Matiə 12 - LAWA A BOO SONBORE

Yezu boo mɛn da susu ǹ pii wɔ paǹ li

¹ Biikoo kɔ́n a kiɛ̃ kio, Yezu n kiɛ̃ *belee wurun kɔnɔn nɛ *susu ǹ pii pinaa. Bòo goã a kialandɛnan ganaa, ǹ ná a giala kɔ ǹ nə́ belee lɛ yiyiɛ, ǹ nə́ soɛ̃.

² *Fariziɛ̃n bɛ́ ǹ nə́ bɛ yɛ, ǹ nə́ pɛ Yezu ni: «Ga, wɔsɛn landa bɛ́ a ba lɛ koe dí mɛn nə n nya susu ǹ pii pinaa wa, n kialandɛnan lɛn nə́ ke bɛ gialaa nyɛɛ!»

³ Yezu tɔ́n pɛ ǹ nɛ: – Davida bɛ́ á sii mɛn zɛnaa bɛ̀ bòo bɛ́ a ná a din laanka a kiodɛnan kũ, ka bɛ lɛ pɛ sɛ́wɔ-n wa?

⁴ A na á wɔ Lawa a Kion, a laanka a kiodɛnan nɛ, ǹ bɛ́ buurun mɛnɛn koɛ Lawa yɔrɔ-a wúlu bɔ ǹ màn lɛa, ǹ nə́ bɛ lɛ saa ǹ nə́ sɔ̃. A kɔnpɛ ka ǹ landa nɛ, min kɔsɔ doamaa bie a sɔ̃ wa, bɛ̀ á n bɔ wúlu-bɔlen ne.

⁵ Hinlaa ka bin pɛ landa sɛ́wɔ nɛ, mà susu ǹ pii pinaa, mà wúlu-bɔlen tá susu ǹ pii ziziɛ̃ Lawa a kion, a da yaa zɛ̀rɛ dɔ ná a ba ǹ koɛ ǹ ganaa wa?

⁶ Bɛ din tumaa kio, masɛ n pii ka nɛ, màn tá kànaa á gole á la Lawa a kion ne!

⁷ Lawa a boo na á pɛ: «Man giɛ li ka makara bɔ minin ganaa, ma bie giɛ li ka *wúlu mànan kɔ ma la wa. Bɛ̀ ka n bɛ giala miɛ, bɛ̀ ka a dɔlɔ diɛ minin mìi ni, a da yaa ǹ nə́ ǹ sii baraa zɛnaa wa.

⁸ A giala Min a Nɛgiĩ n susu ǹ pii mìi la.»

Yezu giĩ gɔn goon gere-a a busu nya

⁹ Yezu kiɛ̃ walan á woo wɔ ǹ lɛsɔkɔn kion goon ne.

¹⁰ Giĩ gɔn goon gere-a kɔ́n na á goã walan. Minin mɛnɛn bɛ́ walan, bɛn nə́ nɔ̀n da Yezu la ǹ nə́ pɛ: «Wɔa landa tá lɛ koe wɔ busulə kaka kɔ susu ǹ pii pinaa?» Maǹ nə́ bɛ pɛ ǹ nə́ giɛ a zɛ̀rɛbaa ǹ gɔn li.

¹¹ Yezu tɔ́n pɛ ǹ nɛ: «Bɛ̀ sère goon toto n kaa min goon lon, yǎa bɛa sère lɛ bɔ á n dɔ nyankɔrɔ zuzulu ni susu ǹ pii pinaa, ǹ dɛnaa a die woe boe a soo ne a bɔ walan wa koɛ?

¹² Minbuiin nɛ á soɛ sère-n pasapasa! Bɛ lɛ taman yii, wɔsɛn landa tá lɛ koe n sii sonbore zɛnaa min ni susu ǹ pii pinaa.»

