Marki 14 - LAWA A BOO SONBORE

Yezu kũ ǹ gɔn

¹ A gialakun na á goã lɛawaa paa, Zuifun *kiɛ̃mala ǹ zɔ́n laanka *yɔ bùbaã buuru zɔ́n dɔ. Lawa a wúlu-bɔlen goledɛnan laanka landa sii-daraalin man nə́ goã gɔn diɛ Yezu ganaa, màn mɛn bɛ́ toɛ, ǹ kũ ka durii ni ǹ dɛ.

² Sɛnɛ, maǹ nə́ goã pii mà ǹsɛn doamaa bie ǹ kũ zɔ́n pinaa kɛ-n wa, mà bɛ bie wa, mà á die sii lɔlɔkɔn biɛ zaman lɛ bii.

Nyɔɔ gìĩ kɔɔ̃n kaa Yezu mìi-n boo

³ Yezu bɛ́ màn bii Simɔn gɔ̀nɔn ki busu babaraa dɛnaa a kion Betaanii kiwi, lɔ goon daa wɔ kion ka kɔlɔ donkolon siĩn kɔ́n nɛ, nyɔɔ gìĩ kɔɔ̃n na a nɛ, a giɔ̀mɔ n kaka parsiini. (Nyɔɔ lɛ yii n fu ka zenzen; a n zɛnaa ka da mɛn gòon ne, bɛ tɔ n naára). Á donkolon lɛ lɛ bũ, á nyɔɔ lɛ kaa Yezu mìi ni.

⁴ Min mɛnɛn bɛ́ walan, bɛn tɛnɛn man nə́ goã pii kɔn nɛ ka busii ni mà bɛa nyɔɔ gìĩ kɔɔ̃n kɛa ziziɛ̃ miɛ giala n ka wàa nɛ?

⁵ Mà nyɔɔ kɛ lɛ á boe la a n sã, a wɔrɔ la lɛawaa biɛsɔɔ (300) a dí nya ǹ giɔ̀mɔ nɛ, a n gii doobaan manɛ! Ǹ nə́ yoo lɔ lɛ gialaa parsiini.

⁶ Sɛnɛ, Yezu pɛ ǹ nɛ kɛnɛn: «Ka toa kiĩni. Wàa na á baa ka á lɔ lɛ nɔmiɛ? Dí taãn nɛ ka kɛ nɛ á nya masɛ nɛ.

⁷ A giala, doobaan tá kun ka nɛ biikoo tumaa li, bɛ̀ ka á li ka bǐɛ̃ zɛnaa ǹ nɛ ǹ mɛn pinaa, ka á boe la ka zɛnaa ǹ nɛ. Sɛnɛ, masɛ bie re goɛ̃ kun ka-n miɛ̃ wa.

⁸ A bɛ́ boe sii mɛn la, a na á bɛ lɛ zɛnaa. A na á nyɔɔ gìĩ kɔɔ̃n kaa masɛ gɔ̀nɔn ganaa, á zɛnaa á koa maa biĩ nyɛɛnɛ.

⁹ Masɛ n pii ka nɛ sonbore, ka bɛ́ re Boo Tii Kɔɔ̃n pii kanaa paǹ mɛn tumaa nɛ, lɔ kɛ sii mɛn zɛnaa, ǹ tá re bɛ dɔ laakalɛɛ walan, ǹ minin yiri da a sii ni.»

Zudaasi n giɛ Yezu kɔ ǹ gɔn li

¹⁰ Kariyɔtin Zudaasi mɛn bɛ́ Yezu a kialandɛnan lɛn goon lɛa, bɛ́ woo pɛ Lawa a wúlu-bɔlen goledɛnan manɛ, mà asɛ n giɛ li a Yezu kɔ ǹ la.

¹¹ Ǹ bɛ́ ǹ nə́ bɛ ma, á kɔɔ̃n kɔ ǹ ganaa parsiini. Ǹ nə́ lɛ kɔ mà ǹsɛn tá re wɔrɔ koe la. Zudaasi ná a giala kɔ á ga biikoo sonbore li, màn mɛn bɛ́ toɛ a Yezu kɔ ǹ la.

