Minin nimi 11 - LAWA A BOO SONBORE

Izirayeli minin man Taberaa

¹ Ǹ kɔn pinaa, zaman lɛ zùũzùũ si. Bɛ kɔɔ̃n kɔ Dɛnaa Lawa ganaa wa. A bɛ́ á ǹ lɛ ma, a foo yoo taãn-taãnɛ. Dɛnaa Lawa tɔ́n bɔ̀n da zaman lɛ ganaa ka tɛ nɛ. Bɛa tɛ lɛ giã ǹ bǎã lɛ lɛkoro kũ.

² Zaman lɛ nə́ n lɛ dɛ Muizu ganaa. Muizu goã-kũ da Dɛnaa Lawa ganaa, tɛ lɛ nimi.

³ Ǹ nə́ bɛa bǎã lɛ bii mà Taberaa, bɛ giala mà "tɛ a màn kũ" a giala walan lɛ nɛ, Dɛnaa Lawa bɔ̀n da Izirayeli minin lɛn ganaa ka tɛ nɛ.

Zaman lɛ n siĩ liɛ

⁴ Ka ǹ kɔn dɔ nɛ, bɔlɔ sɛ muĩ Izirayeli minin tɛnɛn kũ. Izirayeli minin lɛn dininmaan ná a giala kɔ doo ǹ nə́ wuu pɛ, ǹ nə́ n toa mà die n die siĩ koe ǹsɛn la, ǹsɛn nə sɔ̃?

⁵ Mà kɛ nə n ǹsɛn yiri diɛ zɔ̀ kɛ nɛ, ǹsɛn nə́ goã soɛ̃ màn nanaa lɛa Ezipti gána nɛ, ka kɔnkɔnbərə kɛ nɛ, mɛlɔn kɛ nɛ, pɔrɔn kɛ nɛ, gɛ̀ba kɛ nɛ, ka layi kɛ nɛ.

⁶ Sɛnɛ, mà kɛ din ba tan lɛa ǹsɛn gɔn doo wa. Mà màn kɔsɔ banban, bɛ̀ á n bɔ *maánə kɛ dinsɔɔ̃ nɛ ǹsɛn yɔrɔ-a.

⁷ Maánə lɛ na á goã ka da we tɔrɔ bisin kɔn bɛ́ lɔn, a fubaa n ka da a yon bɛ́ lɔn.

⁸ Zaman lɛ na á goã sawɛɛ ǹ tá maánə lɛ goɛ. Maǹ nə́ goã loe gii la, hinlaa ǹ kaa gɔrɔ nɛ ǹ zũ. Maǹ nə́ goã kɔrɛɛ dɔn nɛ, hinlaa ǹ mɔ̀mɔ da nɛ. A kɔɔ̃nbaa na á goã ka nyɔɔ buuru diɛ wɔ bɛ́ lɔn.

⁹ Bɛ̀ pele tá koe giã ǹ bǎã lɛ-n tèlò-n, maánə lɛ dɔ na á goã kiɛ tán a nɛ.

¹⁰ Muizu zaman lɛ lɛ ma wuu pii, ǹ nə́ soe-n kɔn tanlɛ yii li, didie ná a mɔnaa zìã kiɛnlɛ-a. Dɛnaa Lawa foo yoo taãn-taãnɛ, bɛ́ Muizu yiri lɔlɔkɔn parsiini.

¹¹ Á tɔ́n nɔ̀n da Dɛnaa Lawa la: – Wàa na á baa n tá sii kɛ miã zɛnɛɛ masɛ nɛ? Wàa na á baa n bǐɛ̃ kɔ masɛ-a wa, yǎa ń zaman kɛ tumaa a guĩ siɛ diɛ masɛ mìi ni?

¹² Zaman kɛ tumaa na á bɔ masɛ nɛ? Masɛ n má ǹ yɛ má ǹ kaa kanaa? N nə n pii masɛ nɛ, mà ma ǹ kaa ma kolo-n ka nɛ-gũli wɔ bɛ́ lɔn, ma wo ǹ ne gána kɛ nɛ, n din Lawa nə́ n lɛ kɔ ǹ digolon la nɛ.

¹³ Masɛ n die boe ka siĩ-n maa, ma tɔn kɔ bɛa zaman kɛ lɛ tumaa la wuu pii ma ganaa, ǹ nə́ pii: «Siĩ kɔ wɔ sɔ̃?»

