Minin nimi 17 - LAWA A BOO SONBORE

Yiri gisĩ ǹ siin Koree a gòãn dii paǹ li

¹ Dɛnaa Lawa boo da Muizu ni, á pɛ nɛ:

² «Lawa a wúlu-bɔle Eleyazaara ke, Aarɔn a nɛgiĩ lɛa, a pɛ bɛ nɛ, a da yon gìĩ kɔɔ̃n kaa ǹ mànan kɛn waa, a ǹ bɔ tɛ lɛ nɛ, a ǹ tɛ nàn pɛsɛ̃ tán tìãlɛ-a. A giala, maǹ nə́ n baa masɛ wɔn lɛa.

³ Min mɛnɛn lɛn nə gã ǹ sii baraa taman yii, ka bɛn da yon gìĩ kɔɔ̃n kaa ǹ mànan lɛn goa, ka ǹ məə ǹ baalaa kɔ, ka ǹ kaa *wúlu bɔ ǹ bǎã kɛ gɔ̀nɔn-a. A giala, maǹ nə́ daa ǹ nɛ masɛ yɔrɔ-a, ǹ nə́ masɛ wɔn baa. Ǹ tá re yiri gisĩ sii ni ǹ mànan biɛ Izirayeli minin lɛn gɔn.»

⁴ Tɛ min mɛnɛn lɛn kũ ǹ yii n koo, bɛn nə goã ǹ nə́ daa ka da yon gìĩ kɔɔ̃n kaa ǹ zan mànan mɛnɛn nɛ Lawa yɔrɔ-a, Lawa a wúlu-bɔle Eleyazaara lɛ tɔ́n bɛn goa, á ǹ məə, ǹ nə́ ǹ kaa wúlu bɔ ǹ bǎã lɛ la.

⁵ Bɛa zɛnaa miɛ̃ kɛ lɛ n Izirayeli minin lɛn yiri diɛ a nɛ, mà bɛ̀ á n bɔ Aarɔn a tanlɛ nɛ, min kɔsɔ doamaa bie a da yon gìĩ kɔɔ̃n tã Dɛnaa Lawa yɔrɔ-a wa. Ń giɛ, sii mɛn nə Koree laanka a kiodɛnan yɛ, bɛ baran ǹ dɛnaa yɛ wa. Sii lɛ tumaa nə́ n zɛnaa, ka Dɛnaa Lawa goã, á Muizu baa zɛlɛ lɛa á pɛn lɔn.

Zaman lɛ a piã

⁶ Bɛa lɛawaa, zaman lɛ tumaa zùũzùũ si Muizu laanka Aarɔn ganaa, ǹ nə́ pɛ: «Ka dinin man ka Dɛnaa Lawa a zaman lɛ dɛ.»

⁷ A zaman lɛ toa ǹ nə́ n kaa kun ǹ nə́ yui Muizu laanka Aarɔn gialaa, Muizu laanka Aarɔn nə́ n yɔrɔ bɔyaa ǹ nə́ dia kɔn yɛ ka Lawa nɛ ǹ kion kɛ la, bɛ̀ tɛmaa bara á ke á n kuməə a ganaa, Dɛnaa Lawa a gugurubaa daa n din nyaa.

⁸ Muizu laanka Aarɔn tɔ́n kiɛ̃ ǹ nə́ woo kɔn yɛ ka Lawa nɛ ǹ kion lɛ yɔrɔ-a.

⁹ Dɛnaa Lawa boo da Muizu ni, á pɛ-n kɛnɛn:

¹⁰ «Ka n wɔlɔ lui zaman lɛ ganaa, masɛ n die ǹ bɔ̀n biɛ bǎã goon.» Muizu laanka Aarɔn na, ǹ nə́ kaa tán ǹ lɛ la.

¹¹ Muizu tɔ́n pɛ Aarɔn nɛ: «N da yon gìĩ kɔɔ̃n kaa ǹ màn lɛ saa, n tɛ nàn bɔ wúlu bɔ ǹ bǎã kɛ nɛ n kaa a nɛ, n da yon gìĩ kɔɔ̃n dɔ kaa a nɛ, n nə n nanaa n wo dɔ zaman lɛ li. N sii baraa sawaa ǹ wúlu bɔ zaman lɛ a lɛa, a giala Dɛnaa Lawa foo nə́ n da a lɛ la. Koe nə́ n giala kɔ gɔrɔ.»

¹² Aarɔn tɔ́n da yon gìĩ kɔɔ̃n kaa ǹ màn lɛ saa, ka Muizu pɛ-n lɔn. Á baa si á woo dɔ zaman lɛ li, bɛ̀ koe á ke á n giala kɔ ǹ ganaa sonbore. Á da yon gìĩ kɔɔ̃n lɛ tã, á sii baraa sawaa ǹ wúlu bɔ ǹ sii zɛnaa zaman lɛ a lɛa.