Kiɛ̃mala ǹ zɔ́n màn-bii yɔrɔ bɔ boo

¹² Yɔ bùbaã buuru zɔ́n giala kɔ pinaa, ǹ bɛ́ re wúlu sère nɛn dii kiɛ̃mala ǹ zɔ́n a màn-bii lɛa ǹ mɛn pinaa, Yezu a kialandɛnan nə́ nɔ̀n da la mà a n giɛ li ǹsɛn nə wo kiɛ̃mala ǹ zɔ́n a màn-bii zɛnaa-n maa?

¹³ Yezu tɔ́n a kialandɛnan lɛn min paa dia, á pɛ ǹ nɛ kɛnɛn: «Ka wo Zeruzalɛmu kiwi, ka á re n diɛ giĩ goon lɛ ka mu dɔn ná a mìi ni. Ka kɔ lɛ.

¹⁴ Bɛ̀ á wɔ kion mɛn nɛ, ka pɛ bɛa kion lɛ a dɛnaa nɛ mà Mìinaa na á kasɛn dia nɔ̀n diɛ ma asɛ a yu ǹ kion lɛ á maa? Mà asɛ laanka a kialandɛnan man die kiɛ̃mala ǹ zɔ́n màn bii maa?

¹⁵ Á re kion gole goon nyɛɛ ka nɛ lon ǹ miã lalan, ka laadoo màn din tumaa ná a nɛ, ǹ nə́ zɛnaa sɔnbɔraanɛ ǹ nə́ koa. Ka n die kiɛ̃mala ǹ zɔ́n màn-bii zɛnɛɛ wɔsɛn man walan.»

¹⁶ Bɛa kialandɛnan lɛn nə́ woo, ǹ nə́ wɔ kiwi lɛ gɔ́ɔ̃ nɛ. Yezu pɛ ǹ nɛ lɔn, ǹ nə́ woo a tumaa yaa miɛ̃. Ǹ nə́ kiɛ̃mala ǹ zɔ́n màn-bii zɛnaa walan.

¹⁷ Wasa bɛ́ á mɛ, Yezu daa á dɔ ka a kialandɛnaa fulupaa lɛ nɛ.

¹⁸ Ǹ bɛ́ tán màn bii, Yezu pɛ: «Masɛ n pii ka nɛ, sonbore ne: Ka dinin min goon nə die masɛ we maa zɔ́ɔn gɔn, min mɛn din bɛ́ màn bii kun ka masɛ nɛ.»

¹⁹ A kialandɛnan lɛn yɔrɔ kɔsɛ parsiini, ǹ ná a giala kɔ ǹ nə́ nɔ̀n da la gogoon, didie mà táa asɛ bie wa?

²⁰ Yezu tɔ́n pɛ ǹ nɛ kɛnɛn: «Ka dinin min fulupaa kɛ lɛ dù siɛ̃ kun ka masɛ nɛ, ka dinin lɛn goon ne.

²¹ Min a Nɛgiĩ á re giɛ̃, ka a bɛ́ á n kiɛ̃ a wɔ gɔn la Lawa a boo-n lɔn. Sɛnɛ, min mɛn bɛ́ re Min a Nɛgiĩ we a zɔ́ɔn gɔn, bɛa dɛnaa wɔ n ka bɔ̀n nɛ! Bɛ̀ ǹ dɛnaa din na a yɛ wa, bɛ á soɛ a ganaa.»

Dɛnaa a màn-bii sonbore

²² Ǹ bɛ́ màn bii, Yezu buuru saa, á barka da Lawa nɛ, á yiyiɛ kɔn, á kɔ a kialandɛnan la, á pɛ ǹ nɛ: «Ka kɛ si, masɛ din gɔ̀nɔn siĩ-n ka kɛ nɛ.»

²³ Bɛ kio, á duvɛ̃ saa màn nɛ, á barka da Lawa nɛ, á kɔ ǹ la, ǹ tumaa mi.

²⁴ Yezu tɔ́n pɛ ǹ nɛ: «Masɛ mà n ka kɛ nɛ, á kaa minbuiin tumaa a kirisibaa a lɛa, á n nyɛɛ mà Lawa lɛ kɔ kɔn la wɔ ka minbuiinin ni.

²⁵ Masɛ n pii ka nɛ, sonbore ne: Ma a duvɛ̃ mii doo duduu wa, yǎa *Lawa a kiibaa ǹ bǎã nɛ, ma tɔn duvɛ̃ dii mii.»

²⁶ Ǹ bɛ́ ǹ nə́ zɔ́n lɛ a loe lɔ ǹ nə́ nya, ǹ nə́ soo ǹ nə́ woo *Olivie dan kele la.

