Minin nimi 10 - LAWA A BOO SONBORE

Wɔrɔ bɛnɛn

¹ Dɛnaa Lawa boo da Muizu ni, á pɛ:

² «Bɛn màn paa zɛnaa. Wɔrɔ dɛ n nə ǹ zɛnaa nɛ. Bɛa bɛnɛn kɛn lɛn manɛ, ka tá re zaman lɛ soekɔn nɛ, ka gòon dɔ yiɛ minin ganaa nɛ, bɛ̀ ka tá re yui n boe giã ǹ bǎãn nɛ biikoo mɛn li.

³ Bɛ̀ ǹ nə́ bɛa bɛnɛn lɛn pɛ kun, zaman lɛ tumaa die ǹ da n sɔkɔn n din Muizu genli, kɔn yɛ ka Lawa nɛ ǹ kion kɛa kiɛnlɛ-a.

⁴ Bɛ̀ ǹ nə́ bɛn lɛ a goon dinsɔɔ̃ pɛ, nyɛɛnaandɛnan laanka Izirayeli a tanlɛn goledɛnan dininsɔɔ̃nɔn die ǹ da n sɔkɔn n genli.

^5-6 Bɛ̀ ǹ nə́ bɛn pɛ kɔsɛkɔsɛ, bɛ n yoo ǹ wɔ lɛa. Bɛ̀ ǹ nə́ bɛn lɛ a bibinaa pɛ kɔsɛkɔsɛ, tɔrɔn mɛnɛn bɛ́ giã-n lɛ̀giala gɔn la, bɛn die ǹ yoo ǹ zii saa. Bɛ̀ ǹ ná a paabaa ǹ wɔ pɛ kɔsɛkɔsɛ, tɔrɔn mɛnɛn bɛ́ giã-n gusin a lɛ̀gɔn la, bɛn dɔn die ǹ yoo ǹ zii saa.

⁷ Sɛnɛ, bɛ̀ ǹ tá re zaman lɛ soekɔn, ǹ bɛn pɛ, ǹ nə́ ǹ ba toɛ a wuu bɔ kɔsɛkɔsɛ wa.

⁸ Aarɔn a nɛgiĩn kɛn, Lawa a wúlu-bɔlen lɛa, bɛn man die bɛa bɛnɛn lɛn pii. Kɛ n sii zɛnaa ǹ gɔn lɛa, ka laanka kaa nɛnyaanan doamaa nɛ, ka kɔ lɛ biikoo tumaa li.

⁹ Kaa gána nɛ, bɛ̀ ka á woe koe zɔ́ɔn lɛ ka zia nɛ, zɔ́ɔn mɛnɛn bɛ́ ka nɔmɛɛ, ka die ka bɛa bɛnɛn kɛn lɛn pɛ kɔsɛkɔsɛ. Bɛ n die toɛ masɛ nə n yiri koa ka li. Masɛ din Dɛnaa Lawa, kaa Lawa lɛ n die ka sii kaa zɔ́ɔn la kəni, ma ka kaa.

¹⁰ Kaa nyɛnyɛɛ lɛawaan li, kaa lɛawaa dadaran li, kaa mui dii zɔ́nɔn li, ka die ka bɛa bɛnɛn kɛn lɛn pɛ ka *wúlu màn tiɛ̃n laanka kaa barka da ǹ wúlu mànan bɔ biikoo li. Bɛ dɔ á re toɛ masɛ nə n yiri kɔ ka li. Ma din ni kaa Lawa, Dɛnaa Lawa lɛ lɛa.»

Izirayeli minin zii saa

¹¹ Lɛ̀ a mui paabaa ǹ wɔ a lɛawaa fuəbaa ǹ wɔ pinaa, zaman lɛ a soo a bɔ Ezipti gána-n a lɛ̀ paabaa ǹ wɔ li, tɛmaa bara lɛ yoo á n bɔ lɛ kɔ kɔn la ǹ boo koa ǹ kion lɛ la.

¹² Izirayeli minin lɛn nə́ koa kɔn la, ǹ nə́ yoo ǹ nə́ n bɔ Sinayii diə gole lɛ nɛ. Tɛmaa bara lɛ woo golee Paran diə gole ne.

¹³ Dɛnaa Lawa goã á Muizu da boo mɛn pɛ ganaa, Izirayeli minin lɛn gunyin bibinaabaa ǹ wɔ n ke, yui kɔnpii ka bɛ nɛ.

¹⁴ Zudaa tɔrɔn giã ǹ bǎã a zaman na á yoo á zii saa bibinaa nɛ, ka n zanzan nɛ ǹ zia nɛ kurun lɛ yii li. Aminaadaabu a nɛgiĩ Naasɔn na á goã Zudaa tɔrɔn zia nɛn mìi la.

¹⁵ Suwaara a nɛgiĩ Netaneli na á goã Isakaara tɔrɔn zia nɛn mìi la.

¹⁶ Elɔn a nɛgiĩ Eliabu na á goã Zabulɔn tɔrɔn zia nɛn mìi la.

¹⁷ Ǹ nə́ kɔn yɛ ka Lawa nɛ ǹ kion lɛ bɔbɔkɔnlɛ. Gɛrsɔn tɔrɔn laanka Merarii tɔrɔn nə́ gũ ǹ nə́ woo ne.

