Loen 76 - LAWA A BOO SONBORE

Lawa ná a zɔ́ɔn ziabaa ǹ mànan ziziɛ̃

¹ LOE-saalin goledɛnaa loe mɛn lɔ tùtu wuu li. Asaafu a loe goon ne. LOE ne.

² Lawa nə́ n din nyaa Zudaa gána nɛ, ǹ nə́ dɔ̃. A tɔ á gole Izirayeli gána nɛ.

³ A giã ǹ bǎã n ka Salɛmu kiwi ni, a kion bǎã n ka *Siɔn kele kɛ nɛ.

⁴ Walan lɛ nɛ, á ziabaa ǹ mànan ziziɛ̃: kiɛn nɛ, goóron ne ka gɔya san nɛ. *Doa

⁵ Lawa, n tá kakaarɛ, n pàã la haalɛ lɛlɛ-lɛlɛ a kelen kɛn manɛ.

⁶ Zia-baali dadaran kɛn mànan tumaa nə́ n si ǹ la, gɛ̀ nyuù nə́ ǹ saa. Bɛa zia-dɔ̃li sonboren kɛn lɛn nə boo la ǹ nə sii kɔn zɛnaa wa.

⁷ Zakɔba a Lawa, n bɛ́ ń nə́ n lɛn baraa bɔ ǹ li, sùin laanka ǹ dabaalin gù gã.

⁸ Lawa, nsɛ tá kakaarɛ dɛ. Bɛ̀ n foo yoo, die n boe la, a golee n yɔrɔ-a?

⁹ N din nə n toɛ lon, n kiri kuri, nyɛ́ɛ n tán minin kuĩ, ǹ golee ka kiĩni.

¹⁰ Bɛ̀ n yoo kiri kurii li, n nə́ die kanaa lɛ a nɔmaa-wɔlen kirisibiɛ, nyɛ́ɛ n tán minin kuĩ, ǹ golee ka kiĩni. Doa

¹¹ Haalɛ minbuiinin foo-yoo baraa ke, bɛ n boe la, a n tɔ bɔ. Sɛnɛ, min mɛnɛn bɛ́ n sii bɛa foo-yoo kɛ la, n din nə bɛn mɔrɛ n ganaa.

¹² Ka toa ka n lɛ kɔ kaa Dɛnaa Lawa la ka mànan nɛ, ka da bɛa mànan lɛn dɔn kɔ la. Ka mɛnɛn tumaa bɛ́ kun Lawa nɛ, ka da ka a gɔ ǹ mànan nɛ ká bɔ, ka ǹ kɔ nyɛ́ɛ da ǹ Lawa kɛ la.

¹³ A n kii din gole-kɔlen piɛ̃ soe, a n nyɛ́ɛ diɛ kanaa a kiin ganaa.