Matiə 26 - LAWA A BOO SONBORE

Ga Yezu kũ ǹ gɔn li boo

¹ Yezu bɛ́ á bɛa doroon kɛn lɛn tumaa kɔ á nya, á tɔ́n pɛ a kialandɛnan manɛ:

² «Ka á doɛ̃ mà *kiɛ̃mala ǹ zɔ́n gialakun na á goã lɛawaa paa. Ǹ tá re Min a Nɛgiĩ koe minin la, ǹ dere gɔn ganaa.»

³ Bɛa biikoo li, Lawa a wúlu-bɔlen goledɛnan laanka Zuifun goledɛnan kɔsɔn nə́ woo n lɛ sɔkɔn wúlu-bɔlen kiã Kayifu a sumu-n,

⁴ ǹ nə́ n lɛ kaa kun boo goon ganaa, mà maǹ die Yezu kuĩ ka durii ni ǹ dɛ.

⁵ Maǹ nə́ goã pii: «Wɔ doamaa bie wɔ kũ zɔ́n pinaa kɛ-n wa, bɛ bie wa, á die sii lɔlɔkɔn biɛ zaman lɛ bii.»

Nyɔɔ gìĩ kɔɔ̃n kaa Yezu mìi-n boo

⁶ Giĩ goon goã Betaanii kiwi, a tɔ n Simɔn, gɔ̀nɔn busu babaraa goã a ganaa. Yezu bɛ́ bɛa kion,

⁷ lɔ goon daa wɔ walan ka kɔlɔ donkolon siĩn kɔ́n nɛ, nyɔɔ gìĩ kɔɔ̃n ná a nɛ, a giɔ̀mɔ n kaka parsiini. Lɔ lɛ Yezu toa màn bii, á bɛa nyɔɔ lɛ kaa a mìi ni.

⁸ A kialandɛnan bɛ́ ǹ nə́ bɛ yɛ, ǹ foo busu lɔ lɛ li parsiini, ǹ nə́ pɛ: «Wàa-n basaã n ke?

⁹ Toa bɛ̀ wɔ n wɔ́ nyɔɔ kɛ lɛ sã giɔ̀mɔ kaka ganaa, wɔ́ a wɔrɔ kɔ doobaan la!»

¹⁰ Yezu bɛ́ á dɔ̃ mà maǹ boo diɛ miɛ̃, á tɔ́n pɛ ǹ nɛ: «Wàa na á baa ka tá lɔ kɛ lɛ nɔmiɛ? Dí taãn nɛ ka kɛ nɛ á nya masɛ nɛ.

¹¹ A giala, doobaan tá kun ka nɛ biikoo tumaa li, sɛnɛ, ka a re masɛ yii kun ka nɛ biikoo tumaa li wa.

¹² A bɛ́ á nyɔɔ gìĩ kɔɔ̃n kɛ kaa masɛ gɔ̀nɔn ganaa, a na á maa biĩ yɔrɔ bɔ ka bɛ nɛ.

¹³ Man pii ka nɛ, sonbore, ka bɛ́ re Boo Tii Kɔɔ̃n pii kanaa paǹ mɛn tumaa nɛ, lɔ kɛ sii mɛn zɛnaa, ǹ tá re bɛ dɔ laakalɛɛ walan, ǹ minin yiri da a zɛnaa ǹ sii ni.»

Zudaasi a ga Yezu kɔ ǹ gɔn li

¹⁴ Bɛa biikoo li, Kariyɔtin Zudaasi mɛn bɛ́ a kialandɛnaa fulupaa lɛ goon lɛa, bɛ́ woo Lawa a wúlu-bɔlen goledɛnan li,

¹⁵ á pɛ ǹ nɛ: «Ka n lɛ koe ka wàa kɔ masɛ la, ma Yezu kɔ ka la?» Ǹ nə́ wɔrɔ we pɔsɔɔ nimi ǹ nə́ kɔ la.

¹⁶ A saa bɛa biikoo lɛ ganaa, Zudaasi ná a giala kɔ á ga biikoo sonbore li, màn mɛn bɛ́ toɛ, a Yezu kɔ ǹ la.

Kiɛ̃mala ǹ zɔ́n yɔrɔ bɔ

¹⁷ *Yɔ bùbaã buuru zɔ́n giala kɔ pinaa, Yezu a kialandɛnan nə́ daa nɔ̀n da la: «Ma n giɛ li wɔsɛn nə wo kiɛ̃mala ǹ zɔ́n màn-bii zɛnaa maa?»

