Matiə 8 - LAWA A BOO SONBORE

Yezu giĩ goon a gɔ̀nɔn busu babaraa nya

¹ Yezu bɛ́ á gisĩ á n bɔ kele lɛ la, zaman gigiã kɔ a kio lɛ.

² Bɛa biikoo li, gɔ̀nɔn busu babaraa dɛnaa goon nə́ n zɔ̃ á dɔ, á kaa tán a yɔrɔ-a, á pɛ nɛ: «Mìinaa ganaa, bɛ̀ n tá li, n tá boe la n masɛ a busu nya.»

³ Yezu nə́ n gɔn saa á da a ganaa, á pɛ: «Ma tá li, masɛ máa busu lɛ nə n bɔ n ganaa.» A din bǎã-n gɔrɔ, busu lɛ nə́ n bɔ a ganaa, á kakabaa yɛ.

⁴ Bɛ kio, Yezu tɔ́n pɛ nɛ: «N too kɔ doɛ̃, n nyan toa n kɛ laakalaa min kɔ́n yii-n wa. Wo n din nya wúlu-bɔle ne, bɛ ga n ganaa bɔrɔ, bɛ kio, Lawa wúlu mɛn boo da Muizu ni, n bɛ lɛ bɔ n nyaa min din tumaa nɛ mà n busu nya.»

Yezu sii mɛn zɛnaa sɔraasin goledɛnaa a dí-nyali ni

⁵ Yezu bɛ́ we Kafaranaamu kiwi ǹ mɛn waáraa, Rɔmu minin sɔraasi paabiɛ mìilandɛnaa goon nə́ n zɔ̃ á dɔ a li,

⁶ a ná a nyankɔ: «Mìinaa ganaa, maa dí-nyali n waa-n tán piɛ, a boe yoo la wa, á nɔmaa-n parsiini.»

⁷ Yezu tɔ́n pɛ nɛ: «Ma á die woe a busu lɛ nyɛɛ.»

⁸ Sɛnɛ, sɔraasin goledɛnaa lɛ pɛ Yezu ni: «Mìinaa ganaa, masɛ doamaa bie ka n wɔ maa kion ne wa. Boo goon dinsɔɔ̃ pɛ, maa dí-nyali lɛ a busu á die nyɛɛ.

⁹ Masɛ dɔ dinmaa kɛ lɛ n maa goledɛnan pàã giulun, sɔraasin tá ma dɔ a pàã giulun. Bɛ̀ má pɛ ǹ goon ne má a woo, a n woe, bɛ̀ ma pɛ kɔsɔ dɔ nɛ má a daa, a n die. Bɛ̀ má pɛ maa bɛ̀rɛgiĩ ni má a kɛ zɛnaa, a n zɛnɛɛ.»

¹⁰ Yezu bɛ́ á bɛa boon lɛn ma lɔn, á n kaãbaa ǹ ganaa parsiini, á tɔ́n pɛ a kiodɛnan lɛn manɛ: «Masɛ n pii ka nɛ sonbore: ma bin kɛa golee Lawa li kɛ miã tɔrɔ yɛ min kɔ́n lon Izirayeli gána-n wa.

¹¹ Man pii ka nɛ: Min gigiã tá re boe lɛ̀giala-n ka lɛ̀nyɛɛn nɛ, ǹ giã tán ǹ zɔ́n màn bii lon a kiibaa ǹ bǎã nɛ kun ka Zuifun digolo Abrahamu ni, ka Izaaki ni, ka Zakɔba nɛ.

¹² Sɛnɛ, *Lawa a kiibaa ǹ bǎã lɛ bɛ́ min mɛnɛn kíɛ̃ lɛa, ǹ tá re bɛa dɛnan lui ǹ nə ǹ kaa kanaa wɔlɔ tì biribiri li, ǹ wuu pɛ walan, ǹ sɔ kere bɔ.»

¹³ Bɛ kio, Yezu tɔ́n pɛ sɔraasin goledɛnaa lɛ nɛ: «Wo piɛ, á die n zɛnɛɛ n nɛ a kɔnpɛ ka n golee Lawa li ni.» A boo lɛ da biikoo mɛn li, a din biikoo lɛ nɛ sɔraasin goledɛnaa a dí-nyali lɛ a busu nya.

Yezu busulə gigiã mɛn a busu nya

¹⁴ Yezu woo Piɛrɛ a piɛ. Á Piɛrɛ n dàãlɔ yɛ waa-n tán-a walan, gɔ̀nɔn wɛɛ̃ na á goã a ganaa.

¹⁵ Yezu ná a gɔn kũ, a gɔ̀nɔn wɛɛ̃ lɛ nya. Bɛ kio á yoo, á màn-bii zɛnaa á kɔ Yezu la.

¹⁶ Wasa bɛ́ á mɛ, minin nə́ daa nɔ̀ɔn babaraa dɛnaa gigiã kɔ Yezu la. Yezu bɛa nɔ̀ɔnɔn lɛn loo ka boo lɛ yii goon ne, á busulə din tumaa dɔ a busu nya.

