Matiə 21 - LAWA A BOO SONBORE

Yezu ná a kiibaa nyaa ka yɔrɔ mɛn nɛ

^1-2 Ǹ bɛ́ ǹ nə́ diri Zeruzalɛmu la, ǹ bɛ́ Bɛtfazee kiwi, kunu *Olivie dan kele ganaa, Yezu ná a kialandɛnaa min paa dia a nyɛɛnɛ, á pɛ ǹ nɛ: «Kiwi mɛn bɛ́ ka nyɛɛnɛ, ka wo walan. Bɛ̀ ka dɔ lɔn gɔrɔ, ka tá re dundun dan yii doa nɛ, a nɛ banɛɛ n kun ni. Ka ǹ fore ka da ǹ kɔ ma la.

³ Bɛ̀ min nɔ̀n da ka la, ka pɛ mà kasɛn Dɛnaa laadoo na a ganaa. Á die toɛ ka da sisia.»

⁴ Bɛ na á n zɛnaa màn mɛn bɛ́ toɛ, Lawa a boo gii-dali boo mɛn da, bɛ lɛ lɛ pã:

⁵ «Ka pɛ *Siɔn kele minin manɛ Zeruzalɛmu kiwi: Kaa kii á ke die ka li, á n din boɛɛn kɔ, á dii dundun dan la, ka a nɛ banɛɛ nɛ, dundun dan a nɛ lɛa.»

⁶ Kialandɛnaa min paa lɛ woo, ǹ nə́ zɛnaa ka Yezu pɛ ǹ nɛ lɔn,

⁷ ǹ nə́ daa ka dundun dan lɛ laanka a nɛ lɛ nɛ. Ǹ nə́ ǹ mɔnaan kaa ǹ la, Yezu dii á giã la.

⁸ Zaman lɛ bii, min gigiã ná a mɔnaa naa tán zii la. Ǹ tɛn nə́ da luu buruu kuru, ǹ nə́ ǹ kaa tán-a zii la.

⁹ Min mɛnɛn bɛ́ Yezu nyɛɛnɛ, min mɛnɛn bɛ́ a kio, ǹ tumaa na á goã n lɛ dii ǹ nə́ pii: «Kii Davida tɔrɔ da ka n bǐɛ̃ nɛ! Min mɛn bɛ́ die ka wɔa Dɛnaa tɔ nɛ, Lawa die a barka wɔ a nɛ! Wɔsɛn tá fòo diɛ Lon a Lawa nɛ!»

¹⁰ Yezu bɛ́ á wɔ Zeruzalɛmu, kiwi minin tumaa la n kakaɛ̃. Minin man nɔ̀n diɛ bǎã yii ni: «Die ne?»

¹¹ Zaman lɛ pɛ: «Nazarɛtin Yezu, Lawa a boo gii-dali ni, Galilee gána nɛ.»

Yezu sii mɛn zɛnaa pii-kɔlen manɛ Lawa a kion

¹² Bɛ kio, Yezu wɔ Lawa a kion. Min mɛnɛn bɛ́ màn siɛ̃ walan, ǹ mɛnɛn bɛ́ màn pii, á ǹ tumaa loo á ǹ kaa kanaa. Á wɔrɔ lonkɔlen tabalan nyanaa á ǹ lɛ kuməə tán, á zɛrɛkantoan-sãlin dankanan lɛ kuməə tán.

¹³ Á tɔ́n pɛ ǹ nɛ: – A tá kiɛ̃-n Lawa a boo ne: «Masɛ a kion lɛ n die n bíi Lawa nyankɔ ǹ kion.» Sɛnɛ, kasɛn nə́ ke ka baa wurumunun duru ǹ yala lɛa!

¹⁴ Yii tere-an kɔnɔn laanka bɔlɔka tɔrɔ kɔsɔn nə́ n zɔ̃ ǹ nə́ dɔ Yezu li Lawa a kion, Yezu nə́ ǹ busu nya.

¹⁵ Lawa a wúlu-bɔlen goledɛnan laanka landa sii-daraalin bɛ́ ǹ nə́ Yezu yɛ á kaãbaa ǹ siin zɛnaa, nɛnyaanan kɛn dɔn nə́ n lɛ dii Lawa a kion ka a tɔ nɛ mà "ǹsɛn kii Davida tɔrɔ, mà a da ka a bǐɛ̃ nɛ", ǹ foo busu Yezu li.

¹⁶ Ǹ nə́ tɔ́n pɛ nɛ: «Ǹ bɛ́ boo mɛn diɛ, táa n tá miɛ.» Yezu tɔ́n pɛ ǹ nɛ: – Ma á miɛ̃. Sɛnɛ, ka tɔn kɛ pɛ Lawa a boo sɛ́wɔ-n duduu wa? «A ná a din tɔ bɔ ǹ boo wɔ nɛnyaan bɔnboɛɛnɛn laanka nɛnyaan tiɛɛ̃nɛn lɛ-n.»

¹⁷ Bɛ kio, Yezu kiɛ̃ á ǹ toa walan, á soo á n bɔ Zeruzalɛmu, á woo Betaanii kiwi, á waa walan.

