Luku 23 - LAWA A BOO SONBORE

¹ Ǹ tumaa yoo kun, ǹ nə́ kũ, ǹ nə́ woo-n kii Pilati li.

² Ǹ nə́ yoo ǹ tá a gòãn kuri ǹ nə́ pii mà ǹsɛn man nə́ woo giĩ kɛ yaa ǹsɛn gána minin yiri siɛ̃. A n pii, mà ǹ baran nyin giɔ̀mɔ saraa Rɔmun kii gole gole lɛ la wa. Ka bɛ dɔ nɛ, a n pii mà Minin Nyin-sili lɛn ka asɛ nɛ, mà asɛ n kii dɔ lɛa.

³ Pilati nɔ̀n da la kɛnɛn: «Ma n Zuifun kii lɛa?» Yezu ná a lɛ si: «N din nə bɛ pii.»

⁴ Pilati pɛ wúlu-bɔlen goledɛnan lɛn manɛ ka zaman lɛ nɛ mà asɛ dɔlɔ bɔ min-a ǹ sii kɔ́n yɛ giĩ kɛ ganaa wa.

⁵ Sɛnɛ, ǹ nə́ laa bɛ̀ ǹ nə́ pii mà a n zaman lɛ diɛ piã ganaa ka a daraa kɛ nɛ Zudee gána din tumaa nɛ, a bɔ Galilee a da kànaa yaa.

Erɔdi n kiri kuri Yezu la

⁶ Pilati bɛ́ á bɛa boon kɛn ma, á nɔ̀n da mà giĩ lɛ n Galilee gána min lɛa?

⁷ A bɛ́ á ma mà Yezu n Erɔdi a pàã giulun, á dia Erɔdi la. Á daa yaa Erɔdi dɔ na á daa Zeruzalɛmu bɛa biikoo kɛ lɛ li.

⁸ Erɔdi bɛ́ á Yezu yɛ, á n nyɛnyɛɛ parsiini a giala, a bɛ́ màn mɛnɛn miɛ Yezu wɔ gɔn la, a na á goã giɛ li haalɛ bibi, mà a yɛ a yii ni. A na á goã n yiri koɛ a ganaa, mà asɛ yɛ, á n kaãbaa ǹ sii kɔ́n zɛnɛɛ.

⁹ Á nɔ̀n da Yezu la ka boo gigiã nɛ, sɛnɛ, Yezu na a lɛ si ka ǹ kɔ́n nɛ wa.

¹⁰ Wúlu-bɔlen goledɛnan nɛ, ka landa sii-daraalin nə́ goã walan, ǹ nə́ soɛ diɛ la ka boo baraan nɛ.

¹¹ Erɔdi laanka a sɔraasin ná a kiɛɛrɛ kɔ, ǹ nə́ yaa wɔ a ganaa. Erɔdi mɔnaa sonbore kɔ́n wɔ a ganaa, á wusoo á dia Pilati la.

¹² Bɛa pinaa kɛ lɛ nɛ, Erɔdi laanka Pilati kɔn a giaára baa, ǹsɛn mɛnɛn bɛ́ ǹ nə́ goã zɔ́ɔn lɛa lɛlɛ.

Dɔlɔ bɔ Zɛ̀rɛbaãnaa ganaa boo

¹³ Pilati tɔ́n lɛ dia wúlu-bɔlen goledɛnan la ka pàã goledɛnan nɛ ka zaman nɛ.

¹⁴ Á pɛ ǹ nɛ: «Táa ka n ka daa ka giĩ kɛ nɛ masɛ li, mà a n zaman yiri siɛ̃. Á ke, masɛ nɔ̀n da la ka dinin yii ni, ka bɛ́ màn mɛn yii pii, ka n kiɛ a mìi ni, masɛ bɛa dɔlɔ bɔ ǹ sii kɛ kɔ́n yɛ giĩ kɛ wɔ gɔn la wa.

¹⁵ Erɔdi dɔ sii kɔ́n yɛ a ganaa wa, a giala, a bɛ́ á wusoo á dia wɔsɛn la. Bɛa yɔrɔ kɛ lɛ la, masɛ n pii, a sii zɛnaa màn mɛn a dɔlɔ á doe gɛ̀ bǎã-n wa.

¹⁶ Masɛ n die pii máa ǹ duwəə ǹ nə n gɔn bɔ a ganaa.» [

¹⁷ Bɛ̀ *kiɛ̃mala ǹ zɔ́n dɔ lɔn, Pilati doamaa nɛ a ǹ kòso nɛ goon da.]

¹⁸ Zaman lɛ nə́ n lɛ dɛ kun mà a dɛ a gã, a Barabaasi da.

¹⁹ (Bɛa Barabaasi lɛ, maǹ nə́ da kòso-n zaman mìi ziziɛ̃ a lɛa kiwi gɔ́ɔ̃ nɛ, ka gɛ̀-dɛ nɛ.)

²⁰ Pilati bɛ́ giɛ li a n gɔn bɔ Yezu ganaa, á wusoo á boo da ǹ nɛ doo.