¹⁴ Masɛ dinsɔɔ̃ a boe la, man toɛ̃ ka bɛa zaman kɛ lɛ tumaa a sii-n wa, á guguru ma ganaa á la yii ni.

¹⁵ Bɛ̀ n tá re masɛ kuĩ kɛnɛn, á soɛ n masɛ dɛ. Ń ta re bǐɛ̃ din koe masɛ-a bɛa yɔrɔ lɛ la, maa koe kɛ na á ba ma yii gɔ́ɔ̃ ǹ sii biɛ wa.

¹⁶ Dɛnaa Lawa tɔ́n Muizu lɛ si: – Min yii guguru-a pɔsɔbaa sɔkɔn, ń bɛ́ ǹ mɛnɛn doɛ̃ zaman lɛ a min golen laanka a nyɛɛnaandɛnan lɛa. N die n wo ǹ ne kɔn yɛ ka Lawa nɛ ǹ kion kɛ yɔrɔ-a, ǹ giã bii-a kun n dinmaa nɛ masɛ yɔrɔ-a.

¹⁷ Masɛ n die gisĩ, ma boo da n nɛ bɛa bǎã lɛ nɛ. Yiri mɛn bɛ́ n la, ma á die bɛ kɔn boe a gisĩ bɛa minin lɛn la. Ǹ tá re n toɛ̃ ka zaman lɛ a guĩ-n kunun n ni, n dinsɔɔ̃ nə n ba n toɛ̃-n doo wa.

¹⁸ N die n pɛ zaman lɛ nɛ: «Ka *gɔ̀ bɔ ka dinin ganaa, biɛ̃ ǹ taman yii, ka tá re siĩ soɛ̃. A giala, ka wuu pɛ Dɛnaa Lawa ganaa, ka pɛ: Die n die siĩ koe wɔsɛn la wɔ sɔ̃? Ezipti gána goã soɛ wɔsɛn ganaa. Dɛnaa Lawa n die siĩ koe ka la kəni, ka sɔ̃.

¹⁹ Ka bie re bɛa siĩ kɛ lɛ soɛ̃, pinin goon hinlaa lɛawaa paa dinsɔɔ̃ wa, lɛawaa sooro, lɛawaa fù hinlaa lɛawaa fuə dɔ din bie wa.

²⁰ Sɛnɛ, ka n die soɛ̃ mui goon tumu gɔ́ɔ̃ nɛ, yǎa a n toe ka nɛ, a tìĩ boe ka nyin ni. A giala, Dɛnaa Lawa lɛ n kun ka nɛ, ka ná a puusə kɔ, ka wuu pɛ a yɔrɔ-a ká pɛ: Wàa na á baa wɔsɛn nə́ soo wɔ n bɔ Ezipti gána-n dinin?»

²¹ Muizu tɔ́n pɛ: «Ma bɛ́ zaman mɛn lɛ bii, maǹ min duu biɛsɔrɔ (600 000). Bɛn lɛn bie sɛn, Lawa ń pii mà á die siĩ koe ǹ la, ǹ sɔ̃ mui goon tumu gɔ́ɔ̃-n wa?

²² Ta man tɔɔ bisinin laanka tɔɔ dadaran dii koe ǹ la, bɛ tá ǹ boe? Ta man yìsi mu a zɔ̀ tumaa kuĩ doɛ̃, ǹ nə́ koe ǹ la, bɛ tá ǹ boe?»

²³ Dɛnaa Lawa tɔ́n pɛ Muizu ni: «Masɛ pàã lɛ na á woo maa? Ma boo mɛn da, n tá re yii sisia, bɛ̀ bɛ á re n zɛnɛɛ n nɛ, hinlaa bɛ̀ a re n zɛnɛɛ n nɛ wa?»

Lawa Yiri gisĩ min gole pɔsɔbaa la

²⁴ Muizu soo á n bɔ mɔnaa zìã lɛ nɛ, á Dɛnaa Lawa a boon lɛn gũ á ǹ pɛ zaman lɛ nɛ. Bɛ kio, á zaman lɛ a *min gole pɔsɔbaa sɔkɔn, á ǹ kaa bii-a, ǹ nə́ mɔnaa zìã lɛ da bii.

