Loen 83 - LAWA A BOO SONBORE

Izirayeli a zɔ́ɔn pàã nya boo

¹ LOE. Asaafu a loe goon ne.

² Lawa! Soo n boo da, n baran n lɛ tã, n giã ka kiĩni kɛnɛn wa.

³ Á ke, n zɔ́ɔn tá gungunun sii, ǹ tá n gɔ́ɔ̃ tii.

⁴ Maǹ tán dù bose n din a zaman kɛ li, n din bɛ́ min mɛnɛn tamaɛ, maǹ kɔn yii bɛn gialaa.

⁵ Maǹ pii kɛnɛn: Ka daa, wɔ ǹ gána tuturu, min din baran Izirayeli tɔ pɛ doo wa.

⁶ Ǹ nə́ kɔn yɛ, ǹ nə́ n lɛ kaa kun, ǹ nə́ n lɛ kɔ kɔn la, n zaman kɛ lɛ gialaa.

⁷ Bɛa lɛ kaa kun wolen lɛn, Edɔmu minin man ka Isimayeli minin ni, Moabu minin ni ka Agaara a nɛnyaanan nɛ.

⁸ Gevaala minin ni, Amɔn minin ni ka Amalɛki minin ni. Filisiti gána nɛ ka Tiiri kiwi minin ni.

⁹ Haalɛ Asiirii minin dɔn nə́ n naa ǹ ganaa, ǹ nə́ n dɔ Lɔti a nɛnyaanan lɛ.

¹⁰ Lawa, n sii mɛn zɛnaa Madiã minin ni, ka Sizeraa laanka Yavɛn nɛ Kisɔn tà lɛ-a, bɛ lɛ zɛnaa ǹ dɔn manɛ.

¹¹ Madiã minin lɛn man nə́ n dɛ Dɔɔrɔ Tù lɛ-a, ǹ nə́ ǹ toa tán ka mànan bù bɛ́ lɔn.

¹² Ǹ kiin dɛ n nə ǹ baa ka Orɛbu laanka Zɛbu bɛ́ lɔn, ǹ goledɛnan tumaa baa ka Zeba laanka Salmuuna bɛ́ lɔn.

¹³ Bɛn man nə́ goã pii kɛnɛn: Ka daa wɔ Lawa a bǎãn kɛn kũ, wɔ ǹ si.

¹⁴ Maa Lawa, toa ǹ nə n binbirin bɔ, ka kaã bɛ́ lɔn piɛ̃ n siɛ.

¹⁵ Ka tɛ bɛ́ daã kuĩ lɔn, ka tɛ lɛwɔnɔn bɛ́ yui kelen la lɔn,

¹⁶ piɛ̃ bɔ, n nə ǹ kio loo-n miɛ̃, nyɛ́ɛ da ǹ ganaa ka n din a piɛ̃ gole ne.

¹⁷ Toa n sìi da ǹ ganaa, màn mɛn bɛ́ toɛ, ǹ ga n din li, Dɛnaa Lawa.

¹⁸ Toa nyɛ́ɛ laanka sìi nə ǹ kũ biikoo tumaa li, ǹ gã puusə kɔ gɔ́ɔ̃ nɛ.

¹⁹ Toa ǹ dɔ̃ mà n dinsɔɔ̃ tɔ n Dɛnaa Lawa, n din nə Lon a Lawa Gole lɛ lɛa kanaa tumaa gɔ́ɔ̃ nɛ.