Yezu Lawa bíi gɔ́rɔ da goon li

¹⁸ A lɛawaa baayɛlɛ, Yezu bɛ́ wusii die kiwi gɔ́ɔ̃ nɛ, bòo kũ.

¹⁹ Á gɔ́rɔ da kɔ́n yɛ zii para-a, á kanaa á ga ǹ dan la, a màn kɔ́n yɛ wa, bɛ̀ á n bɔ a luu ni. Yezu tɔ́n pɛ gɔ́rɔ da lɛ nɛ: «Nsɛ kɛ a nɛ koe doo duduu wa.» A din bǎã-n gɔrɔ, gɔ́rɔ da lɛ laa.

²⁰ Yezu a kialandɛnan bɛ́ ǹ nə́ bɛ yɛ, á kaãbaa da ǹ ganaa parsiini. Ǹ nə́ tɔ́n nɔ̀n da Yezu la: «Wàa na á baa gɔ́rɔ da lɛ laa bǎã goon ne gɔrɔ kɛnɛn?»

²¹ Yezu tɔ́n pɛ ǹ nɛ: – Man pii ka nɛ, sonbore: Bɛ̀ golee Lawa li yɛ ka lon ǹ mɛn pinaa, bɛ̀ ka n gɔ́ɔ̃ baa paa wa, masɛ màn mɛn zɛnaa bɛa gɔ́rɔ da kɛ nɛ, ka a re goɛ̃ bɛ li wa. Haalɛ ta ka n ka pɛ kele kɛ nɛ: «Yoo n nə n bɔ kànaa, n wo n dɔ yìsi mu gole li», a nə n zɛnɛɛ.

²² Bɛ̀ golee Lawa li tá ka lon, bɛ̀ ka màn woo màn nyankɔ Lawa lon, ka tá re bɛ yii.

Yezu a pàã lɛ n boe maa?

²³ Yezu bɛ́ á wɔ Lawa a kion, a n minin darɛɛ, Lawa a wúlu-bɔlen goledɛnan laanka Zuifun goledɛnan nə́ n zɔ̃ ǹ nə́ dɔ a li, ǹ nə́ nɔ̀n da la: «Ma n bɛa siin kɛn lɛn zɛnɛɛ ka wàa pàã nɛ? Die na á bɛa pàã lɛ kɔ n la?»

²⁴ Yezu tɔ́n pɛ ǹ nɛ: «Masɛ dɔ n die nɔ̀n goon diɛ ka dɔn la. Bɛ̀ ka a binyəə kɔ ma la, min mɛn bɛ́ á siin lɛn zɛnaa ǹ pàã kɔ ma la, ma dɔ á re bɛa dɛnaa pii ka nɛ.

²⁵ Die na á ZAÃ dia mà a da *batɛmu da minin ganaa? Lawa-n hinlaa minbuiinin manɛ?» Ǹ dinin nə́ liere kɔ kɔn biin ni, ǹ nə́ pɛ kɔn nɛ: «Bɛ̀ wɔ́ pɛ mà Lawa ná á dia, a n die pii wɔsɛn manɛ mà wàa na á baa wɔ waa asɛ a boo la wa?

²⁶ Bɛ̀ wɔ́ pɛ mà minbuiinin man nə́ dia, wɔsɛn doamaa nɛ wɔ nyɛ́ɛ baa zaman lɛ nɛ, a giala min tumaa n giɛ ZAÃ ganaa Lawa a boo gii-dali lɛa.»

²⁷ Ǹ nə́ tɔ́n pɛ Yezu ni: «Wɔsɛn ba doɛ̃ wa.» Yezu dɔ́ tɔ́n pɛ ǹ dɔn manɛ: «Bɛ̀ ka a doɛ̃ wa, min mɛn bɛ́ á siin kɛn lɛn zɛnaa ǹ pàã kɔ ma la, masɛ dɔ a bɛa dɛnaa pii ka-n wa.»

Yezu boo giməə mɛn da nɛgiĩ min paa wɔ paǹ li

²⁸ Yezu tɔ́n pɛ: – Ka n wàa taasɛ kɛ gɔ́ɔ̃ nɛ? Nɛgiĩ paa na á goã giĩ kɔ́n lon. Á pɛ a goledɛnaa nɛ ǹ kɔ́n pinaa: «Maa nɛ, wo dí nya maa wuru-n pelo.»

²⁹ Bɛ́ pɛ nɛ: «Ma a woe wa.» Sɛnɛ, á wusoo á n taasɛ bɛ kio, á woo.

³⁰ Á n zɔ̃ á dɔ a kiɛɛrɛdɛnaa lɛ dɔ li á pɛ-n miɛ̃. Bɛ tɔ́n pɛ nɛ: «Ma á woe, díi.» Sɛnɛ, a woo wa.

³¹ Ǹ mɛn na á ǹ díi lɛ foo sii zɛnaa? Ǹ nə́ tɔ́n pɛ: «A bibinaa lɛ nɛ.» Yezu tɔ́n pɛ ǹ nɛ: – Masɛ n pii ka nɛ sonbore: Wusuru-silin laanka lɔ kɔrɔn tá re doe *Lawa a kiibaa ǹ bǎã nɛ ka nyɛɛnɛ.