Yezu a boo Piɛrɛ a piã wɔ gɔn la

²⁷ Yezu pɛ a kialandɛnan manɛ: – Sii mɛn bɛ́ re koɛ masɛ la, bɛ lɛ n die ka dinin tumaa a mɛnaa ǹ giala biɛ, ka a bɛ́ ke á n kiɛ̃ Lawa a boo-n lɔn: «Man die sèren-lɛduə̃li lɛ dii, sèren lɛn tá re sawɛɛ.»

²⁸ Sɛnɛ, bɛ̀ ma yii wusoo á kaa, man die woe ka nyɛɛnɛ Galilee gána nɛ.

²⁹ Piɛrɛ tɔ́n pɛ nɛ: «Haalɛ ta ǹ tumaa baa si ǹ nə́ n daa, masɛ bie wa!»

³⁰ Yezu tɔ́n pɛ Piɛrɛ nɛ: «Man pii n ni, ka boo taãn nɛ: Pelo tèlò-n dinin, koo laan bɛ̀ a wuu pɛ gunyin paa, bɛ̀ n nə́ n piã ka masɛ nɛ á dɔ gunyin sɔɔ.»

³¹ Piɛrɛ wusoo á n parsii bɔ doo á pɛ: «Haalɛ ta masɛ n giɛ̃ kunun n ni, masɛ a n piɛ̃ n nɛ duduu wa.» Kialandɛnan gialakunun lɛn tumaa pɛ miɛ̃.

Yezu Lawa nyan mɛn kɔ Zɛtsemaanii

³² Bɛ kio, ǹ nə́ dɔ bǎã kɔ́n nɛ lalaa lɛ-a, a tɔ mà Zɛtsemaanii. Yezu pɛ a kialandɛnan manɛ: «Ka giã tán kànaa, ma wo Lawa nyankɔ bɔrɔ.»

³³ Á Piɛrɛ kũ ka Zaaki ni ka ZAÃ nɛ, ǹ nə́ woo kun. A yiri yii ná a giala kɔ á n lɔlɔkɔn, a foo yii ziziɛ̃.

³⁴ Á tɔ́n pɛ ǹ nɛ: «Foo-ziziɛ̃ n die masɛ dii. Ka giã tán kànaa, ka n yii toa koo.»

³⁵ Á n zɔ̃ á woo nyɛɛn boɛɛn nɛ, á na á kaa tán, á Lawa nyankɔ: «Bɛ̀ a tá boe la a n zɛnaa, Lawa masɛ kanbaa biikoo kɛa nɔmaa kɛ ganaa.»

³⁶ A na á goã pii: «E, maa Díi! N tá boe sii din tumaa la. Là-paparɛɛ kɛ wɔlɔ lui masɛ ganaa. Sɛnɛ, masɛ foo sii baran n zɛnaa wa, n din wɔ nə n zɛnaa.»

³⁷ Á wusoo á daa kialandɛnaa min sɔɔ lɛ li, á daa ǹ yaa tán nyuù ni. Á tɔ́n pɛ Piɛrɛ nɛ: «Simɔn, ma n nyuù we? N boo la n nə́ n yii toa koo boɛɛn dinin wa?

³⁸ Ka n yii toa koo, ka Lawa nyankɔ, màn mɛn bɛ́ toɛ, ka baran mɛnaa damagɔ́ɔ̃ li ǹ sii-n wa. Sii sonbore zɛnaa ǹ foo tá minbuiin nɛ lon, sɛnɛ, a zɛnaa ǹ pàã na a ba a lon wa.»

³⁹ Á wusoo á n zɔ̃ á woo nyɛɛnɛ, á Lawa nyankɔ miɛ̃ doo.

⁴⁰ Á wusoo á daa a kialandɛnan lɛn li, á daa ǹ yaa tán nyuù-n doo, nyuù la ǹ yii ni. Boo din ba n diɛ ǹ la wa.

⁴¹ A sɔɔbaa ǹ wɔ, a bɛ́ á wusoo á daa, á nɔmaa á pɛ ǹ nɛ: «Ka n tɔn nyuù we, ka á n susui? A lɛ pã kəni! Biikoo dɔ. Ka ga, ǹ tá re Min a Nɛgiĩ we sii baraa-zɛnaalin gɔn.

⁴² Ka yoo, wɔ n tan! Ka ga, min mɛn bɛ́ re ma koe maa zɔ́ɔn la, á ke die.»

