Loen 84 - LAWA A BOO SONBORE

Wo Lawa ganaa wolen pàã n gole koe

¹ LOE-saalin goledɛnaa loe mɛn lɔ, Gaati minin tùtu wuu li. Koore a minin loe goon ne.

² Dɛnaa Lawa Pàãyiidɛnaa, n kion lɛ a sii á kɔɔ̃n ma-a, á la yii ni.

³ Ma la tumaa n kakaɛ̃ Dɛnaa Lawa a kion lɛ a woo li. Ma foo n mu mii Lawa yiikoonaa lɛ li.

⁴ Dɛnaa Lawa Pàãyiidɛnaa, maa kii laanka maa Lawa, haalɛ bùn tiɛɛ̃n din tá kion yii, leere bàan dɔ tá kii doe, n wulu bɔ ǹ bǎã kɛ gienli, a na a gìi da a nɛ.

⁵ Min mɛnɛn bɛ́ giã nɛ n kion kɛ nɛ, bɛn wɔ na á bǐɛ̃ kɔ, ǹsɛn bɛ́ boe la ǹ tá loe loe, n tɔ boe biikoo tumaa li. *Doa.

⁶ Min mɛnɛn bɛ́ doɛ̃, mà ǹsɛn pàã n ka n din ni, bɛn foo á re kɔɔ̃n koe. Zii saa a wo n li n goɛ̃ bɛn foo ne.

⁷ Ta bɛn man kiɛ̃ tán gere bǎã kɛ nɛ, a nə n bɔyɛɛ a mu bǎã nyantoto baa. La bibinaan kɛn man kiɛ la, ǹ barka wɔ a nɛ.

⁸ Bɛa minin kɛn lɛn, bɛ̀ ǹ tá woe nyɛɛnɛ ǹ tɔ-wɔ lɛ gɔ́ɔ̃ nɛ, màn nə n miɛ̃ ǹ pàã li, yǎa ǹ woe doe Lawa yɔrɔ-a Zeruzalɛmu.

⁹ Dɛnaa Lawa, Lawa Pàãyiidɛnaa, n too kɔ maa nyankɔ li. Zakɔba a Lawa, n too da ma lon. Doa

¹⁰ Lawa, n yiri koa kii kɛ li, wɔ tamaali lɛa, n din nə ń bɔ ń koa, ga a walan.

¹¹ Sonbore, min nə lɛawaa goon dinsɔɔ̃ zɛnaa nsɛ a Kion kɛ nɛ, bɛ á soɛ lɛawaa duu goon zɛnaa bǎã kɔsɔ-n nɛ. Maa Lawa, ta masɛ n giɛ̃ tán, n kion kɛa kiɛnlɛ-a kooro dinin kaa, bɛ á kɔɔ̃n ma ganaa, á la wo giã min kooron bii ni.

¹² Sonbore, Dɛnaa Lawa lɛ n wɔlɔ fúli wɔ nɛ ka wasa bɛ́ lɔn, a din dɔ n wɔ tamaɛ. Dɛnaa Lawa din nə bǐɛ̃ zɛnɛɛ, á gugurubaa koe. Min mɛnɛn giã bɛ́ pepere, a n yii-nyɛɛ koe bɛn la.

¹³ Dɛnaa Lawa Pàãyiidɛnaa, min mɛn bɛ́ n foo doɛ nsɛ ganaa, bɛa dɛnaa foo á re kɔɔ̃n koe.