²¹ Sɛnɛ, zaman lɛ nə́ n lɛ dɛ mà a dere gɔn ganaa, mà ǹsɛn mà a dere gɔn ganaa.

²² Pilati wusoo a gunyin sɔɔbaa ǹ wɔ nɛ, á pɛ ǹ nɛ: «Giĩ kɛ lɛ na á wàa sii baraa zɛnaa? Masɛ sii yɛ a ganaa á n gɛ̀ dɔlɔ boe wa. Man die pii ǹ duwəə, ǹ nə n gɔn bɔ a ganaa.»

²³ Sɛnɛ, zaman lɛ nə́ n laa Pilati ganaa ka lɛ-dɛ gigiã nɛ, mà a Yezu lɛ dere gɔn ganaa. Ǹ pàã nɔmaa á la nɛ.

²⁴ Pilati tɔ́n golee li, mà sii lɛ n die n zɛnɛɛ a kɔnpɛ ka zaman lɛ dùũ ni.

²⁵ Min mɛn bɛ́ ǹ nə́ da kòso-n zaman mìi ziziɛ̃ laanka gɛ̀-dɛ a lɛa, á bɛ da, zaman na á goã giɛ bɛ lɛ li. Sɛnɛ, Yezu ke, á bɛ kɔ ǹ la mà bɛ̀ ǹ tá biɛ lɔn mà ǹ baa míɛ̃.

Maǹ woe ka Yezu ni a dɛ ǹ bǎã nɛ

²⁶ Ǹ bɛ́ woe ka Yezu lɛ nɛ, ǹ nə́ n da giĩ kɔ́n lɛ, a tɔ n Simɔn, Sirɛni gána min ni, a na á goã boe wuru-n. Ǹ nə́ kũ ǹ nə́ dere ǹ gɔn lɛ kɔ la, mà a gũ a tɔ wɔ Yezu kio.

²⁷ Zaman gole na á goã Yezu lɛ kio. Lɔn mɛnɛn bɛ́ ǹ nə́ goã ǹ tan, bɛn nə́ goã wuu pii ǹ nə́ n lala diɛ a lɛa.

²⁸ Yezu nə́ n yɔrɔ bɔyaa á dia ǹ la, á pɛ ǹ nɛ: – Zeruzalɛmu lɔn lɛn, ka baran wuu pɛ masɛ a lɛa wa, ka wuu pɛ ka dinin lɛa ka kaa nɛnyaanan nɛ.

²⁹ A giala lɛawaan nə́ ke die, minin nə́ die pii ǹ mɛnɛn gɔ́ɔ̃ nɛ mà lɔ nɛ-yɛlebaãnaan wɔ á sóɛ, mà min mɛnɛn bin nɛ yɛ, ǹ nə́ gũ ǹ nə́ nyɔ kɔ la wa, mà bɛn wɔ á sóɛ.

³⁰ Bɛa biikoo li minin tá re pii kelen manɛ: «Ka bɔ ka mɛ wɔ la!», ǹ tá re pii tentenən manɛ: «Ka n kɔ wɔ lɛ ka wɔ duru!»

³¹ Bɛ̀ n yaa da buruu din nə́ kuĩ, da gere wɔ tɔn nə baa lɔn?

³² Maǹ nə́ goã woe ka min paa kɔsɔ dɔ nɛ bǎã lɛ nɛ, basaã-kɔlen manɛ, ǹ nə́ woe ǹ dii kun ka Yezu ni.

Yezu a deree

³³ Ǹ bɛ́ ǹ nə́ dɔ minin dɛ ǹ bǎã lɛ nɛ, ǹ nə́ bíi ǹ dinin bɔlɔ nɛ mà "Mìi Pán", ǹ nə́ Yezu dere walan kun ka basaã-kɔle min paa kɛ lɛ nɛ, goon ná a gusin, goon ná a gɔsɛ.

³⁴ Yezu pɛ: «Maa Díi, ǹ sã toa ǹ nɛ, a giala, ǹ bɛ́ màn mɛn zɛnɛɛ ǹ ba bɛ doɛ̃ wa.» Ǹ bɛ́ re Yezu a mɔnaan gii kɔn, maǹ nə́ n pã.

³⁵ Zaman lɛ na á goã golee ne giɛ. Pàã a goledɛnan kɛn sɛn man nə́ goã yaa we bɛ̀ ǹ nə́ pii: «Ń min kɔsɔn nyin si, n din wɔ si sisia kəni, bɛ̀ Nyin-sili kɛ lɛ Lawa n die diɛ, Lawa din a min boe lɛ, bɛ̀ n tá bɛ lɛa sonbore!»

³⁶ Sɔraasin lɛn dɔn nə́ goã yaa we a ganaa. Ǹ nə́ n mɔrɔ a ganaa mà maǹ yɔ pipiã koe la.

³⁷ Ǹ nə́ pɛ-n dɔn: «Bɛ̀ n tá Zuifun kii lɛ lɛa sonbore, n din nyin si kəni.»