¹⁸ Yezu tɔ́n pɛ ǹ nɛ: – Ka wo min kɔ́n li kiwi gɔ́ɔ̃ nɛ ka pɛ nɛ: «Mìinaa n kɛ pii mà asɛ a biikoo dɔ, mà asɛ n die kiɛ̃mala ǹ zɔ́n màn bii a piɛ, kun ka a kialandɛnan nɛ.»

¹⁹ Yezu màn mɛn pɛ a kialandɛnan manɛ, ǹ nə́ bɛ lɛ zɛnaa, ǹ nə́ kiɛ̃mala ǹ zɔ́n màn-bii sii yɔrɔ bɔ.

Kiɛ̃mala ǹ zɔ́n màn-bii

²⁰ Wasa bɛ́ á mɛ, Yezu laanka a kialandɛnaa fulupaa lɛ giã tán-a ǹ nə́ màn bii.

²¹ Ǹ bɛ́ màn bii, Yezu pɛ ǹ nɛ: «Masɛ n pii ka nɛ, sonbore, ka dinin min goon nə die masɛ we maa zɔ́ɔn gɔn.»

²² Bɛa boo lɛ yɔrɔ kɔsiɛ da a kialandɛnan lɛn ganaa parsiini, ǹ ná a giala kɔ ǹ nə́ nɔ̀n da la gogoon, didie n pii: «Táa masɛ bie wa, Dɛnaa?»

²³ Yezu tɔ́n pɛ: «Min mɛn bɛ́ á n gɔn wɔ kun ka masɛ nɛ dù tasa nɛ bɛa dɛnaa nɛ.

²⁴ Min a Nɛgiĩ á re giɛ̃, ka a bɛ́ á n kiɛ̃ a wɔ gɔn la Lawa a boo-n lɔn. Sɛnɛ, min mɛn bɛ́ re Min a Nɛgiĩ we a zɔ́ɔn gɔn, bɛa dɛnaa wɔ n ka bɔ̀n nɛ! Bɛ̀ n dɛnaa din na a yɛ wa, bɛ á soɛ a ganaa!»

²⁵ Zudaasi mɛn bɛ́ we a zɔ́ɔn gɔn, bɛ́ tɔ́n nɔ̀n da Yezu la: «Táa masɛ bie wa, Mìinaa?» Yezu tɔ́n pɛ nɛ: «N din bɛ́ nə ń pɛ!»

Dɛnaa a màn-bii sonbore

²⁶ Ǹ bɛ́ màn bii, Yezu buuru saa, á barka da Lawa nɛ, á yiyiɛ kɔn, á kɔ a kialandɛnan la, á pɛ ǹ nɛ: «Ka si ka sɔ̃, masɛ din gɔ̀nɔn nɛ.»

²⁷ Bɛ kio, á duvɛ̃ saa paan nɛ, á barka da Lawa nɛ, á kɔ ǹ la, á pɛ ǹ nɛ: «Ka dinin tumaa mi,

²⁸ kɛ n masɛ mà lɛa, á kaa minbuiin tumaa a lɛa, màn mɛn bɛ́ toɛ, Lawa nə ǹ sii baraan toa ǹ nɛ. A n nyɛɛ mà Lawa lɛ kɔ kɔn la wɔ ka minbuiinin ni.

²⁹ Man pii ka nɛ, sonbore: A kũ sisia ganaa, ma a bɛa duvɛ̃ lɛ mii doo wa, yǎa maa Díi *Lawa a kiibaa ǹ bǎã nɛ, ma bɛ́ re duvɛ̃ dii mii kun ka nɛ ǹ mɛn pinaa.»

³⁰ Bɛ kio, ǹ nə́ zɔ́n lɛ a loe lɔ, ǹ nə́ tɔ́n yoo, ǹ nə́ woo *Olivie dan kele la.

Yezu saa lɛlɛ á Piɛrɛ a piã boo mɛn da

³¹ Bɛa biikoo li, Yezu pɛ a kialandɛnan manɛ: – Sii mɛn bɛ́ re n zɛnɛɛ masɛ-n pelo tèlò-n dinin, bɛ lɛ n die ka dinin tumaa a mɛnaa ǹ giala biɛ. A giala, a kiɛ̃maa tá Lawa a boo-n kɛnɛn: «Man die sèren-lɛduə̃li lɛ dii, sèren lɛn tá re sawɛɛ.»

³² Sɛnɛ, Yezu mà bɛ̀ asɛ yii wusoo á kaa, mà asɛ á die woe ǹ nyɛɛnɛ Galilee gána nɛ.

