Loen 73 - LAWA A BOO SONBORE

Sɛ́wɔ sɔɔbaa ǹ wɔ ( LOE 73—89 ) Bɛ̀ wɔ á taasɛ wáa min baraan sii n bǐɛ̃ koe

1 Asaafu a loe.

¹ Asaafu a loe. Sonbore, Lawa lɛ á Lawa bǐɛ̃ lɛa Izirayeli nɛnyaanan wɔ paǹ li, ka min mɛnɛn dɔn bɛ́ ǹ gɔ́ɔ̃ n fu.

² Sɛnɛ, masɛ n má sã má nya, a na á goã boɛɛn nɛ, bɛ̀ man die papaɛ̃.

³ A giala, ma foo na á goã wuu pii din gole-kɔlen kɛn li, ma yii na a ganaa, min baraan sii n bǐɛ̃ koe.

⁴ Fuu kɔn ba ǹ yii kanaa wa. Maǹ kiɛ̃ nɛ, ǹ nə́ kasiɛ̃-n biikoo tumaa li.

⁵ Ǹ ba nɔmɛɛ ka min gialakunun bɛ́ lɔn wa, sii ba ǹ yii ka min kɔsɔn bɛ́ lɔn wa.

⁶ Bɛ lɛ n ke, din gole kɔ na ǹ ganaa ka nyaǹ màn nɛ, kakaarɛbaa nə́ ǹ si ka maǹ nə́ kiɛ̃ ǹ li.

⁷ A laanɛ ǹ tá kasiɛ̃ nɛ, bɛ̀ ǹ yii bɔ màn li, ǹ gɔ́ɔ̃ n piɛ̃-n ka taasiɛ baraa nɛ.

⁸ Maǹ yaa we, bɛ̀ ǹ nə́ bɔ̀n baraa da minin ganaa boo diɛ. Maǹ nə́ n dinin gole koe, ǹ nə́ din gole kɔ ǹ boo diɛ.

⁹ Maǹ boo diɛ Lon a Lawa ganaa, manə n lɛ we boo tumaa-n tán la.

¹⁰ Bɛ lɛ n ke, Lawa a zaman dɔ din nə́ n bɔyaa á woo ǹ li, a tá ǹ boo sii n gɔ́ɔ̃ piɛ̃ nɛ ka mu bɛ́ lɔn.

¹¹ Maǹ pii: Lawa n siɛ lɔn a tɔn kɛ dɔ̃? Lon a Lawa n wàa doɛ̃?

¹² Ka ga min baraan lɛn ganaa, ǹsɛn man là nyantoro la biikoo tumaa li, màn nə́ miɛ̃ ǹ gɔn màn li miɛ̃.

¹³ A bɛ́ miɛ̃, masɛ n má n gɔ́ɔ̃ fu kɔ kooro, man má n gɔnɔn pii, má ǹ bɔ sii baraa-n kooro.

¹⁴ Lawa n nɔmaa diɛ ma mìi-n baraabaraa, a n ma doree lɛawaa yii li.

¹⁵ Bɛ̀ man má pɛ máa man baa ka ǹ bɛ́ lɔn, bɛ̀ man die ma din boe n wɔbaa nɛ.

¹⁶ Má taasiɛ wɔ a ganaa máa ma a giala ma, sɛnɛ, á kaka kɔ ma ganaa á la yii ni.

¹⁷ Yǎa ǹ mɛn pinaa, ma bɛ́ we Lawa a Kion sonbore kɛ nɛ, sii mɛn bɛ́ n yii diɛ ǹ la, má tɔn bɛ giala ma.

¹⁸ Yǎa, ma nə ǹ kiɛ wɔrɔnzɔrɔn bǎã nɛ, n nə die ǹ nyɛnɛɛ ǹ duwii tán ǹ bɔ̀n baa.

¹⁹ Boɛɛnɛ, basaã gole á die ǹ yii. Á ke ǹ nə́ nya, ǹ nə́ papaã nyɛ́ɛ gɔn.

²⁰ Dɛnaa, bɛ̀ n yoo ǹ li, maǹ die papaɛ̃ ǹ nə n bɔ n yɔrɔ-a, ka min a narɛ ǹ siin bɛ́ papaɛ̃ ǹ nə n bɔ a yɔrɔ-a lɔn, bɛ̀ á yoo nyuù ni.

²¹ Sii kɔɔsɛ lɛ bɛ́ á ma gɔ́ɔ̃ pã, taasiɛ ma nɔmaa ka ma yiri daa a yoo,

²² ma din baãnaan, ma a sii kɔn giala miɛ wa, man má goã ka tɔɔ bɛ́ lɔn n yɔrɔ-a.

²³ Sɛnɛ, man kun ka n din ni biikoo tumaa li. N din nə ma kuĩ ma gusin a gɔn ganaa.

²⁴ N din nə ma nyɛɛnaan boe, á kɔnpii ka n sii yɔrɔ bɔ nɛ. Bɛ kio, n din nə die ma siɛ ka gugurubaa nɛ.

²⁵ Maa min kɔsɔ banban lon wa, yǎa n din. Màn kɔsɔ a ma foo kɔɔ̃n koe tán la wa, yǎa n din.

²⁶ Ma pàã nya, ma foo dɔ́ ziziɛ̃. Sɛnɛ, n din Lawa n maa dɔmalɛ wole lɛa, n din nə maa wɔ lɛa yǎa duduu.

²⁷ A din lɛ n ke: Min mɛn bɛ́ n wɔlɔ lui Dɛnaa ganaa, bɛ n bɔ̀n biɛ. Min mɛn bɛ́ n tii, n nə n bɛa dɛnaa ziziɛ̃.

²⁸ Lawa, masɛ goã kun ka n din ni, maa là n ka bɛ nɛ. Man má kaa n din yele, Dɛnaa Lawa. Man zoɛ̃ li máa ma n nya ǹ dín laakalaa.