Loen 95 - LAWA A BOO SONBORE

Lawa n kii lɛa, ka daa wɔ n doroo ne

¹ Ka daa wɔ n lɛ dɛ, wɔ n nyɛnyɛɛ wɔa Dɛnaa Lawa ganaa. Ka daa wɔ foo kɔɔ̃nbaa ǹ fòo da Lawa nɛ, wɔ tamaali kɛ lɛ wɔ kirisibiɛ.

² Ka daa wɔ n mɔrɔ a ganaa, wɔ barka da nɛ, ka daa wɔ a para pɛ ka loe ne.

³ Sonbore, Dɛnaa Lawa lɛ n Lawa gole lɛa, kii gole mɛn bɛ́ guguru kɔ ǹ mànan tumaa lalan.

⁴ Kanaa kɛ lɛ, a bǎã zuzulun tumaa na a din gɔn, a kele sɔsɔrɔn tumaa na a din wɔ lɛa.

⁵ Yìsi mu kɛ dɔ na a din wɔ lɛa, a din na á zɛnaa, a din gɔn na á kanaa a tán wen kɛn dɔn tumaa zɛnaa.

⁶ Ka daa wɔ wɔ, wɔ kaa tán, wɔ a guguru kɔ, wɔ n musin koa tán Dɛnaa Lawa lɛ yɔrɔ-a. A din na á wɔ zɛnaa.

⁷ Taãn pɛ á soɛ, a din lɛ n wɔa Lawa lɛa. Wɔ na a din a zaman lɛa, a n wɔ tamaɛ ká a tɔɔn bɛ́ lɔn, a n wɔ lɛduĩ. Màn mɛn bɛ́ siĩn pelo, bɛ á ke: ka n too kɔ a lon, ka a lɛ si.

⁸ Ka baran ka foo laa wa, ka ka digolon bɛ́ ǹ nə́ zɛnaa lɔn Meribaa, ǹ nə́ zia da ma ganaa. Ka ǹ bɛ́ ǹ nə́ zɛnaa lɔn Maasaa don gɔ́ɔ̃ nɛ,

⁹ ǹ nə́ n da ma gɔ́ɔ̃ li, a da yaa, ǹ nə́ ma yɛ dí nyɛɛ kunun ǹ ni.

¹⁰ Ka digolon zaman lɛ ma foo busu yǎa lɛ̀ pusi. Bɛ lɛ nɛ, má pɛ: Kɛa tɔrɔ kɛ yiri nə́ n si la, a ba ma dùũ sii doɛ̃ wa.

¹¹ Bɛ lɛ na á toa, maa foo-yoo gɔ́ɔ̃ nɛ, má n liɛ máa ǹ ba re we maa susu ǹ gána kɛ-n wa.