Minin nimi 20 - LAWA A BOO SONBORE

Meribaa a mu

¹ Lɛ̀ a mui bibinaa li, Izirayeli zaman lɛ tumaa dɔ Sini diə gole ne, ǹ nə́ giã Kadɛsi. Miriyamu na á gã walan lɛ nɛ, ǹ nə́ bĩ.

² Zaman lɛ daa á fɔ̃ mu li, ǹ nə́ tɔ́n kaa kun ǹ nə́ yoo Muizu laanka Aarɔn gialaa.

³ Zaman lɛ ga Muizu lɛ li, ǹ nə́ pɛ: «Haayii! Wɔsɛn dɔɔ̃nɔn kɛn lɛn bɛ́ giɛ̃ Dɛnaa Lawa yɔrɔ-a, toa bɛ̀ wɔsɛn dɔn man wɔ́ gã bɛa biikoo lɛ din li.

⁴ Wàa na á baa, ká daa ka Dɛnaa Lawa a zaman lɛ nɛ, diə gole kɛ nɛ, mà wɔ gã a nɛ, kɔnlɛ ka wɔa tɔɔn nɛ?

⁵ Wàa na á baa, ká soo ka wɔ nɛ Ezipti gána nɛ, ká daa wɔ kaa bǎã gere kɛ miã nɛ? A ba bǎã lɛa, min nə́ boe la a màn da a-n wa, gɔ́rɔ da ba a-n wa, *rezɛ̃ da ba a-n wa, grenadie da ba a-n wa. Mu din ba a-n, min nə́ mii wa.»

⁶ Bɛ kio, Muizu laanka Aarɔn kiɛ̃ ǹ nə́ n bɔ zaman lɛ li, ǹ nə́ daa kɔn yɛ ka Lawa nɛ ǹ kion kɛa kiɛnlɛ-a, ǹ nə́ na ǹ nə́ kaa tán ǹ lɛ la, Dɛnaa Lawa a gugurubaa daa n din nyaa ǹ nɛ.

⁷ Dɛnaa Lawa tɔ́n pɛ Muizu ni:

⁸ «N bàlà lɛ saa, n laanka n dɔɔ̃ngiĩ Aarɔn nɛ, n Izirayeli zaman lɛ sɔkɔn. Ka die ka boo da ka gɛ̀fu kɛ nɛ zaman lɛ yii ni, mu á die soe a nɛ. N tá re mu boe gɛ̀fu lɛ nɛ, n kɔ zaman lɛ laanka ǹ tɔɔn la ǹ mi.»

⁹ Ka Dɛnaa pɛ Muizu-n lɔn, Muizu woo a bàlà lɛ saa Dɛnaa Lawa a kion.

¹⁰ Muizu laanka Aarɔn tɔ́n zaman lɛ sɔkɔn gɛ̀fu lɛ nyɛɛnɛ, ǹ nə́ n toa ǹ ganaa: «Piã-wole lɛn, ka n too kɔ kəni! Wɔsɛn tá boe la wɔ mu bɔ gɛ̀fu kɛ nɛ, wɔ kɔ ka la?»

¹¹ Bɛ kio, Muizu nə́ n gɔn saa lon, á gɛ̀fu lɛ dɛ ka a bàlà nɛ gunyin paa. Mu gigiã soo gɛ̀fu lɛ nɛ, zaman lɛ mi kɔnlɛ ka ǹ tɔɔn nɛ.

¹² Sɛnɛ, Dɛnaa Lawa pɛ Muizu laanka Aarɔn nɛ: «Ka bɛ́ ka waa masɛ la wa, ka masɛ a gugurubaa nyaa Izirayeli minin lɛn yɔrɔ-a wa. Bɛ lɛ n ke, gána ke masɛ ń die koe zaman lɛ la, kasɛn kɛn bie re woe ka zaman lɛ-n walan wa.»

¹³ Bɛa sii kɛ lɛ wɔ paǹ li, ǹ lɛ dɔ Meribaa mu boo ganaa "ga-lɛli ǹ mu", a giala Izirayeli minin lɛn man nə́ goã ǹ nə́ ga Dɛnaa Lawa lɛ li bɛa bǎã kɛ lɛ nɛ. Sɛnɛ, Dɛnaa Lawa ná a gugurubaa nyaa bɛa sii lɛ gɔ́ɔ̃ nɛ.

Edɔmu gána minin maǹ nə́ n piã ka Izirayeli minin kiɛ̃ nɛ

¹⁴ Muizu nə́ n toa Kadɛsi, á minin dia woe pii Edɔmu a kii ni kɛnɛn: «N dɔɔ̃n Izirayeli minin lɛn man pii: Nɔmaa mɛn tumaa wɔsɛn yɛ, n tá doɛ̃.

