Luku 18 - LAWA A BOO SONBORE

Lɔ giɔɔrɔ mɛn kiri-kuruli nyankɔ á belebɔ nɛ

¹ Yezu boo giməə kɔ́n da a kialandɛnan manɛ, á nyaa ǹ nɛ mà min doamaa nɛ, a Lawa nyankɔ biikoo tumaa waáraa, a gù ná a giɛ̃ wa.

² Á pɛ ǹ nɛ: «Kiri-kuruli goon na á goã kiwi goon ne, nyɛ́ɛbaa Lawa nɛ goã a yii la wa, a goã min kɔ́n dɔ guguru koe wa.

³ Lɔ giɔɔrɔ goon dɔ na á goã bɛa kiwi lɛ nɛ, bɛ na á goã die pii kiri-kuruli lɛ nɛ mà a na asɛ a gɛ̀ dòo bɔ asɛ a zɔ́ɔ ganaa.

⁴ Bɛa kiri-kuruli lɛ nə́ n piã gunyin damata. Bɛ kio, á tɔ́n pɛ a din ni mà sonbore, mà asɛ a nyɛ́ɛ biɛ Lawa-n wa, asɛ a min kɔ́n dɔ guguru koe wa.

⁵ Sɛnɛ, mà lɔ giɔɔrɔ kɛ bɛ́ asɛ nɔmiɛ, mà asɛ n die a kiri sii yɔrɔ boe, mà a bɛ́ giɛ màn mɛn li asɛ bɛ zɛnaa nɛ, màn mɛn bɛ́ toɛ, a baran da asɛ nɔmaa doo wa.»

⁶ Bɛ kio, Dɛnaa wusoo doo á pɛ: «Ka n too kɔ kiri-kuruli kɔkɔrɔ kɛ a da ǹ boo ganaa!

⁷ Sanparɛ ka Lawa nɛ, min mɛnɛn bɛ́ Lawa wɔn lɛa, ǹ ná a nyankoe tèlò-n ka penleen ne, a ba re bǐɛ̃ zɛnɛɛ bɛn man wa? A ba re n nanaɛ a n dɔ ǹ lɛ wa?

⁸ Ma n pii ka nɛ, a n die bǐɛ̃ zɛnɛɛ ka nɛ fufuu. Sɛnɛ, Min a Nɛgiĩ bɛ́ re die ǹ mɛn waáraa, á re die yiɛ bɛ̀ kanaa minin nə́ tɔn golee-n li, ǹ nə́ n yii diɛ a daa la?»

Fariziɛ̃n giĩ laanka wusuru-sili boo

⁹ Yezu na á boo giməə kɛ da. Min mɛnɛn bɛ́ n dinin biɛ min peperen lɛa Lawa yɔrɔ-a, ǹ nə́ giɛ ǹ miãn-a min kɔrɔn lɛa, a na á da bɛn manɛ:

¹⁰ – Min paa na á woo Lawa nyankɔ Lawa a kion, goon na á goã *Fariziɛ̃ lɛa, goon kɛ na á goã wusuru-sili lɛa.

¹¹ Fariziɛ̃ lɛ sɛ giã lon a gɔrɔn, á Lawa nyankoe kɛnɛn: «Lawa, masɛ á barka diɛ n nɛ, a giala masɛ a goon ka min gialakunun kɛn nɛ wa. Bɛn man wurumunun lɛa, ka min baraan nɛ, ka naarɛbaalin ni. Ma á barka diɛ Lawa-n doo, a giala ma ba ka wusuru-sili kɛ bɛ́ lɔn wa.

¹² Masɛ nə n lɛ soɛ lɛawaa paa piizii goon gɔ́ɔ̃ nɛ. Ma á màn woo màn yii, ma na a talɛɛ fùbaa ǹ wɔ koe Lawa la.»

¹³ Wusuru-sili lɛ sɛ na á goã golee ne tiãlɛa, a yii din ba we á n mìi siɛ lon wa. Sɛnɛ, a na á goã n foo bii dii, a nə́ n lala diɛ bɛ̀ á n pii: «Lawa, makara bɔ masɛ-a, masɛ n sii baraa-zɛnaali lɛa.»

