Luku 4 - LAWA A BOO SONBORE

Sɛtaan nə n diɛ Yezu gɔ́ɔ̃ li

¹ Yezu bɔ Zurdɛ̃ tà lɛ-a, a bɛ́ piɛ zii la, Yiri Fu mɛn bɛ́ kun ni, bɛ ná a nyɛɛnaan sabɔ á woo-n diə gole ne.

² *Sɛtaan nə́ n da a gɔ́ɔ̃ li walan lɛawaa pusi gɔ́ɔ̃ nɛ. Bɛa biikoo kɛ lɛ din tumaa li, Yezu màn kɔ́n bii wa. Bɛa lɛawaan kɛn lɛn bɛ́ ǹ nə́ kiɛ̃, bòo kũ.

³ Sɛtaan tɔ́n pɛ nɛ: «Bɛ̀ n tá Lawa a Nɛgiĩ lɛa, a pɛ kɔlɔ kɛ nɛ, mà a n bɔyaa a n baa màn-bii lɛa.»

⁴ Yezu Sɛtaan a boo lɛ si kɛnɛn: «A tá kiɛ̃ nɛ Lawa a boo ne mà minbuiin nɛ ba re n din toe ka màn-bii dinsɔɔ̃-n wa.»

⁵ Sɛtaan nə́ dii lon ka Yezu ni bǎã kɔ́n nɛ, á biikoo boɛɛn saa á kanaa a gánan dinin tumaa nyaa nɛ.

⁶ Á pɛ nɛ: «Masɛ n die pàã koe n la n giã gánan kɛn dinin tumaa mìi la, ǹ laanka ǹ siĩnbaa nɛ ka ǹ naforon ne. Bɛn man nə́ n kɔ masɛ la, bɛ̀ min mɛn dɔ masɛ din yii li, ma dɔ n koe bɛa dɛnaa la.

⁷ Bɛ̀ n masɛ guguru kɔ, bɛ din tumaa á re n wɔ biɛ.»

⁸ Yezu pɛ nɛ: «A tá kiɛ̃ nɛ mà n kaa tán n Dɛnaa Lawa dinsɔɔ̃ yɔrɔ-a, n na a guguru kɔ.»

⁹ Bɛ kio, Sɛtaan woo ka Yezu-n Zeruzalɛmu kiwi, á da Lawa a kion mìi ni, á pɛ nɛ: «Bɛ̀ n tá Lawa a Nɛ lɛa sonbore, n toa walan n furəə tán,

¹⁰ a giala, a tá kiɛ̃ nɛ mà Lawa á re pii a lon a dia dí-a wolen manɛ ǹ ga n walan,

¹¹ ka bɛ dɔ-n doo, ǹ tá re n yoe lon, màn mɛn bɛ́ toɛ, n baran n gòã na kɔlɔ ganaa wa.»

¹² Yezu tɔ́n pɛ Sɛtaan nɛ: «A na á n pɛ mà n baran n da n Lawa, Dɛnaa Lawa gɔ́ɔ̃ li ka sii kɔ́n nɛ wa.»

¹³ Sɛtaan nə́ n da Yezu gɔ́ɔ̃ li ka yɔrɔ din tumaa nɛ, sɛnɛ, a boo la á sã wa. Á nɔmaa á n zɔ̃ á n bɔ Yezu li, á n yii da biikoo kɔsɔ la.

Yezu a minin daraa giala koe Galilee gána nɛ

¹⁴ Yezu bɛ́ ka Yiri Fu pàã lɛ ná a nɛ, á wusoo á daa Galilee gána nɛ. A tɔ bɔ bɛa bǎã lɛ a wɔlɔ yii ni.

¹⁵ A na á goã minin darɛɛ ǹ Zuifun lɛsɔkɔn kionən ne. Min tumaa dɔ na á goã a gugurubaa boo diɛ.

Nazarɛti kiwi minin nə n piã ka Yezu-n lɔn

¹⁶ Yezu bɛ́ á too Nazarɛti kiwi mɛn nɛ, á wusoo á daa walan. Zuifun *susu ǹ pii pinaa, a kɔnpɛ ka Yezu a lɛ mui sii ni, á wɔ lɛsɔkɔn kion. Á yoo a n die Lawa a boo sɛ́wɔ pii.

