛn lɛn dia ma li, táa má goã má pɛ ǹ nɛ máa

¹³ ta Balaaki na a kion sana tumaa laanka a kion wɔrɔ tumaa koe masɛ la, ma ba boe la ma bɔ ma din ni, ma sii bǐɛ̃ hinlaa sii baraa kɔn zɛnaa, ma Dɛnaa Lawa bɔlɔ tii-n wa. Dɛnaa Lawa bɛ́ re boo mɛn diɛ, man bɛ lɛ pii.

¹⁴ Kanna kəni, man die woe ma tɔrɔ minin li. Sɛnɛ, Izirayeli minin lɛn bɛ́ re sii mɛn zɛnɛɛ ka nyɛɛn biɛ̃, Balaaki, n tɔrɔ minin manɛ, daa ma bɛ lɛ pɔrɔ n nɛ.»

¹⁵ Balaamu tɔ́n bɔ boon kɛn nɛ kɛnɛn á ǹ pɛ: Masɛ Bewɔɔrɔ a nɛgiĩ Balaamu n boo diɛ. Min mɛn yii bɛ́ sii yii, bɛ n boo diɛ.

¹⁶ Min mɛn too bɛ́ Lawa a boo miɛ, min mɛn bɛ́ lon a Lawa gɔ́ɔ̃ miɛ, á n Pàãyiidɛnaa a sii-nyaa yii, á n niɛ̃ kiɛ tán a lɛ la, a yii n niɛ̃, bɛ n boo diɛ.

¹⁷ Sii mɛn bɛ́ die, ma yii tá-a, sɛnɛ, pelo sii bie wa. Sii mɛn bɛ́ re n zɛnɛɛ, má n yiin doa la, sɛnɛ, a ba foɛɛ̃n wa. Leere á re boe Zakɔba tɔrɔn bii, kii á re yui tán Izirayeli minin bii, a n die Moabu gána minin para giala wurii, a Sɛɛti tɔrɔn tumaa dɛ.

¹⁸ A n die Edɔmu gána kuĩ a giã la, a n die a zɔ́ɔ, Seyiri gána kɛ kuĩ a giã la. Izirayeli minin man die gɔ̀lɔ̀ biɛ.

¹⁹ Zakɔba tɔrɔ lɛ n die giɛ̃ a ziadɛnan mìi la. Kiwi lɛ a min gialakunun mɛnɛn yii goã koo, a n die bɛn bɔ̀n biɛ.

Balaamu n Izirayeli minin zɔ́ɔn bɔ̀nbaa boo diɛ

²⁰ Bɛ kio, Balaamu yii Amalɛki tɔrɔn yɛ, á tɔ́n bɔ boon kɛn nɛ kɛnɛn á ǹ pɛ: Amalɛki tɔrɔ n tɔrɔn nyɛɛnɛ. Sɛnɛ, nyɔɔbaa, bɔ̀n nɛ.

²¹ Bɛ kio, Balaamu yii Kenii tɔrɔn yɛ, á tɔ́n bɔ boon kɛn nɛ kɛnɛn á ǹ pɛ: Kenii tɔrɔn, kaa giã ǹ bǎã tá didimi, ká kaa kii dɔ gɛ̀fu la.

²² A laanka ka bɛ yii ni, tɛ n die kaa giã ǹ bǎãn lɛn mamaɛ, Asiirii minin nə ka goa, ǹ wo ka-n bɛ̀rɛ baa ǹ bǎã nɛ.

²³ Balaamu wusoo doo á bɔ boon kɛn nɛ kɛnɛn á ǹ pɛ: Bɛ̀ Lawa bɛa siin kɛn lɛn zɛnaa, Bɔ̀n nɛ! Die yii n boe la a goã koo?

²⁴ Mu la ǹ goon nə́ ke boe Siipri gána li, maǹ die boe Asiirii gána minin yii ni, ǹ bɔ Ebɛɛrɛ tɔrɔn dɔn dinin yii ni. Sɛnɛ ǹ dinin dɔn tá re bɔ̀n biɛ.

²⁵ Bɛ kio, Balaamu nə́ n bɔyaa á woo a gána nɛ, Balaaki dɔ́ kiɛ̃ ka a zii ni.