¹⁴ Yezu pɛ: «Man pii ka nɛ, bɛa wusuru-sili lɛ wusoo á woo piɛ ka peperebaa nɛ Lawa yɔrɔ-a, sɛnɛ, goon kɛ lɛ bɛ yɛ wa. A giala bɛ̀ min mɛn nə́ n din saa lon, ǹ tá re bɛa dɛnaa gisĩ, bɛ̀ min mɛn nə́ n din boɛɛn kɔ ǹ tá re bɛ siɛ lon.»

Yezu sii a kɔnboe mɛn saa nɛnyaanan wɔ paǹ li

¹⁵ Minin man nə́ goã die Yezu li ka ǹ nɛnyaan tiɛɛ̃nɛn nɛ dinin, mà a n gɔn da ǹ ganaa, a Lawa nyankɔ ǹ lɛa. Kialandɛnan lɛn nə́ bɛ yɛ, ǹ nə́ yoo ǹ gialaa.

¹⁶ Sɛnɛ, Yezu mà ǹ da ka nɛnyaanan lɛn nɛ, á pɛ: «Ka toa nɛnyaanan nə da masɛ ganaa! Ka baran ǹ kurəə wa. A giala, min mɛnɛn bɛ́ ka nɛnyaanan bɛ́ lɔn, *Lawa a kiibaa lɛ n bɛn wɔ lɛa.

¹⁷ Masɛ n pii ka nɛ sonbore, bɛ̀ min mɛn lɛ kɔ Lawa a kiibaa lɛ ganaa ka nɛnyaan bɛ́ lɛ koe sii-a lɔn wa, bɛa dɛnaa a boe la a wɔ Lawa a kanaa dii kɛ-n wa.»

Giĩ pàãma a boo

¹⁸ Zuifun goledɛnaa goon na á nɔ̀n da Yezu la: «Mìinaa sonbore, masɛ doamaa nɛ ma wàa zɛnaa, màn mɛn bɛ́ toɛ, masɛ nyin nyabaã yɛ?»

¹⁹ Yezu pɛ nɛ: «Wàa na á baa n tá masɛ bíi min sonbore? Min kɔ́n ba sonbore wa, yǎa Lawa dinsɔɔ̃.

²⁰ Táa n tá dí-pɛn lɛn doɛ̃: N baran naarɛbaa zɛnaa wa, n baran gɛ̀ dɛ wa, n baran wurumu baa wa, n baran soɛ da min la wa, n díi laanka n náa guguru kɔ.»

²¹ Giĩ lɛ ná a lɛ si: «Masɛ bɛa dí-pɛn kɛn lɛn tamaa haalɛ maa nɛnyaanbaa waáraa.»

²² Yezu bɛ́ á bɛ ma, á pɛ nɛ: «Sii goon tá tɔn nə n nyaabiɛ: N gɔn màn tumaa sã, n na a wɔrɔ gii doobaan manɛ. N tá re gɔn màn gigiã yii lon Lawa a piɛ. Bɛ zɛnaa n tɔn da kɔ masɛ kio lɛ.»

²³ Giĩ lɛ bɛ́ á bɛ ma, a yɔrɔ kɔsɛ parsiini, a giala a na á goã pàãma lɛa taãn-taãnɛ.

²⁴ Yezu yii bɛ́ a ganaa, á pɛ: «Pàãma a dɔ Lawa a kiibaa ǹ bǎã tá re kaka koe!

²⁵ Hiĩ, nyɔɔmaa a wɔ mɛsɛn yala-n tá re goɛ̃ naanaa pàãma a wɔ Lawa a kiibaa ǹ bǎã-n nɛ.»

²⁶ Min mɛnɛn bɛ́ n too koe, bɛn nə́ pɛ: «Bɛ̀ á miɛ̃, die n boe la a kirisibaa kəni?»