³⁸ Sɛ́wɔ-kiɛ̃ kɔ́n na á goã Yezu lɛ mìi lalan, bɛa sɛ́wɔ-kiɛ̃ lɛ n pii: «Zuifun kii lɛ n ke.»

³⁹ Ǹ basaã-kɔlen mɛnɛn dere kun ka Yezu ni, bɛn goon na á goã sɔ kiɛ Yezu la a n pii: «N bie Nyin-sili lɛ lɛa wa ya? N din nyin si kəni, n wɔsɛn dɔn wɔ si!»

⁴⁰ Sɛnɛ, goon kɛ na á goã sɛ̀ pii ǹ miã lɛ ganaa, a n pii: «N ba nyɛ́ɛ biɛ Lawa-n wa, nsɛ mɛn bɛ́ a din fuu goon lɛ yii?

⁴¹ Wɔsɛn wɔ na a zii li le! Wɔsɛn man wɔa nya ǹ dí a mìi gɔ́ɔ̃ ǹ sii yii. Sɛnɛ, giĩ kɛ sii baraa kɔ́n zɛnaa wa.»

⁴² Yǎa a pɛ Yezu-n kɛnɛn: «N bɛ́ re die n kiibaa kɛ nɛ ǹ mɛn pinaa, n yiri koa masɛ nɛ.»

⁴³ Yezu ná a lɛ si: «Masɛ n pii ni sonbore, pelo kɛ lɛ din ni, n tá re goɛ̃ kun ka masɛ nɛ Lawa a piɛ.»

Yezu a gɛ̀

⁴⁴ Wasa a dɔ baã bii waáraa, wasa papaã. Wɔlɔ yoo á tii kanaa bǎã din tumaa nɛ, yǎa á woo dɔ biikoo sɔɔ.

⁴⁵ Lawa a kion nyɛɛnaan sonbore kɛ a bii kuru kɔn-a ǹ mɔnaa kɛ tɔ́n toɛ̃ a bii.

⁴⁶ Yezu nə́ n lɛ dɛ gole á pɛ: «Díi, masɛ n ma din nyin we n gɔn.» A bɛ́ á bɛ da á nya, a piɛ̃ nya.

⁴⁷ Sɔraasin goledɛnaa lɛ bɛ́ á bɛa sii kɛ lɛ yɛ, á Lawa guguru kɔ bɛ̀ á n pii: «Liere ba a-n wa, giĩ kɛ na á goã min pepere lɛa!»

⁴⁸ Min mɛn tumaa goã á daa n lɛ sɔkɔn bɛa minin deree kɛ lɛ a lɛa, ǹ bɛ́ ǹ nə́ sii kɛ yɛ á n zɛnaa, ǹ nə́ wusoo bɛ̀ ǹ nə́ n foo bii dii.

⁴⁹ Yezu a giaáran tumaa goã tiãlɛa. Lɔn mɛnɛn dɔn nə kɔ lɛ ǹ nə́ bɔ Galilee gána nɛ, bɛn dɔn nə́ goã tiãlɛa ǹ nə́ giɛ.

Yezu a bĩ ǹ bǎã

^50-51 Zuifun kiri-wɔlen lɛn bii, giĩ goon na á goã boe Arimatee kiwi, a tɔ n Zozɛfu. A na á goã min sonbore lɛa, a n pepere dɔn. A na á goã n yii diɛ *Lawa a kiibaa ǹ dí kɛ a daa la. Ǹ miãn nə sii mɛn zɛnaa, a lɛ kɔ bɛ ganaa wa.

⁵² Bɛa giĩ lɛ na á woo Pilati li á Yezu gere nyankɔ la.

⁵³ A ná a gere lɛ gisĩ á bɔ dere ǹ gɔn lɛ-a, á mɔnaa fu pɛnɛ a ganaa á woo naa yala-n. Bɛa yala lɛ n boe-n kele kolo ganaa. Ǹ tɔn min naa-n bɔrɔ wa.

⁵⁴ Bɛa siin kɛn lɛn man nə́ n zɛnaa, á kɔnpɛ ka Zuifun lɛn yɔrɔ bɔ pinaa nɛ, ǹ nə́ n yii diɛ *susu ǹ pii la. Bɛa susu ǹ pii lɛ dɔ a biikoo n dirii.

⁵⁵ Lɔn mɛnɛn nə kɔ Yezu lɛ ǹ nə́ bɔ Galilee gána nɛ, bɛn nə́ Zozɛfu lɛ da zii. Ǹ nə́ ga yala lɛ ganaa ka gere lɛ a naa tán-a ǹ gɔn nɛ.

⁵⁶ Bɛ kio ǹ nə́ wusoo ǹ nə́ daa piɛ, ǹ nə́ da yon gìĩ kɔɔ̃n laanka nyɔɔ gìĩ kɔɔ̃n zɛnaa. Susu ǹ pii pinaa ke, ǹ nə́ bɛ koa á kɔnpɛ ka dí-pɛ lɛ nɛ.