Minin nimi 18 - LAWA A BOO SONBORE

Lawa a wúlu-bɔlen laanka Levii a tanlɛ

¹ Dɛnaa Lawa boo da Aarɔn nɛ, á pɛ: «N din ni, n tanlɛ minin ni, ka n din dɔɔ̃n Levii a tanlɛ minin kɛn nɛ, bɛ̀ sã mɛn yɛ Lawa a kion kɛa sii wɔ paǹ li, bɛ n die ka dinin mìi gɔ́ɔ̃ ǹ sii biɛ. Sɛnɛ, n din laanka n tanlɛ minin kɛn nɛ, bɛ̀ sã mɛn yɛ kaa wúlu bɔ ǹ dí ni, bɛ n die ka dininsɔɔ̃nɔn mìi gɔ́ɔ̃ ǹ sii biɛ.

² A toa, ka dɔɔ̃n Levii a tanlɛ minin lɛn dɔn nə n mɔrɔ Lawa a kion lɛ ganaa kunun n ni. Maǹ die koɛ n la, ǹ dí nya n giulun. Sɛnɛ n din laanka n tanlɛ minin man die golee lɛ kɔ kɔn la ǹ boo koa ǹ mɔnaa zìã lɛ yɔrɔ-a.

³ Levii a tanlɛ minin lɛn tá re dí nyɛɛ n giulun, ǹ mɔnaa zìã tumu lɛ a dí nya, sɛnɛ ǹ nə́ ǹ ba n mɔrɛ kion lɛ a màn sonboren kɛn laanka *wúlu bɔ ǹ bǎã kɛ ganaa wa. Bɛa yɔrɔ lɛ la, ǹ ba re gɛ̀ siɛ, ǹ min kɔn gɔ-n wa, ǹ dininmaan hinlaa kasɛn.

⁴ Levii a tanlɛ minin lɛn tá re koɛ ka la, ǹ kɔn yɛ ka Lawa nɛ ǹ kion lɛ a dí nya, ǹ mɔnaa zìã lɛ a dí tumaa nya, sɛnɛ, min kooro na a die n mɔrɛ ka ganaa wa.

⁵ Ka dininmaan man die bǎã sonbore kɛa dí nyɛɛ, ka wúlu bɔ ǹ bǎã kɛ wɔ nɛ, màn mɛn bɛ́ toɛ masɛ foo baran yoo, Izirayeli minin lɛn li doo wa.

⁶ Ka ga dɛ! Man má ka dɔɔ̃n Levii a tanlɛ minin lɛn yii gɔgɔɔ̃ Izirayeli min gialakunun lɛn bii. Levii a tanlɛ minin lɛn man masɛ din wɔn lɛa, má ǹ kɔ ka la máa ǹ dí nya kɔn yɛ ka Lawa nɛ ǹ kion kɛ nɛ.

⁷ Sɛnɛ, n din Aarɔn laanka n tanlɛ nɛ, kasɛn die ka Lawa a wúlu-bɔlebaa ǹ dí nya wúlu bɔ ǹ bǎã kɛ laanka bǎã sonbore sonbore kɛ nɛ, kion bii kuru kɔn-a ǹ mɔnaa kɛ kio. Ma din ni ka goe ka bɛa dí lɛ nɛ. Bɛ̀ min kooro nə́ n mɔrɔ, ǹ dɛnaa nyin nə n boe.»

Lawa a wúlu-bɔlen bɛ́ màn mɛn yii ǹ wɔ lɛa

⁸ Dɛnaa Lawa pɛ Aarɔn nɛ: «Á ke, Izirayeli minin bɛ́ mànan mɛnɛn tumaa boe, ǹ nə́ koe masɛ la, ma bɛ yii a sii wɔ n gɔn. Ma n má ǹ kɔ n din la, ka n tɔrɔn nɛ, kaa bɔ a koa lɛ barka nɛ, a zɛnaa n landa lɛa tán duduu.

⁹ Màn sonbore sonboren mɛnɛn bɛ́ ǹ ba n tiɛ̃ wa, bɛn bii, kɛ n die doe n ganaa: Izirayeli minin lɛn bɛ́ die masɛ goe ka màn mɛn tumaa nɛ, wùsu kɛ nɛ, sii baraa sawaa ǹ wúlu mànan kɛn nɛ, ka zɛ̀rɛ si ǹ wúlu mànan kɛn nɛ. Bɛa màn sonbore sonboren kɛn lɛn man die doe, n din laanka n tɔrɔn ganaa.