³³ Piɛrɛ tɔ́n nə n lɛ da boo lɛ nɛ á pɛ nɛ: «Haalɛ ta ǹ tumaa baa si ǹ nə́ n daa, masɛ a baa sii ma n daa wa.»

³⁴ Yezu tɔ́n pɛ nɛ: «Man pii n ni, sonbore: Pelo tèlò-n dinin, koo laan bɛ̀ a wuu pɛ, n din kɛ lɛ á re n piɛ̃ ka masɛ nɛ, á dɔ gunyin sɔɔ.»

³⁵ Piɛrɛ tɔ́n pɛ Yezu ni: «Haalɛ ta masɛ n giɛ̃ kunun n ni, masɛ a n piɛ̃ n nɛ duduu wa.» Kialandɛnaa gialakunun lɛn tumaa pɛ miɛ̃.

Yezu Lawa nyan mɛn kɔ Zɛtsemaanii dù gɔrɔ nɛ

³⁶ Bɛ kio, Yezu woo á dɔ bǎã kɔ́n nɛ, kun ka a kialandɛnan nɛ, a tɔ mà Zɛtsemaanii. Á tɔ́n pɛ ǹ nɛ: «Ka giã tán kànaa, ma wo Lawa nyankɔ kɛnɛn li ma tɔn daa.»

³⁷ Á Piɛrɛ laanka Zebedee a nɛgiĩ min paa kũ, á woo ǹ ne. Yɔrɔ-kɔsiɛ laanka foo-ziziɛ̃ kũ.

³⁸ Á tɔ́n pɛ ǹ nɛ: «Foo-ziziɛ̃ n die masɛ dii. Ka giã tán kànaa, ka n yii toa koo kun ka masɛ nɛ.»

³⁹ Á n zɔ̃ á woo nyɛɛn boɛɛn nɛ, á na á kaa tán-a, á n mìi kuməə, á Lawa nyankɔ bɛ̀ a n pii: «Maa Díi! Bɛ̀ n tá boe la n zɛnaa, n là-paparɛɛ kɛ wɔlɔ lui ma ganaa. Sɛnɛ, masɛ foo sii baran n zɛnaa wa, n din wɔ nə n zɛnaa.»

⁴⁰ Á wusoo á daa a kialandɛnaa sɔɔ lɛ li, á daa ǹ yaa tán-a nyuù ni. Á tɔ́n pɛ Piɛrɛ nɛ: «Á ke, ka n yii toa koo boɛɛn dinin kun ka masɛ-n wa?»

⁴¹ Ka n yii toa koo, ka Lawa nyankɔ, màn mɛn bɛ́ toɛ, ka baran mɛnaa damagɔ́ɔ̃ li ǹ sii-n wa. Sii sonbore zɛnaa ǹ foo tá minbuiin nɛ lon, sɛnɛ, a zɛnaa ǹ pàã na a ba a lon wa.

⁴² Á n zɔ̃ á n bɔ ǹ ganaa doo, ka a gunyin paabaa ǹ wɔ nɛ, á Lawa nyankɔ bɛ̀ a n pii: «Maa Díi, bɛ̀ masɛ á boe la ma kanbaa là-paparɛɛ kɛ lɛ-a wa, n din foo sii nə n zɛnaa!»

⁴³ Á wusoo á daa a kialandɛnan lɛn li doo, á daa ǹ yaa tán-a nyuù ni. Nyuù na á la ǹ yii ni.

⁴⁴ Yezu kiɛ̃ á n bɔ ǹ li doo, á n zɔ̃ á woo tiãlɛa, á Lawa nyankɔ a gunyin sɔɔbaa ǹ wɔ, a ná a din boo goon lɛ pɛ.

⁴⁵ Bɛ kio, á wusoo á daa a kialandɛnan lɛn li, á pɛ ǹ nɛ: «Ka n tɔn nyuù we ka tá n susui? Á ke, biikoo dɔ. Ǹ tá re Min a Nɛgiĩ we sii baraa-zɛnaali n gɔn.

⁴⁶ Ka yoo wɔ n tan! Ka ga, min mɛn bɛ́ re ma koe maa zɔ́ɔn la, á ke die.»

Yezu a kuĩ

⁴⁷ Yezu bɛ́ boo diɛ, Zudaasi daa á dɔ gɔrɔ, a kialandɛnaa fulupaa lɛ a goon ne. Lawa a wúlu-bɔlen goledɛnan laanka Zuifun goledɛnan nə́ zaman gole dia kun ni, ǹ nə́ daa ka gɔya san laanka bàbàlan nə ǹ gɔn.