¹⁷ Ǹ nə́ Lawa a boo gii-dali Izayii a sɛ́wɔ kɔ la. Á bɛa sɛ́wɔ lɛ lɛ bɔ á woo bǎã kɔ́n yaa, a n kiɛ̃-n bɛa bǎã lɛ-n kɛnɛn:

¹⁸ Dɛnaa Yiri n ma la. Hiĩ, a na á ma bɔ á ma koa, mà ma boo tii kɔɔ̃n pɛ doobaan manɛ,

¹⁹ min mɛnɛn bɛ kòso ne mà ǹ tá re ǹ kiɛ, min mɛnɛn bɛ́ yii tere-an lɛa mà ǹ yii á re wusii a wɔlɔ yɛ, ǹ bɛ́ mɛnɛɛ min mɛnɛn la, mà ǹ tá re bɛn kiɛ. A na á ma dia mà ma da pɛ mà Dɛnaa a bǐɛ̃baa lɛ̀ nɛ.

²⁰ Yezu sɛ́wɔ lɛ lɛ tã, á kɔ a tamaali la, a din nə́ woo giã tán boo da ǹ bǎã nɛ. Min tumaa nə́ n yii saa á doa la lɛsɔkɔn kion lɛ nɛ.

²¹ Á tɔ́n na a giala kɔ á pɛ ǹ nɛ kɛnɛn: «Pelo, kasɛn mɛnɛn bɛ́ ka sɛ́wɔ kɛ lɛ a pɛ ma ka ka too ne, bɛa sɛ́wɔ lɛ a boo lɛ pã kasɛn manɛ kɛnɛn gɔrɔ.»

²² Min din tumaa na á goã Yezu laakalɛɛ. Bɛa Lawa a bǐɛ̃baa ǹ boo kɛ kaãbaa da min tumaa ganaa. Sɛnɛ, bɛa boo kɛ a bɔ asɛ lɛ-n kɛ lɛ na á ǹ tɔwaa. Maǹ nə́ goã pii kɔn nɛ mà Zozɛfu a nɛ kɛ lɛ bie wa?

²³ Yezu tɔ́n pɛ ǹ nɛ: «Ma á doɛ̃ máa ka ǹ die suusu kɛ lɛ diɛ masɛ ganaa: Dagòã-dali, n din a busu nya bɔrɔ. Siin mɛnɛn yii nə n zɛnaa Kafaranaamu kiwi, wɔ́ ǹ ma, bɛ lɛ miã dɔ zɛnaa n din a piɛ kəni.»

²⁴ Yezu wusoo á suusu kɔsɔ da: – Masɛ n pii ka nɛ sonbore, «Lawa a boo gii-dali kɔ́n ba gugurubaa yii a din a kiwi wa.»

²⁵ Man pii ka-n taãn-taãnɛ, Lawa a boo gii-dali Yilii a biikoo li, la bɛ́ n piɛ̃ lɛ̀ sɔɔ ka mui sɔrɔ a ná a kiɛ wa, bòo wɔ, lɔ giɔɔrɔ goã mɔnaa-n Izirayeli gána nɛ.

²⁶ Sɛnɛ, Lawa Yilii dia bɛa lɔ kɛ lɛ kɔ́n li wa. A na á dia Sidɔn gána nɛ, Sarɛptaa kiwi lɔ giɔɔrɔ goon li.

²⁷ Lawa a boo gii-dali Yiliizee a wasa nɛ, gɔ̀nɔn busu babaraa dɛnaa gigiã goã Izirayeli gána nɛ, sɛnɛ, bɛn kɔ́n a busu nya wa, yǎa Naaman mɛn bɛ́ Siirii gána min lɛa.

²⁸ Zaman mɛn tumaa bɛ́ lɛsɔkɔn kion lɛ nɛ, ǹ foo yoo bɛa boon kɛn lɛn ma gɔ́ɔ̃ nɛ.

²⁹ Ǹ nə́ parɛ ǹ nə́ yoo, ǹ nə́ Yezu loo ǹ nə́ bɔ ǹ kiwi. Ǹ kiwi lɛ bɛ́ tentelen mɛn la, ǹ nə́ woo ka Yezu-n bɛa wàã goon ganaa. A na á goã ǹ gɔ́ɔ̃ nɛ ǹ nyanaa ǹ zũ tán,

³⁰ sɛnɛ, Yezu bɔ ǹ gɔn yɛ ǹ bii, á woo.

