Loen 77 - LAWA A BOO SONBORE

Taasiɛ wɔ Izirayeli a lɛlɛ siin ganaa loe

¹ LOE-saalin goledɛnaa loe mɛn lɔ. Yedutun na á lɔ. Asaafu a loen kaa kun goon ne.

² Man lɛ diɛ Lawa la, ma á n lɛ dii. Man lɛ diɛ la, máa a n too kɔ ma lon.

³ Bɛ̀ ma á nɔmaa gɔ́ɔ̃ nɛ, ma nə n yɔrɔ diɛ Dɛnaa la. Tèlò-n, ma nə n gɔnɔn diɛ a din la, ma a n susui wa, ma nə n piɛ̃ ka foo-wɔraa nɛ.

⁴ Bɛ̀ má n yiri kɔ ka Lawa-n lɔn gɔrɔ, man gini, bɛ̀ má n taasɛ lɔn gɔrɔ, ma gù n giɛ̃. *Doa.

⁵ Dɛnaa, n din nə ma kurii yii tã kɔn ganaa tèlò-n. Ma yiri nə́ n lɔlɔkɔn, ma bɛ́ re boo mɛn diɛ, ma a bɛ doɛ̃ wa.

⁶ Ma nə n taasɛ ka lɛlɛ a lɛawaan kɛn nɛ, lɛ̀n mɛnɛn bɛ́ ǹ nə́ kiɛ̃.

⁷ Tèlò-n, ma nə n taasɛ, ma nə n yiri koe, man nɔ̀n diɛ ma din la kɛnɛn:

⁸ Dɛnaa n die wɔ daɛ yǎa duduu? A ba re bǐɛ̃ zɛnɛɛ wɔ-n doo wa?

⁹ A kɔn-narɛɛ gole lɛ na á nya wɔa wɔ paǹ li? A re n lɛ koe wɔ la ka sii kɔn nɛ doo duduu wa?

¹⁰ Lawa yiri na á bɔ ka a makara bɔ wɔ ganaa nɛ? A na á n saa a foo-yoo lɛ li, á n gɔ́ɔ̃ tii wɔ ganaa? Doa.

¹¹ Man má goã pii: Maa nɔmaa lɛ mìi n ka kɛ nɛ: Lon a Lawa gole lɛ pàã na a banban doo wa.

¹² Ma nə n yiri gisĩ Dɛnaa Lawa a sii dadaran nɛ. Hiĩ, ma nə n yiri koɛ n lɛlɛ a kaãbaa ǹ siin ni.

¹³ N siin mɛnɛn tumaa zɛnaa, man wusii bɛn pii ma din ni. Ma nə n taasɛ n sii dadaran nɛ.

¹⁴ Lawa, n sii-zɛnaan man yoreen yoreene. Lawa kɔsɔ kɔn ba gole ka n bɛ́ lɔn wa.

¹⁵ N dinsɔɔ̃ n kaãbaa ǹ sii sonboren zɛnɛɛ, ń nə́ n boo sii la kɛ nyaa tɔrɔ kɔsɔn manɛ.

¹⁶ Zakɔba laanka Zozɛfu a nɛnyaanan kɛn, n din a zaman lɛa, n din nə ń bɛn bɔ bɛ̀rɛbaa nɛ, ka n din pàã nɛ. Doa.

¹⁷ Lawa, mu nə́ n yɛ, kɔ̀ mu nə́ n yɛ, nyɛ́ɛ kũ, á n lɔlɔkɔn yǎa a gialaa ganaa.

¹⁸ Labaran nə́ ǹ mu kaa tán la, la a giniin nə́ bɔ ǹ bii, la a tɛ-pɛn nə́ bɔ, ǹ nə́ woo paǹ tumaa ganaa.

¹⁹ N la lɛ bɛ́ gini kiɛ̃, la a tɛ-pɛn nə́ kanaa lɛ fulu. Tán nə́ nyɛ́ɛ baa, á bìn da.

²⁰ Ń nə́ n kiɛ̃ ǹ zii bɔ kɔ̀ mu bii, ń bɔ mu zuzulun bii, min kɔn dɔ boo la, á n gòɛ̃ yɛ wa.

²¹ Ń Muizu laanka Aarɔn bɔ ka tɔɔn-lɛduə̃lin bɛ́ lɔn, ǹ nə́ n zaman lɛ nyɛɛnaan bɔ.