⁴⁸ Zudaasi mɛn bɛ́ die Yezu koe ǹ la, á gòon yiɛ ǹ ganaa á sii a kɔnbɔ nyaa ǹ nɛ, á pɛ ǹ nɛ: «Ma bɛ́ re fòo diɛ min mɛn nɛ, man sɔɔ a nɛ, a din lɛ nɛ. Ka kũ.»

⁴⁹ Zudaasi nə́ n zɔ̃ á dɔ Yezu li gɔrɔ, á pɛ nɛ: «Fòo le, Mìinaa!» Bɛ kio á n sɔɔ a nɛ.

⁵⁰ Yezu tɔ́n pɛ nɛ: «Maa giaáragiĩ, n da sii mɛn ganaa, a zɛnaa fufuu.» Bɛ kio, gialakunun lɛn nə́ n zɔ̃ ǹ nə́ dɔ, ǹ nə́ kaa Yezu la, ǹ nə́ kũ.

⁵¹ Min mɛnɛn bɛ́ kun ka Yezu ni, bɛn goon ná a gɔya sa bɔ, á yoo Lawa wúlu-bɔlen kiã a dí-nyali gialaa, a ná a too na, á bɔ a ganaa.

⁵² Yezu tɔ́n pɛ nɛ: «N gɔya sa da a kii ni, a giala min mɛn din tumaa bɛ́ gɔya siɛ min li, ǹ dɔn man die gɔya gɛ̀ we.

⁵³ N ba doɛ̃ mà masɛ á boe la ma pɛ maa Díi Lawa nɛ, mà a n dɔ ma lɛ wa? Bɛ̀ masɛ golee li, á boe la a lon a dia dí-a wole kuru dadara fulupaa dia masɛ la sisia, ǹ zia da maa lɛa.

⁵⁴ Sɛnɛ, bɛ̀ masɛ zɛnaa miɛ̃, Lawa a boo lɛ lɛ n siɛ lɔn a tɔn pã doo? A n zɛnaa lɔn, Lawa a boo na á pɛ mà a doamaa nɛ a n zɛnaa miɛ̃.»

⁵⁵ Bɛ kio, Yezu tɔ́n pɛ zaman lɛ nɛ: «Ka ǹ ka gɔya san laanka babalan goa, ka daa masɛ gialaa, ka masɛ n mɛnaa minin la wole lɛa? Ma bɛ́ giɛ̃ tán Lawa a kion baraabaraa bɛ̀ ma minin daraa, wàa na á baa ka ma kũ wa?

⁵⁶ Sɛnɛ, kɛ din tumaa na á n zɛnaa, màn mɛn bɛ́ toɛ, Lawa a boo gii-dalin nə́ màn mɛn kiɛ̃ Lawa a boo ne, bɛ lɛ lɛ pã.» Bɛa biikoo li, a kialandɛnan tumaa baa si ǹ nə́ toa walan.

Maǹ kiri we Yezu ganaa

⁵⁷ Min mɛnɛn bɛ́ ǹ nə́ Yezu kũ, ǹ nə́ woo ne wúlu-bɔlen kiã Kayifu a piɛ, landa sii-daraalin laanka Zuifun goledɛnan kɔsɔn nə wo n lɛ sɔkɔn bǎã mɛn nɛ.

⁵⁸ Piɛrɛ ná a din bii lui Yezu ganaa, á kɔ lɛ, yǎa Lawa a wúlu-bɔlen kiã a sumu-n ka kɔ̃. Á wɔ sumu-n, á giã tán kun ka dí-nyalin ni, n yii diɛ sii lɛ a giala nyɔmɔɔ ǹ gɔn la.

⁵⁹ Lawa a wúlu-bɔlen goledɛnan laanka kiri-kurulin gialakunun tumaa ga Yezu biɛ kɔ ǹ gɔn li, haalɛ ta a din ni kɔkɔrɔ lɔn, màn mɛn bɛ́ toɛ, ǹ dɛ a gã.

⁶⁰ Sɛnɛ, ǹ na a biɛ kɔ ǹ sii yɛ wa, a laanɛ, min gigiã daa soɛ kuru ǹ nə́ kakaa la. Nyɔɔbaa-n, min paa kɔ́n nə́ yoo, ǹ nə́ soɛ kuru ǹ nə́ da la,

⁶¹ ǹ nə́ pɛ: «Giĩ kɛ lɛ pɛ mà asɛ á boe la a Lawa a kion kɛ wuru, asɛ wusoo a kɔsɔ dɔ lɛawaa sɔɔ gɔ́ɔ̃ nɛ.»

