Loen 94 - LAWA A BOO SONBORE

Lawa lɛ-sili dinsɔɔ̃ n barkadɛnaa lɛa

¹ Dɛnaa Lawa, n din lɛ n gɛ̀ dòo boe, Lawa mɛn bɛ́ gɛ̀ dòo boe, n din nyaa.

² N din mɛn bɛ́ kiri kuri kanaa tumaa la, yoo. Dɔlɔ bɔ din gole-kɔlen kɛn ganaa, a kɔnpɛ ǹ nya ǹ dí ni.

³ Dɛnaa Lawa, min babaraan kɛn man die goɛ̃ nyɛnyɛɛ la yǎa biĩ? Ee, maǹ die goɛ̃ la yǎa biĩ kəni?

⁴ Maǹ boo ziziɛ̃n diɛ, ǹ tá ǹ dinin kalɛɛ, bɛa baraa-zɛnaalin kɛn lɛn tumaa.

⁵ Dɛnaa Lawa, manə n din a zaman lɛ nɔmɛɛ, ǹ nə́ mɛnɛɛ n din wɔn kɛn la.

⁶ Maǹ lɔ giɔɔrɔn nyin boe, ka tiin ni. Maǹ nɛ toenən dii, ǹ boe kanaa.

⁷ Maǹ bɛ tumaa zɛnɛɛ, bɛ̀ ǹ pɛ: Dɛnaa Lawa yii ba-a wa, Zakɔba a Lawa lɛ ba n yiri koɛ kɛ li wa.

⁸ Kaa baãnaabaa lɛ la yii ni, ka toa ka sii dɔ̃. Ka yiri lɛ kiɛɛrɛ kɔ á la yii ni, ka á re sii giala miɛ ǹ kɔn pinaa dinin le?

⁹ Dɛnaa Lawa mɛn nə too zɛnaa, bɛa boo miɛ wa? A din mɛn nə yii zɛnaa, a yii a wɔlɔ yii wa?

¹⁰ A din lɛ na á dɔlɔ bɔ tɔrɔ kɔsɔn kɛn ganaa, ka n taasɛ, mà dɔlɔ bɔ ǹ pàã na a ba a lon doo wa? Dɛnaa Lawa mɛn bɛ́ doɛ̃ koe minbuiinin la,

¹¹ a tá min tumaa a taasiɛ doɛ̃, á doɛ̃ mà màn kɔn ba a-n wa.

¹² Dɛnaa Lawa, n bɛ́ min mɛn doree, n nə́ daraa koe la ka n din a boo ne, bɛa dɛnaa wɔ na á bǐɛ̃ kɔ.

¹³ Asɛ n goɛ̃ susui la minin nɔmaa pinaa, bɛ á zɛnɛɛ, bɛ̀ min baraan man mɛnɛɛ koe ne, ǹ tá bɔ̀n biɛ.

¹⁴ Sonbore, Dɛnaa Lawa ba n gɔn boe a zaman kɛ ganaa wa. A ba a din wɔn kɛn toɛ walan wa.

¹⁵ Kiri we tá re pepere koe doo, gána lɛ gɔ́ɔ̃ nɛ, gɔ́ɔ̃ fudɛnan tumaa á re bɛ tamaɛ.

¹⁶ Die n die boe ma lɛ-a, a yoo min babaraan kɛn gialaa? A maa zia gii si, a da baraa-zɛnaalin kɛn-a?

¹⁷ Bɛ̀ Dɛnaa Lawa din bie á n dɔ ma lɛ wa, bɛ̀ má lɛ kuru geren piɛ kanna.

¹⁸ Bɛ̀ má pɛ lɔn gɔrɔ máa man die mɛnɛɛ, n din Dɛnaa Lawa lɛ n die ka kɔn-narɛɛ gole ne, n ma kũ.

¹⁹ Bɛ̀ taasiɛ la ma yii ni, n din nə ma foo taɛ̃, n tá ma foo kɔɔ̃n koe.

²⁰ Ma á doɛ̃. Min babaraan kɛn bɛ́ kiri kɔkɔrɔn mɛnɛn we, ǹ nə́ ǹ ba kɔnpii n boo-n wa, ǹ nə́ nɔmaa kiɛ wɔlɔ la, n ba lɛ koe bɛ-a wa.

²¹ Maǹ yɔ boe min peperen ganaa, maǹ zɛ̀rɛ koɛ zɛ̀rɛbaãnan ganaa.

²² Sɛnɛ, Dɛnaa Lawa lɛ n masɛ tamaali kaka lɛa. Maa Lawa lɛ n maa kele kɔ́sɔ lɛa, ma nə́ n duri a nɛ.

²³ Ǹ bɛ́ giɛ baraa mɛn li, maa wɔ paǹ li, wɔa Dɛnaa Lawa lɛ na á ǹ saraa ka bɛ lɛ nɛ. Á ǹ dinin baraabaa lɛ kuməə ǹ mìi ni, á ǹ sàabaa nɛ.