¹⁸ Bɛ kio, Urubɛn tɔrɔn giã ǹ bǎã a zaman nə́ yoo á zii saa, ka zanzan nɛ ǹ zia nɛ kurun yii li. Sedewuru a nɛgiĩ Elisuuru na á goã Urubɛn tɔrɔn zia nɛn mìi la.

¹⁹ Surisadayii a nɛgiĩ Selumiyeli na á goã Simiɔn tɔrɔn zia nɛn mìi la.

²⁰ Dewɛli a nɛgiĩ Eliyasaafu na á goã Gaadi tɔrɔn zia nɛn mìi la.

²¹ Bɛ kio, Keyati tɔrɔn kɛn *Levii tɔrɔn lɛa, bɛn nə́ yoo ǹ nə́ zii saa, ka zazan nɛ bɛ̀ ǹ tá màn sonboren kɛn guĩ. Levii tɔrɔ gialakunun kɛn doamaa nɛ ǹ kɔn yɛ ka Lawa nɛ ǹ kion kɛ doa, bɛ̀ Keyati tɔrɔn lɛn nə baa doe.

²² Bɛ kio, Efrayimu tɔrɔn giã ǹ bǎã a zaman yoo á zii saa, ka zanzan nɛ ǹ zia nɛ kurun yii li. Amiwudu a nɛgiĩ Elisaamaa na á goã Efrayimu tɔrɔn zia nɛn mìi la.

²³ Pedaasuuru a nɛgiĩ Galimeyeli na á goã Manaasee tɔrɔn zia nɛn mìi la.

²⁴ Gideonii a nɛgiĩ Abidan na á goã Bɛnzamɛn tɔrɔn zia nɛn mìi la.

²⁵ Dan tɔrɔn giã ǹ bǎã a zaman na á yoo á zii saa, ka zanzan nɛ ǹ zia nɛ kurun yii li, giã ǹ bǎã gialakunun lɛn tumaa kio. Amisadayi a nɛgiĩ Ayiezɛɛrɛ na á goã Dan tɔrɔn mìi la.

²⁶ Okran a nɛgiĩ Pagiyeli na á goã Asɛɛrɛ tɔrɔn zia nɛn mìi la.

²⁷ Eyinan a nɛgiĩ Ayira na á goã Nɛfutalii tɔrɔn zia nɛn mìi la.

²⁸ Izirayeli minin lɛn man nə́ koa kɔn la yɔrɔ kɛ lɛ tɔrɔ la, ǹ zia nɛ kurun yii li, ǹ nə́ zii saa.

Min mɛn bɛ́ re zaman lɛ a bǎã-nyaali biɛ

²⁹ Rewuyeli a nɛgiĩ Obaabu ke Madiã gána min lɛa, Muizu daãgiĩ lɛa, Muizu pɛ bɛ nɛ: «Dɛnaa Lawa bǎã mɛn lɛ boo da, á kɔ wɔ la, wɔsɛn man woe walan. Kiɛ̃ n nə n ta kun ka wɔsɛn nɛ. Dɛnaa Lawa nə n lɛ kɔ Izirayeli minin la ka yii-nyɛɛ mɛn nɛ, wɔsɛn tá re toɛ n dɔ wɔ yɛ bɛ nɛ.»

³⁰ Obaabu Muizu lɛ si kɛnɛn: «Ma a woe wa. Ma n die woe maa gána nɛ, ma tɔrɔn bii.»

³¹ Muizu wusoo á n toa a ganaa: «Bǐɛ̃ kɔ, n baran wɔsɛn toa walan wa. Wɔ bɛ́ boe la wɔ golee bǎãn mɛnɛn nɛ diə gole lɛ nɛ, n bɛ́ bɛn doɛ̃, n die n nə n baa wɔsɛn bǎã-nyaali lɛa.

³² Bɛ̀ ń daa kun ka wɔsɛn nɛ, Dɛnaa Lawa bɛ́ giɛ li a yii-nyɛɛ mɛn lɛ kɔ wɔsɛn la, bɛ̀ wɔsɛn nə́ bɛ yɛ, wɔ á re toɛ n dɔ nə n wɔ yɛ a nɛ.»

³³ Bɛ kio, ǹ nə́ kiɛ̃ ǹ nə́ n bɔ Dɛnaa Lawa a kele bǎã kɛ nɛ, ǹ nə́ lɛawaa sɔɔ zii tɔ wɔ. Bɛa lɛawaa sɔɔ zii tɔ lɛ gɔ́ɔ̃ nɛ Dɛnaa Lawa a *lɛ kɔ kɔn la ǹ goo lɛ goã á woo ǹ nyɛɛnɛ, màn mɛn bɛ́ toɛ, ǹ bɛ́ re boe la ǹ golee bǎã mɛn nɛ, ǹ bɛ dɔ̃.

³⁴ Bɛ̀ ǹ nə́ yoo ǹ tá woe, Dɛnaa Lawa a tɛmaa bara lɛ na á goã n koe ǹ lɛ lɛawaa li.

³⁵ Bɛ̀ goo lɛ tá woe, Muizu na á goã pii: «Dɛnaa Lawa ganaa, yoo! N zɔ́ɔn tá re pɛsɛ̃, n zia dama a wolen tá re kiɛ baa nɛ n nyɛɛnɛ!»

³⁶ Bɛ̀ goo lɛ golee, Muizu na á goã pii: «Dɛnaa Lawa ganaa, wusoo n da Izirayeli a zia nɛ damata lɛ li.»