¹⁰ N die ǹ nə ǹ bii tán bǎã sonbore sonbore kɛ nɛ. Giĩ tumaa á boe la a bii. Ka ga ǹ ganaa màn sonboren lɛa.

¹¹ Màn mɛn bɛ́ re doe n ganaa doo, bɛ á ke: Màn mɛn tumaa bɛ́ n boe Izirayeli minin Lawa gɔ ǹ mànan nɛ, ka ǹ mɛn dɔ bɛ́ n boe màn kɛ din tumaa nɛ, ǹ ná a kɔ Lawa la ǹ sii zɛnɛɛ. Masɛ nə ǹ koe n din la, n nɛgiĩn ni, ka n nɛlɔn nɛ, a zɛnaa ń landa lɛa tán duduu. Bɛ̀ min woo min tá *yoreene n kion, á boe la a bii.

¹² Izirayeli minin lɛn bɛ́ re màn lɛ bibinaan mɛnɛn koe masɛ la, masɛ n bɛn dɔn koe n la: nyɔɔ dii a sonbore ne, duvɛ̃ dii a sonbore ne, ka *belee wɔ nɛ.

¹³ Izirayeli minin lɛn bɛ́ die ǹ gána lɛ a màn tumaa a lɛ binaa mɛn koe masɛ la, n din wɔ n ka bɛ dɔ nɛ. Bɛ̀ min woo min tá yoreene n kion, á boe la a bii.

¹⁴ Bɛ̀ ǹ nə́ màn mɛn tumaa toa walan duduu Lawa taman yii, Izirayeli gána nɛ, bɛ dɔ nə n din wɔ lɛa.

¹⁵ Ǹ bɛ́ re gɔ́ɔ̃ binaa nɛ mɛn tumaa koe masɛ la, ta tɔɔ wɔ-n hinlaa minbuiin nɛ wɔ nɛ, n din wɔ nɛ. Sɛnɛ, n die n nɛgiĩ binaan sɛn nyin si, tɔɔn mɛnɛn bɛ́ gɔgɔrɛ landa wɔ paǹ li, n bɛn dɔn sa binaa, hinlaa gɔ̀lɔ̀n binaa mìi bɔ.

¹⁶ Bɛ̀ n doamaa nɛ n nə ǹ mɛnɛn nyin si, bɛ̀ ǹ yɛ dɔ mui goon, n si. Ǹ nyin si ǹ giɔ̀mɔ lɛ toa Lawa a kion kɛa wɔrɔ we sooro, wɔrɔ kɛa we goon nə́ garamu fù.

¹⁷ Sɛnɛ, diin nɛ gɔ̀lɔ̀n binaa nɛ, sère nɛ gɔ̀lɔ̀n binaa, ka bòe nɛ gɔ̀lɔ̀n binaa nɛ, n baran bɛn kɔn mìi bɔ wa: maǹ masɛ wɔn lɛa a tɔ-a. N die n nə ǹ mà kaa wúlu bɔ ǹ bǎã kɛ la, n nə ǹ nyɔɔ tã. *Wúlu màn tiɛ̃ nɛ, a gìĩ ń kɔɔ̃n masɛ Dɛnaa Lawa ganaa.

¹⁸ Ǹ siĩ nə n din Aarɔn wɔ lɛa, ka tɔɔ lɛ a paǹan kɛn bɛ́ n wɔ lɛa lɔn: A tiãbii ke bɛ̀ ǹ na a kɔ Lawa la ǹ sii zɛnaa, ka a gusin a gisi kɛ nɛ.

¹⁹ Izirayeli minin lɛn bɛ́ mànan mɛnɛn tumaa boe die koe masɛ Dɛnaa Lawa la, masɛ gɔ ǹ wɔn lɛa, man bɛ koe n din la, ka n nɛgiĩn laanka n nɛlɔn nɛ, a zɛnaa ń landa lɛa tán miɛ̃ duduu. Kɛ n lɛ kɔ kɔn la lɛa, n din laanka n tɔrɔn wɔ lɛa, a ná a ba ziziɛ̃ masɛ yii-n duduu wa.»

²⁰ Dɛnaa Lawa wusoo á pɛ Aarɔn nɛ: «Masɛ bɛ́ re gána mɛn koe Izirayeli minin la ǹ gii kɔn, màn kɔn ba re n wɔ biɛ bɛ gɔ́ɔ̃-n wa. Màn kɔn ba re doe n ganaa n kuru lɛa, Izirayeli minin lɛn bii wa. Masɛ din lɛ nə n kuru lɛa, n màn lɛa, Izirayeli minin lɛn bii.»

