Minin nimi 16 - LAWA A BOO SONBORE

Koree a piã

¹ Levii tɔrɔ goon ne, a tɔ n Koree. Isaara a nɛ nɛ, Keyati a tanlɛ min ni. Bɛa Koree lɛ piã wɔ kun ka Eliabu a nɛ min paa nɛ, Datan laanka Abiramu ni, ka Pelɛti a nɛ Ɔne ne. Ǹ dinin min sɔɔ tumaa n Urubɛn a tanlɛ minin lɛa.

² Ǹ nə́ yoo Muizu gialaa, ǹ laanka Izirayeli min biɛpaa ka posooro ne. Maǹ nə́ goã zaman lɛ a goledɛnan lɛa, min yii guguru-an lɛa, ǹ nə́ woe lɛsɔkɔn bǎãn nɛ.

³ Ǹ nə́ kaa kun ǹ nə́ yoo Muizu laanka Aarɔn gialaa, ǹ nə́ pɛ ǹ nɛ: «Kɛa boe? A giala, zaman lɛ tumaa n Dɛnaa Lawa wɔ lɛa, Dɛnaa Lawa tá kun ka wɔ tumaa nɛ. Wàa na á baa kasɛn tá ka dinin soɛ koe Dɛnaa Lawa a zaman gialakun kɛ nɛ?»

⁴ Muizu bɛ́ á bɛa boon kɛn lɛn ma, á na, á kaa tán a lɛ la.

⁵ Bɛ kio, á pɛ Koree ne, ka Koree a kiodɛnan lɛn tumaa nɛ kɛnɛn: «Biɛ̃ baayɛlɛ, Dɛnaa Lawa tá re nyɛɛ, min mɛn bɛ́ a din wɔ lɛa, min mɛn bɛ́ *yoreene, ka min mɛn bɛ́ boe la a n mɔrɔ a ganaa. Bɛ̀ á min mɛn bɔ, á die toɛ bɛ nə n mɔrɔ a ganaa.

⁶ Koree laanka a kiodɛnan lɛn, ka die ka sii lɛ a kɛ zɛnaa: ka da yon gìĩ kɔɔ̃n kaa ǹ mànan goa,

⁷ biɛ̃, ka tɛ nàn kaa ǹ nɛ, ka da yon gìĩ kɔɔ̃n kaa a lalan, Dɛnaa Lawa yɔrɔ-a. Dɛnaa Lawa bɛ́ re min mɛn boe, bɛ lɛ n yoreene. Levii a tanlɛ minin lɛn mà bɛ á boe.»

⁸ Muizu wusoo doo á pɛ Koree ne: «Ka n too kɔ kəni, kasɛn Levii a tanlɛ minin kɛn lɛn.

⁹ Izirayeli a Lawa bɛ́ á ka yii gɔgɔɔ̃ Izirayeli zaman lɛ bii, á n toɛ ka nə́ n mɔrɛ a ganaa, ń giɛ ka tá a kion sonbore kɛ a dí nyɛɛ, ka dí nya nɛ zaman lɛ a lɛa, bɛ na a ba doe ka yii li wa?

¹⁰ Lawa toa ka tá n mɔrɛ a ganaa, nsɛ Koree kɛ lɛ laanka n dɔɔ̃n Levii a tanlɛ minin lɛn nɛ. Ka n wusii doo wúlu bɔ ǹ dí liɛ?

¹¹ Bɛa yɔrɔ kɛ lɛ la, n laanka n kiodɛnan lɛn tumaa n ká kaa kun, ká yoo Dɛnaa Lawa gialaa. Bɛ bie wa, Aarɔn lɛ n die lɛa kəni, ka tɔn zùũzùũ si a ganaa?»

¹² Bɛ kio, Muizu min dia woe lɛ diɛ Datan laanka Abiramu la, Eliabu a nɛgiĩn lɛn. Sɛnɛ, ǹ nə́ pɛ: «Wɔsɛn ba li wɔ daa wa.

¹³ Gána mɛn nə́ ke bɔ̀nyaa laanka zoo nyɔɔ n baa sii a nɛ, Muizu wɔ waa á wɔ bɔ walan, á daa wɔ dɛ diə gole kɛ nɛ. Bɛ tɔn dɔ a yii li wa? A n zoɛ̃ li dɔn, a wɔsɛn nyɛɛnaandɛnaa baa ka pàã nɛ?

¹⁴ Haayii dɛ! Gána mɛn bɛ́ bɔ̀nyaa laanka zoo nyɔɔn baa sii a nɛ, a bie á daa ka wɔsɛn nɛ bɛ-n wa. A wurun hinlaa *rezɛ̃ dan kɔ wɔsɛn la, wɔ́ baa wɔa wɔ lɛa wa. N ba re giɛ n gaãnaan li wa? Wɔa die wa.»

¹⁵ Muizu foo tɔ́n yoo taãn-taãnɛ, á pɛ Dɛnaa Lawa nɛ: «Bɛa minin kɛn lɛn bɛ́ re n goe ka mànan mɛnɛn nɛ, n baran n yɔrɔ bǐɛ̃ da bɛ la wa. Haalɛ dundun din ni, ma si ǹ la wa. Ma sii dɔ la ǹ kɔn la wa.»

Sii mɛn nə Koree laanka a kiodɛnan yɛ

¹⁶ Muizu pɛ Koree ne: «N din ni, ka n kiodɛnan lɛn tumaa nɛ, ka da Dɛnaa Lawa yɔrɔ-a bǐɛ̃. Aarɔn dɔ á die goɛ̃ a tan.