¹³ Yezu tɔ́n pɛ giĩ lɛ nɛ: «N gɔn lɛ bɔ kɔn.» Á bɔ kɔn, á wusoo á bǐɛ̃ kɔ siĩni ka a gɔn lɛ a goon kɛ bɛ́ lɔn.

¹⁴ Fariziɛ̃n nə́ soo ǹ nə́ woo n lɛ sɔkɔn, ǹ nə́ ga Yezu dɛ ǹ gɔn li.

Yezu bɛ́ min mɛn lɛa Lawa gɔn

¹⁵ Yezu bɛ́ á bɔ bɛ siére-a, á kiɛ̃ á n bɔ bɛa bǎã lɛ nɛ. Zaman gigiã kɔ a kio lɛ. Á busulən tumaa a busu nya,

¹⁶ sɛnɛ, á n gɔn waa ǹ nɛ parsiini, mà ǹ nyan toa ǹ na asɛ boo da min kɔ́n yii-n wa.

¹⁷ A na á n zɛnaa miɛ̃, màn mɛn bɛ́ toɛ, Lawa a boo gii-dali Izayii boo mɛn da, bɛ lɛ lɛ pã. A na á pɛ kɛnɛn:

¹⁸ «Masɛ din Lawa a dí-nyali n ka kɛ nɛ, má bɔ. Man bɛ lɛ narɛ, a sii á kɔɔ̃n ma ganaa. Man die ma din a Yiri Fu koe la. Á die ma foo sii boo diɛ tɔrɔn tumaa nɛ.

¹⁹ A die zia diɛ kɔn-a ka min kɔ́n nɛ wa, a die parɛɛ wa. Min kɔ́n ba re a lɛ miɛ zaman paã ǹ bǎã-n wa.

²⁰ Buu mɛn bɛ́ a n pusu, a die bɛ yiɛ wa, Bólon mɛn nə́ ke tɔn tɛ siã boe, a die bɛ nimi wa. A n die zɛnɛɛ miɛ̃ yǎa minin nə Lawa foo sii doɛ̃.

²¹ Tɔrɔ din tumaa á die n foo doɛ a ganaa.»

Yezu laanka Sɛtaan dɔ a wàa n kun?

²² Bɛa biikoo li, minin nə́ daa giĩ goon kɔ Yezu la, a giala nɔ̀ɔnɔn man a ganaa, a yii tã, a boe boo diɛ dɔ la wa. Yezu ná a busu nya, yǎa a boo la á boo da, a yii dɔ wɔlɔ yɛ.

²³ Zaman lɛ din tumaa nə́ n kaãbaa a ganaa, ǹ nə́ pɛ: «Davida a Nɛgiĩ mɛn lɛ bɛ́ wɔsɛn tá n yii diɛ la, a din lɛ bie ke wa le?»

²⁴ Fariziɛ̃n bɛ́ ǹ nə́ bɛ ma, ǹ nə́ tɔ́n pɛ: «Giĩ kɛ n nɔ̀ɔnɔn lui ǹ boe minin ganaa ka nɔ̀ɔnɔn kiã *Sɛtaan pàã nɛ!»

²⁵ Sɛnɛ, Yezu nə́ ǹ taasiɛ dɔ̃, á tɔ́n pɛ ǹ nɛ: «Gána mɛn a minin bɛ́ zia diɛ kɔn ganaa, bɛa gána lɛ á die ziziɛ̃. Kiwi hinlaa sumu mɛn a minin bɛ́ zia diɛ kɔn ganaa, a ba boe la a wo nyɛɛn wa.

²⁶ Bɛ̀ Sɛtaan tá a din a minin lui, ka dɔ̃ mà a n zia diɛ a din ganaa, a gána lɛ dɔ n siɛ lɔn a wo nyɛɛnɛ?

²⁷ Táa ka n taasɛ mà masɛ n nɔ̀ɔnɔn lui ka Sɛtaan pàã nɛ, ka dinin kialandɛnan kɛn dɔn, die nə ǹ loo ǹ pàã koe bɛn la? Táa Sɛtaan bie wa? Bɛn lɛn man nyɛɛ mà ka sã dinin!

