Minin nimi 14 - LAWA A BOO SONBORE

Izirayeli minin nə n piã mà ǹ ba woe gána lɛ-n wa

¹ Izirayeli zaman lɛ tumaa nə́ n lɛ wurəə, ǹ nə́ n lɛ dɛ tèlò tumu gɔ́ɔ̃ nɛ.

² Ǹ nə́ n bɔlɔ lɔlɔkɔn Muizu laanka Aarɔn ganaa, ǹ nə́ pɛ ǹ nɛ kɛnɛn: «Haayii! Ká toa bɛ̀ wɔsɛn dinin man wɔ́ gã Ezipti gána lɛ nɛ, hinlaa diə gole kɛ nɛ.

³ Wàa na á baa Dɛnaa Lawa á woe ka wɔsɛn nɛ bɛa gána kɛ miã nɛ, zia bɛ́ re wɔ bii bǎã mɛn nɛ? Maǹ die wɔa lɔn laanka wɔa nɛnyaanan kuĩ. A ba soɛ wɔ ganaa, wɔ n bɔyaa wɔ wo Ezipti gána-n wa?»

⁴ Ǹ nə́ tɔ́n pɛ kɔn nɛ kɛnɛn: «Ka daa wɔ min koa wɔa kii lɛa, wɔ n bɔyaa wɔ wo Ezipti gána nɛ.»

⁵ Muizu laanka Aarɔn tɔ́n na, ǹ nə́ kaa tán ǹ lɛ la, Izirayeli zaman sɔkɔn lɛ tumaa yɔrɔ-a.

⁶ Min mɛnɛn nə goã ǹ nə́ woo ga gána lɛ ganaa, bɛn min paa, Nunu a nɛgiĩ Zozoe laanka Zefunee a nɛgiĩ Kalɛbu ni, foo ziziɛ̃ taman yii, ǹsɛn nə́ ǹ dɔnkɛn tɔtoɛ̃,

⁷ ǹ nə́ pɛ Izirayeli zaman lɛ tumaa nɛ: «Wɔsɛn nə gána mɛn lɛ kɔkɔn wɔ́ ga a ganaa, gána siĩn ni a tɔ-a.

⁸ Bɛ̀ Dɛnaa Lawa nə́ n gɔ́ɔ̃ kaa wɔ nɛ, á die woe ka wɔ nɛ bɛa gána kɛ lɛ nɛ, a kɔ wɔ la, bɛa gána kɛ lɛ, bɔ̀nyaa laanka zoo nyɔɔ n baa sii a nɛ.

⁹ Sɛn kəni, ka baran n gòãn dii Dɛnaa Lawa ganaa wa. Ka baran nyɛ́ɛ baa bɛa gána kɛ lɛ a minin man wa. Bɛa minin kɛn lɛn ba re wɔsɛn lɛ boe goon dinin wa. A giala, ǹ bɛ́ dìn mɛnɛn wúlu li, bɛn nə́ ǹ toa walan. A da yaa, Dɛnaa Lawa á kun ka wɔsɛn nɛ. Ka baran nyɛ́ɛ din baa ǹ nɛ wa.»

¹⁰ Zaman lɛ tumaa na á goã, mà ǹ kɔlɔ kaã bɔ ǹ ganaa, sɛnɛ bǎã goon ne, Dɛnaa Lawa a gugurubaa daa n din nyaa Izirayeli minin lɛn manɛ kɔn yɛ ka Lawa nɛ ǹ kion kɛ la.

Muizu goã-kũ da Lawa ganaa

¹¹ Dɛnaa Lawa boo da Muizu ni á pɛ nɛ: «Zaman kɛ n die n yii we masɛ la yǎa biĩ kəni? Ma sii nyaa ǹ siin mɛnɛn tumaa zɛnaa ǹ bii, maǹ die n tiɛ̃ bɛn kio, ǹ nə́ ǹ ba n foo doɛ masɛ ganaa wa, yǎa biĩ kəni?

¹² Masɛ n die yui ǹ gialaa ka piɛ̃ busu ni, ma ǹ dɛ ma ǹ nya lenlen. Bɛ kio, ma á die zɛnɛɛ, zaman bɔ Muizu din ni, ǹ pàã laanka ǹ mɔnaabaa n liɛ nɛ ǹ wɔ nɛ.»

¹³ Muizu tɔ́n pɛ Dɛnaa Lawa nɛ: – Ezipti minin nə́ dɔ̃, mà n din ni ń zaman kɛ lɛ bɔ ǹ bii ka n pàã nɛ ń soo ǹ ne.

¹⁴ Ǹ ná a boo laakalaa gána lɛ a minin manɛ. Bɛn dɔn nə́ bɔ a siére-a kəni, mà n din Dɛnaa Lawa tá kun ka zaman kɛ lɛ nɛ, n tá n din nyɛɛ nɛ buə̃buə̃. Ǹ nə́ bɔ a siére-a dɔn, mà n din nə zaman lɛ tamaɛ, a giala, man tɔ we ǹ nyɛɛnɛ lɛawaa li, tɛmaa bara bii, tèlò-n, tɛ bara bii.

