Loen 75 - LAWA A BOO SONBORE

Lawa n kiri kuri

¹ LOE-saalin goledɛnaa loe mɛn lɔ. A nə n loe kɛnɛn N baran ziziɛ̃ wa. Asaafu a loe goon ne. LOE ne.

² Wɔ n barka diɛ n nɛ, Lawa, wɔ n barka diɛ n nɛ, a giala n wɔlɔ á kunu wɔ ganaa. Wɔ nə n kaãbaa da ǹ siin kɛn laakalɛɛ.

³ Lawa lɛ n pii kɛnɛn: Ma bɛ́ re biikoo mɛn koɛ, bɛ̀ bɛ́ dɔ, ma á re kiri kuri ka peperebaa nɛ.

⁴ Tán tá boe la a yalaa, ka a minbuiinin tumaa nɛ, sɛnɛ, ma din nə kuĩ, ma á golee ne, a giala la. *Doa

⁵ Man pii ga tɔ li wolen manɛ máa ǹ nə n ga tɔ li lɛ doa. Man pii min baraan dɔn manɛ máa ǹ din gole kɔ ke, ǹ toa miɛ̃.

⁶ Hiĩ, máa ǹ nə ǹ din gole kɔ kɛ toa miɛ̃, máa ǹ nə n din koa ǹ boon kɛn lɛ doa.

⁷ Ka dɔ̃ mà golebaa bie boe lɛ̀giala-n wa, a bie boe lɛ̀nyɛɛn wa, a bie boe don gɔ́ɔ̃ dɔ din ni wa,

⁸ Lawa n kiri kuri. A din nə min goon gisĩ, a min goon saa lon.

⁹ Dɛnaa Lawa n paan goon guĩ a gɔn, a n yɔ kaka kakaarɛ kɔn kiɛ a nɛ, bɛ n ka a din a foo-yoo kɛ nɛ. A n bɛ kiɛ kanaa a min baraan tumaa lon, ǹ doamaa nɛ ǹ mi dɔn, yǎa a doe a bù ganaa.

¹⁰ Masɛ wɔ paǹ li kəni, man die Zakɔba a Lawa kɛ laakalɛɛ biikoo tumaa li, bɛ̀ má n loe loe, a tɔ boe ne.

¹¹ Lawa mà kɛnɛn: Masɛ n die min baraan kɛn tumaa pàã nyɛɛ. Sɛnɛ, min peperen kɛn sɛn pàã á re gole koe.