⁶² Wúlu-bɔlen kiã tɔ́n yoo á pɛ Yezu ni: «Minin lɛn bɛ́ n gialaa ka boo mɛn nɛ, boo ba n lɛ-n, n tá ǹ lɛ sii-n wa?»

⁶³ Sɛnɛ, Yezu nə́ n lɛ tã. Wúlu-bɔlen kiã tɔ́n pɛ nɛ: «Ká Lawa yiikoonaa tɔ nɛ, bɛ̀ n din ni Minin Nyin-sili lɛa, bɛ̀ Lawa a Nɛgiĩ n ka n din lɛ nɛ, a pɛ wɔsɛn manɛ.»

⁶⁴ Yezu tɔ́n pɛ nɛ: «Ka n pɛ lɔn. Sɛnɛ, masɛ n pii ka nɛ: A saa sisia ganaa, ka á re Min a Nɛgiĩ yii giã-n tán Lawa Pàãyiidɛnaa gusin, ka á re masɛ yii dɔn die lon a labaran la.»

⁶⁵ Lawa a wúlu-bɔlen kiã nɔmaa a ná a din a mɔnaan kũ á ǹ toɛ̃, á pɛ: «Á Lawa tɔ ziziɛ̃! Wɔsɛn laadoo ba siére kɔsɔ-a doo wa! Ka bɛ́ ka a Lawa tɔ ziziɛ̃ ǹ boo lɛ ma.

⁶⁶ Ka n wàa taasɛ?» Ǹ nə́ tɔ́n pɛ: «A zɛ̀rɛ nɛ, a doamaa-n ka gɛ̀ nɛ.»

⁶⁷ Bɛ kio, ǹ nə́ sɛ̀ kakaa a yɔrɔ-a, ǹ nə́ dɛdɛ ka gɔn-muniin ni. Min tɛn nə́ ǹ gɔn tɔtɔ a para-n,

⁶⁸ bɛ̀ ǹ pɛ nɛ: «Minin Nyin-sili lɛ, min mɛn bɛ́ á n dɛ, bɛa dɛnaa pɛ wɔsɛn man kən le!»

Piɛrɛ nə n piɛ̃ ka Yezu ni

⁶⁹ Piɛrɛ na á goã giã-n tán kanaa sumu-n. Wúlu-bɔlen kiã a lɔn dí-nyali goon nə́ n zɔ̃ á dɔ a li, á pɛ nɛ: «Nsɛ kɛ dɔ goã kun ka Galileen giĩ Yezu kɛ lɛ nɛ.»

⁷⁰ Sɛnɛ, Piɛrɛ ná a liere kɔ min tumaa yɔrɔ-a, á pɛ: «Masɛ din yii ba n boo lɛ a woo ǹ bǎã-a wa.»

⁷¹ Bɛ kio, á soo sumu-n á woo kiɛnlɛ-a. Lɔ dí-nyali kɔsɔ dɔ yɛ, min mɛnɛn bɛ́ walan, bɛ́ tɔ́n pɛ bɛn manɛ: «Kɛ dɔ́ goã kun ka Nazarɛtin Yezu lɛ nɛ.»

⁷² Piɛrɛ wusoo a ná a liere kɔ doo, á n liɛ á pɛ: «Masɛ a bɛa giĩ lɛ doɛ̃ wa.»

⁷³ Bɛ kio boɛɛn nɛ, min mɛnɛn bɛ́ walan, bɛn nə́ n zɔ̃ ǹ nə́ dɔ Piɛrɛ li, ǹ nə́ pɛ nɛ: «Liere ba a-n wa, ma nə ǹ dinin min goon lɛa. N boo da ǹ gɔn din tá n bɔ ǹ bǎã nyɛɛ.»

⁷⁴ Piɛrɛ yoo á dì bíi a din li, á n liɛ: «Bɛ̀ masɛ soɛ bɔ, Lawa dɔlɔ bɔ ma ganaa! Masɛ a kɛa giĩ lɛ doɛ̃ wa dɛ!» A din biikoo lɛ li gɔrɔ, koo sa goon nə́ wuu pɛ.

⁷⁵ Yezu boo mɛn pɛ Piɛrɛ nɛ, Piɛrɛ yiri gisĩ a nɛ: «Koo laan bɛ̀ a wuu pɛ, n din kɛ lɛ á re n piɛ̃ ka masɛ nɛ, a dɔ gunyin sɔɔ.» Piɛrɛ soo kanaa, á wuu pɛ parsiini.