¹⁵ Bɛ̀ ń yoo sisia, ń nə n zaman kɛ tumaa lɛ naa bǎã goon ne, tɔrɔn mɛnɛn nə n tɔ ma, bɛn man die pii kɛnɛn:

¹⁶ «Dɛnaa Lawa goã á n lɛ kɔ zaman lɛ la ka gána mɛn lɛ nɛ, a bɛ́ a ba boe la a tá we ǹ ne walan wa, bɛ lɛ n ke á ǹ dɛ diə gole ne.»

¹⁷ Bɛ lɛ nɛ, Dɛnaa Lawa, masɛ n gòã-kũ diɛ n ganaa, máa n nə n pàã lɛ nyaa. A giala, n din ni ń pɛ kɛnɛn:

¹⁸ «Masɛ din nə Dɛnaa Lawa lɛa, ma foo a yui fufuu wa, maa bǐɛ̃ zɛnaa pàã ń gole. Masɛ n siɛ̃-wole a sii baraan laanka bɔlɔ-tii siin tɔɛ ǹ dɛnan manɛ. Sɛnɛ, ma a zɛ̀rɛdɛnaa bii zɛ̀rɛbaãnaa wa. Ma n díin dɔlɔ boe ǹ nɛnyaanan ganaa, yǎa ǹ nɔ̀ɔnɔn nɔ̀ɔnɔn ganaa.»

¹⁹ Dɛnaa Lawa, a kũ zaman lɛ a soo a bɔ Ezipti gána-n kɛ ganaa, n nə́ ǹ sii baraan toa ǹ nɛ yǎa kànaa. Wusoo doo n nə ǹ sã toa-n miɛ̃, n din a bǐɛ̃ gole lɛ taman yii.

²⁰ Dɛnaa Lawa tɔ́n pɛ: «Má zaman lɛ a sã toa nɛ, ka Muizu din na a nyankɔ lɔn.

²¹ Sɛnɛ, bɛ̀ ma n liɛ wa, ma yii bie koo, maa gugurubaa kanaa gɔ́ɔ̃ tumaa pã wa.

^22-23 Masɛ máa minin kɛn lɛn min kɔn ba re we gána lɛ-n wa. Ǹ nə́ maa gugurubaa yɛ, ka kaãbaa sii dadaran kɛn nɛ má ǹ zɛnaa Ezipti gána laanka diə gole gɔ́ɔ̃ nɛ. A laanka bɛ yii ni, ǹ nə n da ma gɔ́ɔ̃ li lɛ da wa. Ǹ nə́ ma bɔlɔ dɔ tii. Bɛ lɛ n ke, ma n lɛ kɔ ǹ digolon la ka gána mɛn lɛ nɛ, ǹ min kɔn yii ba re miɛ bɛ-a wa, a giala ǹ nə́ ma daa.

²⁴ Sɛnɛ, taasiɛ kɔsɔ goã maa dí-nyali Kalɛbu sɛ yiri ni, á goã bɔlɔgoondɛnaa lɛa masɛ wɔ paǹ li. A wo ga gána mɛn lɛ-a, masɛ á die we-n walan, ma bɛa bǎã lɛ kɔ a tɔrɔn la.

²⁵ Amalɛki tɔrɔn laanka Kanaan minin man giã-n bɛa nyankɔrɔ lɛ nɛ. Biɛ̃, ka die ka n lɛ goa ka wusoo ka wo diə gole lɛ nɛ, ka wo ka ka yɔrɔ nɛ Sawɛɛ tà kɛ ganaa.»

Dɛnaa Lawa yoo a zaman gialaa

²⁶ Dɛnaa Lawa wusoo á boo da Muizu laanka Aarɔn nɛ, á pɛ:

²⁷ «Man die goɛ̃ bɛa zaman tìĩ-bɔle kɛ lɛa siin sii ma ganaa miɛ̃, yǎa biĩ? Bɛa zaman kɛ lɛ, a ba n niɛ̃ lɛ giulun boo da masɛ ganaa-a wa. Izirayeli minin lɛ giulun boon lɛn ǹ tá ǹ diɛ masɛ ganaa, máa ǹ ma.

²⁸ Ka wo kɛ pɛ ǹ nɛ mà masɛ Dɛnaa Lawa lɛ gɔ́ɔ̃ ǹ boo á ke: Zaman lɛ boo mɛn da, á kaa masɛ too ne, bɛ̀ masɛ ka kũ á kɔnpɛ ka bɛa boo lɛ-n duduu wa, masɛ Dɛnaa Lawa yii bie koo wa.

²⁹ Ka n die giɛ̃ diə gole kɛ nɛ. Ka goã ka kaa min mɛnɛn tumaa nimi, á saa lɛ̀ fuə ganaa, á woo lɛ̀ fuə ka kio yaa, bɛn tumaa n giɛ̃, a giala ka lɛ giulun boo da masɛ ganaa.

³⁰ Masɛ nə n lɛ kɔ, má ma á gána mɛn lɛ koe ka la, ka giã a nɛ, bɛ̀ á n bɔ Zefunee a nɛgiĩ Kalɛbu ni, ka Nunu a nɛgiĩ Zozoe ne, bɛ̀ ka wɔ bɛ nɛ, masɛ bie wa.