¹³ Aarɔn golee zaman lɛ a geren laanka a yiikoonaan bii, koe lɛ woo.

¹⁴ Sii lɛ min mɛnɛn bii, ǹ kaa kun nə min duu fulusii ka biɛsɔbaa (14 700), min mɛnɛn nə goã ǹ nə́ gã Koree a sii kɛ gòã wuu li, bɛn nə́ ǹ ba a-n wa.

¹⁵ Koe lɛ a woo kio gɔrɔ, Aarɔn wusoo á woo Muizu li, kɔn yɛ ka Lawa nɛ ǹ kion lɛ a kiɛnlɛ-a.

Aarɔn a bàlà buũ kɔ

¹⁶ Dɛnaa Lawa boo da Muizu ni, á pɛ:

¹⁷ «A pɛ Izirayeli minin lɛn nɛ, mà tɔrɔ gogoonmaa a nyɛɛnaandɛnaa da bàlà goon kɔ n la. Bàlà lɛ a kaa kun nə goɛ̃ fulupaa. Tanlɛ lɛ gogoonmaa tɔ kiɛ̃ a bàlà ganaa.

¹⁸ Aarɔn tɔ kiɛ̃ *Levii tɔrɔn bàlà sɛ ganaa. Bɛa yɔrɔ lɛ la, tanlɛ lɛ gogoonmaa a nyɛɛnaandɛnaa a bàlà n die goɛ̃ goon dinsɔɔ̃.

¹⁹ Bɛ kio, ń die n bàlàn lɛn kaa tán kɔn yɛ ka Lawa nɛ ǹ kion kɛ nɛ, *lɛ kɔ kɔn la ǹ goo lɛ yɔrɔ-a, ma bɛ́ nɛn bɛ̀ ma n din nyaa ka nɛ bǎã mɛn lɛ nɛ.

²⁰ Ma bɛ́ má min mɛn bɔ, bɛa dɛnaa a bàlà lɛ á die luu piɛ̃. Izirayeli minin bɛ́ zùũzùũ mɛn sii ka ganaa, ma n die bɛ wɔlɔ lui ma din-a ka bɛa yɔrɔ lɛ nɛ.»

²¹ Muizu tɔ́n bɛa boon kɛn lɛn pɛ Izirayeli minin lɛn nɛ. Tanlɛ lɛn dinin bɛ́ lɔn, ǹ gogoonmaa a nyɛɛnaandɛnaa daa bàlà goon kɔ Muizu la. Bàlà lɛ a kaa kun nə fulupaa. Aarɔn a bàlà lɛ goã kun ka bɛa bàlàn kɛn lɛn nɛ.

²² Muizu bàlàn lɛn kaa tán Dɛnaa Lawa a lɛ kɔ kɔn la ǹ goo lɛ yɔrɔ-a, mɔnaa zìã lɛ nɛ.

²³ Bɛ́ a lɛawaa, Muizu bɛ́ á woo wɔ mɔnaa zìã lɛ nɛ, á Levii a tanlɛ min Aarɔn a bàlà lɛ yɛ á luu pã, á buũ kɔ, á nɛ kɔ amandie da nɛ lɛa, á ma.

²⁴ Muizu bàlàn lɛn tumaa goa mɔnaa zìã lɛ nɛ, á woo ǹ nyaa Izirayeli minin lɛn manɛ. Min tumaa boo la á ǹ yɛ, nyɛɛnaandɛnan lɛn gogoonmaa tɔ́n na a wɔ si.

²⁵ Dɛnaa Lawa wusoo á pɛ Muizu ni: «Wusoo n Aarɔn a bàlà lɛ sɛ da tán lɛ kɔ kɔn la ǹ goo lɛ nyɛɛnɛ, n koa sii a kɔnboe lɛa piã wolen kɛn manɛ. Bɛa yɔrɔ lɛ la, n tá re Izirayeli minin lɛn zùũzùũ si wɔlɔ lui masɛ ganaa, gɛ̀ dɔlɔ ná a ba n boe ǹ ganaa wa.»

²⁶ Muizu dɔ́ zɛnaa miɛ̃. Dɛnaa Lawa pɛ-n lɔn a na á baa miɛ̃.

²⁷ Izirayeli minin lɛn nə́ tɔ́n boo da Muizu ni, ǹ nə́ pɛ: «N yii ba a ganaa, wɔ n gigiɛ̃, wɔ tumaa ń gɛ̀ lɛnpɛnɛ wa?

²⁸ Bɛ̀ min woo min nə́ n mɔrɔ Dɛnaa Lawa a kion lɛ-a, ǹ dɛnaa n giɛ̃. Wɔsɛn tumaa n die giɛ̃ bɛa yɔrɔ kɛ lɛ la, wɔ nya lenlen koɛ?»