¹⁷ A ná a zɛnaa màn mɛn bɛ́ toɛ Lawa a boo gii-dali Izayii boo mɛn da, bɛ lɛ lɛ pã: «Wɔ dinin busun man nə́ goã a mìi ni, a na á wɔa fuun si a din ganaa.»

Min mɛnɛn bɛ́ giɛ li mà ǹ kɔ Yezu lɛ

¹⁸ Yezu bɛ́ á zaman gigiã yɛ a lɛnpɛnɛ, á pɛ ǹ nɛ gɔrɔ mà ǹ wo tà kio.

¹⁹ A laan bɛ̀ a woo, landa sii-daraali goon nə́ n zɔ̃ á dɔ a li á pɛ nɛ: «Mìinaa, n bɛ́ re woe bǎã woo bǎã nɛ, masɛ n koe n lɛ.»

²⁰ Yezu tɔ́n pɛ nɛ: «Tolokan yalan tan, bàanan kii tan, sɛnɛ, bǎã kɔ́n ba Min a Nɛgiĩ lon á n mìi susui a-n wa.»

²¹ Giĩ goon ne, a dɔ n Yezu a kialandɛnaa goon lɛa, bɛ dɔ́ pɛ nɛ: «Mìinaa, toa masɛ wo ma di gere bĩ bɔrɔ, ma tɔn daa.»

²² Yezu tɔ́n pɛ nɛ: «Kɔ masɛ kio lɛ. A toa geren nə ǹ geren bĩ.»

Yezu n piɛ̃ gole lɛ kuĩ

²³ Yezu wɔ tà kuru ǹ goo ne, a kialandɛnan nə́ da zii.

²⁴ Boɛɛn gɔrɔ piɛ̃ gole nə́ n tonton baa á yoo tà lɛ la, tà mu lɛ n yui á n duwii goo lɛ la, a n giɛ li a mui. Bɛa zɛnɛɛ bɛ̀ Yezu n nyuù we.

²⁵ A kialandɛnan nə́ n zɔ̃ ǹ nə́ dɔ a li, ǹ nə́ bũ ǹ nə́ pɛ nɛ: «Dɛnaa, wɔ kirisibaa! Wɔsɛn man die giɛ̃!»

²⁶ Yezu tɔ́n pɛ ǹ nɛ: «Wàa na á baa ka tá nyɛ́ɛ biɛ miɛ̃, kaa golee Lawa li a kiɛɛrɛ dɛ!» Bɛa bǎã-n gɔrɔ, Yezu yoo, á paraa piɛ̃ lɛ laanka tà mu lɛ li. Wɔlɔ nyɛɛ ka kiĩn.

²⁷ Ǹ tumaa nə́ n kaãbaa parsiini, ǹ nə́ goã pii: «Kɛ n wàa n min tɔrɔ lɛa, piɛ̃ laanka tà mu din tumaa ná a bɔlɔ sii?»

Yezu nɔ̀ɔndɛnaa min paa a busu nya

²⁸ Yezu bɛ́ á dɔ tà kio, Gadaaraa minin gána nɛ, giĩ min paa kɔ́n yoo geren bĩ ǹ bǎã nɛ, ǹ nə́ daa n da lɛ. Nɔ̀ɔnɔn man nə́ goã ǹ ganaa. Ǹ nə́ goã baraa á la yii ni, haalɛ min kɔ́n din yii ba we á boe ka bɛa zii lɛ-n wa.

²⁹ Ǹ nə́ yoo ǹ nə́ n lɛ dɛ: «Lawa a Nɛgiĩ ganaa, n wàa mɛn sii n wɔsɛn sii ni? Ma nə́ n daa dɔlɔ bɔ wɔsɛn ganaa kànaa bɛ̀ a biikoo ná a tɔn dɔ wa?»

³⁰ Birii gigiã goã tiãlɛa, giɛ ǹ màn-bii li.

³¹ Nɔ̀ɔnɔn lɛn nə́ Yezu nyankɔ ǹ nə́ pɛ: «Bɛ̀ n tá li n wɔsɛn loo, n wɔ kaa bɛa biriin lɛn ganaa.»

³² Yezu tɔ́n pɛ ǹ nɛ: «Ka soo ka n tan.» Ǹ nə́ n bɔ giĩ min paa lɛ ganaa, ǹ nə́ woo kaa biriin lɛn ganaa. A din bǎã-n gɔrɔ, biriin lɛn nə́ n toa kele lɛ la ka baa nɛ, ǹ nə́ gisĩ ǹ nə́ kaa tà mu li, mu nə́ ǹ kũ.

³³ Biriin-lɛduə̃lin lɛn nə́ baa si, ǹ nə́ woo kiwi gɔ́ɔ̃ nɛ, ǹ nə́ sii lɛ din tumaa laakalaa walan. Sii mɛn bɛ́ á n zɛnaa nɔ̀ɔn babaraa dɛnan lɛn manɛ, ǹ nə́ bɛ dɔ laakalaa.

³⁴ Kiwi minin nə́ nɔmaa ǹ nə́ soo, ǹ nə́ woo ǹ da Yezu lɛ. Ǹ bɛ́ ǹ nə́ yɛ, ǹ ná a nyankɔ mà a woo a n bɔ ǹsɛn gána nɛ.