³¹ Sɛnɛ, kaa nɛnyaanan kɛn sɛn, ka goã ǹ mɛnɛn lɛn ganaa, mà minin tá re ǹ kuĩ, masɛ á re we ka bɛn nɛ gána lɛ nɛ. Ka dinin bɛ́ ka zín toa gána mɛn lɛ-n wa, kaa nɛnyaanan lɛn tá re bɛ doɛ̃.

³² Sɛnɛ, ka dinin kɛn, ka n giɛ̃ diə gole kɛ nɛ.

³³ Kaa nɛnyaanan lɛn tá re n binbirin boe diə gole lɛ nɛ, lɛ̀ pusi gɔ́ɔ̃ nɛ. Kaa bɔlɔgoonbaãdɛnaa siin lɛn nɔmaa n die goɛ̃ kaa nɛnyaanan lɛn kio, yǎa ka dinin kɛn tumaa giɛ̃ ka nyɛɛ diə gole kɛ nɛ.

³⁴ Ka n ka woo ga gána lɛ-a, ka lɛawaa pusi. Lɛawaa goon nə die lɛ̀ goon bǎã siɛ: ka n die n toɛ̃ ka kaa sãn lɛn guĩ ni lɛ̀ pusi gɔ́ɔ̃ nɛ. Màn mɛn tá gòãn dii masɛ ganaa nɛ, ka á re bɛ doɛ̃.

³⁵ Masɛ din Dɛnaa Lawa n má boo da. Bɛa zaman tìĩ-bɔle kɛ lɛ, ǹ nə́ n lɛ kaa kun ǹ nə́ yoo masɛ gialaa, ma n die ǹ kuĩ ka yɔrɔ kɛ tɔrɔ nɛ: Ǹ tumaa n die nyɛɛ diə gole kɛ nɛ. Maǹ die giɛ̃ kànaa lɛ nɛ.»

³⁶ Minin kɛn Muizu goã á ǹ dia woe giɛ gána lɛ ganaa, bɛn bɛ́ ǹ nə́ n bɔyaa, ǹ mɛnɛn nə gána lɛ piɛ̃ bɔ, ǹ nə́ zaman lɛ tumaa gòãn sɔmɔ ǹ nə́ ǹ kaa Muizu ganaa,

³⁷ bɛa minin lɛn nə́ gɛ̀ kaka wɔ Dɛnaa Lawa yɔrɔ-a, kɛn lɛn ǹ nə́ goã ǹ nə́ gána lɛ piɛ̃ bɔ.

³⁸ Min mɛnɛn nə goã ǹ nə́ woo ga gána lɛ ganaa, Nunu a nɛgiĩ Zozoe laanka Zefunee a nɛgiĩ Kalɛbu dinsɔɔ̃ yii na á goã koo ǹ bii.

Zaman lɛ wusoo a Lawa bɔlɔ tii

³⁹ Muizu bɛa boon lɛn gũ á ǹ pɛ Izirayeli minin lɛn tumaa nɛ. Boon lɛn nə́ zaman lɛ foo ziziɛ̃ parsiini.

⁴⁰ Bɛ lɛ n ke, bɛa lɛawaa baayɛlɛ yiisoone, ǹ nə́ yoo ǹ nə́ zii saa, ǹ nə́ woo ka ǹ yɔrɔ nɛ kele yii bǎã kɛ li, bɛ̀ ǹ nə́ pii: «Wɔ á ke, Dɛnaa Lawa bǎã mɛn lɛ nyaa, wɔ n die woe walan. Sonbore, wɔsɛn nə́ sii baraa zɛnaa.»

⁴¹ Muizu tɔ́n nɔ̀n da ǹ la: «Ka n woe wàa pii walan? Ka na a gialaa Dɛnaa Lawa bɔlɔ tii. Kɛa bǐɛ̃ koe wa.

⁴² Ka baran wo wa, a giala Dɛnaa Lawa ba kun ka n wa. Ka baran wo ka dinin kɔ kaa zɔ́ɔn la, bɛn nə ka dɛ wa.

⁴³ Amalɛki tɔrɔn laanka Kanaan minin tá walan ka nyɛɛnɛ, zia tá re ka bii bɛn gɔn. A giala, ka n paǹ kɔ Dɛnaa Lawa nɛ. Dɛnaa Lawa ba re goɛ̃ kun ka-n wa.»

⁴⁴ Sɛnɛ, ǹ dɔn nə́ n too laa ǹ nə́ woo bɛa kele yii bǎã lɛ li, a da yaa, *lɛ kɔ kɔn la ǹ goo lɛ laanka Muizu nə n gòã woɛ̃ giã ǹ bǎã lɛ-n wa.

⁴⁵ Amalɛki tɔrɔn laanka Kanaan minin mɛnɛn bɛ́ giã-n bɛa kele mìin lɛn nɛ, bɛn nə́ gisĩ, ǹ nə́ Izirayeli minin lɛn dɛ ǹ nə́ ǹ zɔzɔɔ, yǎa Ɔrmaa kiwi.