Màn mɛn bɛ́ doe Levii tɔrɔn ganaa ǹ wɔ lɛa

²¹ Dɛnaa Lawa woo nyɛɛn ka boo ne: «Levii a tanlɛ bɛ́ dí mɛn nyɛɛ kɔn yɛ ka Lawa nɛ ǹ kion kɛ nɛ, bɛa saraa á ke: màn a fùbaa ǹ wɔ mɛn tumaa bɛ́ n sii Izirayeli gána nɛ, ma bɛ yii kɔ ǹ la.

²² Bɛa yɔrɔ lɛ la, Izirayeli min gialakun lɛ ba re n mɔrɛ kɔn yɛ ka Lawa nɛ ǹ kion lɛ-a doo wa, màn mɛn bɛ́ toɛ sii baraa baran yoo ǹ ganaa, ǹ gã wa.

²³ Levii a tanlɛ minin lɛn dininsɔɔ̃nɔn man die kɔn yɛ ka Lawa nɛ ǹ kion lɛ a dí nyɛɛ, bɛ̀ ǹ nə́ sã mɛn wɔ, a sii nə ǹ dinin mìi ni. Bɛa zɛnaa n die goɛ̃ landa lɛa miɛ̃ duduu, á ná a ba n bɔyɛɛ wa. Bǎã ba re doe Levii a tanlɛ minin lɛn ganaa, Izirayeli tɔrɔ gialakunun lɛn bii wa.

²⁴ Sɛnɛ, Izirayeli minin lɛn bɛ́ màn a fùbaa ǹ wɔ mɛn boe koe masɛ la, man bɛ koe Levii a tanlɛ minin lɛn dɔn la ǹ wɔ gii lɛa. Bɛ lɛ n ke ma á pii, bǎã ba re doe ǹ ganaa Izirayeli tɔrɔ gialakunun lɛn bii wa.»

²⁵ Bɛ kio, Dɛnaa Lawa boo da Muizu ni, á pɛ:

²⁶ «A pɛ Levii a tanlɛ minin lɛn manɛ: Ma bɛ́ gɔn màn a fùbaa ǹ wɔ mɛn lɛ koe ka la kaa wɔ gii lɛa, bɛ̀ Izirayeli minin lɛn nə́ daa bɛ kɔ ka la, ka dɔn nə wusoo ka bɛa gɔn màn a fùbaa ǹ wɔ kɛ lɛ a fù baa ǹ wɔ bɔ ka kɔ masɛ la.

²⁷ Bɛ lɛ n die goɛ̃ ka dɔn màn bɔ lɛa, goon ka ka miãn bɛ́ ǹ mɛn boe ǹ tán-kɔsiɛ mànan laanka ǹ duvɛ̃ dii ni, ǹ nə́ koe masɛ la.

²⁸ Bɛa yɔrɔ lɛ la, Izirayeli minin lɛn bɛ́ re màn a fùbaa ǹ wɔ mɛn tumaa koe ka la, ka dɔn nə Dɛnaa Lawa wɔ bɔ bɛ nɛ. Ka masɛ wɔ lɛ bɔ, ka kɔ Lawa a wúlu-bɔle Aarɔn la.

²⁹ Bɛ̀ ǹ nə́ màn woo màn kɔ ka la, ka masɛ wɔ lɛpiɛ̃ bɔ bɛa sonbore ne, ka kɔ masɛ la maa wɔ lɛa.

³⁰ «Bɛ̀ ka masɛ wɔ lɛ bɔ, ka dinin nə nɔmɔ a gialakun kɛ-a, ka Izirayeli min gialakun lɛ dɔ bɛ́ nɔmɛ ǹ tán-kɔsiɛ màn giala-a, ka ǹ duvɛ̃ giala laanka ǹ nyɔɔ giala-a lɔn.

³¹ Ka tá boe la ka bɛa mànan kɛn bii bǎã din tumaa nɛ, kun ka kaa sumu minin tumaa nɛ, a giala ka bɛ́ dí mɛn nyɛɛ kɔn yɛ ka Lawa nɛ ǹ kion kɛ nɛ, bɛa saraa nɛ.

³² Bɛ̀ ka màn lɛ a sonbore bɔ masɛ wɔ lɛa, ta ká a giala kɛ bii, ka a re sii baraa siɛ wa. Ka bɛ dɔ nɛ, Izirayeli minin lɛn bɛ́ mànan mɛnɛn koe masɛ la maa wɔ lɛa, ka a re barka boe bɛn nɛ, gɛ̀ dɔlɔ nə n bɔ ka ganaa wa.»