¹⁷ Min biɛpaa ka posooro mɛn bɛ́ n kio, bɛn min gogoonmaa die a na a da yon gìĩ kɔɔ̃n kaa ǹ màn saa, a da yon gìĩ kɔɔ̃n kaa a nɛ, a da nɛ Dɛnaa Lawa yɔrɔ-a. Aarɔn laanka n dinmaa dɔ die ka zɛnaa miɛ̃.»

¹⁸ Koree laanka a kiodɛnan lɛn nə́ lɛ kɔ: ǹ didie ná a da yon gìĩ kɔɔ̃n kaa ǹ màn saa, á tɛ nàn kaa a nɛ, á da yon gìĩ kɔɔ̃n kaa a lalan, ǹ nə́ daa golee kɔn yɛ ka Lawa nɛ ǹ kion kɛa kiɛnlɛ-a, kun ka Muizu laanka Aarɔn nɛ.

¹⁹ Koree lɛ ná a kiodɛnan lɛn tumaa mìi sɔkɔn Muizu laanka Aarɔn li, kɔn yɛ ka Lawa nɛ ǹ kion lɛ a kiɛnlɛ-a. Dɛnaa Lawa a gugurubaa daa n din nyaa zaman lɛ tumaa nɛ.

²⁰ Dɛnaa Lawa tɔ́n boo da Muizu laanka Aarɔn nɛ, á pɛ:

²¹ «Ka n na ka n bɔ bɛa minin kɛn lɛn ganaa. Masɛ n die ǹ bɔ̀n biɛ a din bǎã nɛ.»

²² Bɛ kio, Muizu laanka Aarɔn na, ǹ nə́ kaa tán ǹ lɛ la, ǹ nə́ pɛ: «Ee Lawa! Nsɛ mɛn bɛ́, da ǹ màn din tumaa a fɔfoã nə́ n gɔn, n foo n die yui zaman lɛ tumaa li, a da yǎa min goon dinsɔɔ̃ na á sii baraa zɛnaa?»

²³ Dɛnaa Lawa wusoo á boo da Muizu ni á pɛ:

²⁴ «A pɛ zaman lɛ nɛ, mà ǹ nə n wɔlɔ lui Koree a giã ǹ bǎã ganaa, ka Datan laanka Abiramu wɔ nɛ.»

²⁵ Muizu tɔ́n yoo á woo Datan laanka Abiramu li, ka Izirayeli min golen ná a kio.

²⁶ Muizu pɛ zaman lɛ nɛ: «Ka n zɔ̃ ka n bɔ bɛa min baraan kɛn lɛn mɔnaa zìãn ganaa, ka baran toa ka n gɔn da ǹ màn kɔn ganaa wa. Bɛ bie wa, ka dɔn man die giɛ̃ bɛa min baraan kɛn lɛn sii baraan lɛn tumaa taman yii.»

²⁷ Bɛ kio, zaman lɛ nə́ n wɔlɔ lui Koree a giã ǹ bǎã lɛ ganaa, ka Datan laanka Abiramu wɔ nɛ. Datan laanka Abiramu na á goã ǹ nə́ soo, ǹ nə́ golee ǹ mɔnaa zìãn kiɛnlɛ-a kun ka ǹ lɔn nɛ, ka ǹ nɛnyaanan laanka ǹ nɔ̀ɔnɔn nɛ.

²⁸ Muizu tɔ́n pɛ: «Ka tá re doɛ̃ kɛ li kəni, mà Dɛnaa Lawa na a masɛ dia bɛa siin kɛn lɛn tumaa zɛnɛɛ, masɛ bie ǹ zɛnɛɛ ma din li wa.

²⁹ Bɛa minin kɛn lɛn gɛ̀ wɔ ǹ gɔn goã goon ka min tumaa wɔ nɛ, bɛ̀ ǹ giala nyɔmɔɔ goã goon ka min tumaa wɔ-n sɛn, Dɛnaa Lawa bie á masɛ dia wa.

³⁰ Sɛnɛ, bɛ̀ Dɛnaa Lawa kaãbaa sii zɛnaa, tán nə́ n lɛ bũ, á ǹ mui kɔnlɛ ka màn mɛn tumaa bɛ́ ǹ wɔ lɛa, yǎa ǹ wo geren piɛ ǹ yii n koo, ka tá re doɛ̃ kəni mà bɛa minin kɛn man nə́ n yii wɔ Dɛnaa Lawa la.»

³¹ Muizu bɛ́ á bɛa boo kɛ lɛ yii da á nya gɔrɔ, tán nə́ n dɛ bɛa minin lɛn gòã giulun.

³² Tán lɛ nə́ n lɛ bũ, á ǹ mui kɔnlɛ ka ǹ kion minin ni, ka Koree a minin tumaa laanka ǹ gɔn mànan nɛ.

³³ Ǹ nə́ woo geren piɛ ǹ yii n koo, kɔnlɛ ka màn mɛn tumaa bɛ́ ǹ wɔ lɛa. Tán nə́ n lɛ tɔrɔ ǹ ganaa. Maǹ nə́ papaã ǹ nə́ n bɔ Izirayeli zaman lɛ bii ka bɛa yɔrɔ lɛ nɛ.

³⁴ Izirayeli minin mɛnɛn tumaa goã kunu ǹ ganaa, bɛn bɛ́ ǹ nə́ ǹ lɛ-dɛ ma, ǹ nə́ n daa baa la. A giala mà ǹ nə́ goã nyɛ́ɛ biɛ, mà tán lɛ tá re ǹsɛn dɔn mui.

³⁵ Min biɛpaa ka posooro mɛn dɔ goã wúlu boe ka da yon gìĩ kɔɔ̃n lɛ nɛ, Dɛnaa Lawa tɛ dɛ á da bɛn dɔn-a ǹ nə́ kũ ǹ yii n koo.