²⁸ Man nɔ̀ɔnɔn lui ǹ boe minin ganaa ka Lawa a Yiri Fu pàã nɛ, bɛ lɛ n nyɛɛ mà *Lawa a kiibaa lɛ nə́ n giala kɔ ka li.

²⁹ «Min kɔ́n ba we min kaka a kion, a na a gɔn mànan goa, bɛ̀ a ná a na a din yii bɔrɔ á da tán wa. Bɛ̀ á yii ǹ mɛn waáraa, á boe la a na a kion màn din tumaa goa.

³⁰ «Min mɛn bɛ́ a ba masɛ a dàã lɛa wa, bɛ n masɛ a zɔ́ɔ lɛa. Bɛ̀ min mɛn ba n doe masɛ lɛ a minin lɛ sɔkɔn wa, bɛa dɛnaa nə ǹ sasawɛɛ.

³¹ Bɛ lɛ na á toa, ma á pii ka nɛ: Minin sii baraan laanka ka ǹ Lawa tɔ ziziɛ̃ ǹ boon dinin tumaa á re n toɛ ka nɛ. Sɛnɛ, bɛ̀ min mɛn Lawa a Yiri Fu tɔ ziziɛ̃, bɛa dɛnaa a sii baraa a re ǹ toɛ-n wa.

³² Bɛ̀ min mɛn nə́ Min a Nɛgiĩ tɔ ziziɛ̃, bɛa dɛnaa a sii baraa á re n toɛ nɛ. Sɛnɛ, bɛ̀ min mɛn nə́ Yiri Fu tɔ ziziɛ̃, bɛa dɛnaa a sii baraa a re n toɛ-n sisia wa, a re n toɛ-n biɛ̃ dɔn wa.

Da laanka a nɛ

³³ «Min nə da doɛ̃ a nɛ li. Da sonbore n nɛ sonbore koe, da baraa dɔ n nɛ baraa koe.

³⁴ Miɛ̃ tɔrɔn lɛn! Boo sonbore n siɛ lɔn a bɔ ka lɛ-n, a da yaa ka dininmaan nə́ baraa? A giala min gɔ́ɔ̃ bɛ́ á pã ka boo mɛn nɛ, a lɛ n bɛ lɛ diɛ.

³⁵ Boo sonbore n boe min sonbore lɛ-n, boo baraa n boe min baraa lɛ-n.

³⁶ Masɛ n pii ka nɛ: Kiri kurii pinaa, minin nə boo kooron mɛnɛn tumaa da, Lawa á die nɔ̀n diɛ ǹ la ka a din tumaa nɛ.

³⁷ Kiri n die n kuri didie la a kɔnpɛ ka a din a da ǹ boo ne: Didie a da ǹ boo n die sonbore koe la, didie a da ǹ boo n die a din zɛ̀rɛ biɛ.»

Minin nə kaãbaa ǹ sii mɛn nɔ̀n da Yezu la

³⁸ Landa sii-daraalin kɔnɔn laanka Fariziɛ̃n kɔnɔn nə́ pɛ Yezu ni: «Mìinaa, wɔsɛn man giɛ li n kaãbaa ǹ sii kɔ́n zɛnaa màn mɛn nə́ nyɛɛ wɔsɛn manɛ mà Lawa na á n dia.»

³⁹ Yezu tɔ́n pɛ ǹ nɛ: – Pelo min babaraan, Lawa bɔlɔ tii wolen kɛn man giɛ kaãbaa ǹ sii li! Kaãbaa ǹ sii kɔ́n ba re n nyɛɛ ka nɛ, a kiɛ̃ Lawa a boo gii-dali Zonaasi wɔ kɛ la wa.