¹⁵ Wɔ digolon man nə́ goã ǹ nə́ woo Ezipti gána-n lɛlɛ, wɔ́ goã walan wɔ́ belebɔ. Sɛnɛ, Ezipti minin lɛn nə́ bɔ wɔ yii ni, wɔ laanka wɔ digolon lɛn nɛ.

¹⁶ Wɔ tɔ́n nə n lɛ dɛ Dɛnaa Lawa ganaa, á wɔa lɛ-dɛ lɛ ma, á lon a dia dí-a wole goon dia á daa wɔ waa á soo wɔ nɛ Ezipti gána lɛ nɛ. Á ke, wɔ n kaa gána gèlè la Kadɛsi kiwi, wɔ n walan sisia.

¹⁷ A toa kəni, wɔsɛn nə da bɔ n gána nɛ wɔ kiɛ̃. Wɔ ba re boe wuru gɔ́ɔ̃-n wa, wɔ ba re boe rezɛ̃ da wuru gɔ́ɔ̃-n wa, wɔ ba re tù mu mii wa. Wɔ n die koe zii gole kɛ lɛ wɔ kiɛ̃, wɔ́ n wɔ a kanɛɛ gusin hinlaa gɔsɛ wa, yǎa wɔ kiɛ̃ wɔ n boe n tán la.»

¹⁸ Sɛnɛ, Edɔmu a kii lɛ ná a lɛ si kɛnɛn: «Ka baran da bɔ masɛ a gána-n wa, bɛ bie wa ma n soe man da ka lɛ ka zia nɛ.»

¹⁹ Izirayeli minin lɛn nə́ wusoo ǹ nə́ pɛ kii lɛ nɛ: «Wɔ n die boe ka zii gole kɛ nɛ, bɛ̀ wɔ n mu mi, wɔ laanka wɔa tɔɔn nɛ, wɔ tá re a giɔ̀mɔ sarɛɛ. Wɔsɛn bie màn kɔsɔ nyankoe wa, wɔ n gòã dinsɔɔ̃ da tán wɔ kiɛ̃.»

²⁰ Sɛnɛ, Edɔmu a kii lɛ wusoo á ǹ lɛ si kɛnɛn: «Ka a kiɛ̃ wa.» Bɛ kio, Edɔmu minin lɛn nə́ soo, zaman didi lɛa kun, ǹ nə́ woo Izirayeli minin lɛn gialaa ka we gole ne.

²¹ Bɛa yɔrɔ lɛ la, Edɔmu minin nə́ n piã, ǹ toa Izirayeli minin lɛn nə́ kiɛ̃ ǹ gána-n wa. Bɛ lɛ nɛ, Izirayeli minin lɛn nə́ wɔlɔ pɔrɔ ǹ nə́ naa ǹ ganaa.

Aarɔn a gɛ̀

²² Izirayeli zaman lɛ tumaa nə́ n toa Kadɛsi, ǹ nə́ woo Hɔɔrɔ kele la.

²³ Hɔɔrɔ kele lɛ, Edɔmu gána gèlè la, Dɛnaa Lawa boo da Muizu laanka Aarɔn nɛ á pɛ:

²⁴ «Aarɔn nyin nə die nyɛɛ. Sonbore, ma bɛ́ gána mɛn koe Izirayeli minin lɛn la, Aarɔn ba re we bɛ-n wa. A giala, ǹ nə́ masɛ bɔlɔ tii Meribaa mu bǎã nɛ.

²⁵ N din Muizu Aarɔn kũ, ka Aarɔn a nɛgiĩ Eleyazaara nɛ, n dii ǹ ni Hɔɔrɔ kele lɛ mìi ni.

²⁶ N die n Aarɔn a mɔnaan sɔlɔ, n nə ǹ wɔ Eleyazaara ganaa. Bɛ kio, Aarɔn nyin tá re nyɛɛ, a gã walan.»

²⁷ Ka Dɛnaa Lawa pɛ lɔn, Muizu dɔ́ zɛnaa miɛ̃. Ǹ dinin min sɔɔ dii Hɔɔrɔ kele lɛ la min tumaa yii ni.

²⁸ Muizu tɔ́n Aarɔn a dɔnkɛn si, á ǹ wɔ a nɛgiĩ Eleyazaara ganaa. Bɛ kio, Aarɔn gã walan, kele lɛ mìi ni. Muizu sɛ́ laanka Eleyazaara gisĩ ǹ nə́ n bɔ kele lɛ la.

²⁹ Zaman lɛ tumaa bɛ́ á yɛ mà Aarɔn na á gã, ǹ ná a gɛ̀ koa lɛawaa pɔsɔɔ.