³² A giala, ZAÃ na á daa zii pepere nyaa ka nɛ, sɛnɛ, ka waa a boo la wa. Wusuru-silin laanka lɔ kɔrɔn sɛn nə́ waa la. Ka bɛ yɛ, haalɛ bɛ din tumaa kio, ka nə n taasɛ, ka wusoo ka kio ne, ka golee a boo li wa.

Yezu boo giməə mɛn da wuru-lɛduə̃li babaraan wɔ paǹ li

³³ Ka n too kɔ boo giməə kɔsɔ li. Giĩ goon na á wuru bɔ, á da nɛ-kɔle zumu a nɛ, a tɔ mà *rezɛ̃ da, á kungɔn dɔ, á ná a lɛnpɛnɛ nɛ, a ná a nɛ mu bɔɔ̃ ǹ yala fɔ̃, a ná a lɛduə̃lin kion dɔ. Bɛ kio, á dí-nyalin goa, á ǹ koa a li, á woo zii ni.

³⁴ Da nɛ ma waáraa bɛ́ á dɔ, a ná a dí-nyalin dia da wuru dí-nyalin lɛn li, maǹ na asɛ wɔ gii kɔ ǹ la ǹ da nɛ.

³⁵ Wuru-lɛduə̃lin lɛn ná a dí-nyalin lɛn kũ, ǹ nə́ goon məməə, ǹ nə́ goon dɛ á gã, ǹ nə́ goon dɛdɛ ka kɔlɔ nɛ.

³⁶ Wurudɛnaa lɛ wusoo a dí-nyali kɔsɔn dia, bɛn nə́ gigiã ǹ nə́ la bibinaa wɔn kɛn manɛ. Wuru-lɛduə̃lin lɛn nə́ bɛn dɔn baa miɛ̃.

³⁷ Nyɔɔbaa, a ná a din a nɛgiĩ dia. A na á goã taasɛ: «Bɛ bɛ́ n maa nɛ lɛa, ǹ tá re nyɛ́ɛ biɛ bɛ-n sɛn.»

³⁸ Sɛnɛ, wuru dí-nyalin lɛn bɛ́ ǹ nə́ yɛ die, ǹ nə́ pɛ kɔn nɛ: «Haya, a kíɛ̃-saali lɛ á ke. Ka daa, wɔ dɛ, wɔ wuru lɛ si.»

³⁹ Ǹ nə́ kũ ǹ nə́ zũ wuru lɛ kio, ǹ nə́ dɛ á gã.

⁴⁰ Yezu tɔ́n nɔ̀n da ǹ la: «Bɛ̀ wurudɛnaa lɛ daa ǹ mɛn waáraa, a n die wàa zɛnɛɛ dí-nyalin lɛn man kəni?»

⁴¹ Ǹ nə́ tɔ́n pɛ Yezu ni: «A n die bɛa min baraan kɛn dii baraa, yǎa ǹ giɛ̃, a na a da wuru lɛ koa dí-nyali kɔsɔn li, bɛ̀ a tá a wɔ gii li ǹ mɛn waáraa, bɛ̀ ǹ kɔ la a biikoo li.»

⁴² Yezu tɔ́n pɛ ǹ nɛ: – Lawa a boo bɛ́ màn mɛn diɛ, ka tɔn bɛ pɛ wa? «Kion-dɔlen bɛ́ ǹ nə́ n piã ka kɔlɔ mɛn nɛ, bɛ lɛ na á kɛ gùrù dɔ ǹ kɔlɔ baa. Dɛnaa Lawa na á bɛa kaãbaa ǹ dí kɛ nya, wɔsɛn yii na á bɛ lɛ yɛ.»

⁴³ Bɛ lɛ nɛ, masɛ á pii ka nɛ, kaa tá Lawa wɔbaa-n ke, a kiibaa giulun, bɛ á die n sii ka la, a n kɔ tɔrɔ kɔsɔn la, ǹ mɛnɛn zɛnaa ǹ sii bɛ́ kɔnpii ni. [

⁴⁴ Bɛ̀ min mɛn bɔ á mɛnaa bɛa kɔlɔ kɛ lɛ la, ǹ dɛnaa gù yii n yiyiɛ. Bɛ̀ á bɔ á mɛnaa min mɛn la, a n bɛa dɛnaa yɔyɔrɛ.]

⁴⁵ Lawa a wúlu-bɔlen goledɛnan laanka *Fariziɛ̃n bɛ́ ǹ nə́ bɛa a boo giməə kɛn lɛn ma, ǹ nə́ dɔ̃ mà Yezu na á ǹ da ǹsɛn dinin ganaa.

⁴⁶ Ǹ nə́ goã giɛ a kũ ǹ gɔn li, sɛnɛ, ǹ nə́ nyɛ́ɛ baa zaman nɛ, a giala minin man giɛ Yezu ganaa Lawa a boo gii-dali lɛa.