⁴⁰ Zonaasi bɛ́ á lɛawaa sɔɔ laanka tèlò sɔɔ zɛnaa zɔ̀ gole gɔ́ɔ̃-n lɔn, Min a Nɛgiĩ dɔ n die lɛawaa sɔɔ laanka tèlò sɔɔ zɛnɛɛ yala-n miɛ̃.

⁴¹ Kiri kurii pinaa, Ninivu kiwi minin kɛn tá re yui ǹ golee kɔn yɔrɔ-a ka pelo minin kɛn nɛ, ǹ zɛnaa ǹ sii á re pelo minin kɛn biɛ koe, a giala Zonaasi bɛ́ á woo Boo Tii Kɔɔ̃n pɛ Ninivu, a minin nə́ n taasɛ ǹ nə́ wusoo ǹ sii baraan kio. Màn tá kànaa á gole á la Zonaasi-n dɛ!

⁴² Kiri kurii pinaa, lɔ mɛn bɛ́ á goã kii lɛa Saabaa gána nɛ, bɛ á re yui kun ka pelo minin kɛn nɛ, a ǹ zɛ̀rɛ baa. A giala, a na á bɔ kanaa bǎã sɔsɔɔ nɛ, á daa n too kɔ Salomɔn a sii-doɛ̃ boon kɛn ganaa. Màn tá kànaa á gole á la Salomɔn nɛ dɛ!

Nɔ̀ɔnɔn wusoo a da min ganaa

⁴³ Bɛ̀ nɔ̀ɔn babaraa soo á n bɔ min ni, a n woe n bibiĩ diə bǎãn nɛ, a ga susu ǹ bǎã li. Bɛ̀ a ba susu ǹ bǎã yii wa,

⁴⁴ a n pii a din gɔ́ɔ̃ nɛ: «Ma soo má n bɔ kion mɛn lɛ nɛ, man die wusii ma wo wɔ bɛ lɛ nɛ.» Bɛ̀ á wusoo á woo bɛa dɛnaa lɛ ganaa, a n woe a bǎã lɛ yiɛ wɔraa nɛ, a gɔ́ɔ̃gɔ́ɔ̃ ǹ mànan nə́ telee ne.

⁴⁵ A n nɔmiɛ a wo nɔ̀ɔn sɔbaa kɔsɔ kũ a da ǹ nɛ, ǹ mɛnɛn bɛ́ baraa ǹ nə́ la a din ni, ǹ da giã walan kun. Bɛ kio kəni, bɛa dɛnaa lɛ a sisiamaa n baraa koe a la a lɛlɛ ǹ nɛ. Pelo minbuiinin kɛn lɛn man die goɛ̃ miɛ̃.

Yezu ǹ dan laanka ǹ dɔɔ̃nɔn

⁴⁶ Yezu bɛ́ tɔn boo diɛ zaman lɛ nɛ, ǹ dan laanka ǹ dɔɔ̃nɔn nə́ daa ǹ nə́ dɔ. Ǹ nə́ golee kanaa, maǹ giɛ li mà ǹ boo da nɛ.

⁴⁷ Min nə́ tɔ́n pɛ Yezu ni: «Ga, n dan laanka n dɔɔ̃nɔn tá golee-n kanaa, maǹ giɛ li ǹ boo da n nɛ.»

⁴⁸ Yezu tɔ́n pɛ bɛa dɛnaa lɛ nɛ: «Die n masɛ dan lɛa, masɛ dɔɔ̃nɔn man ka dien ne?»

⁴⁹ Bɛ kio, á n gɔn nyaa a kialandɛnan ganaa á n toa: «Ka ga. Masɛ dan laanka ma dɔɔ̃nɔn nə́ ke kànaa.

⁵⁰ A giala, min mɛn bɛ́ masɛ Di Lawa foo sii zɛnɛɛ, bɛ lɛ n masɛ dɔɔ̃ngiĩ lɛa, bɛ lɛ n masɛ miãnɛn lɛa, bɛ lɛ n masɛ dan lɛa.»