Yezu kũ boo

⁴³ Yezu bɛ́ boo diɛ, Zudaasi daa á dɔ gɔrɔ, a kialandɛnaa fulupaa lɛ goon ne. Lawa a wúlu-bɔlen goledɛnan laanka landa sii-daraalin laanka Zuifun goledɛnan nə́ zaman dia kun ni, ǹ nə́ daa ka gɔya san laanka bàbàlan nɛ ǹ gɔn.

⁴⁴ Zudaasi mɛn bɛ́ die Yezu koe ǹ la, á gòon yiɛ ǹ ganaa á sii a kɔnbɔ nyaa ǹ nɛ, á pɛ ǹ nɛ mà asɛ bɛ́ re fòo diɛ min mɛn nɛ a n sɔɔ a nɛ, mà a din lɛ nɛ. Mà ǹ kũ ǹ tamaa sɔnbɔraanɛ, ǹ wo ne.

⁴⁵ Zudaasi bɛ́ á dɔ lɔn gɔrɔ, á n zɔ̃ á dɔ Yezu li, á pɛ nɛ: «Mìinaa!» Bɛ kio, á n sɔɔ a nɛ.

⁴⁶ Gialakunun lɛn nə́ tɔ́n kaa Yezu la ǹ nə́ kũ.

⁴⁷ Min mɛnɛn bɛ́ ǹ nə́ goã walan, bɛn goon ná a gɔya sa bɔ, á yoo Lawa a wúlu-bɔlen kiã a dí-nyali gialaa, a ná a too na á bɔ a ganaa.

⁴⁸ Yezu tɔ́n pɛ ǹ nɛ: «Ka n ka gɔya san laanka bàbàlan goa ka daa masɛ gialaa, ka ma n mɛnaa minin la wole lɛa?

⁴⁹ Ma bɛ́ kun ka nɛ babaraa, má n minin darɛɛ Lawa a kion, wàa na á baa ka ma kũ wa? Sɛnɛ, kɛ na á n zɛnaa màn mɛn bɛ́ toɛ a n kiɛ̃ Lawa a boo-n lɔn, a kɔnpɛ ka bɛ lɛ nɛ.»

⁵⁰ Bɛa biikoo li, a kialandɛnan tumaa baa si ǹ nə́ toa walan.

⁵¹ Tɔntɔraa goon kɔ Yezu lɛ yǎa walan, burunkan dinsɔɔ̃ n pɛnɛɛ nɛ a ganaa. Ǹ bɛ́ mà ǹ na a dɔ kuĩ,

⁵² a ná a burunkan na á daa, á baa si ka a gɔ̀nɔn kooro fulupaa nɛ.

Yezu n Zuifun kiri-kurulin yɔrɔ-a

⁵³ Ǹ nə́ woo ka Yezu ni Lawa a wúlu-bɔlen kiã a piɛ. Lawa a wúlu-bɔlen goledɛnan laanka Zuifun goledɛnan laanka landa sii-daraalin tumaa woo n lɛ sɔkɔn walan.

⁵⁴ Piɛrɛ ná a din bii lui Yezu ganaa á kɔ lɛ yǎa Lawa a wúlu-bɔlen kiã a sumu-n ka kɔ̃. Á giã tán walan á n gɔ̀nɔn wɔ̃ tɛ ganaa kun ka garadin ni.

⁵⁵ Lawa a wúlu-bɔlen goledɛnan laanka kiri-kurulin tumaa ga Yezu biɛ kɔ ǹ gɔn li mà maǹ dii, ǹ nə́ fɔ̃.

⁵⁶ Min gigiã soɛ da la sɛn, sɛnɛ, ǹ dinin nə́ wusoo ǹ nə́ kɔn liere kɔ.

⁵⁷ Ǹ kɔnɔn nə́ yoo, ǹ nə́ soɛ kuru ǹ nə́ da la,

⁵⁸ mà ǹsɛn nə́ ma a lɛ-n, mà minbuiinin nə Lawa a kion mɛn dɔ ka ǹ gɔn nɛ, mà asɛ á die bɛ lɛ wurii, a wusoo a kɔsɔ dɔ lɛawaa sɔɔ gɔ́ɔ̃ nɛ, min gòɛ̃ ná a ba a-n wa.

⁵⁹ Sɛnɛ, bɛa boo lɛ dɔ din wɔ gɔn la, ǹ bɔlɔ goã kun wa.