²⁷ Yezu nə́ ǹ lɛ si: «Min ba boe la a nə n din kirisibaa wa, yǎa Lawa ná a kirisibiɛ.»

²⁸ Piɛrɛ tɔ́n pɛ: «Wɔsɛn dɔn, wɔsɛn mɛnɛn nə gɔn mànan toa walan wɔ́ daa kɔ n lɛ.»

²⁹ Yezu nə́ ǹ lɛ si á pɛ ǹ nɛ: «Sonbore, masɛ n pii ka nɛ, min mɛn yii soo a ná a kion toa walan, a lɔ nɛ, ǹ dɔɔ̃nɔn nɛ, a yɛ wolen hinlaa a nɛnyaanan, Lawa a kiibaa ǹ dí kɛ a lɛa,

³⁰ bɛa dɛnaa á die màn gigiã yii kanaa kɛ lɛ din ni, ka bɛ dɔ nɛ, á die nyin nyabaã yii biɛ̃.»

Yezu boo mɛn da doo a din a gɛ̀ wɔ paǹ li

³¹ Yezu kialandɛnaa fulupaa lɛ bíi a din li, á pɛ ǹ nɛ ǹ gɔrɔn: «Á ke, wɔ n woe Zeruzalɛmu. Lawa a boo gii-dalin nə màn mɛn yii da Min a Nɛgiĩ wɔ gɔn la, bɛ n die n zɛnɛɛ.

³² A giala, ǹ tá re masɛ we tɔrɔ kɔsɔn gɔn, bɛn tá re yaa we ma ganaa, ǹ sɔ kaa ma la, ǹ sɛ̀ kaa ma ganaa.

³³ Ǹ tá re ma pɛnɛ ka sɔsɔrɔ nɛ, ǹ tá re ma dii ma gã. A lɛawaa sɔɔbaa ǹ wɔ pinaa, masɛ yii á re wusii a kaa.»

³⁴ Sɛnɛ, kialandɛnan lɛn nə bɛa boon kɛn lɛn giala ma wa. Bɛa boo kɛ lɛ na á goã tì ǹ yɔrɔ-a. Yezu bɛ́ màn mɛn pii ǹ ni, ǹ ba a giala miɛ wa.

Yezu n yii tere-a goon yii buĩ

³⁵ Yezu n dirii Zerikoo la. Á daa yaa yii tere-a goon nə giã-n tán zii gialaa, a n nyankoe.

³⁶ Á zaman lɛ lɛ ma, á nɔ̀n da mà wàa mɛn nɛ?

³⁷ Ǹ nə́ pɛ mà Nazarɛtin Yezu n kiɛ̃.

³⁸ Á n lɛ dɛ, á pɛ: «Yezu, kii Davida tɔrɔ, makara bɔ masɛ ganaa!»

³⁹ Min mɛnɛn bɛ́ tɔ we nyɛɛnɛ, bɛn nə́ sɛ̀ pɛ a ganaa, bɛ̀ ǹ nə́ pii ni mà a n lɛ tã. Sɛnɛ, a na á goã màn diɛ a lɛ-dɛ li: «Davida tɔrɔ, makara bɔ masɛ ganaa!»

⁴⁰ Yezu golee á pɛ, mà ǹ da nɛ asɛ li. Yii tere-a lɛ bɛ́ á n mɔrɔ, Yezu nɔ̀n da la

⁴¹ mà a n giɛ li asɛ wàa zɛnaa nɛ? A ná a lɛ si: «Mìinaa, masɛ yii bũ a wusoo a wɔlɔ yɛ.»

⁴² Yezu tɔ́n pɛ nɛ: «Masɛ máa n yii wɔlɔ yɛ! N din a goleemali na á n kirisibaa.»

⁴³ A din bǎã-n gɔrɔ, a yii boo la á wɔlɔ yɛ, á goã koe Yezu lɛ bɛ̀ a n Lawa tɔ boe. Zaman lɛ tumaa bɛ yɛ, ǹ dɔn nə́ yoo ǹ nə́ barka diɛ Lawa nɛ.