²⁵ Dɛnaa Lawa gisĩ tɛmaa bara bii, á boo da Muizu ni. Yiri mɛn goã Muizu la, á bɛ kɔn bɔ á gisĩ min gole pɔsɔbaa lɛ la. Lawa yiri lɛ bɛ́ á gisĩ ǹ la lɔn gɔrɔ, ǹ ná a giala kɔ ǹ nə́ Lawa a boo gii-dali baa ǹ siin zɛnɛɛ, sɛnɛ ǹ wo-n nyɛɛn wa.

²⁶ Ǹ min gole pɔsɔbaa mɛn lɛ tɔ kiɛ̃, ǹ min paa golee giã ǹ bǎã lɛ nɛ, ǹsɛn nə wo mɔnaa zìã lɛ li wa. Goon tɔ n Ɛldaadi, kɛ dɔ tɔ n Medaadi. Lawa yiri lɛ gisĩ ǹ dɔn la, ǹ nə́ Lawa a boo gii-dali baa ǹ sii zɛnaa giã ǹ bǎã lɛ nɛ.

²⁷ Nɛginin goon nə́ baa si á woo a boo da Muizu ni mà Ɛldaadi laanka Medaadi tá a gialaa Lawa a boo gii-dali baa ǹ sii zɛnɛɛ giã ǹ bǎã lɛ nɛ.

²⁸ Nunu a nɛgiĩ Zozoe mɛn lɛ á ke, a kũ a tenmaa ganaa á n Muizu a dɔmalɛ wole lɛa, bɛ́ tɔ́n nə n lɛ da boo ne mà asɛ a dɛnaagiĩ Muizu nə ǹ kurəə.

²⁹ Muizu Zozoe lɛ si á pɛ: «N foo n wuu pii masɛ a lɛa? Ká toa bɛ̀ Dɛnaa Lawa din nə n Yiri kɛ gisĩ Izirayeli minin lɛn tumaa la, màn mɛn bɛ́ toɛ ǹ tumaa Lawa a boo gii-dalin baa.»

³⁰ Bɛ kio, Muizu nə́ n bɔyaa á daa giã ǹ bǎã lɛ nɛ, a laanka Izirayeli min golen lɛn nɛ.

Zaman lɛ siĩ yɛ

³¹ Dɛnaa Lawa piɛ̃ da bɔ ganaa. Bɛa piɛ̃ lɛ pɛpɛrɛn goa yìsi mu bǎã nɛ, á daa ǹ nyɔmaa giã ǹ bǎã lɛ la, á ná a lɛnpɛnɛ nɛ. Giã ǹ bǎã lɛ a lon li bǎã li, pɛpɛrɛn lɛn gɔn bɔ á pinin goon tɔ-wɔ boe, a tán nɛ dɔ li, ǹ gɔn bɔ á pinin goon tɔ-wɔ boe. Giã ǹ bǎã lɛ paǹ tumaa li, a n miɛ̃. Pɛpɛrɛn lɛn wɔlɔ a lui tán ganaa n mɛtərə goon kɛ miã.

³² Zaman lɛ na á bɛa lɛawaa lɛ tumaa zɛnaa ǹ gòãn la, ǹ nə́ tèlò tumu zɛnaa, ka bɛa lɛawaa tumaa nɛ, ǹ nə́ pɛpɛrɛn lɛn goɛ. Bɛ̀ min mɛn pɛpɛrɛn lɛn goa taãn wa, bɛ wɔ n kilo duu damata. Ǹ nə́ pɛpɛrɛn lɛn nyɔmaa tán bǎã yii ni, ǹ nə́ giã ǹ bǎã lɛ lɛnpɛnɛ nɛ.

³³ Sɛnɛ, Izirayeli minin lɛn nə n sɔ din da bɛa siĩ lɛ la lɔn gɔrɔ, Dɛnaa Lawa foo yoo ǹ li taãn-taãnɛ, á koe gole da ǹ mìi ni.

³⁴ Ǹ nə́ tɔ́n bɛa bǎã lɛ bii mà "Kibrɔti-Taawa", bɛ giala mà "bɔlɔ sɛ mui ǹ yalan". A giala, bɔlɔ sɛ mui zaman lɛ a minin mɛnɛn kũ, maǹ nə́ bɛn bĩ walan.

³⁵ Zaman lɛ nə́ n toa Tibrɔti-Taawa, ǹ nə́ woo Haserɔti, ǹ nə́ golee walan.