⁶⁰ Lawa a wúlu-bɔlen kiã tɔ́n yoo á golee ǹ tumaa yɔrɔ-a, á nɔ̀n da Yezu la: «Minin lɛn bɛ́ n gialaa ka boo mɛn nɛ, boo ba n lɛ-n n tá ǹ lɛ sii-n wa koɛ?»

⁶¹ Sɛnɛ, Yezu nə́ n lɛ tã, a boo kɔ́n da wa. Lawa a wúlu-bɔlen kiã wusoo á nɔ̀n da la: «N din lɛ n Minin Nyin-sili lɛa? Lawa sonbore kɛa Nɛgiĩ nə n nɛ?»

⁶² Yezu tɔ́n pɛ: «Hiĩ, masɛ n bɛ lɛ lɛa. Ka á re Min a Nɛgiĩ yii giã-n tán Lawa Pàãyiidɛnaa gusin. Ka á re yii dɔn lon a labaran bii die.»

⁶³ Lawa a wúlu-bɔlen kiã foo yoo, á nɔmaa a ná a din a mɔnaan kũ á ǹ toɛ̃, á pɛ: «Wɔsɛn laadoo ba siére kɔsɔ din ganaa doo wa!

⁶⁴ Táa ka a lɛ ma Lawa tɔ ziziɛ̃? Ka n wàa taasɛ?» Ǹ tumaa mà a zɛ̀rɛ nɛ, mà a doamaa-n ka gɛ̀ nɛ.

⁶⁵ Ǹ kɔnɔn ná a giala kɔ ǹ nə́ sɛ̀ kaa Yezu ganaa, ǹ nə́ màn yii a yii ganaa, bɛ̀ ǹ nə n gɔn munu ǹ dɛ, ǹ nɔ̀n da la: «Min mɛn bɛ́ á n dɛ, bɛa dɛnaa pɛ wɔsɛn man kən le!» Bɛ kio, garadin nə́ Yezu kũ ǹ nə́ n gɔn tɔtɔ a para-n.

Piɛrɛ nə n piɛ̃ ka Yezu ni

⁶⁶ Piɛrɛ bɛ́ tɔn tán sumu lɛ nɛ, lɔ goon daa, bɛa lɔ lɛ n dí nyɛɛ Lawa a wúlu-bɔlen kiã nɛ.

⁶⁷ A bɛ́ á Piɛrɛ yɛ n gɔ̀nɔn wɛ̃ tɛ ganaa, á ga a ganaa ka gongon, á pɛ nɛ: «Nsɛ kɛ dɔ́ goã kun ka Nazarɛtin giĩ Yezu kɛ lɛ nɛ.»

⁶⁸ Sɛnɛ, Piɛrɛ ná a liere kɔ mà asɛ a doɛ̃ wa, mà asɛ din yii ba a boo lɛ a woo ǹ bǎã-a wa. Bɛ kio, á soo kiɛnlɛ-a, bɛ̀ koo sa goon bɛ́ á wuu pɛ.

⁶⁹ Lɔ dí-nyali lɛ yɛ, min mɛnɛn bɛ́ ǹ tan, á wusoo á pɛ bɛn manɛ mà giĩ kɛ nə ǹ dinin min goon lɛa!

⁷⁰ Piɛrɛ wusoo a ná a liere kɔ. Bɛ kio boɛɛn nɛ, min mɛnɛn bɛ́ walan bɛn nə́ wusoo ǹ nə́ pɛ Piɛrɛ nɛ mà liere ba a-n wa, mà a nə ǹ dinin min goon lɛa, mà Galilee gána min ni.

⁷¹ Piɛrɛ yoo á dì bíi á n liɛ, á pɛ: «Bɛ̀ masɛ soɛ bɔ, Lawa dɔlɔ bɔ ma ganaa! Ka bɛ́ giĩ mɛn lɛ boo diɛ masɛ nɛ, masɛ a doɛ̃ wa!»

⁷² A din bǎã-n gɔrɔ koo sa goon wuu a paabaa ǹ wɔ pɛ. Piɛrɛ yiri tɔ́n gisĩ Yezu a boo lɛ nɛ a ǹ mɛn lɛ pɛ nɛ mà koo laan bɛ̀ a wuu pɛ gunyin paa, mà á re n piɛ̃ ka asɛ nɛ á dɔ gunyin sɔɔ. Piɛrɛ nɔmaa á n lɛ da wuu ni.