Yezu na a din a pàãdɛnaabaa nyaa lɔn

³¹ Yezu woo Kafaranaamu kiwi Galilee gána nɛ, á goã minin darɛɛ Zuifun susu ǹ pii pinaa.

³² Bɛn nə́ n kaãbaa parsiini a minin daraa lɛ ganaa, a giala pàã na á goã a boo lɛ nɛ.

³³ Giĩ goon na á goã lɛsɔkɔn kion lɛ nɛ, nɔ̀ɔn baraan man a ganaa. Bɛa giĩ lɛ nə́ n lɛ dɛ ka kɔsɛkɔsɛ á pɛ:

³⁴ «Nazarɛtin Yezu. N bɛ́ min mɛn lɛa, wɔsɛn tá doɛ̃, Lawa din a dia dí-a wole sonbore nə n ne! N wàa mɛn sii n wɔsɛn sii ni? Ma nə́ n daa wɔsɛn laadoo ziziɛ̃ gɔrɔ kən le?»

³⁵ Yezu paraa ǹ li á pɛ: «Ka n lɛ tã, ka n bɔ giĩ kɛ ganaa.» Nɔ̀ɔnɔn lɛn nə́ giĩ lɛ zũ tán min tumaa yɔrɔ-a, bɛ kio, ǹ nə́ n bɔ a ganaa, ǹ baraa zɛnaa-n wa.

³⁶ Á kaãbaa da min tumaa ganaa, ǹ nə́ goã pii kɔn nɛ mà wàa boo n ka kɛ nɛ? Mà giĩ kɛ n sɛ̀ pii nɔ̀ɔn baraan ganaa ka pàã nɛ, maǹ ná a bɔlɔ sii dɔn!

³⁷ Yezu tɔ bɔ bɛa gána lɛ a bǎã yii ni.

Yezu busulə gigiã kaka kɔ

³⁸ Yezu soo á n bɔ lɛsɔkɔn kion, á woo Simɔn a piɛ. Gɔ̀nɔn wɛ̃ kaka kɔ́n na á goã Simɔn n dàãlɔ ganaa. Ǹ nə́ Yezu nyankɔ mà a na a busu nya.

³⁹ Yezu nə́ n zuməə á paraa lɔ lɛ mìi la, mà a gɔ̀nɔn wɛ̃ lɛ nya. A din bǎã nɛ gɔ̀nɔn wɛ̃ lɛ nya, yǎa á yoo gɔrɔ á màn-bii zɛnaa á kɔ ǹ la.

⁴⁰ Wasa a yii sã kio, busulən nə goã min mɛnɛn tumaa li, busu tɔrɔ gigiã nə́ ǹ ganaa, ǹ nə́ daa ǹ nɛ Yezu li. Á n gɔn da ǹ gogoonmaa la, á ǹ busu nya.

⁴¹ Nɔ̀ɔnɔn dɔn nə́ goã n boe gigiã ganaa, bɛ̀ ǹ nə́ n lɛ dii Yezu ganaa: «Ma n Lawa a Nɛ lɛa!» Sɛnɛ, Yezu goã sɛ̀ pii ǹ-a, a goã toɛ ǹ boo kɔsɔ da wa, a giala nɔ̀ɔnɔn lɛn nə́ goã Yezu lɛ doɛ̃ Minin Nyin-sili lɛ lɛa.

Yezu n soe n boe Kafaranaamu

⁴² Lɛ̀ bɛ́ á waa, Yezu soo á woo don, min bɛ́ a ba bǎã mɛn nɛ wa. Zaman lɛ na á goã giɛ li. Ǹ bɛ́ ǹ nə́ yɛ ǹ nə́ woo a li, a na á goã ǹ gɔ́ɔ̃ nɛ, ǹ kũ, ǹ na a sàabaa a baran n wɔlɔ lui ǹ-a doo wa.

⁴³ Sɛnɛ, Yezu nə́ n toa zaman lɛ ganaa mà asɛ doamaa nɛ a *Lawa a kiibaa ǹ Boo Tii Kɔɔ̃n kɛ pɛ kiwi gialakunun kɛn lɛn dɔn nɛ. A giala mà Lawa na á na asɛ dia bɛ lɛ a lɛa.

⁴⁴ Bɛ lɛ taman yii, á goã Lawa a boo pii lɛsɔkɔn kionən ne Zudee gána nɛ.